“འགན་འཁུར་བའི་རྒྱལ་ཁབ་ཆེན་པོ་ཞིག་ཡིན་པའི་ཀྲུང་གོས་གོ་ལ་ཧྲིལ་པོའི་བཅོས་སྐྱོང་མ་ལག་འཐུས་སྒོ་ཚང་དུ་གཏོང་བའི་ཐད་ནུས་པ་གལ་ཆེན་བཏོན་ནས། རྒྱལ་སྤྱིའི་སྤྱི་ཚོགས་ལ་སྤྱི་པའི་ཐོན་རྫས་མང་པོ་མཁོ་འདོན་བྱས་ཡོད”ཉེ་ཆར། ཧིན་རྡུ་ཉི་ཞི་ཡའི་རྒྱལ་ཁབ་ཞིབ་འཇུག་གསར་གཏོད་ཧྲུའུ་ཡི་ཞིབ་འཇུག་པ་ཧཱ་ཡ་ཐི·ནོ་ཧྥུའུ་སི་ཡིས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས། ཀྲུང་གོས་གཉིས་ཕན་གཉིས་ཁེ་དང་ཐུན་མོང་འཕེལ་རྒྱས་ཀྱི་འདོད་ཚུལ་འཛིན་ནས་འཛམ་གླིང་ལ་ལེགས་སྐྱེས་གལ་ཆེན་ཕུལ་ཡོད་ཅེས་བརྗོད།

ན་ནིང་ཟླ་4པར། ནུའོ་ཧྥུའུ་སི་ཧིན་རྡུ་ཉི་ཞི་ཡའི་མཁས་དབང་གི་འཐུས་མི་ཚོགས་པ་དང་མཉམ་དུ་ཀྲུང་གོར་འཚམས་འདྲི་དང་སྤེལ་རེས་ལ་ཕེབས་པ་དང་། ད་ཐེངས་ཀྲུང་གོར་ཕེབས་་སྐབས་ཤིས་ཨན་གྲོང་ཁྱེར་ལིན་ཐུང་ཆུས་ཏའེ་ཝང་ཁྲོམ་གཞུང་ཧྲན་རེན་གྲོང་ཚོས་ནུའོ་ཧྥུའུ་སིར་བག་ཆགས་ཟབ་མོ་བཞག་ཡོད། “ཀྲུང་གོ་སྲིད་གཞུང་གིས་ཞིང་ལས་དང་གྲོང་གསེབ་འཕེལ་རྒྱས་ལ་མཐོང་ཧ་ཅང་ཆེན་པོ་བྱེད་ཀྱི་འདུག ཧྲན་རེན་གྲོང་ཚོ་ནས་ང་ཚོས་ས་གནས་དེ་གའི་སྲིད་གཞུང་གིས་གྲོང་གསེབ་དར་རྒྱས་ལ་སྐུལ་འདེད་གཏོང་བར་འབད་བརྩོན་བྱས་པ་མཐོང་བྱུང”ཞེས་ནུའོ་ཧྥུའུ་སི་ཡིས་བརྗོད་པ་དང་། ཁོང་གིས། ཧྲན་རེན་གྲོང་ཚོས་ས་གནས་དེ་གའི་ལེགས་ཆ་སྔོག་འདོན་ཧུར་ཐག་བྱས་ནས། ཡུལ་སྐོར་ལས་རིགས་དང་ཁྱད་ལྡན་ཞིང་ལས་ཐོན་རྫས་ལས་སྣོན་ལས་རིགས་སོགས་འཕེལ་རྒྱས་བཏང་བའི་ཉམས་མྱོང་དེ་དག་རྒྱལ་ཁབ་གཞན་གྱིས་སློབ་སྦྱོང་བྱེད་རིན་འདུག ཀྲུང་གོ་སྲིད་གཞུང་གིས་འཕེལ་རྒྱས་ཀྱི་འཐབ་ཇུས་དང་འཆར་འགོད་གང་ལེགས་བཟོས་ཏེ་དབུལ་སྒྲོལ་འགག་སྒྲོལ་དང་གྲོང་གསེབ་དར་རྒྱས་ལ་རྒྱུན་མཐུད་ཆོག་པའི་རང་བཞིན་ལྡན་པར་བྱས་ཡོད་ཅེས་བརྗོད།

