ཉིན་ཤས་གོང་། ཨེ་ཙེ་ཨོ་ཕི་ཡའི་ཨེ་ཏི་སི་ཨ་པ་པ་སློབ་ཆེན་གྱི་སློབ་སྤྱི་སའེ་མོར·ཁོ་ཧྥོ་ལེ་ཡིས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས། “ཉེ་བའི་ལོ་ཤས་རིང་། ཨེ་ཙེ་ཨོ་ཕི་ཡ་དང་ཀྲུང་གོའི་འབྲེལ་བ་འཕེལ་རྒྱས་མྱུར་པོ་ཕྱིན་པ་དང་རྒྱལ་ཁབ་གཉིས་པོའི་དུས་དང་རྣམ་པ་ཀུན་གྱི་འཐབ་ཇུས་རོགས་ཟླའི་འབྲེལ་བ་རྒྱུན་ཆད་མེད་པར་མདུན་ཕྱོགས་སུ་སྐུལ་འདེད་གཏོང་གི་ཡོད། ཕྱོགས་གཉིས་པོས་ཆབ་སྲིད་དང་། དཔལ་འབྱོར། རིག་གནས་སོགས་ཁྱབ་ཁོངས་སུ་མཉམ་ལས་དམ་ཟབ་བྱས་ཏེ། ཆབ་སྲིད་ཐད་ཕན་ཚུན་ཡིད་ཆེས་དང་། དཔལ་འབྱོར་ཚོང་དོན་མཉམ་ལས། མི་ཆོས་རིག་གནས་སྤེལ་རེས་བཅས་ནི་ཨེ་ཙེ་ཨོ་ཕི་ཡ་དང་ཀྲུང་གོའི་འབྲེལ་བའི་ཀ་རྟེན་གལ་ཆེན་ཞིག་ཡིན། རྒྱལ་ཁབ་གཉིས་པོའི་སློབ་གསོ་དང་། རིག་གནས། ཡུལ་སྐོར་སོགས་ཁྱབ་ཁོངས་ཀྱི་མཉམ་ལས་ཀྱིས་ཕྱོགས་གཉིས་པོའི་འབྲེལ་བ་འཕེལ་རྒྱས་འགྲོ་བར་གསོན་ཤུགས་གསར་པ་རྒྱུན་ཆད་མེད་པར་བསྣན་ཡོད”ཅེས་བརྗོད།

ཁོ་ཧྥོ་ལེ་ཡིས། ཀྲུང་གོའི་ཁེ་ལས་ཀྱིས་མ་དངུལ་བཏང་ནས་ཨེ་ཙེ་ཨོ་ཕི་ཡར་མྱུར་བགྲོད་གཞུང་ལམ་དང་། གྲོང་ཁྱེར་གྱི་ཐེག་ཆུང་མེ་འཁོར། རྒྱལ་ཁབ་བཟོ་ལས་གླིང་སོགས་མཚོན་རྟགས་རང་བཞིན་གྱི་རྣམ་གྲངས་བསྐྲུན་པ་དང་། མཉམ་ལས་ཀྱི་གྲུབ་འབྲས་དག་གིས་ཨེ་ཙེ་ཨོ་ཕི་ཡའི་དེང་རབས་ཅན་འཕེལ་རྒྱས་ལ་སྐུལ་མ་ཐེབས་ཡོད། སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་གྱི་སྒྲོམ་གཞིའི་འོག ཨེ་ཙེ་ཨོ་ཕི་ཡ་དང་ཀྲུང་གོའི་མི་ཆོས་རིག་གནས་སྤེལ་རེས་ཀྱི་མཉམ་ལས་ཟབ་ཏུ་རྒྱུན་ཆད་མེད་པར་ཕྱིན་ཡོད། 2023ལོའི་ལོ་མཇུག་ཏུ་ཨེ་ཏི་སི་ཨ་པ་པ་སློབ་ཆེན་ཁུང་ཙི་སློབ་གླིང་བཙུགས་ནས་ལོ་10འཁོར་ཡོད། ལོ་10ལྷག་ཙམ་རིང་། ཨེ་ཙེ་ཨོ་ཕི་ཡའི་སློབ་མ་མི་ཐེངས་ཁྲི་ལ་ཉེ་བ་ཁུང་ཙི་སློབ་གླིང་གི་ཕུན་སུམ་ཚོགས་པའི་རྒྱ་ཡིག་སློབ་ཁྲིད་རྣམ་གྲངས་ནང་ཞུགས་པ་དང་། དེ་ནི་རྒྱལ་ཁབ་གཉིས་པོའི་མཛའ་གྲོགས་ལ་ལོ་རྒྱུས་ཡུན་རིང་ལྡན་པའི་བསྡུས་རིས་གསར་པ་ཞིག་རེད་ཅེས་བརྗོད།

ཨེ་ཏི་སི་ཨ་པ་པ་སློབ་ཆེན་ཁུང་ཙི་སློབ་གླིང་ནི་ཐེན་ཅིན་ལས་རིགས་ལག་རྩལ་དགེ་འོས་སློབ་ཆེན་དང་ཨེ་ཏི་སི་ཨ་པ་པ་སློབ་ཆེན་གྱིས་མཉམ་དུ་བཙུགས་པ་ཞིག་རེད། ཁོ་ཧྥོ་ལེ་ཡིས། ཕྱོགས་གཉིས་པོའི་མཉམ་ལས་ཀྱིས་ཨེ་ཙེ་ཨོ་ཕི་ཡའི་ས་གནས་དེ་གའི་དགོས་མཁོ་དང་མཐུན་པའི་རྒྱ་ཡིག་སློབ་ཁྲིད་མ་ལག་འཛུགས་པར་རོགས་རམ་བྱས་པ་མ་ཟད། ཨེ་ཙེ་ཨོ་ཕི་ཡའི་འཕེལ་རྒྱས་ལ་ཤེས་ལྡན་པ་དེ་བས་མང་བ་གྲབས་གསོག་བྱས་ཡོད་ཅེས་བརྗོད།

མཉམ་ལས་ཀྱི་མདུན་ལམ་སྐོར་གླེང་སྐབས་ཁོ་ཧྥོ་ལེ་ཡིས། “ཀྲུང་གོ་ནི་ཨ་ཧྥེ་རི་ཁས་ཆེས་བློས་འགེལ་ཆོག་པའི་འཕེལ་རྒྱས་ཀྱི་རོགས་ཟླ་ཞིག་རེད། འབྱུང་འགྱུར་ཨེ་ཏི་སི་ཨ་པ་པ་སློབ་ཆེན་གྱིས་ཀྲུང་གོའི་མཐོ་རིམ་སློབ་གསོའི་སྒྲིག་གཞི་དང་ཞིབ་འཇུག་ལས་ཁུངས་དབར་གྱི་མཉམ་ལས་ལ་སྔར་བས་ཤུགས་སྣོན་དང་། ལྷག་པར་དུ་མཉམ་འབྲེལ་ཞིབ་འཇུག་རྣམ་གྲངས་དང་རིག་གནས་སྤེལ་རེས་ཐད་རྒྱལ་ཁབ་གཉིས་པོའི་མཛའ་གྲོགས་ཟབ་ཏུ་གཏོང་བར་འབྲེལ་ཟམ་གྱི་ནུས་པ་མུ་མཐུད་འདོན་གྱི་ཡིན”ཞེས་བརྗོད།