ཨུ་ཡོན་ཀྲང་ཡུན་ཁའེ་ཡིས་གསུངས་དོན།
བརྟག་ཞིབ་གཏིང་ཟབ་བྱེད་དགོས་ལ་གྲོས་འགོ་ཡང་ཏན་ཏིག་འདོན་དགོས།
སློབ་དུས་གསར་པ་འགོ་ཚུགས་ནས་གཟའ་འཁོར་གཅིག་ཀྱང་སོང་མེད་རུང་རྒྱལ་ཡོངས་སྲིད་གྲོས་ཀྱི་ཨུ་ཡོན་ཀྲང་ཡུན་ཁའེ་ཡིས་སློབ་གྲྭའི་སློབ་ཁྲིད་ལས་དོན་བསྒྲུབས་རྗེས། ཧོ་པེ་ཞིང་ཆེན་ཀྲེང་ཏིང་རྫོང་དུ་གནས་པའི་ཧོ་པེའི་མཁའ་དབྱིངས་ཆ་འཕྲིན་མ་འཇོག་ཚོད་འཛིན་ཚད་ཡོད་ཀུང་སིར་བརྟག་ཞིབ་བྱེད་པར་བསྐྱོད་རྒྱུར་བྲེལ་བཞིན་མཆིས། ཡུན་རིང་མ་སོང་གོང་། ཁོང་གིས་དེ་གར་རྣམ་གྲངས་ལ་ལྟ་སྦྱོང་དང་སྤེལ་རེས་བྱས་པས་ཀུང་སིར་གནས་པའི་ལག་རྩལ་རང་བཞིན་གྱི་ཤེས་ལྡན་པ་དཀོན་པའི་དཀའ་ངལ་ཤེས་ཡོད་པ་རེད།
ཀུང་སིའི་ཐོན་རྫས་ཀྱི་འགྲེམས་སྟོན་ལྟེ་གནས་སུ་བསྐྱོད་ནས་ཀྲང་ཡུན་ཁའེ་ཡིས“ཤེས་ལྡན་པ་གང་འདྲ་ཞིག་མཁོ་གི་འདུག་གམ”ཞེས་དྲིས།
“ད་ཆ་དམའ་དབྱིངས་དཔལ་འབྱོར་གྱི་འཕེལ་རྒྱས་མྱུར་བས་ང་ཚོས་ཐོན་རྫས་གསར་པ་མི་ཉུང་བ་ཞིག་གསར་སྤེལ་བྱས་པ་ཡིན། འོན་ཀྱང་སྐུ་མགྲོན་ཚོར་ལག་རྩལ་གྱི་ཞབས་ཞུ་བསྒྲུབ་པར་རྩལ་ནུས་མཐོ་བའི་ཤེས་ལྡན་པ་ཁག་གཅིག་མཁོ་གི་འདུག”ཅེས་ཀུང་སིའི་སྤྱི་ཁྱབ་ཅིང་ལེ་ཧྲེན་ཧྥུང་གིས་བཤད།
ཉེ་ཆར་ཀྲང་ཡུན་ཁའེ་ཡིས་སྔ་རྗེས་སུ་མཁའ་དབྱིངས་ཆ་འཕྲིན་དང་ནུས་རྒྱུ་གསར་པ་སོགས་ལས་རིགས་ཀྱི་འབྲེལ་ཡོད་ཁེ་ལས་བཅུ་ཕྲག་ལ་བརྟག་ཞིབ་བྱེད་པར་བསྐྱོད་པ་མ་ཟད། ད་དུང་ཞིང་ཆེན་ཕྱི་ནང་གི་ལས་རིགས་མཐོ་སློབ་ཏུ་བཞུགས་མོལ་སྤེལ་རེས་ཀྱང་བྱེད་པར་བསྐྱོད་ཡོད། “འདི་ལོ་ངས་གྲོས་འགོའི་ནང་དོན་སྔར་བས་ཕུན་སུམ་ཚོགས་སུ་བཏང་སྟེ་ལས་རིགས་སློབ་གསོ་དང་ས་ཁོངས་ཐོན་ལས་ལ་རམ་འདེགས་བྱ་རྒྱུ་དང་ལྷག་དོན་དུ་གསར་དར་ཐོན་ལས་འཕེལ་རྒྱས་ཀྱི་འཚམ་སྒྲིག་བྱེད་ཚད་ཆེ་རུ་བཏང་སྟེ། ཐོན་སློབ་མཉམ་འདྲེས་དང་ཚན་སློབ་མཉམ་འདྲེས་གཏིང་ཟབ་དང་ཏན་ཏིག་ཡོང་བར་སྐུལ་འདེད་གཏོང་རྒྱུ་ཡིན”ཞེས་ཀྲང་ཡུན་ཁའེ་ཡིས་གསུངས།
“བརྟག་ཞིབ་གཏིང་ཟབ་བྱེད་དགོས་ལ་གྲོས་འགོ་ཡང་ཏན་ཏིག་འདོན་དགོས”ཀྲང་ཡུན་ཁའེ་ཡིས་གཞི་རིམ་དུ་བརྟག་ཞིབ་བྱེད་སྐབས་རྣམ་པ་ཙམ་མ་ཡིན་པར་ངེས་པར་དུ་གནད་དོན་གཅིག་ལ་དམིགས་ཏེ་རྣམ་པ་མི་འདྲ་བ་དང་ཟུར་ཚད་མི་འདྲ་བའི་སྒོ་ནས་གནད་དོན་མཐིལ་རྟོགས་ཡོང་བ་བྱེད་དགོས། “ཤེས་རྟོགས་གཏིང་ཟབ་བྱུང་ཚེ་བཏོན་པའི་གྲོས་འགོ་ཡང་ཏན་ཏིག་དང་དོན་དངོས་དང་མཐུན་ཐུབ་པས་དམངས་ཆེད་སྐད་ཆ་ཤོད་ཐུབ་པ་དང་ཐབས་འདོན་ཇུས་འབུལ་བྱེད་ཐུབ”ཅེས་གསུངས་པ་རེད།