ནག་ཆུ་གྲོང་ཁྱེར་གྱིས་ལས་ཞུགས་ལ་སྐུལ་འདེད་བཏང་ནས་ཞིང་འབྲོག་པ་འབབ་འཕར་ཕྱུག་འགྱུར་ཡོང་བར་རོགས་རམ་བྱས་པ།
2024ལོར་ཞིང་འབྲོག་པ་ཁྲི་6.5ལས་ཞུགས་གཞན་སྒྱུར་བྱུང་བ་དང་འབབ་འཕར་སྒོར་དུང་ཕྱུར་7.2བྱུང་བ།
ནག་ཆུ་གྲོང་ཁྱེར་གྱིས་སྔ་ཕྱི་བར་གསུམ་དུ་ཞིང་འབྲོག་མང་ཚོགས་ཀྱི་འབབ་འཕར་ལས་དོན་དེ་གནས་བབ་གལ་ཆེན་ཐོག་བཞག་སྟེ། མི་དམངས་མང་ཚོགས་ལ་སྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་སྤྱོད་རྒྱུ་ཡོང་བར་བྱས་ཡོད། 2024ལོར་གྲོང་ཁྱེར་ཡོངས་ཀྱིས་ལས་ཞུགས་སྔོན་སྐྱོང་འཐབ་ཇུས་བློ་བརྟན་འགྱུར་མེད་ངང་ལག་ལེན་བསྟར་བ་དང་། ལས་ཞུགས་སྔོན་སྐྱོང་སྲིད་ཇུས་ལ་ཤུགས་སྣོན་བརྒྱབ་པ། ལས་ཞུགས་སྐུལ་སྤེལ་ལམ་སྲོལ་འཐུས་སྒོ་ཚང་དུ་བཏང་བས་ཞིང་འབྲོག་པ་ཁྲི་6.5ལས་ཞུགས་གཞན་སྒྱུར་བྱུང་བ་དང་འབབ་འཕར་སྒོར་དུང་ཕྱུར་7.2བྱུང་ཡོད།
ངོ་སྤྲོད་བྱས་པར་གཞིགས་ན། 2025ལོར་ནག་ཆུ་གྲོང་ཁྱེར་གྱིས་དམངས་འཚོའི་ལས་དོན་ལ་མུ་མཐུད་ཤུགས་སྣོན་རྒྱག་པ་དང་ཞིང་འབྲོག་པའི་འབབ་འཕར་ཐབས་ལམ་རྒྱ་སྐྱེད་བཏང་སྟེ། ཞིང་འབྲོག་པའི་འབབ་འཕར་ལས་དོན་ལ་ཚད་བརྒལ་དེ་བས་ཆེ་བ་ཡོང་བའི་འགན་ལེན་དང་། ལོ་འགོར་ལས་ཞུགས་དམིགས་ཚད་དག་རྫོང་དང་ཆུས་ཁག་ཏུ་ཁག་བགོས་བྱེད་པ་དང་ཁེ་ལས་ཀྱི་གྲབས་གསོག་ལས་གནས་དང་འབྲེལ་མཐུད་དམ་ཟབ་བྱས་ཏེ། གདན་ཞུའི་བྱེད་སྒོ་སྣ་ཚོགས་སྤེལ་ནས་ལས་ཞུགས་གང་མགྱོགས་ཐུབ་པར་འགན་ལེན། དེ་དང་ཆབས་ཅིག་གསོ་སྦྱོང་བྱེད་སྟངས་སྟབས་བསྟུན་བེད་སྤྱོད་བྱས་ནས་ལས་རིགས་མང་པོའི་རྩལ་ནུས་ཁྱབ་པ་དང་ཞིང་འབྲོག་པའི་བྱང་ཚད་མཐོ་རུ་གཏོང་བ། གྲོང་ཁྱེར་ཡོངས་ཀྱི་ངལ་ལས་མངགས་གཏོང་སྒྲིག་གཞི་14དང་། མི་ཤུགས་ཐོན་ཁུངས་ཞབས་ཞུའི་སྒྲིག་གཞི། དེ་བཞིན་གཞི་རིམ་ལས་སྟེགས་ཀྱི་ཆེད་བསྐོས་པའི་འགན་ནུས་འདོན་སྤེལ་ཡག་པོ་བྱས་ཏེ། ངལ་ལས་མངགས་གཏོང་སྒྲིག་གཞིར་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ། མཁོ་སྤྲོད་ལས་སྟེགས་འཛུགས་པ་དང་། དྲ་ཐོག་ནས་ལས་གནས་ཀྱི་ཆ་འཕྲིན་ཁྱབ་བསྒྲགས། ལས་བསྡུའི་འདུ་ཚོགས་ཡང་ཡང་ཚོགས་པ་བཅས་བྱས་ནས་རོགས་སྐྱོར་རྒྱུན་མཐུད་ཡོང་བར་འགན་ལེན། སྲིད་གཞུང་གིས་བཏང་བའི་མ་དངུལ་སྒོར་ཁྲི་400མན་གྱི་རྣམ་གྲངས་ཆ་རྐྱེན་འཛོམས་པའི་ས་གནས་དེ་གའི་ཞིང་འབྲོག་པའི་ཨར་ལས་རུ་ཁག་ལ་རྩིས་སྤྲོད་པ་དང་ས་གནས་དེ་གའི་ཞིང་འབྲོག་པའི་ལས་ཞུགས་མི་གྲངས་ཀྱིས་ལས་མིའི་བསྡོམས་འབོར་ནང་80%བཟུང་བའི་འཕྲལ་སྒྲུབ་དམིགས་ཚད་ཁ་གསལ་བཟོ་བ། རྩལ་ནུས་ཤེས་ལྡན་པ་སྔོག་འདོན་བྱས་ནས་ཞིང་འབྲོག་པར་རྩལ་ནུས་ལས་གཏོད་ལ་ཞུགས་པར་སྐུལ་མ་གཏོང་བ། རོགས་སྐྱོར་སྲིད་ཇུས་ནུས་ཤུགས་ཡོད་རྒུས་དོན་འཁྱོལ་བྱས་ཏེ། མ་དངུལ་གཏོང་སྤྲོད་ཀྱི་གོ་རིམ་སྟབས་བདེ་རུ་དང་ཕྱིར་ལས་ཀར་བསྐྱོད་པར་རྗེས་སྙེག་ཞབས་འདེགས་ཞུ་ཤུགས་ཆེ་རུ་གཏོང་བ་བཅས་རེད།