ཀྲུང་གོའི་ཁེ་ལས་ཀྱིས་སྐྲུན་འགན་འཁུར་བའི་ཨེ་ཁྭ་ཏོར་གྱི་གཞུང་ལམ་རྣམ་གྲངས་ལས་དམངས་ཚོགས་ཁྲི་10ལྷག་ཙམ་ལ་ཕན་པ་ཐོབ་པ།
“འདི་ནི་ཕྱུག་འགྱུར་གྱི་ལམ་བུ་ཞིག་རེད”
འདི་ནི་ཀྲུང་གོའི་ཁེ་ལས་ཀྱིས་སྐྲུན་འགན་འཁུར་བའི་གཞུང་ལམ་དུ་རླངས་འཁོར་སྐྱོད་བཞིན་པ།
འདི་ནི་ཝེ་ཉི་ཤི་ཨའོ·ཅཱ་ལི་ཡ་ཏོ་ཡིས་གསར་འགོད་པར་སྨིན་ཟིན་པའི་ཤིང་ཏོག་ཁོ་ཁོ་སྟོན་བཞིན་པ། (པར་འདི་གཉིས་འདི་ག་ཚགས་པར་གྱི་གསར་འགོད་པ་ཧྲི་ཡོན་ཧའོ་ཡིས་མཁོ་འདོན་བྱས)
རླངས་འཁོར་བཏང་ནས་ཨེ་ཁྭ་ཏོར་གྱི་དབུས་བྱང་ས་ཁུལ་གྱི་ཕི་ཆིན་ཁྲ་ཞིང་ཆེན་དང་། དབྱིན་པ་པུའུ་ལྭ་ཞིང་ཆེན། ཨའེ་སི་མེ་ལྭ་ཏ་སི་ཞིང་ཆེན་བཅས་ཀྱི་འབྲེལ་མཚམས་སུ་སླེབས་སྐབས་ཞེང་ཚད་ལ་སྨི་16དང་ལམ་ཐག་ཧྲིལ་པོའི་རིང་ཚད་ལ་སྤྱི་ལེ་40ཙམ་ཟིན་པའི་གཞུང་ལམ་དུ་སྐྱོད་ཆོག
གཞུང་ལམ་དེ་2016ལོར་ཨེ་ཁྭ་ཏོར་དུ་ས་ཡོམ་རིམ་པ་7.8བརྒྱབ་རྗེས་ཀྲུང་གོ་ཕྱོགས་ཀྱིས་བསྐྱར་སྐྲུན་བྱེད་རོགས་བྱས་པའི་རྣམ་གྲངས་གལ་ཆེན་གྱི་གྲས་ཤིག་རེད། ཨེ་ཁྭ་ཏོར་འགྲིམ་འགྲུལ་དང་སྤྱི་པའི་ལས་གྲྭ་པུའི་གྲངས་གཞི་ལས་མངོན་པར། གཞུང་ལམ་དེ་བསྐྲུན་རྗེས་གྲོང་མི་ཁྲི་10ལྷག་ཙམ་ལ་ཕན་པ་ཐོབ་ཡོད། གཞུང་ལམ་དེས་ད་དུང་དབུས་བྱང་རྒྱུད་ས་ཁུལ་གྱི་ཞིང་ཆེན་མང་པོ་སྦྲེལ་མཐུད་ཐུབ་སྟེ། གྲོང་ཁྱེར་མང་པོ་ཞིག་ནས་ནུབ་རྒྱུད་ཞི་བདེ་རྒྱ་མཚོ་ཆེན་པོའི་མཚོ་རྒྱུད་ས་ཁུལ་དུ་སྐྱོད་པར་སྟབས་བདེ་བསྐྲུན་ཡོད།
གཞུང་ལམ་དེ་ཀྲུང་གོ་ལམ་ཟམ་ལས་གྲྭ་ཚད་ཡོད་འགན་འཁྲི་ཀུང་སིས་སྐྲུན་འགན་འཁུར་བ་དང་། 