རྒྱལ་ཁབ་འཕེལ་སྒྱུར་ཨུ་ལྷན་གྱིས་ཕྱོགས་5ཡི་ཐད་ནས་དམངས་གཉེར་ཁེ་ལས་འཕེལ་རྒྱས་ལ་རྒྱབ་སྐྱོར་བྱེད་པ།
ཁྲིམས་ལྟར་དམངས་གཉེར་ཁེ་ལས་དང་དམངས་གཉེར་ཁེ་ལས་པའི་ཁྲིམས་མཐུན་ཁེ་དབང་ལ་སྲུང་སྐྱོང་བྱེད་པ།
ཉིན་ཤས་གོང་། རྒྱལ་ཁབ་འཕེལ་སྒྱུར་ཨུ་ལྷན་གྱི་ཀྲུའུ་རེན་གཞོན་པ་ཀྲེང་པེ་ཡིས་རྒྱལ་ཁབ་འཕེལ་སྒྱུར་ཨུ་ལྷན་གྱིས་འབྲེལ་ཡོད་སྡེ་ཚན་དང་ས་གནས་དང་མཉམ་དུ་ཕྱོགས་5ཡི་ཐད་ནས་དམངས་གཉེར་ཁེ་ལས་ཀྱི་བཞུགས་མོལ་ཚོགས་འདུའི་བཀོད་སྒྲིག་ཁག་དོན་འཁྱོལ་ཡག་པོ་བྱེད་ཀྱི་ཡིན་ཞེས་གསར་འགོད་པར་བཤད་པ་རེད།
ཁྲོམ་རར་ཞུགས་འཐུས་དང་གཙོ་རྒྱུ་ཐོབ་པའི་འགོག་རྐྱེན་མེད་པར་བཟོ་རྒྱུ་ཡིན་ཞིང་། ཁྲོམ་རར་ཞུགས་འཐུས་ཀྱི་བཀག་རྒྱའི་གསལ་ཐོ་གསར་པར་གང་མགྱོགས་བཟོ་བཅོས་བརྒྱབ་སྟེ་བཏོན་ནས“བཀག་རྒྱ་མེད་ན་བྱེད་ཆོག་པའི”བླང་བྱ་དོན་འཁྱོལ་ཡག་པོ་བྱ་རྒྱུ། བྱེད་ཐབས་ཞིབ་ཕྲ་བཟོས་ཏེ་རྨང་གཞིའི་སྒྲིག་བཀོད་ཀྱི་འགྲན་རྩོད་རང་བཞིན་གྱི་ཁྱབ་ཁོངས་དང་རྒྱལ་ཁབ་ཀྱི་གཙོ་གནད་ཚན་རིག་ཞིབ་འཇུག་གི་རྨང་གཞིའི་སྒྲིག་བཀོད་སོགས་དམངས་གཉེར་ཁེ་ལས་ལ་དྲང་གཞག་ངང་སྒོ་མོ་འབྱེད་པར་རྒྱུན་མཐུད་སྐུལ་འདེད་གཏོང་བ་དང་དམངས་གཉེར་ཁེ་ལས“གལ་ཆེན་གཉིས”འཛུགས་སྐྲུན་དང“གསར་གཉིས”ལས་དོན་ནང་ཧུར་ཐག་ཞུགས་པར་རྒྱབ་སྐྱོར་བྱ་རྒྱུ། འབྲེལ་ཡོད་ཕྱོགས་དང་མཉམ་དུ་དམངས་གཉེར་ཁེ་ལས་ཀྱི་མ་དངུལ་བསྡུ་སྒྲིལ་བྱེད་དཀའ་བ་དང་མ་དངུལ་བསྡུ་སྒྲིལ་གྱི་མ་གནས་མཐོ་བའི་གནད་དོན་མུ་མཐུད་ཐག་གཅོད་བྱ་རྒྱུ།
དམངས་གཉེར་ཁེ་ལས་ཀྱི་རྩིས་དངུལ་འགྱངས་ཆད་ཀྱི་གནད་དོན་ཐག་གཅོད་བྱེད་པར་སྐུལ་འདེད་གཏོང་རྒྱུ་ཡིན་ཞིང་། ས་གནས་སྲིད་གཞུང་དང་གཞུང་ཁོངས་ཁེ་ལས་ཀྱིས་འགན་འཁྲི་དོན་འཁྱོལ་བྱེད་པར་སྐུལ་འདེད་གཏོང་བ་དང་ས་གནས་སྲིད་གཞུང་གི་གསར་དུ་འཕར་བའི་ཆེད་དོན་བུ་ལོན་སོགས་ཀྱི་སྲིད་ཇུས་བེད་སྤྱོད་ཡག་པོ་བྱས་ཏེ་ཆད་དངུལ་གཙང་སྤྲོད་ཀྱི་མྱུར་ཚད་མགྱོགས་སུ་གཏོང་རྒྱུ། བཅའ་ཁྲིམས་དང་ཁྲིམས་སྲོལ་སྔར་བས་འཐུས་སྒོ་ཚང་དུ་བཏང་ནས་ཡིད་རྟོན་ཤོར་བའི་རིགས་ལ་ཆད་གཅོད་བསླབ་འདོམས་བྱེད་ཤུགས་ཆེ་རུ་བཏང་སྟེ་ཆད་དངུལ་གཙང་སྤྲོད་བྱེད་ཀྱིན་འགྱངས་ཆད་བྱེད་རིགས་བཀག་འགོག་བྱ་རྒྱུ།
