ཉེ་བའི་ལོ་ཤས་རིང་། ཉིང་ཁྲི་གྲོང་ཁྱེར་སྨན་གླིང་གྲོང་ཁྱེར་གྱིས་ལྗང་མདོག་ཁྱད་ལྡན་ཐོན་ལས་འཕེལ་རྒྱས་གཏོང་སྟངས་རྒྱུན་ཆད་མེད་པར་གསར་གཏོད་བྱས་ནས་ཨ་བི་ཁ་ཐོན་མཐོ་ཅན་དང་གཞི་ཁྱོན་ཅན་གྱི་འདེབས་འཛུགས་ལ་སྐུལ་འདེད་བཏང་སྟེ། ཐད་གཏོང་ཟོག་ཚོང་སོགས་ཀྱི་ཐབས་ལམ་བརྒྱུད་མང་ཚོགས་ཀྱི་ལས་ཞུགས་དང་འབབ་འཕར་གྱི་ཐབས་ལམ་རྒྱ་ཆེར་བཏང་ཡོད། འདི་ནི་སྨན་གླིང་གྲོང་ཁྱེར་བམ་གྲོང་ཨ་བི་ཁ་འདེབས་འཛུགས་རྟེན་གཞིའི་ལས་མིས་ཨ་བི་ཁ་སྐྱེ་འཚར་ལ་ལྟ་བཞིན་པ།

2024ལོ་ཚུན་དུ། རང་ལྗོངས་ཀྱི་རིམ་པ་ཁག་དང་སྡེ་ཚན་ཁག་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པར་བརྟེན་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྤྱི་ཡོངས་ལ་གཅིག་འདོམས་བྱ་རྒྱུ་མཐའ་འཁྱོངས་ཀྱིས་དམིགས་ཚད་ལས་འགན་ལ་དམ་པོར་དམིགས་པ་དང་། ལས་ཀའི་འགན་འཁྲི་ནན་དུ་གཏོང་བ། ལས་ཀ་བྱེད་སྟངས་འཐུས་སྒོ་ཚང་དུ་གཏོང་བ་བཅས་བྱས་ནས། དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་གཏིང་ཤུགས་རྒྱུན་ཆད་མེད་པར་མངོན་པར་བྱས་པས་ལྗོངས་ཡོངས་བསམ་ཇུས་གཅིག་གིས་དོན་འཁྱོལ་ལ་དམ་འཛིན་དང་འཕེལ་རྒྱས་ལ་སྐུལ་འདེད་གཏོང་བའི་རྣམ་པ་བཟང་པོ་ཞིག་ཆགས་ཡོད།

གཙོ་གནད་རྣམ་གྲངས་འཛུགས་སྐྲུན་གྱིས་སྤུས་ཚད་མཐོ་བའི་འཕེལ་རྒྱས་ཀྱི་ནུས་པ་ཆེ་རུ་ཕྱིན་པ།

2024ལོ་ཚུན་དུ། རང་ལྗོངས་ཀྱི་གྲོང་ཁྱེར་དང་ས་གནས་ཁག་དང་སྡེ་ཚན་ཁག་གིས“རྣམ་གྲངས་ལ་དམ་འཛིན་བྱེད་པ་ནི་འཕེལ་རྒྱས་ལ་དམ་འཛིན་བྱེད་པ་དང་འཕེལ་རྒྱས་ལ་དམ་འཛིན་བྱེད་པར་ངེས་པར་དུ་རྣམ་གྲངས་ལ་དམ་འཛིན་བྱེད་དགོས་པའི”འདུ་ཤེས་བརྟན་པོར་བཙུགས་ནས་གཙོ་གནད་རྣམ་གྲངས་འཛུགས་སྐྲུན་ལ་ནུས་ཤུགས་ཡོད་རྒུས་སྐུལ་འདེད་གཏོང་བ་དང་། འགན་འཁྲི་ཁ་གསལ་བཟོ་བ། བྱེད་ཐབས་ཞིབ་ཚགས་སུ་གཏོང་བ། འགོ་བཙུགས་མ་ཐག་རྒྱལ་ཁ་ཕུ་ཐག་ཆོད་པ་དང་འགོ་བཙུགས་མ་ཐག་མཐའ་མའི་གདོང་མཆོང་བྱས་ནས་གྲུབ་འབྲས་མངོན་གསལ་དོད་པོ་ཐོབ་པར་བྱས་ཏེ་ལོ་འཁོར་གྱི་མ་འཇོག་ལས་འགན་བདེ་བླག་ངང་ལེགས་སྒྲུབ་ཡོང་བར་རྨང་གཞི་བརྟན་པོ་ཞིག་བཏིང་ཡོད།

རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགོ་ཁྲིད་གཙོ་བོ་སྐུ་ངོ་མས་གཙོ་གནད་རྣམ་གྲངས་ཁག་21འཛུགས་སྐྲུན་གྱི་འགན་འཁྲི་གཙང་ལེན་གྱིས“འགོ་ཁྲིད་ཀྱིས་འགན་གཙང་འགན་ལེན་དང་། ཆེད་དོན་ཚན་ཁག་གིས་ཞབས་འདེགས་ཞུ་བ། དུས་བཀག་བཀོད་སྒྲིག་བྱེད་པ། ནུས་ཤུགས་ཡོད་རྒུས་སྐུལ་འདེད་གཏོང་བ”བཅས་ཀྱི་ལས་ཀའི་རྩ་དོན་དང“རྣམ་གྲངས་གཅིག་དང་། འགོ་ཁྲིད་གཅིག ཇུས་གཞི་ཆ་ཚང་གཅིག དམ་འཛིན་མཐར་ཕྱིན་པ་བྱེད་པ”བཅས་ཀྱི་ལས་ཀ་བྱེད་སྟངས་གཞིར་བཟུང་། ནུས་ཤུགས་ཡོད་རྒུས་འགན་གཙང་འགན་ལེན་རྣམ་གྲངས་འཛུགས་སྐྲུན་གྱི་མྱུར་ཚད་མགྱོགས་སུ་བཏང་ཡོད།

ཉིན་ཤས་གོང་བྱང་རྩྭ་ཐང་དུ་བོད་ཀྱི“གློག་གསོག་འབོ”ཆེ་ཤོས་དང་གོ་ལ་ཧྲིལ་པོའི་ས་བབ་མཐོ་ཤོས་དང་གློག་འདོན་ཤུགས་ཆེ་ཤོས་ཀྱི་རང་ཚུགས་དྲ་གྲུབ་རྣམ་པའི་ནུས་གསོག་རྣམ་གྲངས་སྟེ། བོད་ཀྱིས་གསེར་རྙེད་ཆུས་རྟ་སྒ་ཕུ་རང་ཚུགས་དྲ་གྲུབ་རྣམ་པའི་ནུས་གསོག་གློག་ཁང་བཙུགས་པ་དང་སྦྲགས་དྲ་སྦྲེལ་བྱས་ནས་གློག་ཀྱང་བཏང་བ་རེད། ནུས་གསོག་རྣམ་གྲངས་བདེ་བླག་ངང་འཁོར་སྐྱོད་བྱས་པ་དེས་ནག་ཆུ་གྲོང་ཁྱེར་ཡོངས་ཀྱི་གློག་ཤུགས་མཁོ་སྤྲོད་སྔར་བས་བརྟན་པོ་ཡོང་བའི་འགན་ལེན་ཐུབ་ཡོད།