“ཀྲུང་གོ་སྲིད་གཞུང་གིས་ཐོག་མཐའ་བར་གསུམ་དུ་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་འདུ་ཤེས་མཐའ་འཁྱོངས་བྱེད་ཀྱི་ཡོད་ལ། འཕེལ་རྒྱས་ཀྱི་མཐར་གཏུག་དམིགས་ཡུལ་ནི་མི་དམངས་ཀྱི་ཆེད་དུ་རེད”ནུའོ་ཧྥུའུ་སི་ཡིས“ཀྲུང་གོས་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་མགྱོགས་མྱུར་གཏོང་བ་དང་། མི་དམངས་ཀྱི་འཚོ་བའི་ཆུ་ཚད་རྒྱུན་ཆད་མེད་པར་མཐོ་རུ་བཏང་ནས་མི་དམངས་མང་ཚོགས་ཀྱི་རྩ་བའི་ཁེ་ཕན་ལ་་འགན་ལེན་ཏན་ཏིག་བྱེད་ཀྱི་ཡོད། ཀྲུང་གོའི་ལུགས་ཀྱི་དེང་རབས་ཅན་འཕེལ་རྒྱས་མགྱོགས་མྱུར་གཏོང་བ་དང་ཆབས་ཅིག རྒྱལ་ཁབ་གཞན་དག་ལའང་ཤུགས་རྐྱེན་བཟང་པོ་ཐེབས་ཏེ་དཔྱད་གཞིར་འཛིན་ཆོག་པའི་འཕེལ་རྒྱས་ཀྱི་ཉམས་མྱོང་མཁོ་འདོན་བྱས་ཡོད”ཅེས་བརྗོད།

ཉེ་བའི་ལོ་ཤས་རིང་། ཀྲུང་གོ་དང་ཧིན་རྡུ་ཉི་ཞི་ཡས་ནུས་རྒྱུ་གསར་པའི་ཐོན་ལས་ཐད་མཉམ་ལས་མང་པོ་བྱས་ཤིང་། ནུའོ་ཧྥུའུ་སི་ཡིས། “ཀྲུང་གོའི་ནུས་རྒྱུ་གསར་པའི་ཐོན་ནུས་ནི་རྒྱལ་ཁབ་མང་པོ་དང་ལྷག་པར་དུ་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་མཁོ་བ་ཞིག་རེད། ཧིན་རྡུ་ཉི་ཞི་ཡ་དང་ཀྲུང་གོས‘རྒྱུད་གཅིག་ལམ་གཅིག’མཉམ་སྐྲུན་མཉམ་ལས་ཁྲོད། རྣམ་གྲངས་མང་པོ་ཞིག་ནུས་རྒྱུ་གསར་པའི་ཐོན་ལས་དང་འབྲེལ་བ་ཡོད་པ་དེས་ཧིན་རྡུ་ཉི་ཞི་ཡར་སྤུས་ལེགས་ཐོན་རྫས་དང་སྔོན་ཐོན་ལག་རྩལ་ཁྱེར་བ་དང་། ང་ཚོར་ཐོན་ལས་ཀྱི་ཤེས་ལྡན་པ་མང་པོ་གསོ་སྐྱོང་བྱ་རྒྱུར་རོགས་རམ་བྱས་ཏེ་ཧིན་རྡུ་ཉི་ཞི་ཡའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་ནུས་ལྡན་བཏང་ཡོད”ཅེས་བརྗོད།

(འདི་ག་ཚགས་པར་ཁང་དུ་ཅ་ཁར་ཐ་ནས་འབྱོར་བའི་གློག་འཕྲིན)