འདི་ནི་ཀྲུང་གོའི་རིགས་གཅིག་མཁས་ཅན་གྱིས་མུའུ་ཐན་ཀ་ཉི་སློབ་ཆུང་གི་སློབ་མར་ཁྲག་འཇིབ་སྲིན་འབུའི་ནད་འགོག་བཅོས་ཤེས་བྱ་སློབ་བཞིན་པ།

ཧོང་ཝེ་ཤིན།ཐན་ཙན་ནི་ཡའི་སང་ཀི་པར་དུ་ཚ་གདུག་ཆེ་བའི་ཉི་ཟེར་འོག་ཀྲུང་གོའི་ཨར་ལས་ལས་གྲྭ་ཚོགས་པ་ཚད་ཡོད་ཀུང་སིས(གཤམ་དུ“ཀྲུང་གོ་ཨར་ལས་ཚོགས་པ”ཞེས་བསྡུ་རྒྱུ)བསྐྲུན་འགན་འཁུར་བའི་སང་ཀི་པར་གྱི་སྤྱི་ལེ་100ཡི་གྲོང་སྲིད་གཞུང་ལམ་རིམ་སྤོར་སྒྱུར་བཀོད་རྣམ་གྲངས་ལ་གོ་རིམ་ལྡན་པར་སྐུལ་འདེད་གཏོང་བཞིན་ཡོད། “ཐོག་མར་ས་རྒྱོང་བ་དང་དེ་རྗེས་ཁོད་སྙོམས་ནས་སོ་ཕག་འདིང་དགོས”ཞེས་ལས་དཔོན་ཞུས་ཏན་ཀྲི་ཡིས་སི་ཝ་ཤིས་ལིའི་སྐད་ནས་དགེ་ཕྲུག་མཱ་པུ་ལ·ཨ་ཁ་པ·མ་ཀན་ཅ་དང་སྤེལ་རེས་བྱེད་བཞིན་ཡོད།

ཞུས་ཏན་ཀྲི་གནས་སའི་རྣམ་གྲངས་དེ་2022ལོའི་ཟླ་12པར་ལས་འགོ་བརྩམས་ཤིང་། དེའི་དམིགས་ཡུལ་ནི་གྲོང་ཁུལ་གྱི་སྤྱི་ལེ་100ཙམ་གྱི་གཞུང་ལམ་ཨ་མ་རིམ་སྤོར་སྒྱུར་བཀོད་བྱེད་པ་དང་ཆབས་ཅིག སྣོལ་ཟམ་གཉིས་དང་དེ་བཞིན་ཞོར་གཏོགས་ལས་གྲྭ་བསྐྲུན་རྒྱུ་དེ་རེད། ཐན་ཙན་ནི་ཡར་ཞུས་ཏན་ཀྲི་དང་འདྲ་བའི་ཀྲུང་གོའི་འཛུགས་སྐྲུན་པ་དང་འཕྲོད་བསྟེན་ཞབས་ཞུའི་རིགས་གཅིག་མཁས་ཅན་མང་པོས་ས་གནས་ཁག་ཏུ་བརྟན་སྲུང་བྱས་ཏེ་ཡུལ་དེ་གའི་གྲོང་སྲིད་གཞུང་ལམ་སྒྱུར་བཀོད་དང་། བཙོག་ཆུ་གཙང་གསིང་སྒྲིག་བཀོད་བསྐྲུན་པ། ཁྲག་འཇིབ་སྲིན་འབུའི་ནད་འགོག་བཅོས་མཉམ་ལས་བཅས་ལ་རོགས་རམ་བྱས་ཏེ་ས་གནས་དེ་གའི་དམངས་ཚོགས་ལ་དངོས་འབྲེལ་དྲང་འབྲེལ་གྱི་བདེ་རྩ་བསྐྲུན་ཡོད།