དམངས་གཉེར་ཁེ་ལས་དང་དམངས་གཉེར་ཁེ་ལས་པའི་ཁྲིམས་མཐུན་ཁེ་དབང་ཁྲིམས་ལྟར་སྲུང་སྐྱོང་བྱ་རྒྱུ་ཡིན་ཞིང་། དམངས་གཉེར་དཔལ་འབྱོར་སྐུལ་སྤེལ་བཅའ་ཁྲིམས་དེ་ཉིད་རྒྱལ་ཡོངས་མི་དམངས་འཐུས་ཚོགས་ལ་གྲོས་ཞིབ་བྱ་རྒྱུར་ཕུལ་ཟིན་པས་དེ་བཏོན་ནས་ལག་ལེན་བསྟར་བའི་འབྲེལ་ཡོད་གྲ་སྒྲིག་ཡག་པོ་བྱ་རྒྱུ། སྲིད་འཛིན་ཁྲིམས་ཚད་གཅོད་དབང་གི་གཞི་རྩའི་ཚད་གཞི་མགྱོགས་མྱུར་འཐུས་སྒོ་ཚང་དུ་གཏོང་བ་དང་ཁེ་ལས་དང་འབྲེལ་བ་ཡོད་པའི་ཁྲིམས་སྒྱུར་ཆེད་དོན་བྱ་སྤྱོད་ནང་ཞུགས་ཏེ་སྒྲིག་འགལ་ངང་ས་གནས་གཞན་དུ་ཁྲིམས་སྒྱུར་བྱེད་པ་དང་ཕན་གཉེར་རང་བཞིན་གྱི་ཁྲིམས་སྒྱུར་བྱེད་རིགས་སྔོན་འགོག་བྱ་རྒྱུ།
ཁེ་ལས་ལ་རོགས་རམ་དང་དཀའ་ངལ་སེལ་བའི་སྲིད་ཇུས་ཁག་དོན་འཁྱོལ་བྱ་རྒྱུ་ཡིན་ཞིང་། པུའུ་དབར་གྱི་མཉམ་འབྲེལ་ཚོགས་འདུའི་ལམ་ལུགས་ཀྱི་ནུས་པ་གང་ལེགས་བཏོན་ཏེ་རྒྱུན་རྣམ་ཅན་གྱི་འབྲེལ་གཏུག་སྤེལ་རེས་ལམ་སྲོལ་དང་དམངས་གཉེར་དཔལ་འབྱོར་འཕེལ་རྒྱས་ཀྱི་ཕྱོགས་བསྡུས་ཞབས་ཞུའི་ལས་སྟེགས་ཡག་པོ་སྤྱད་དེ་དམངས་གཉེར་ཁེ་ལས་ཀྱིས་སྙན་སེང་ཞུས་པའི་དཀའ་གནད་ལ་གནད་སྨིན་ཇུས་བསྟར་དང་རོགས་རམ་ངོ་མ་བྱས་ནས་སྲིད་ཇུས་དང་བྱེད་ཐབས་ཁག་དོན་ཐོག་ཏུ་འཁྱོལ་བར་བྱ་རྒྱུ།
དམངས་གཉེར་དཔལ་འབྱོར་འཕེལ་རྒྱས་གཏོང་བར་སེམས་ཁུར་དང་རྒྱབ་སྐྱོར་བྱེད་པའི་ཁོར་ཡུག་བཟང་པོ་ཧུར་ཐག་བསྐྲུན་རྒྱུ་ཡིན་ཞིང་། “ཅིན་ཅང་གི་ཉམས་མྱོང”གསར་གཏོད་དང་འཕེལ་རྒྱས་གཏོང་བ་དང་། ཁེ་ལས་པའི་སྙིང་སྟོབས་དར་སྤེལ་གཏོང་བ། དམངས་གཉེར་དཔལ་འབྱོར་འཕེལ་རྒྱས་གཏོང་བའི་ཉམས་མྱོང་བཟང་པོ་དང་བྱེད་སྟངས་བཟང་པོ་ཕྱོགས་སྡོམ་དང་ཁྱབ་གདལ་གཏོང་བ་བཅས་བྱས་ཏེ་དམངས་གཉེར་ཁེ་ལས་དང་ཁེ་ལས་པའི་གཏམ་རྒྱུད་ཡག་པོ་ཤོད་རྒྱུ་བཅས་རེད།