གསར་འགོད་པར་རང་བྱུང་ཐོན་ཁུངས་པུའུ་ནས་ཤེས་རྟོགས་བྱུང་བར། ཉེ་ཆར་རྒྱལ་སྲིད་སྤྱི་ཁྱབ་ཁང་གིས《ཝུའུ་ཧན་གྲོང་ཁྱེར་གྱི་རྒྱལ་ཁབ་ས་ཆའི་བར་མཐོངས་ཀྱི་སྤྱིའི་འཆར་འགོད(2021—2035ལོ་བར)》ལ་དངོས་སུ་མཆན་བཀོད་བཀའ་ལན་སྤྲད་པ་རེད། དེར་བརྟེན་གྲོང་ཁྱེར་ཆེན་པོ་དང་ཤིན་ཏུ་ཆེ་བའི་གྲོང་ཁྱེར་གྱི་རྒྱལ་ཁབ་ས་ཆའི་བར་མཐོངས་ཀྱི་སྤྱིའི་འཆར་འགོད་ཆ་ཚང་ལ་རྒྱལ་སྲིད་སྤྱི་ཁྱབ་ཁང་གིས་མཆན་བཀོད་བཀའ་ལན་སྤྲད་པ་དེ་ཐོག་ནས་རང་རྒྱལ་གྱི་གཙོ་གནད་གྲོང་ཁྱེར་གྱི་འབྱུང་འགྱུར་འཕེལ་རྒྱས་ཀྱི་བར་མཐོངས་ཀྱི་འཆར་གཞི་བཀོད་ཟིན་པ་མཚོན་ཡོད། མིག་སྔར་རྒྱལ་ཡོངས་ཀྱི་ཞིང་ཆེན་དང་། གྲོང་ཁྱེར། རྫོང་བཅས་ཀྱི་རིམ་པ་ཁག་གི་རྒྱལ་ཁབ་ས་ཆའི་བར་མཐོངས་ཀྱི་སྤྱིའི་འཆར་འགོད་སྒྲིག་བཟོ་དང་ཆོག་མཆན་འགོད་པའི་ལས་དོན་སྤྱིར་ན་ལེགས་གྲུབ་ཟིན་ནས་རྒྱལ་ཁབ་ས་ཆའི་བར་མཐོངས་ཀྱི་འཆར་འགོད་ལས་དོན་དེ་ཕྱོགས་ཡོངས་ནས་ལག་བསྟར་བྱེད་པའི་དུས་མཚམས་སུ་སླེབས་ཡོད་པ་རེད།

རེས་སྐོར་དེའི་འཆར་འགོད་ནང་གྲོང་ཁྱེར་ཆེན་པོ་དང་ཤིན་ཏུ་ཆེ་བའི་གྲོང་ཁྱེར་གྱི་འཕེལ་རྒྱས་གཏོང་སྟངས་སྒྱུར་མགྱོགས་སུ་གཏོང་བའི་བླང་བྱ་དོན་འཁྱོལ་བྱས་ཏེ། འབྱུང་རྩ་ནས་བཅོས་སྒྲིག་དང་ཕྱོགས་བསྡུས་བཅོས་སྒྲིག་གི་ནུས་པ་འདོན་པ་དང་། འཕེལ་རྒྱས་ཀྱི་འདུ་ཤེས་གསར་པ་ཕྱོགས་ཡོངས་ནས་ལག་བསྟར་བྱེད་པ། མི་དམངས་ལྟེ་བར་འཛིན་པ་མཐའ་འཁྱོངས་བྱེད་པ། འཕེལ་རྒྱས་དང་བདེ་འཇགས་ལ་སྤྱི་འདོམས་བྱེད་པ། མི་དང་རང་བྱུང་ཁམས་ཞི་མཐུན་མཉམ་གནས་ལ་སྐུལ་འདེད་གཏོང་བ། རྒྱལ་ཁབ་ས་ཆའི་བར་མཐོངས་གསར་སྤེལ་སྲུང་སྐྱོང་གི་བཀོད་པ་སྤྱི་ཡོངས་ནས་ཇུས་འགོད་བྱེད་པ། གྲོང་ཁྱེར་ཆེན་པོ་དང་ཤིན་ཏུ་ཆེ་བའི་གྲོང་ཁྱེར་གྱི་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་ལ་སྐུལ་འདེད་གཏོང་བ་བཅས་བྱས་ནས་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བར་འདེགས་སྐྱོར་བརྟན་པོ་བྱས་ཡོད།