གསར་འགོད་པས་སྤྱི་བདེ་པུའུ་ནས་ཤེས་རྟོགས་བྱས་པར། 2024ལོར་སྤྱི་བདེ་ལས་ཁུངས་ཀྱིས་འབྲི་ཆུའི་འབབ་རྒྱུད་དུ“ལོ་བཅུའི་རིང་ཉ་འཛིན་མི་ཆོག”པའི་བྱེད་ཐབས་ལ་བློ་བརྟན་འགྱུར་མེད་ངང་སྐུལ་འདེད་བཏང་ནས་ཁྲིམས་འགལ་ཉ་འཛིན་གྱི་གྱོད་གཞི་6000ལྷག་ཙམ་རྩད་ཆོད་པ་དང་། ཉེས་གསོག་ཚོགས་པ་830གཏོར་བ། ཁྲིམས་འགལ་ངང་འཛིན་པའི་ཉ་སྤྱི་རྒྱ་ཁྲི་19ལྷག་ཙམ་རྩད་ཆོད་ནས་འབྲི་ཆུའི་འབབ་རྒྱུད་དུ་གཞི་ཁྱོན་ཆེན་པོས་ཉ་འཛིན་པའི་ཉེས་གསོག་ལ་བཀག་འགོག་ནུས་ལྡན་ཐུབ་ཡོད། འབྲེལ་ཡོད་སྡེ་ཚན་གྱིས་ལྟ་ཞིབ་ཚད་ལེན་བྱས་པར་གཞིགས་ན། འབྲི་ཆུའི་འབབ་རྒྱུད་དུ་ཡུལ་ཉ་རིགས་30ལྷག་ཙམ་མང་དུ་ཕྱིན་པ་དང་། ཆུ་ཕག་ཁྱུ་ཚོགས་ཀྱི་གྲངས་འབོར་ཡང་འཕར་ཏེ་གྲངས་འབོར་1240ལྷག་ཙམ་ཟིན་པ། འབྲི་ཆུའི་ཆུ་ཐོན་སྐྱེ་དངོས་སྣ་མང་རང་བཞིན་རྒྱུན་མཐུད་སླར་གསོ་ཐུབ་པ་བཅས་འབྲི་ཆུའི་འབབ་རྒྱུད་དུ་ཉ་འཛིན་བཀག་འགོག་ལས་དོན་ལ་དུས་མཚམས་རང་བཞིན་གྱི་གྲུབ་འབྲས་མངོན་གསལ་དོད་པོ་ཐོབ་ཡོད།

སྤྱི་བདེ་ལས་ཁུངས་ཀྱིས་སྔ་རྗེས་སུ་ཁག་ཐེངས་བཞི་ལ་དབྱེ་ནས་སྒྲིག་འཛུགས་ཅན་དང་ཚོགས་པ་ཅན་གྱི་ཉ་ལས་དང་འབྲེལ་བ་ཡོད་པའི་གྱོད་གཞི་གཙོ་བོ་120ལྷག་ཙམ་སྒོ་བྱང་བཀལ་ནས་སྒྲུབ་གཉེར་བྱས་ཏེ་འབྲི་ཆུའི་འབབ་རྒྱུད་དུ་ཡོད་པའི་ཉེས་གསོག་ཚོགས་པ་ཁག་གཅིག་གཏོར་བ་རེད། དེ་དང་ཆབས་ཅིག ཁུངས་སྣེ་སྔོག་འདོན་དང་དབྱེ་ཞིབ་བརྡར་གཅོད་ལ་ཤུགས་སྣོན་རྒྱག་པ་དང་གྱོད་གཞི་གཅིག་པ་དང་འབྲེལ་ཡོད་གནད་དོན་ལ་རྡུང་རྡེག་བཅོས་སྒྲིག་བྱ་རྒྱུར་ཤུགས་སྣོན་བརྒྱབ་སྟེ“གྱོད་གཞི་གཅིག་སྒྲུབ་གཉེར་གྱིས་ཡུག་གཅིག་བཅོས་སྐྱོང”གི་ཕན་འབྲས་བཟང་པོ་མངོན་འགྱུར་ཧུར་ཐག་བྱས་ཡོད།

འབྲི་ཆུའི་འབབ་རྒྱུད་དུ་ཁྲིམས་འགལ་ཉ་འཛིན་ཉེས་གསོག་གི་དུས་ཚིགས་རང་བཞིན་དང་ཁུལ་ཁོངས་རང་བཞིན་གྱི་ཁྱད་ཆོས་ལ་དམིགས་ནས། སྤྱི་བདེ་ལས་ཁུངས་ཀྱིས་ཁྲིམས་སྒྱུར་མཉམ་ལས་ལམ་སྲོལ་སྔར་བས་འཐུས་སྒོ་ཚང་དུ་བཏང་བ་དང་། ཞིང་ལས་དང་གྲོང་གསེབ་སྡེ་ཚན་དང་མཉམ་དུ“དཔྱིད་དུས་སུ་ཉར་སྲུང་སྐྱོང”དང“སྟོན་དུས་སུ་ཉར་སྲུང་སྐྱོང”གི་ཁུལ་ཁོངས་མཉམ་འཐབ་བསྟུད་མར་བཀོད་སྒྲིག་བྱས་ཏེ། རྟ་ཤུགས་ཆེ་བའི་མྱུར་གྲུ་བཏང་་ནས་ཉ་འཛིན་པ་དང་གློག་གིས་ཉ་འཛིན་པ་སོགས་མངོན་གསལ་དོད་པའི་ཉ་འཛིན་ཉེས་གསོག་བྱེད་སྤྱོད་ལ་དམིགས་ཏེ་འབྲེལ་ཡོད་ཁུངས་སྣེར་ཕྱོགས་ཡོངས་ནས་གྲལ་བཤེར་དབྱེ་ཞིབ་དང་། བྱེད་ཐབས་སྣ་ཚོགས་ཕྱོགས་བསྡུས་ཀྱིས་རྡུང་རྡེག་ཚ་ནན་དང་བཅོས་སྐྱོང་ནན་པོ་བྱས་ནས་མཉམ་འབྲེལ་ཁྲིམས་སྒྱུར་བྱ་སྤྱོད་ཁྱོན་ཐེངས་ཁྲི་1.3ལྷག་ཙམ་སྤེལ་བ། “མེད་པ་གསུམ”གྱི་གྲུ་གཟིངས་1200ལྷག་ཙམ་ཞིབ་བཤེར་གཞུང་བཞེས་བཏང་བ་བཅས་བྱས་པར་བརྟེན་ཁུལ་ཁོངས་རང་བཞིན་གྱི་ཉ་འཛིན་ཉེས་གསོག་བྱེད་སྤྱོད་ལ་རྡུང་རྡེག་ཚ་ནན་བཏང་ཡོད།