ཉེ་བའི་ལོ་ཤས་རིང་རྒྱལ་ཁབ་མང་པོའི་ཚན་རིག་ཞིབ་འཇུག་པ་ཀྲུང་གོར་ལས་དོན་སྤེལ་རེས་བྱེད་པར་ཡོང་བ་དང་། ཀྲུང་གོའི་ལས་རིགས་གཅིག་པ་དང་མཉམ་དུ་བསམ་བློ་སྤེལ་རེས་བྱེད་རིང་ཡར་རྒྱས་གསར་པ་བྱུང་བ་དང་ཚན་ཞིབ་མཉམ་ལས་བྱེད་རིང་གྲུབ་འབྲས་གསར་པ་ཐོབ་ཡོད། ཀྲུང་གོས་ཚན་རྩལ་གསར་གཏོད་ཀྱི་མཉམ་ལས་མ་ལག་འཐུས་སྒོ་ཚང་དུ་བཏང་ནས་སྒོ་དབྱེའི་རྣམ་འགྱུར་ཐོག་ནས་ཚན་རྩལ་སྤེལ་རེས་ལ་སྐུལ་འདེད་གཏོང་བ་དང་མཉམ་ལས་རྒྱལ་ཁབ་དང་མཉམ་དུ་ཚན་ཞིབ་ནུས་པ་ཆེ་རུ་བཏང་སྟེ། འཛམ་གླིང་མི་དམངས་ཀྱི་བདེ་རྩ་ཆེ་རུ་གཏོང་བར་སྟོབས་ཤུགས་སྐྱེས་སུ་ཕུལ་ཡོད།

ཧྲན་ཏུང་ཚན་རྩལ་སློབ་ཆེན་གཏེར་རིའི་གནོད་འཚེ་སྔོན་འགོག་ཚོད་འཛིན་གྱི་གཙོ་གནད་ཚོད་ལྟ་ཁང་གི་དགེ་རྒན་ཆེ་མོ་བ་ནཱ་སའེ་ཨེར ——

“ཚན་རྩལ་གསར་གཏོད་རྒྱུན་ཆད་མེད་པར་མདུན་ཕྱོགས་སུ་སྐུལ་འདེད་གཏོང་དགོས”

ནཱ་སའེ་ཨེར་ནི་ཧྲན་ཏུང་ཚན་རྩལ་སློབ་ཆེན་གཏེར་རིའི་གནོད་འཚེ་སྔོན་འགོག་དང་ཚོད་འཛིན་གྱི་གཙོ་གནད་ཚོད་ལྟ་ཁང་དང་ནུས་རྒྱུ་དང་གཏེར་ལས་བཟོ་སྐྲུན་སློབ་གླིང་གི་དགེ་རྒན་ཆེ་མོ་བ་ཡིན། 2014ལོར་ཁོང་དབྱི་རན་ནས་ཧྲན་ཏུང་ཆིང་ཏའོ་གྲོང་ཁྱེར་དུ་ཡོང་སྟེ་ཀྲུང་གོ་རྡོ་སྣུམ་སློབ་ཆེན་དུ་འབུམ་རམས་པའི་སློབ་གནས་བླངས། “དབྱི་རན་བའི་མིག་ནང་ཀྲུང་གོ་ནི་ལོ་རྒྱུས་ཡུན་རིང་ལྡན་པ་དང་ཕུན་སུམ་ཚོགས་པའི་རིག་གནས་ཀྱིས་ཕྱུག་པའི་རྒྱལ་ཁབ་ཅིག་ཡིན་པའི་ངོས་འཛིན་བྱེད་ཀྱི་ཡོད། སློབ་ཆེན་ཐོན་རྗེས་མི་སྒེར་གྱི་འབྱུང་འགྱུར་གྱི་འཆར་གཞི་དང་། རིག་གཞུང་ཞིབ་འཇུག་འཕེལ་རྒྱས། འཚོ་བ་སྐྱེལ་སྟངས་བཅས་ལ་ཕྱོགས་བསྡུས་བསམ་གཞིག་བྱས་རྗེས་ང་རང་མུ་མཐུད་ཀྲུང་གོར་སློབ་གཉེར་བྱ་རྒྱུའི་གདམ་ག་བྱས་པ་ཡིན”ཞེས་རང་ཉིད་ཀྱི་སློབ་གཉེར་སྐོར་གླེང་སྐབས་ཁོང་གིས་བྱང་ཆུབ་པའི་རྒྱ་སྐད་ཐོག་ནས་གསར་འགོད་པར་དེ་ལྟར་བཤད། འབུམ་རམས་པ་ཐོན་རྗེས་ནཱ་སའེ་ཨེར་ཀྲུང་གོ་ཚན་རྩལ་པུའུ་ཡིས་བཙུགས་པའི“འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཕུལ་བྱུང་གཞོན་ནུ་ཚན་རྩལ་པ་ཀྲུང་གོར་སྐྱོད་པའི་ལས་ཀའི་འཆར་གཞིའི”（གཤམ་དུ“རྒྱལ་སྤྱིའི་ཕུལ་བྱུང་གཞོན་ནུའི་འཆར་གཞི”ཞེས་བསྡུ་རྒྱུ）ནང་ཚུད་པ་དང་། 2019ལོར་ཧྲན་ཏུང་ཚན་རྩལ་སློབ་ཆེན་གཏེར་རིའི་གནོད་འཚེ་སྔོན་འགོག་དང་ཚོད་འཛིན་གྱི་གཙོ་གནད་ཚོད་ལྟ་ཁང་དུ་དངོས་སུ་གདན་ཞུ་བྱས། ལོ་དེ་དག་རིང་ས་གཤིས་ཐོན་ཁུངས་དང་ས་གཤིས་བཟོ་སྐྲུན་ཁྱབ་ཁོངས་ཀྱི་རིགས་གཅིག་མཁས་ཅན་ཡིན་པའི་ཁོང་གིས་ཆུ་ཚད་མཐོ་བའི་SCIདུས་དེབ་ཐོག་དཔྱད་རྩོམ་ཁག་60ལྷག་ཙམ་སྤེལ་བ་མ་ཟད། རྒྱལ་སྤྱི་དང་། རྒྱལ་ཁབ་རིམ་པ། ཞིང་ཆེན་རིམ་པ་བཅས་ཀྱི་ཚན་ཞིབ་རྣམ་གྲངས་ཁག་7གཙོ་སྐྱོང་དང་དེའི་ནང་ཞུགས་པ་རེད།

