“ཕྱི་འབྲེལ་བཙུགས་ཚུན། ཨེ་རི་ཐྲེ་ཡ་དང་ཀྲུང་གོ་གཉིས་ཐོག་མཐའ་བར་གསུམ་དུ་ལྷག་བསམ་ཟོལ་མེད་ཀྱི་མཛའ་གྲོགས་འབྲེལ་བ་རྒྱུན་འཁྱོངས་དང་ལག་གདང་སྦྲེལ་ནས་མདུན་སྐྱོད་བྱེད་ཀྱི་ཡོད” ཉེ་ཆར་ཨེ་རི་ཐྲེ་ཡ་རྒྱལ་ཁབ་རྟེན་མཛོད་ཁང་གི་ཀོན་ཀྲང་ཡིའུ་སུའུ་ཧྥུས་འདི་ག་ཚགས་པར་གྱི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས“ཀྲུང་གོ་དང་སྤེལ་རེས་མཉམ་ལས་བྱེད་པ་དེ་ང་ཚོའི་འཕེལ་རྒྱས་ལ་མཚོན་ན་གལ་འགངས་ཧ་ཅང་ཆེན་པོ་ཞིག་ཡིན། འབྱུང་འགྱུར་རྒྱལ་ཁབ་གཉིས་པོས་མཉམ་ལས་ཀྱི་ལས་སྟེགས་དེ་བས་མང་བ་བསྐྲུན་ནས་མི་སྣ་འགྲོ་འོང་རྒྱ་ཆེར་གཏོང་བ་དང་ཤེས་དཔལ་སྤེལ་རེས་དང་ཕན་ཚུན་མིག་དཔེར་འཛིན་པར་སྔར་བས་སྐུལ་འདེད་བཏང་ནས་ཐུན་མོང་འཕེལ་རྒྱས་མངོན་འགྱུར་ཡོང་རེ་བྱེད་ཀྱི་ཡོད”ཅེས་བརྗོད།

ཨ་ཧྥེ་རི་ཁའི་ཤར་རྒྱུད་ཀྱི་མཚོ་དམར་འགྲམ་དུ་གནས་པའི་ཨེ་རི་ཐྲེ་ཡ་ནི་དེ་སྔ་གནའ་བོའི་མཚོ་ཐོག་དར་གོས་ལམ་བུའི་ལྟེ་གནས་གལ་ཆེན་ཞིག་ཡིན། ཀྲུང་གོ་དང་ཨེ་རི་ཐྲེ་ཡའི་དབར་གྱི་མཛའ་གྲོགས་འགྲོ་འོང་དེ་ལོ་2000ལྷག་ཙམ་གྱི་གོང་བར་ཁུངས་འདེད་ཐུབ་ཀྱི་ཡོད། ཨེ་རི་ཐྲེ་ཡ་མ་ས་ཝ་གྲོང་ཁྱེར་གྱི་མཚོ་དམར་བྱང་མའི་ཞིང་ཆེན་རྟེན་མཛོད་ཁང་དུ་གནའ་གྲོང་ཨ་ཏུའུ་ལི་སི་ནས་ཐོན་པའི་ཀྲུང་གོའི་གནའ་རབས་རྫ་ཆས་ཀྱི་ཆང་སྣོད་ཅིག་འགྲེམས་སྟོན་བྱས་ཡོད་པ་དང་རྫ་ཆས་ཀྱི་སྟེང་དུ་རྒྱ་ཡིག“万”“和”“禅”“山”སོགས་བརྐོས་ཡོད། ཡིའུ་སུའུ་ཧྥུས་གནའ་རྫས་རྟོག་ཞིབ་མཁས་དབང་ཚོས་རིག་དངོས་དེ་ནི་གནའ་བོའི་མཚོ་ཐོག་དར་གོས་ལམ་བུ་བརྒྱུད་ཨེ་རི་ཐྲེ་ཡར་སླེབས་པ་ཞིག་ཡིན་པས“དེ་ནི་ཨེ་རི་ཐྲེ་ཡ་དང་ཀྲུང་གོའི་དབར་གྱི་ཡུན་རིང་འགྲོ་འོང་ལོ་རྒྱུས་ཀྱི་དཔང་པོ་ཞིག་རེད”ཅེས་བརྗོད།