“འདི་ལྟར་བྱས་ཚེ་སློབ་སྦྱོང་གི་ཕན་འབྲས་ལེགས་ལ་མྱུར་པོ་ཐོན་ཐུབ“

འདི་ལོ་ལོ་55ལ་སླེབས་པའི་ཞུས་ཏན་ཀྲི་ཕྱི་རྒྱལ་དུ་ལས་ཀ་བྱས་ནས་ལོ་20ལྷག་ཙམ་སོང་བ་དང་ཐན་ཙན་ནི་ཡར་ལས་ཀར་ཡོང་ནས་ལོ་14ཙམ་ཕྱིན་ཡོད།

“རྒན་ཞུས་ལགས་ཀྱི་སློབ་ཁྲིད་ཐབས་ཤེས་ཧ་ཅང་ཡག་པོ་ཡོད། ངས་ལས་ཀའི་ཁྲོད་ནོར་འཁྲུལ་ཤོར་ཚེ་ཁོང་གིས་ང་ལ་སྔོན་ལ་རང་སོ་སོས་ཞིབ་བཤེར་བྱས་ནས་གནད་དོན་བཙལ་ཏེ་ཡོ་བསྲང་བྱེད་དུ་འཇུག་གི་ཡོད། དེ་ལྟར་བྱས་སྟབས་སློབ་སྦྱོང་གི་ཕན་འབྲས་བཟང་པོ་མགྱོགས་པོ་ཐོན་གྱི་འདུག” ད་ལོ་ལོ་40ལ་སླེབས་པའི་མཱ་ཀན་ཅ་ནི་ཐན་ཙན་ནི་ཡའི་ནུབ་རྒྱུད་ཐ་པོ་ལ་ས་ཁུལ་ནས་ཡིན་པ་དང་2013ལོ་ནས་བཟུང་ཞུས་ཏན་ཀྲི་དང་མཉམ་དུ་ལས་ཀ་བྱས་ཏེ་སོ་ཕག་བཟོ་པ་ནས་རིམ་བཞིན་ལས་དཔོན་དུ་འཚར་ལོངས་བྱུང་ཡོད། ཁོང་གིས“རྒན་ཞུས་ལགས་དང་ཀྲུང་གོའི་ཁེ་ལས་མེད་ན་རང་ཉིད་ལ་འཚར་ལོངས་ཡོང་བའི་གོ་སྐབས་ཡག་པོ་འདི་འདྲ་ཞིག་འཕྲད་མི་སྲིད”ཅེས་བཤད།

ལི་ཧྲ·པེ་ཏེ·མུའུ་ཆི་ལི་ནི་མིག་སྔར་རྣམ་གྲངས་མི་ཤུགས་ཐོན་ཁུངས་སྡེ་ཚན་གྱི་གླ་པ་ཞིག་ཡིན་པ་དང་ཀྲུང་གོའི་ཨར་ལས་ཚོགས་པའི་ལས་ཀར་ཡོང་ནས་ལོ་15ཙམ་ཕྱིན་ཡོད། “ངས་རྒྱུན་དུ་བུ་མོར་ཀྲུང་གོའི་སྐོར་གྱི་གཏམ་རྒྱུད་བཤད་ཀྱི་ཡོད། ཁོ་མོ་ད་ལྟ་ཀྲུང་གོའི་རིག་གནས་ལ་ཧ་ཅང་དགའ་པོ་ཡོད་ལ་རྗེས་སུ་ཀྲུང་གོར་སློབ་སྦྱོང་ལ་འགྲོ་འདོད་བྱེད་ཀྱི་འདུག”ཅེས་ལི་ཧྲ·པི་ཏེ·མུའུ་ཆི་ལིས་བརྗོད།

ཐན་ཙན་ནི་ཡའི་སང་ཀི་པར་གྱི་ཙུང་ཐུང་མུའུ་ཝེ་ཉི་ཡིས་སྤྱི་ལེ་100ཡི་གྲོང་སྲིད་གཞུང་ལམ་རིམ་སྤོར་སྒྱུར་བཀོད་རྣམ་གྲངས་ནི་སང་ཀི་པར་གྱི་ལོ་རྒྱུས་ཐོག་གི་གཞུང་ལམ་རྣམ་གྲངས་ཆེ་ཤོས་ཡིན་པ་དང་བསྐྲུན་རྗེས་སང་ཀི་པར་གྱི་གཞུང་ལམ་སྒྲིག་བཀོད་སྦྲེལ་མཐུད་སྔར་བས་འཐུས་སྒོ་ཚང་དུ་སོང་ནས་འབྲེལ་ཡོད་ས་ཁོངས་ཀྱི་འགྲིམ་འགྲུལ་འགག་པའི་དཀའ་ངལ་ཆུང་དུ་འགྲོ་བ་དང་ཡུལ་སྐོར་ལས་རིགས་དང་ཚོང་དོན་འཕེལ་རྒྱས་ལ་སྐུལ་མ་ཐེབས་རྒྱུ་རེད་ཅེས་བརྗོད།