2018ལོའི་ལོ་མཇུག་ཏུ་དངོས་སུ་ལས་འགོ་བཙུགས་ནས་2023ལོའི་ཟླ་11པར་ལས་མཇུག་འགྲིལ་ཏེ་རླངས་འཁོར་ཤར་གཏོང་ཐུབ་ཡོད། ཀྲུང་གོ་ལམ་ཟམ་ཨེ་ཁྭ་ཏོར་ཡན་ལག་ཀུང་སིའི་འགན་འཁུར་བ་ཀའོ་ཡོན་ཧའེ་ཡིས། གཞུང་ལམ་དེའི་ལམ་ཐིག་ཨེ་ཁྭ་ཏོར་གྱི་དབུས་བྱང་གྲོང་ཁྱེར་ནས་ནུབ་རྒྱུད་ཀྱི་མཚོ་འགྲམ་གྲོང་ཁྱེར་དུ་སྐྱོད་སའི་ལམ་ཐག་ཐུང་ཤོས་སུ་གྱུར་ཡོད། རྒྱལ་ས་ཁེ་ཐོའི་གྲོང་མིའི་ངོས་ནས་བརྗོད་ན། གཞུང་ལམ་དེ་ཁོ་ཚོའི་ཕྱིར་སྐྱོད་ཀྱི་གདམ་ག་གསར་པར་གྱུར་ཡོད། གཞུང་ལམ་ཐོག་དངོས་སུ་རླངས་འཁོར་ཤར་གཏོང་བྱེད་སྐབས་ཨེ་ཁྭ་ཏོར་གྱི《འཇིག་རྟེན་ཚགས་པར》ཐོག“དེ་ནི་ས་གནས་དེ་གའི་གྲོང་མིས་ལོ་30ལྷག་ཙམ་རེ་སྒུག་བྱས་པའི་གཞུང་ལམ་ཞིག་རེད”ཅེས་འཁོད་ཡོད་པ་གསར་འགོད་པར་བཤད་བྱུང་།
“ཕར་འགྲོ་ཚུར་འོང་བྱེད་མཁན་མང་དུ་སོང་བས་ཚོང་ཡང་རང་བཞིན་གྱིས་ཡག་ཏུ་ཕྱིན་སོང”བེ་ཏ་ཚོང་མཁན་གྱི་སྦྱིན་བདག་མཱ་ཧྲ·སང་པུའུ་ལ་ནུའོ་ཡིས། གཞུང་ལམ་བསྐྲུན་རྗེས་ལམ་རྒྱུད་ཀྱི་སྒུལ་བདེའི་སྦྲེལ་ཚུགས་སོགས་ཀྱི་རྨང་གཞིའི་སྒྲིག་བཀོད་ལེགས་སུ་སྔར་བས་ཕྱིན་པ་དང་གཙང་པོའི་ཉེ་འགྲམ་དང་ཁོར་ཡུག་དེ་བས་ཡག་པའི་ཞིང་ར་ཁག་གཅིག་གིས་ད་དུང་དམངས་སྲོལ་གནས་ཚང་གཉེར་སྐྱོང་བྱས་ཡོད། “འདི་ནི་ཕྱུག་འགྱུར་གྱི་ལམ་ཞིག་རེད”ཅེས་གསར་འགོད་པར་བཤད་བྱུང་།
“གཞུང་ལམ་འདིས་ས་གནས་དེ་གའི་ཐོན་སྐྱེད་དང་དཔལ་འབྱོར་འཕེལ་རྒྱས་ལ་ཤུགས་རྐྱེན་བཟང་པོ་ཐེབས་ཡོད”ཨེ་ཁྭ་ཏོར་འགྲིམ་འགྲུལ་དང་སྤྱི་པའི་བཟོ་སྐྲུན་པུའི་ཡན་ལག་ཁུལ་དང་པོའི་དྲུང་ཆེ་ལུའུ་དབྱི་སི·སི་ཕེ་ཡིས། འབྱུང་འགྱུར་གཞུང་ལམ་དེ་མུ་མཐུད་ཤར་ཕྱོགས་སུ་སྣུར་སྲིང་བྱས་ཏེ་རྒྱལ་ཁབ་དེའི་བྱང་རྒྱུད་དུ་སྤྱི་ལེ་200ཡི་མ་ལམ་ཞིག་ཆགས་པར་བྱས་ནས་གཏེར་ཁུལ་དང་འབྲོག་ལས་ཁུལ་སོགས་དང་སྦྲེལ་མཐུད་བྱ་རྒྱུ་རེད་ཅེས་གསར་འགོད་པར་བཤད་བྱུང་།