ཡིའུ་སུའུ་ཧྥུའུ་ཡིས་བརྗོད་དོན། ཨེ་རི་ཐྲེ་ཡའི་རྒྱལ་ཁབ་རྟེན་མཛོད་ཁང་འཛུགས་པའི་དམིགས་ཡུལ་གཙོ་བོ་ནི་རྒྱལ་ཁབ་ཀྱི་ཤུལ་བཞག་སྲུང་སྐྱོང་བྱེད་པའི་ཨེ་རི་ཐྲེ་ཡའི་མི་དམངས་ཀྱི་འདུ་ཤེས་གསོ་སྐྱོང་བྱ་ཆེད་ཡིན། རྟེན་མཛོད་ཁང་དེས་ཤུལ་བཞག་ཉར་ཚགས་དང་། སྲུང་སྐྱོང་། ཞིབ་འཇུག འགྲེམས་སྟོན་བཅས་ཀྱི་ནང་ཞུགས་པ་དང་ད་ཆ་ལོ་ངོ་ཁྲི་120གོང་གི་ཨེ་རི་ཐྲེ་ཡ་ས་ཁུལ་གྱི་གནའ་བོའི་མིའི་རིགས་ཀྱི་ཀ་ལིའི་རུས་པའི་འགྱུར་རྡོ་སོགས་རྩ་ཆེའི་དངོས་རྫས་ཉར་ཚགས་བྱས་ཡོད། རྟེན་མཛོད་ཁང་དེ་ནི་འཛམ་གླིང་ལ་ཨ་ཧྥེ་རི་ཁའི་འོད་སྟོང་འཕྲོ་བའི་ཤེས་དཔལ་འགྲེམས་སྟོན་བྱེད་པའི་སྐར་ཁུང་ཞིག་ཡིན་པ་མ་ཟད། ཨེ་རི་ཐྲེ་ཡས་གོ་ལ་ཧྲིལ་པོའི་ཤེས་དཔལ་སྤེལ་རེས་དང་ཕན་ཚུན་མིག་དཔེར་འཛིན་པའི་ཁྲོད་ནུས་པ་གལ་ཆེན་བཏོན་པའི་མཚོན་ཚུལ་ཞིག་ཀྱང་ཡིན། “ཨེ་ཀྲུང་ཤེས་དཔལ་སྤེལ་རེས་དང་སྐད་ཆ་ཤོད་རེས་བྱེད་པ་ནི་ཧ་ཅང་གལ་འགངས་ཆེ་བ་ཞིག་ཡིན། ངས་འབྱུང་འགྱུར་ཨེ་རི་ཐྲེ་ཡའི་རྒྱལ་ཁབ་རྟེན་མཛོད་ཁང་དང་ཀྲུང་གོའི་རྟེན་མཛོད་ཁང་དབར་གྱི་སྤེལ་རེས་དང་མཉམ་ལས་གཏིང་ཟབ་ཏུ་བཏང་ནས་རྒྱལ་ཁབ་གཉིས་པོའི་ཤེས་དཔལ་སྤེལ་རེས་དང་ཕན་ཚུན་མིག་དཔེར་འཛིན་པའི་མཛེས་སྡུག་ལྡན་པའི་ལེའུ་སྔར་བས་ཡག་པ་རྩོམ་རྒྱུའི་རེ་བ་བྱེད་ཀྱི་ཡོད”

ཉེ་བའི་ལོ་ཤས་རིང་རྒྱལ་ཁབ་གཉིས་པོས་འཕྲོད་བསྟེན་དང་། ཞིང་ལས། སློབ་གསོ། རིག་གནས་སོགས་ཁྱབ་ཁོངས་སུ་དངོས་སྒྲུབ་མཉམ་ལས་རྒྱུན་ཆད་མེད་པར་གཏིང་ཟབ་བྱས་ཡོད། 2021ལོའི་ཟླ་11པར་རྒྱལ་ཁབ་གཉིས་པོས“རྒྱུད་གཅིག་ལམ་གཅིག”མཉམ་སྐྲུན་གྱི་བསམ་ཤེས་དྲན་ཐོར་མིང་རྟགས་བཀོད་པ་དང་རྨང་གཞིའི་སྒྲིག་བཀོད་ཁྱབ་ཁོངས་ཀྱི་མཉམ་ལས་ལ་གྲུབ་འབྲས་གཡུར་དུ་ཟ་བ་ཐོན་ཡོད། “ཀྲུང་གོས་རང་བཙན་རང་བདག་དང་རང་སྟོབས་རང་སྤེལ་མཐའ་འཁྱོངས་བྱས་ནས་ཉེ་བའི་ལོ་ཤས་རིང་འཕེལ་རྒྱས་མགྱོགས་མྱུར་བྱུང་ནས་འཛམ་གླིང་ལ་ལེགས་སྐྱེས་ཧ་ཅང་ཆེན་པོ་ཕུལ་ཡོད། ཀྲུང་གོའི་ཉམས་མྱོང་ལ་ང་ཚོས་སློབ་སྦྱོང་བྱེད་རིན་ཡོད”ཡིའུ་སུའུ་ཧྥུས“ཨེ་རི་ཐྲེ་ཡས་རང་ཉིད་ཀྱི་རྒྱལ་བབ་དང་འཚམ་པའི་འཕེལ་རྒྱས་ཀྱི་འགྲོ་ལམ་བཙལ་ནས་ཐུན་མོང་འཕེལ་རྒྱས་དང་དར་རྒྱས་ཡོང་བར་སྐུལ་འདེད་གཏོང་སྐབས་ཀྲུང་གོས་བློ་བརྟན་འགྱུར་མེད་ངང་བརྩི་འཇོག་དང་རྒྱབ་སྐྱོར་བྱེད་ཀྱི་ཡོད་པའི”ངོས་འཛིན་བྱེད་ཀྱི་ཡོད།