“ཀྲུང་གོའི་ཁེ་ལས་ཀྱིས་ང་ཚོ་བཙོག་ཆུའི་དཀའ་ངལ་ལས་སྔ་ཙམ་སྒྲོལ་བའི་རེ་སྒུག་བྱེད་བཞིན་ཡོད”

2023ལོའི་ཟླ་5པར། པེ་ཅིང་འཛུགས་སྐྲུན་བཟོ་ལས་ཚོགས་པས་བསྐྲུན་འགན་འཁུར་བའི་ཏཱ་ལེ་སི་ས་ལ་མུའུ་གྲོང་ཁྱེར་གྱི་མུའུ་པེ་ཆི་མཚོ་འགྲམ་གྱི་བཙོག་ཆུའི་མདོང་དྲ་དང་ཆུ་འཐེན་ས་ཚིགས་རྣམ་གྲངས་ལས་འགོ་བཙུགས་ཡོད། རྣམ་གྲངས་འདིར་སྤྱི་ལེ་100ཙམ་གྱི་བཙོག་ཆུའི་མདོང་དྲ་དང་། བཙོག་ཆུའི་ཆུ་འཐེན་ས་ཚིགས་2 ཞིབ་བཤེར་ཁྲོན་པ་2000ལྷག་ཙམ་བསྐྲུན་རྒྱུ་མ་ཟད། ཡུལ་དེ་གའི་ཁྱིམ་ཚང་ཁྲི་1ལྷག་ཙམ་ལ་མཐུད་རྩིས་ཡོད་པ་རེད།

ཀྲང་ཅིན་ཀྲུང་འདི་ལོ་ལོ་52ལ་སླེབས་པ་དང་ཐན་ཙན་ནི་ཡར་ལས་ཀ་བྱས་ནས་ལོ་14སོང་ཞིང་། “ལོ་གསར་དང་དུས་ཆེན་སྐབས་སུ་ང་ཚོ་་ཁྱིམ་དུ་ལོག་འདོད་ཡོད་མོད། འོན་ཀྱང་ལས་ཡུན་ཧ་ཅང་ཐུང་ཐུང་ཡིན་པ་དང་། སྔ་ཙམ་ལས་མཇུག་བསྒྲིལ་ཚེ་ས་གནས་འདི་གའི་གྲོང་མིས་དེང་རབས་ཅན་གྱི་གྲོང་སྲིད་སྒྲིག་ཆས་སྔ་ཙམ་སྤྱོད་ཐུབ་རྒྱུ་རེད”ཅེས་བཤད།

“འདི་གར་གཞི་རྩའི་ཆ་ནས་འདམ་བག་ལམ་ཡིན་པ་དང་ཆུ་འབུད་ཁུལ་མེད་ལ་བཙོག་ཆུ་གཙང་གསིང་གི་སྒྲིག་བཀོད་དེ་བས་མེད་རྐྱེན་ཡུལ་འདི་གའི་གྲོང་མིའི་འཚོ་བར་གནོད་སྐྱོན་ཚབས་ཆེན་བཟོ་གི་འདུག”ཏཱ་ལེ་སི་ས་ལ་མུའུ་གྲོང་ཁྱེར་གྱི་གྲོང་སྲིད་ཆུ་མཁོ་འདོན་དང་འཕྲོད་བསྟེན་དོ་དམ་ཅུས་ཀྱི་དབུ་བཞུགས་ལག་བསྟར་དཔོན་མུའུ་ཁ་མ·པུའུ་ཝེར་གྱིས“ཀྲུང་གོའི་ཁེ་ལས་ཀྱིས་ང་ཚོ་བཙོག་ཆུའི་དཀའ་ངལ་ལས་སྔ་ཙམ་སྒྲོལ་རོགས་བྱེད་པའི་རེ་སྒུག་བྱེད་བཞིན་ཡོད”ཅེས་བརྗོད།