ཀྲུང་གོ་ལམ་ཟམ་ཨེ་ཁྭ་ཏོར་ཡན་ལག་ཀུང་སིའི་ལས་གྲྭ་པུའུ་ཡི་ཅིང་ལི་ཀྲོའུ་ཅུན་གྱིས། རྣམ་གྲངས་འཛུགས་སྐྲུན་བྱེད་རིང་། ཁོངས་གཏོགས་ཅན་གྱི་དོ་དམ་བྱས་པ་དང་ཨར་ལས་བྱེད་མཁན་མང་ཆེ་བ་ནི་ས་གནས་དེ་གའམ་ཡང་ན་ཉེ་འགྲམ་ཁུལ་ཁོངས་ཀྱི་གྲོང་མི་ཡིན་པ་དང་ལས་ཞུགས་ལས་གནས་དང་གསོ་སྦྱོང་གོ་སྐབས་300ལྷག་ཙམ་མཁོ་འདོན་བྱས་ཡོད་ཅེས་གསར་འགོད་པར་བཤད་བྱུང་། “ཀྲུང་གོའི་ཀུང་སིས་ས་གནས་དེ་གའི་ལས་མི་གླས་པ་མ་ཟད། ད་དུང་ཁོང་ཚོར་གསོ་སྦྱོང་བྱས་ནས་འབྱུང་འགྱུར་ལས་ཀ་གཞན་དག་བྱེད་པར་སྟབས་བདེ་སྐྲུན་པ་དེས་ང་ཚོའི་ཡུན་རིང་འཕེལ་རྒྱས་ཀྱི་ངོས་ནས་བརྗོད་ན་གལ་འགངས་ཤིན་ཏུ་ཆེ”ཞེས་སི་ཕེ་ཡིས་བཤད།
2018ལོར་ཀྲུང་གོ་དང་ཨེ་ཁྭ་ཏོར་དབར“རྒྱུད་གཅིག་ལམ་གཅིག”མཉམ་སྐྲུན་གྱི་བསམ་ཤེས་བརྗེད་ཐོར་མིང་རྟགས་བཀོད་པ་དང་། 2019ལོར་ཨེ་ཁྭ་ཏོར་ནི་ཨེ་ཤེ་ཡའི་མ་འཇོག་དངུལ་ཁང་ནང་དངོས་སུ་ཞུགས་པའི་ལ་ཏིང་མེ་གླིང་གི་རྒྱལ་ཁབ་དང་པོར་གྱུར་པ། ན་ནིང་ཟླ་5པར་ཀྲུང་གོ་དང་ཨེ་ཁྭ་ཏོར་དབར་གྱི་རང་མོས་ཚོང་དོན་གྲོས་ཆོད་ལ་དངོས་སུ་ནུས་པ་ཐོན་པ་རེད། “ཨེ་ཁྭ་ཏོར་དང་ཀྲུང་གོའི་དབར་གྱི་འབྲེལ་བ་རྒྱུན་ཆད་མེད་པར་གཏིང་ཟབ་ཏུ་ཕྱིན་པ་ལས་རྒྱལ་ཁབ་གཉིས་པོའི་མི་དམངས་ཚང་མར་དེའི་ཁྲོད་ནས་ཕན་པ་ཐོབ་ཡོད” མོ་ལེ་ནོ་ཡིས། ཨེ་ཁྭ་ཏོར་གྱིས་དཔལ་འབྱོར་ཚོང་དོན་དང་། མ་འཇོག རིག་གནས་སྤེལ་རེས་སོགས་ཁྱབ་ཁོངས་ཁག་ནང་ཀྲུང་གོ་དང་འབྲེལ་བ་བྱེད་པར་མུ་མཐུད་ཤུགས་སྣོན་རྒྱག་རྒྱུའི་རེ་བ་ཡོད། “འབྱུང་འགྱུར་ཀྲུང་གོའི་མ་འཇོག་བྱེད་མཁན་དེ་བས་མང་བ་ཡོང་རྒྱུའི་རེ་སྒུག་བྱེད་ཀྱི་ཡོད”ཅེས་བཤད།
(འདི་ག་ཚགས་པར་ཁང་དུ་ཨེ་ཁྭ་ཏོར་ཅི་ཉིང་ཏེ་ནས་འབྱོར་བའི་གློག་འཕྲིན)