ཐབས་མང་མཉམ་སྤྱོད་ཀྱིས་འཛད་སྤྱོད་ཀྱི་གདེང་ཚོད་འཕེལ་བར་བྱས་པ།

2024ལོ་ཚུན། རང་ལྗོངས་ཀྱིས་རིམ་པ་གསུམ་གྱི་ནོར་སྲིད་ནས་འཛད་སྤྱོད་སྐུལ་སྤེལ་མ་དངུལ་སྒོར་དུང་ཕྱུར་5.76ལྷག་ཙམ་བཀོད་སྒྲིག་བྱས་ཏེ་རླངས་འཁོར་དང་། ཁྱིམ་སྤྱོད་གློག་ཆས། བཟའ་བཏུང་། བཅོས་སྣུམ། ཚོང་ཁང་དང་སྒོ་རྩིས་ཚོང་ཁང་། ས་མཐོའི་ཞིང་ལས་ཀྱི་ཁྱད་ལྡན་ཐོན་རྫས་སོགས་གཙོ་གནད་འཛད་སྤྱོད་ཁྱབ་ཁོངས་ལ་དམིགས་ནས“བདེ་སྐྱིད་བོད་ལྗོངས། འཚོ་བ་ལོངས་སྤྱོད”ཅེས་པ་བརྗོད་དོན་གཙོ་བོར་བྱས་པའི་འཛད་སྤྱོད་སྐུལ་སྤེལ་བྱེད་སྒོ་རབ་དང་རིམ་པ་མུ་མཐུད་སྤེལ་བ་རེད། གྲངས་གཞི་ལས་མངོན་པར། མིག་སྔའི་བར་རིམ་རྩིས་བརྒྱབ་ན་མ་དངུལ་སྒོར་དུང་ཕྱུར་4.3བཏང་ནས་འཛད་སྤྱོད་སྒོར་དུང་ཕྱུར་35.52འཕར་རྒྱུར་ཐད་ཀར་སྐུལ་ཁྲིད་བྱས་ཡོད།

སྲིད་གཞུང་གིས་ཁྲིད་སྟོན་དང་། ཁེ་ལས་ཞུགས་པ། དམངས་ཡོངས་མཉམ་སྤྱོད་བཅས་ཀྱི་བྱ་ཐབས་བརྒྱུད་འཛད་སྤྱོད་ཁྲོམ་རའི་གསོན་ཤུགས་འཕེལ་བ་མ་ཟད། ད་དུང་རང་ལྗོངས་ཀྱི་འཛད་སྤྱོད་པའི་ཉོ་སྒྲུབ་ཀྱི་སྤྲོ་སེམས་སྔར་བས་འཕེལ་བར་བྱས་ཡོད། གྲངས་གཞི་ལས་མངོན་པར། 2024ལོའི་དུས་ཚིགས་དང་པོ་ནས་གསུམ་པའི་བར་རང་ལྗོངས་ཀྱི་སྤྱི་ཚོགས་འཛད་རྫས་སིལ་ཚོང་བསྡོམས་འབོར་སྒོར་དུང་ཕྱུར་671.06ཟིན་པ་དེ་དུས་མཚུངས་ལས་6.2%འཕར་ཡོད། ལྗོངས་ཡོངས་ཀྱི་དྲ་ཐོག་སིལ་ཚོང་བསྡོམས་འབོར་དང་དངོས་ཟོག་དྲ་ཐོག་སིལ་ཚོང་བསྡོམས་འབོར་འཕར་ཚད་ཚང་མ་རྒྱལ་ཡོངས་ཀྱི་ཨང་དང་པོར་སླེབས་ནས་འཛད་སྤྱོད་གསར་པའི་གཏིང་ཤུགས་མངོན་ཡོད།

དུས་མཚུངས་རང་ལྗོངས་ཀྱི་ཚོང་དོན་སྡེ་ཚན་གྱིས་སྣེ་ཁྲིད་དེ་ཞབས་ཞུའི་འཛད་སྤྱོད་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུའི་སྐོར་གྱི་བོད་རང་སྐྱོང་ལྗོངས་ཀྱི་བྱ་ཐབས་འགའ་ཞིག་ཞིབ་འཇུག་བྱས་ནས་བཟོས་ཡོད། རླངས་འཁོར་ནུས་རྒྱུ་གསར་པར་བརྗེ་བ་དང་། ཁྱིམ་སྤྱོད་གློག་ཆས་རིག་ནུས་ཅན་ལ་བརྗེ་བ། ཁྱིམ་ཚང་གི་སྒྲིག་ཆས་དང་ཐབ་ཚང་རྣམ་པ་གསར་རྐྱང་དུ་འགྱུར་བ། ཚུར་བསྡུའི་ཞབས་ཞུ་ལེགས་སུ་གཏོང་བ་བཅས་ཕྱོགས་བཞི་ནས་འཛད་སྤྱོད་དངོས་རྫས་རྙིང་པ་གསར་བརྗེས་ལ་སྐུལ་འདེད་བཏང་ཡོད།

མིག་སྔའི་བར། བོད་ཡོངས་ཀྱིས་འཛད་སྤྱོད་ཚོང་ཟོག་རྙིང་པ་གསར་བརྗེས་ཐད་མ་དངུལ་སྒོར་དུང་ཕྱུར་2.24བཏང་བའི་ཁྲོད་སྒོར་དུང་ཕྱུར་1.13སྤྱད་ཟིན་པ་དང་འཛད་རྫས་རྙིང་པ་གསར་བརྗེས་བྱེད་ཚད་ཐེངས་ཁྲི་7.8ལས་བརྒལ་ནས་ཕྱིར་ཚོང་བསྡོམས་འབོར་སྒོར་དུང་ཕྱུར་11.2ཟིན་ཡོད། རྙིང་པ་གསར་བརྗེས་ལས་འཛད་སྤྱོད་ལ་སྐུལ་ཁྲིད་བྱེད་པའི་ཕན་འབྲས་རིམ་བཞིན་མངོན་ཡོད།

འགག་སྒོའི་དཔལ་འབྱོར་འཕར་ཚད་མགྱོགས་སུ་བཏང་བ།

2024ལོའི་ཟླ་4པར། ཉིང་ཁྲི་གྲོང་ཁྱེར་བྲག་ཡིབ་ཆུས་སྦེ་པ་གྲོང་རྡལ་འཛིན་པ་གྲོང་ཚོའི་ཀུ་ཤུ་ཏུན་20ལྷག་ཙམ་བླུགས་པའི་ཟོག་འདྲེན་རླངས་འཁོར་སྐྱིད་གྲོང་འགག་སྒོ་བརྒྱུད་ནེ་པ་ལའི་ཕྱོགས་སུ་བསྐྱོད་པ་དེས་བོད་ཀྱི་ཤིང་ཏོག་ཐོག་མར་ཕྱིར་གཏོང་ཐུབ་པ་མཚོན་ཡོད།

2024ལོའི་ཟླ་1ནས་9པའི་བར། སྐྱིད་གྲོང་འགག་སྒོ་བརྒྱུད་རང་རྒྱལ་ནས་ཐོན་པའི་ནུས་རྒྱུ་གསར་པའི་རླངས་འཁོར་5231ཕྱིར་གཏོང་བྱས་པར་ཉོ་ཚོང་བསྡོམས་འབོར་སྒོར་དུང་ཕྱུར་6.66ཟིན་ནས་ཕྱིར་གཏོང་བྱེད་ཚད་ཉེ་བའི་ལོ་3རིང་གི་མཐོ་ཤོས་སུ་སླེབས་ཏེ་རང་ལྗོངས་ཀྱི་ཕྱི་ཕྱོགས་ཚོང་དོན་གྱི་འཕར་གཞི་གསར་པར་གྱུར་ཡོད།

