སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རིག་གནས་རྒྱུན་འཛིན་དང་འཕེལ་རྒྱས་ཀྱི་བཞུགས་མོལ་ཚོགས་འདུའི་ཐོག“ཀྲུང་ཧྭའི་ཤེས་དཔལ་ལ་གསར་གཏོད་རང་བཞིན་ལྡན་པ་དེས་ཀྲུང་ཧྭ་མི་རིགས་ཀྱིས་དྲང་གཞག་སྲུང་བ་ལས་རྙིང་ཞེན་མི་བྱེད་པ་དང་། གནའ་བོའི་རིག་གནས་ལ་བརྩི་འཇོག་བྱེད་པ་ལས་གནའ་བོའི་རིག་གནས་འདྲ་བཟོ་མི་བྱེད་པའི་ཡར་བརྩོན་གྱི་སྙིང་སྟོབས་དང་། འགྲན་སློང་གསར་པར་མི་སྐྲག་པ་དང་བྱ་དངོས་གསར་པ་དང་ལེན་བྱེད་ཕོད་པའི་ཀྲུང་ཧྭ་མི་རིགས་ཀྱི་ཞུམ་པ་མེད་པའི་གཤིས་རྒྱུད་རྩ་བའི་ཐོག་ནས་གཏན་འཁེལ་བྱས་ཡོད”ཅེས་བསྟན་གནང་ཡོད།

དྲང་གཞག་སྲུང་བ་ལས་རྙིང་ཞེན་མི་བྱེད་པ་དང་གནའ་བོའི་རིག་གནས་ལ་བརྩི་འཇོག་བྱེད་པ་ལས་གནའ་བོའི་རིག་གནས་འདྲ་བཟོ་མི་བྱེད་པའི་ཡར་བརྩོན་གྱི་སྙིང་སྟོབས་དེ་འདྲ་ཞིག་ཡོད་པའི་དབང་གིས་ཀྲུང་ཧྭ་མི་རིགས་ཀྱིས་ལོ་རྒྱུས་རིང་ཞིང་རྒྱ་ཆེ་ལ་གཏིང་ཟབ་པའི་ཀྲུང་ཧྭའི་ཤེས་དཔལ་གསར་གཏོད་བྱས་ཡོད། དངོས་པོའི་དཔལ་ཡོན་དང་། བསམ་པའི་དཔལ་ཡོན། ལམ་ལུགས་ཀྱི་དཔལ་ཡོན་སོགས་ཕྱོགས་གང་གི་ཐད་ནས་བལྟས་ཀྱང་ཀྲུང་ཧྭ་མི་རིགས་ཀྱིས་ལོ་རྒྱུས་ཐོག་འཛམ་གླིང་སྐྱེ་བོ་ཀུན་ཡིད་སྨོན་སྐྱེ་འོས་པའི་ངོ་མཚར་བཏོད་ཅིང་། དངོས་པོའི་དཔལ་ཡོན་ཐད་རྫ་ཆས་དང་། ཟངས་ཆས། ལྕགས་ཆས་སོགས་ཐོན་སྐྱེད་དང་འཚོ་བའི་ཡོ་བྱད་ཀྱི་རྒྱུ་ཆ་རྒྱུན་ཆད་མེད་པར་གསར་བརྗེས་བྱས་པ་དང་། ལྕགས་རི་རིང་པོ་དང་། ཕོ་བྲང་པོ་ཏ་ལ། ཏུའུ་ཅང་ཡན་སོགས་ལས་གྲྭ་རླབས་པོ་ཆེ་རྒྱུན་ཆད་མེད་པར་གསར་སྐྲུན་བྱས་པ། ཤོག་བུ་དང་། ཐགས་ཁྲི། འབྲུག་དབྱིབས་ཆུ་འཁོར། སྐར་དཔྱད་ཡོ་ཆས། ས་ཡོམ་བརྟག་ཆས་སོགས་མཚོན་རྟགས་རང་བཞིན་གྱི་ཚན་རྩལ་ཐོན་རྫས་རྒྱུན་ཆད་མེད་པར་གསར་གཏོད་བྱས་པ་ལ་སོགས་རེད། བསམ་པའི་དཔལ་ཡོན་ཐད་ང་ཚོའི་རྩོམ་རིག་དང་། སྒྱུ་རྩལ། བསམ་བློ། ཀུན་སྤྱོད་བཅས་ཕྱོགས་གང་ཅིའི་ཐད་ཀྱི་གྲུབ་འབྲས་ཀྱིས་མིའི་རིགས་ལ་རྒྱུན་མཐུད་ཤུགས་རྐྱེན་ཐེབས་བཞིན་ཡོད། ཆིན་རྒྱལ་རབས་གོང་མའི་ལྷ་སྒྲུང་དང་། ཐང་རྒྱལ་རབས་ཀྱི་སྙན་ངག