“ཀྲུང་གོའི་རིགས་གཅིག་མཁས་ཅན་གྱིས་ང་ཚོར་སློབ་འགོ་ཚུགས་པའི་སློབ་ཚན་དང་པོ་འཚོགས་ཡོད”

“ཀྲུང་གོའི་རིགས་གཅིག་མཁས་ཅན་གྱིས་ང་ཚོར་སློབ་འགོ་ཚུགས་པའི་སློབ་ཚན་དང་པོ་འཚོགས་སོང”མུའུ་ཐན་ཀ་ཉི་སློབ་ཆུང་གི་སློབ་སྤྱི་ཨའོ་སི་མན·མུའུ་ཧན་མུའུ་ཏེ·ཀྲུའུ་མ་ཡིས་རིགས་གཅིག་མཁས་ཅན་ཚོགས་ཆུང་པུན་པ་གླིང་ཕྲན་དུ་བཅའ་སྡོད་བྱས་ཚུན་སློབ་གྲྭར་ཁྲག་འཇིབ་སྲིན་འབུའི་ནད་འགོག་བཅོས་ཀྱི་སློབ་ཁྲིད་ཐེངས་མང་བྱས་པར་བརྟེན“དགེ་རྒན་དང་སློབ་མ་ཚོ་ཁྲག་འཇིབ་སྲིན་འབུའི་ནད་ལ་རྒྱུས་མངའ་ཟབ་ཏུ་ཕྱིན་ནས་འཚོ་བའི་ཁྲོད་འགོག་ཟོན་ལ་དོ་སྣང་བྱ་རྒྱུ་རེད”ཅེས་བརྗོད།

པུན་པ་གླིང་ཕྲན་ནི་སང་ཀི་པར་གྱི་གླིང་ཕྲན་ཆེ་གྲས་གཉིས་པ་ཡིན་པ་དང་ཡུལ་མི་ཁྲི་60ཙམ་ཡོད་ཅིང་། གླིང་ཕྲན་ཐོག་ཆུ་ཕྲན་དང་རྫིང་བུ་གང་སར་ཡོད་པ་དང་ཁྲག་འཇིབ་སྲིན་འབུའི་འབུ་ཁོག་གཙོ་བོ་ཡིན་པའི་ཆུ་ལྦུ་དུང་འཁྱིལ་ས་གནས་དེ་གར་ཚབས་ཆེན་ཐོན་ནས་གྲོང་མི་མང་པོ་ཞིག་ཁྲག་འཇིབ་སྲིན་འབུའི་ནད་ཀྱི་མནར་གཅོད་མྱོང་བཞིན་ཡོད་པ་རེད།

མུའུ་ཐན་ཀ་ཉི་སློབ་ཆུང་གནས་ཡུལ་གྲོང་ཚོར་འགྲོ་སྐབས་ཁྲག་འཇིབ་སྲིན་འབུའི་ནད་འགོག་བཅོས་ཀྱི་སྦྱར་ཡིག་གང་སར་མཐོང་རྒྱུ་ཡོད་པ་དང་། ཆུ་མཁོ་འདོན་བྱེད་ས་ཞིག་ཏུ་ས་གནས་དེ་གའི་གྲོང་མིས་ཆུ་ལེན་བཞིན་ཡོད་ལ་ཉེ་འགྲམ་གྱི་ཁང་སྟེང་དུ“རིམས་ནད་ཡོད་པའི་ཆུར་མི་རེག་པ་དང་ཁྲག་འཇིབ་སྲིན་འབུའི་ནད་སྔོན་འགོག་བྱེད་དགོས”ཞེས་པའི་སྦྱར་ཡིག་བྲིས་ཡོད།