2024ལོ་ཚུན། རང་ལྗོངས་ཀྱིས་མཐའ་མཚམས་ཚོང་དོན་ཟོག་འགྲེམས་ལས་སྟེགས་དང་དེ་བཞིན་བགྲོད་ལམ་འཛུགས་སྐྲུན་ལ་མུ་མཐུད་སྐུལ་འདེད་བཏང་སྟེ། སྐྱིད་གྲོང་འགག་སྒོར་བརྟེན་ནས་སྐྱིད་གྲོང་མཐའ་མཚམས་དཔལ་འབྱོར་མཉམ་ལས་ཁུལ་གྱིས་རྒྱལ་སྤྱིའི་ཚོང་དོན་དང་། དེང་རབས་ཟོག་འགྲུལ། མཐའ་མཚམས་ཚོང་དོན་ལས་སྣོན། མཐའ་མཚམས་ཡུལ་སྐོར་སོགས་ཁྱད་ལྡན་ལེགས་ཆའི་ཐོན་ལས་སྐྱེད་སྲིང་དང་འཕེལ་རྒྱས་ཤུགས་ཆེན་བཏང་བ་དང་། ཨེ་ཤེ་ཡ་ལྷོ་མར་ཕྱོགས་པའི་སྒོ་དབྱེའི་བགྲོད་ལམ་གལ་ཆེན་མགྱོགས་མྱུར་བསྐྲུན་ཡོད། མཐའ་མཚམས་མཉམ་འབྲེལ་ཁུལ་བཙུགས་པ་ནས་བཟུང་འཛུགས་སྐྲུན་རྣམ་གྲངས་55ལག་བསྟར་བྱས་པ་དང་རྣམ་གྲངས་ལ་མ་དངུལ་བསྡོམས་འབོར་སྒོར་དུང་ཕྱུར་13ཙམ་བཏང་ཡོད། དུས་མཚུངས་ཆེད་དོན་མ་དངུལ་སྒོར་ཁྲི་1600ལྷག་ཙམ་བཏང་ནས་ལྷ་ས་རྒྱལ་སྒྲོལ་དྲ་ཐོག་ཚོང་དོན་ཕྱོགས་བསྡུས་ཚོད་ལྟའི་ཁུལ་དང་ཕྱི་རྒྱལ་གྱི་མཛོད་ཁང་རྣམ་གྲངས་འཛུགས་སྐྲུན་ལ་རྒྱབ་སྐྱོར་བྱས་པ་དང་། ནེ་པ་ལའི་ཕྱི་རྒྱལ་གྱི་མཛོད་ཁང་དང་ལྷ་ས་གྲོང་ཁྱེར་གྱི་རྒྱལ་མཚམས་རྒྱལ་སྒྲོལ་དྲ་ཐོག་ཚོང་དོན་འགྲེམས་སྟོན་ལྟེ་གནས་ཁག་བཞི་སྐྲུན་ཟིན་ནས་སྤྱོད་འགོ་ཚུགས་ཡོད།

2024ལོའི་ཟླ་1ནས་9པའི་བར། མཐའ་མཚམས་ཀྱི་འབོར་ཉུང་ཚོང་དོན་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་26.15ཟིན་པ་དེ་དུས་མཚུངས་ལས་48.1%འཕར་བ་དང་། མཐའ་མཚམས་ཀྱི་ཡུལ་མིའི་བརྗེ་རེས་ཉོ་ཚོང་བསྡོམས་འབོར་སྒོར་དུང་ཕྱུར་0.34ཟིན་པ་དེ་དུས་མཚུངས་ལས་32.3%འཕར་ཡོད། ལྗོངས་ཡོངས་ཀྱི་འགག་སྒོ་ནས་དངོས་ཟོག་འདྲེན་གཏོང་བྱེད་ཚད་ཏུན་ཁྲི་13.83ཟིན་པ་དེ་དུས་མཚུངས་ལས་44.9%འཕར་ཡོད། “འགག་སྒོའི་སྒོ་མོ་ཕྱེ་བ་ལས་ཉོ་ཚོང་རིམ་བཞིན་ཡག་ཏུ་སོང་བ་མ་ཟད། འཚོ་བ་ཡག་པོ་སྐྱེལ་ཐུབ་པའི་གདེང་ཚོད་ཀྱང་ཆེ་རུ་ཕྱིན་སོང”ཞེས་སྐྱིད་གྲོང་མཐའ་མཚམས་དྲ་ཐོག་ཚོང་པ་ཆོས་དར་གྱིས་སེམས་འགུལ་ཆེན་པོ་ཐེབས་བཞིན་བཤད།