སློབ་ཁྲིད་དང་ཚན་ཞིབ་ལས་དོན་ཕུད། ནཱ་སའེ་ཨེར་རྒྱལ་སྤྱིའི་སྤེལ་རེས་དང་། ཤེས་ལྡན་པ་ནང་འདྲེན། མཉམ་འབྲེལ་གསོ་སྐྱོང་སོགས་ཀྱི་ལས་ཀའི་ནང་ཧུར་ཐག་ཞུགས་ཤིང་། མིག་སྔར་ནཱ་སའེ་ཨེར་ཞིབ་འཇུག་ཚོགས་པར་ཀྲུང་གོ་དང་། དབྱི་རན། ཕ་ཁི་སི་ཐན། ཨུ་རུ་སུ། ཕོ་ལན། འཇར་མན་སོགས་རྒྱལ་ཁབ་6གི་རིགས་གཅིག་མཁས་ཅན་གྱིས་སྣུམ་རླངས་ཐོན་ཁུངས་ཀྱི་ལྗང་མདོག་སྔོག་འདོན་དང་ནུས་ཆེ་བེད་སྤྱོད་ལ་དམིགས་ནས་ཚན་ཞིབ་འགག་སྒྲོལ་ལས་དོན་སྤེལ་བཞིན་ཡོད། “ཀྲུང་གོས‘རྒྱལ་སྤྱིའི་ཕུལ་བྱུང་གཞོན་ནུའི་འཆར་གཞི’སོགས་སྣ་མང་གི་རྒྱལ་སྤྱིའི་ཚན་རྩལ་སྤེལ་རེས་ལ་སྐུལ་འདེད་བཏང་སྟེ་འཛམ་གླིང་ས་གནས་ཁག་གི་ཕུལ་བྱུང་ཚན་ཞིབ་ཤེས་ལྡན་པ་གཅིག་འདུས་བྱས་པས་ཚན་རྩལ་གསར་གཏོད་རྒྱུན་ཆད་མེད་པར་མདུན་ཕྱོགས་སུ་སྐུལ་འདེད་གཏོང་བར་རམ་འདེགས་ཐུབ་ཡོད”

ཀྲེ་ཅང་སློབ་ཆེན་འབུ་སྲིན་ཚན་རིག་ཞིབ་འཇུག་ཁང་གི་མཆོག་རམས་པ་ཨཱ་མུའུ་ཨེར ——

“ཨེ་ཀྲུང་གི་ཚན་རྩལ་སྤེལ་རེས་དང་མཉམ་ལས་ཀྱི་ ཕོ་ཉ་ཞིག་ཏུ་འགྱུར་རེ་བྱེད་པ”

2019ལོའི་ཟླ་11པར། ཨེ་ཅིབ་ཀྱི་ཡ་ལི་ཧྲན་ཏ་སློབ་ཆེན་གྱི་ཞིང་ལས་ཚན་རིག་གླིང་དུ་ལས་ཀ་བྱེད་བཞིན་པའི་ཨཱ་མུའུ་ཨེར“རྒྱལ་སྤྱིའི་ཕུལ་བྱུང་གཞོན་ནུའི་འཆར་གཞིའི”ནང་ཞུགས་པ་དང་ཀྲུང་གོར་ལས་དོན་སྤེལ་རེས་བྱེད་པར་ཡོང་བ་རེད། ལོ་གཅིག་གི་དུས་ཚོད་ཟིན་རྗེས་ཁོང་གིས་ཀྲེ་ཅང་སློབ་ཆེན་ཞིང་ལས་དང་སྐྱེ་དངོས་ལག་རྩལ་སློབ་གླིང་གི་མཆོག་རམས་པ་རེ་ཞུ་བྱས་པ་རེད།