2014ལོར་ཀྲུང་གོས་འཛམ་གླིང་འཕྲོད་བསྟེན་ཚོགས་ཆེན་ཐོག་ཐན་ཙན་ནི་ཡར་ཁྲག་འཇིབ་སྲིན་འབུའི་ནད་འགོག་བཅོས་ལ་མཉམ་ལས་བྱེད་པའི་སྐོར་གྱི་བསམ་ཤེས་དྲན་ཐོར་མིང་རྟགས་བཀོད་པ་དང་ཀྲུང་གོ་སྲིད་གཞུང་གིས་མ་དངུལ་དང་ལག་རྩལ་གྱི་རྒྱབ་སྐྱོར་བྱས་པ་རེད། 2017ལོར་ཅང་སུའུ་ཞིང་ཆེན་ཁྲག་འཇིབ་སྲིན་འབུའི་ནད་འགོག་བཅོས་ཞིབ་འཇུག་སུའོ་ཡི་རིགས་གཅིག་མཁས་ཅན་ཁག་དང་པོ་པུན་པ་གླིང་ཕྲན་དུ་བཅའ་སྡོད་བྱས་པ་དང་། 2023ལོའི་ཟླ་11ཚེས་1ཉིན། ཀྲུང་གོས་ཐན་ཙན་ནི་ཡའི་སང་ཀི་པར་ལ་ཁྲག་འཇིབ་སྲིན་འབུའི་ནད་ལ་རོགས་སྐྱོར་བྱེད་པའི་ལྟ་ཞིབ་ཚད་ལེན་ས་ཚིགས་ཐོག་མ་དེ་པུན་པ་གླིང་ཕྲན་དུ་སྒོ་བྱང་ཕྱེ་བ་རེད།

ན་ནིང་ཟླ་བརྒྱད་པར་མུའུ་ཝེ་ཉི་ཡིས་སང་ཀི་པར་གྱི་ཙུང་ཐུང་ལས་ཤག་ཏུ་དུས་ཐེངས་གཉིས་པའི་རྣམ་གྲངས་ཀྱི་རིགས་གཅིག་མཁས་ཅན་ཚོགས་ཆུང་ཁག་དང་པོ་དང་མཇལ་འཛོམས་བྱས་ནས་རུ་མི་ཡོངས་ལ་བྱས་རྗེས་གཟེངས་རྟགས་དང་། བྱ་དགའི་གཟེངས་རྟགས། དྲན་གསོའི་ལག་ཁྱེར་བཅས་སྤྲད་ནས་ཁོང་ཚོས་སང་ཀི་པར་གྱི་སྨན་བཅོས་འཕྲོད་བསྟེན་བྱ་གཞག་ལ་ལེཌ་སྐྱེས་ཕུལ་བར་གཟེངས་བསྟོད་བྱས་པ་རེད། མུའུ་ཝེ་ཉིས་ཀྲུང་གོ་ཕྱོགས་ཀྱིས་ལོ་མང་རིང་སྨན་བཅོས་དང་སྤྱི་པའི་འཕྲོད་བསྟེན་ཁྱབ་ཁོངས་སུ་སང་ཀི་པར་ལ་རོགས་རམ་གནང་བར་ཐུགས་རྗེ་ཆེ་ཞུ་རྒྱུ་དང་སང་ཀི་པར་གྱི་ནད་རིགས་སྔོན་འགོག་ཚོད་འཛིན་མ་ལག་འཐུས་སྒོ་ཚང་དུ་གཏོང་རོགས་གནང་བ་མ་ཟད། རྒྱལ་ཁབ་གཉིས་པོའི་དབར་སྤྱི་པའི་འཕྲོད་བསྟེན་ཁྱབ་ཁོངས་ཀྱི་མཉམ་ལས་སྔར་བས་རྒྱ་ཆེར་གཏོང་རྒྱུའི་རེ་སྒུག་ཀྱང་བྱས་པ་རེད།

(འདི་ག་ཚགས་པར་ཁང་དུ་ཏཱ་ལེ་སི་ས་ལ་མུའུ་ནས་འབྱོར་བའི་གློག་འཕྲིན)