སུང་རྒྱལ་རབས་ཀྱི་སྙན་ངག མིང་དང་ཆིང་རྒྱལ་རབས་ཀྱི་བརྩམས་སྒྲུང་སོགས་ཀྱིས་སོ་སོའི་ཁྱབ་ཁོངས་སུ་ཤུགས་རྐྱེན་ཆེན་པོ་ཐེབས་བཞིན་ཡོད་པ། གེ་སར་དང་། ཅང་ཀེར། མཱ་ནཱ་སི་སོགས་ལོ་རྒྱུས་མཚོན་པའི་སྙན་ངག་ནི་མི་རྣམས་ཧང་སངས་དགོས་པ་ཞིག་ཡོད་པ། ཀྲུང་ལུགས་དང་། བོད་ལུགས། མེའོ་ལུགས། སོག་ལུགས་སོགས་གསོ་རིག་གིས་རང་སོའི་ནུས་པ་འདོན་བཞིན་ཡོད། ལམ་ལུགས་ཀྱི་དཔལ་ཡོན་ཐད་ཀྲུང་ཧྭ་མི་རིགས་ཀྱིས་རྒྱལ་ཁབ་ཀྱི་ལམ་ལུགས་དང་རྒྱལ་ཁབ་བཅོས་སྐྱོང་སྐོར་གྱི་བསམ་བློ་ཕུན་སུམ་ཚོགས་པོ་བསགས་ཡོད་ཅིང་། ཅུན་རྫོང་ལམ་ལུགས་དང་། ས་ཞིང་ལམ་ལུགས། དཔྱ་ཁྲལ་ལམ་ལུགས། ཚན་འབྱེད་རྒྱུགས་ལེན་ལམ་ལུགས། ལྟ་ཞིབ་ལམ་ལུགས། དམག་དོན་ལམ་ལུགས་སོགས་ཕྱོགས་གང་ཅིའི་ཐད་ཀྱི་ལམ་ལུགས་ཀྱིས་ཀྲུང་གོའི་སྲོལ་རྒྱུན་སྤྱི་ཚོགས་ཡུན་རིང་གནས་པ་དང་འཕེལ་རྒྱས་འགྲོ་བར་ལམ་ལུགས་ཀྱི་འདེགས་སྐྱོར་བརྟན་པོ་བྱས་ཡོད། དེང་འདིར་ང་ཚོས་འཛམ་གླིང་ཐོག་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལམ་ལུགས་ཀྱི་འགྲན་ཟླ་བྲལ་བའི་ཁྱད་འཕགས་རང་བཞིན་གང་ལེགས་མངོན་བཞིན་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“གསར་གཏོད་ནི་མི་རིགས་ཤིག་ཡར་ཐོན་ཡོང་བའི་བླ་སྲོག་ཡིན་ལ། རྒྱལ་ཁབ་ཅིག་དར་རྒྱས་གོང་འཕེལ་ཡོང་བའི་རྫོགས་མཐའ་མེད་པའི་སྒུལ་ཤུགས་དང་། ཀྲུང་ཧྭ་མི་རིགས་ཀྱི་ཆེས་གཏིང་ཟབ་པའི་མི་རིགས་ཀྱི་སྐྱེས་ཐོབ་ཀྱང་ཡིན”ཞེས་བསྟན་གནང་ཡོད། ཀྲུང་ཧྭའི་ཤེས་དཔལ་གྱི་གསར་གཏོད་རང་བཞིན་སྔོན་ཆད་ཀྱི་ཕྱོགས་གང་ཅིའི་ཐད་ནས་མངོན་ཡོད་ལ། དེང་གི་ལས་རིགས་ཁག་ནས་དེ་བས་ཀྱང་མངོན་ཡོད། ཀྲུང་ཧྭའི་རིག་གནས་ཀྱི་གྲུབ་ཆ་གལ་ཆེན་ཞིག་ཡིན་པའི་བོད་ཀྱི་རིག་གནས་རྒྱུན་ཆད་མེད་པར་རྒྱུན་འཛིན་དང་འཕེལ་རྒྱས་བྱུང་དོན་ནི་མི་རིགས་ཁག་དབར་ཡུན་རིང་འགྲོ་འོང་དང་། སྤེལ་རེས། མཉམ་འདྲེས་བཅས་བྱེད་པའི་ལོ་རྒྱུས་ཀྱི་འཕེལ་རིམ་ཁྲོད་ཤེས་དཔལ་གྱི་གཞི་རྒྱུ་འདྲ་བཟོ་དང་འཕེལ་འགྱུར་བྱུང་ནས་འགྲན་སློང་གསར་པར་མི་སྐྲག་པ་དང་བྱ་དངོས་གསར་པ་དང་ལེན་བྱེད་ཕོད་པའི་ཞུམ་པ་མེད་པའི་གཤིས་རྒྱུད་བཏོད་པས་རེད།

ལོ་རྒྱུས་རྒྱུན་འཛིན་བྱེད་ཐབས་ཡག་ཤོས་ནི་ལོ་རྒྱུས་གསར་པ་གཏོད་རྒྱུ་དེ་ཡིན། གསར་གཏོད་ནི་ལོ་རྒྱུས་ཁས་མི་ལེན་པ་དང་སྔར་སྲོལ་མེད་པར་བཟོ་བ་ཞིག་མིན་པར་སྲོལ་རྒྱུན་ལ་བརྩི་འཇོག་བྱེད་པའི་སྔོན་འགྲོའི་ཆ་རྐྱེན་འོག་རང་ངོས་གསར་བརྗེ་བྱེད་པ་ཞིག་རེད། རྒྱང་ལམ་གསར་པར་ང་ཚོས་བོད་ཀྱི་རིག་གནས་ལ་གསར་གཏོད་རང་བཞིན་གྱི་འགྱུར་ལྡོག་དང་གསར་གཏོད་རང་བཞིན་གྱི་འཕེལ་རྒྱས་ཡོང་རྒྱུར་སྐུལ་འདེད་གཏོང་བར། ངེས་པར་དུ་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་ཀྱིས་དེང་གི་མིའི་རིགས་ཀྱི་སྤྱི་ཚོགས་འཕེལ་རྒྱས་འགྲོ་ཚུལ་དང་། ཀྲུང་གོའི་ལུགས་ཀྱི་དེང་རབས་ཅན་ལ་འཕྲད་པའི་གནས་ཚུལ་གསར་པ་དང་འགྲན་སློང་གསར་པ་མཐོང་ཐུབ་པ་དང་། སྔ་གོམ་སོར་གནས་དང་སྔར་སོང་ལ་ཞེན་མི་ཆགས་པ། སྒོ་དབྱེ་བསྟུན་མཁས་མཐའ་འཁྱོངས་བྱེད་པ། ཀྲུང་ཧྭ་མི་རིགས་ཀྱི་སྤུན་ཟླའི་མི་རིགས་ཁག་གི་སྔོན་ཐོན་རིག་གནས་སློབ་སྦྱོང་དང་དཔྱད་གཞིར་འཛིན་པ། མིའི་རིགས་ཀྱི་ཕུལ་བྱུང་ཤེས་དཔལ་གྱི་གྲུབ་འབྲས་ཡོད་ཚད་བསྡུ་ལེན་བཅས་བྱས་ཏེ། བོད་ཀྱི་རིག་གནས་འཕེལ་རྒྱས་དང་གོང་འཕེལ་བཏང་ནས་ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་སྲོལ་གཏོད་བྱེད་པར་བོད་ཀྱི་མི་རིགས་ཁག་གི་མི་དམངས་ཀྱིས་འབུལ་འོས་པའི་ལེགས་སྐྱེས་འབུལ་དགོས།