“ཀྲུང་གོའི་མཐོ་སློབ་ནང་ལས་ཀ་དང་སྤེལ་རེས་བྱས་པ་ལས་ངའི་བསམ་རྒྱ་ཆེ་རུ་ཕྱིན་སོང་ལ། ཞིང་ལས་ཁྱབ་ཁོངས་ཀྱི་སྔོན་ཐོན་ལག་རྩལ་མང་པོ་དང་དེ་བཞིན་ལག་རྩལ་གསར་པར་བརྟེན་ནས་གནོད་འབུ་འགོག་བཅོས་བྱེད་སྟངས་ཀྱང་ཤེས་བྱུང་། ཉེ་བའི་ལོ་ཤས་རིང་ཀྲུང་གོའི་ཚན་རིག་ལག་རྩལ་འཕེལ་རྒྱས་མྱུར་པོ་བྱུང་བ་མ་ཟད། ཞིང་ལས་ཐོན་སྐྱེད་ནང་རྒྱ་ཁྱབ་སྤྱད་ཡོད། ཞིང་ལས་སྐྱེ་དངོས་ཀྱི་ནད་དང་གནོད་འབུའི་གནོད་འཚེ་འགོག་བཅོས་ཀྱི་འབྲེལ་ཡོད་ལག་རྩལ་དང་ཉམས་མྱོང་ལས་ཞིང་ལས་ཐོན་སྐྱེད་དེ་བས་བདེ་འཇགས་དང་དེ་བས་རྒྱུན་མཐུད་ཆོག་པར་གྱུར་ཡོད། ངས་དེ་བས་བདེ་འཇགས་ལྡན་པ་དང་ཁོར་ཡུག་ལ་གནོད་འཚེ་ཆུང་བའི་བྱ་ཐབས་གསར་པ་འཚོལ་ཞིབ་བྱས་ནས་ཞིང་ལས་སྐྱེ་དངོས་ལ་གནོད་འབུ་མི་ཐོན་པ་བྱེད་ཀྱི་ཡོད། ཞིབ་འཇུག་དེ་དག་གིས་ཨེ་ཅིབ་དང་། ཀྲུང་གོ འཕེལ་རྒྱས་འགྲོ་བཞིན་པའི་རྒྱལ་ཁབ་གཞན་དག་གི་ཞིང་ལས་འཕེལ་རྒྱས་དང་འབྲུ་རིགས་བདེ་འཇགས་ལ་ཕན་ཐོགས་ཡོང་སྲིད”ཅེས་ཨཱ་མུའུ་ཨར་གྱིས་བཤད།

“རྒྱལ་ཁབ་སྒྲོལ་བ་དང་། ཤེས་བྱ་མཉམ་སྤྱོད། བསམ་ཚུལ་བརྗེ་རེས་བཅས་ལས་ཚན་རིག་ཞིབ་འཇུག་ལ་དོན་སྙིང་གལ་ཆེན་ལྡན་ཡོད། ཀྲུང་གོས‘རྒྱལ་སྤྱིའི་ཕུལ་བྱུང་གཞོན་ནུའི་འཆར་གཞི’བརྒྱུད་རྒྱལ་ཁབ་མི་འདྲ་བའི་ཚན་རིག་མཁས་ཅན་གྱི་སྤེལ་རེས་ལ་ཤུགས་སྣོན་བརྒྱབ་པས་ང་ལྟ་བུའི་གཞོན་ནུ་ཚན་རིག་ཞིབ་འཇུག་པར་ཕན་ཐོགས་ཆེན་པོ་འདུག”ཅེས་ཨཱ་མུའུ་ཨེར་གྱིས་བཤད།

ཨཱ་མུའུ་ཨེར་གྱིས་གསར་འགོད་པར། ཀྲུང་གོར་དུས་ཡུན་རིང་པོ་ལས་ཀ་བྱེད་པའི་གོ་སྐབས་རག་པའི་རེ་བ་ཡོད་ལ། རང་ཉིད་ཀྱི་ཞིབ་འཇུག་གྲུབ་འབྲས་ཀྱིས་ཕ་ཡུལ་གྱི་ཞིང་ལས་འཕེལ་རྒྱས་ལ་སྐུལ་མ་ཐེབས་རྒྱུའི་རེ་བའང་ཡོད། ཨེ་ཅིབ་ཏུ་ལོག་པའམ་ཡང་ན་ཀྲུང་གོར་བསྡད་རུང་རང་ཉིད་ཨེ་ཅིབ་དང་ཀྲུང་གོའི་ཚན་རྩལ་སྤེལ་རེས་དང་མཉམ་ལས་ཀྱི་ཕོ་ཉ་ཞིག་ཏུ་འགྱུར་རྒྱུའི་རེ་བ་ཡོད། ངའི་ཞིབ་འཇུག་གྲུབ་འབྲས་ཀྱིས་སྤྱི་ཚོགས་ལ་ཕན་ཐོགས་དེ་བས་མང་བ་སྐྲུན་ཐུབ་པའི་རེ་བ་ཡོད་ཅེས་བཤད།