སློབ་འགོ་ཚུགས་སྐབས་མིང་ཐོ་འགོད་པའི་འགྲོ་གྲོན་གཏོང་བ་སོགས་ཀྱི་ཁ་བསླུས་རྒྱག་ཐབས་རིགས་ལ་གཟབ་གཟབ་བྱེད་དགོས།
ཤིན་ཧྭ་གསར་འགྱུར་ཁང་ཐེན་ཅིན་ནས་ཟླ་2ཚེས་16ཉིན་གློག་འཕྲིན་འབྱོར་གསལ། སློབ་འགོ་ཚུགས་ཉེའི་སྐབས། སློབ་མ་དང་ཁྱིམ་བདག་ལ་ཁ་བསླུས་མང་པོ་ཐེབས་པར་དམིགས་ནས། ཉེན་རྟོག་ཕྱོགས་ཀྱིས་རྒྱ་ཆེའི་ཁྱིམ་བདག་དང་སློབ་མ་ཚོར་ཟུར་ཁྲིད་འཛིན་གྲྭ་དང་། སློབ་ཞུགས་རོགས་དངུལ་སྤྲོད་པ། རོལ་རྩེད་ཀྱི་ཨང་རྟགས་ཉོ་འཚོང་བྱེད་པ་སོགས་དང་འབྲེལ་བའི་ཁ་བསླུས་རྒྱག་ཐབས་རིགས་ལ་དོགས་ཟོན་གྱིས་འགྲོ་གྲོན་གཏོང་སྐབས་བདེན་མིན་བརྟག་དཔྱད་བྱས་ནས་མགོ་སྐོར་འོག་ཏུ་མ་ཚུད་པར་བྱེད་དགོས་པའི་དྲན་སྐུལ་བྱས་ཡོད།
ཐེན་ཅིན་གྲོང་ཁྱེར་སྤྱི་བདེ་ཅུས་ཉེས་དོན་མྱུལ་ཞིབ་སྤྱི་ཁྱབ་རུ་ཁག་ཉིང་ལག་རུ་ཁག་བཞི་པའི་རུ་ཆེན་གསུམ་པའི་རུ་དཔོན་གཞོན་པ་ལི་ཅ་ལུའུ་ཡིས། སློབ་འགོ་ཚུགས་སྐབས། མགོ་སྐོར་གཏོང་མཁན་གྱི“གཡོ་ཐབས”ཧ་ཅང་མང་བ་སྟེ་དཔེར་ན། ཐོན་མང་བའི་ཟུར་ཁྲིད་འཛིན་གྲྭའི་རིགས་ཀྱི་ཁ་བསླུས་ནང་། ཁ་བསླུས་རྒྱག་མཁན་གྱིས་རང་ཉིད་ཟུར་ཁྲིད་སྒྲིག་གཞི་ནས་ཡིན་པའམ་ཡང་ན་སློབ་མ་ཡིན་ཁུལ་བྱས་ཏེ་སློབ་མའི་ཁྱིམ་བདག་ལ་འབྲེལ་བ་བྱས་ཏེ། སློབ་མ་ཟུར་ཁྲིད་འཛིན་གྲྭར་ཞུགས་དགོས་ལུགས་བརྗོད་དེ། ཁྱིམ་བདག་ལ་མིང་ཐོ་བཀོད་ནས་སློབ་ཡོན་རྩིས་རྒྱག་དགོས་པའི་རེ་བ་འདོན་གྱི་ཡོད། ཁ་བསླུས་རྒྱག་མཁན་གྱིས“མི་གྲངས་ལ་ཚད་ཡོད་པ”དང“མིང་ཐོ་འགོད་པའི་དུས་ཚོད་ཐིམ་གྲབས་ཡོད་པ”སོགས་ལ་ཁ་གཡར་ནས་མི་སེམས་ཚབ་ཏུ་བཅུག་ནས་ཁྱིམ་བདག་ལ་བདེན་མིན་བརྟག་དཔྱད་བྱེད་ཁོམ་མེད་པར་ཁ་བསླུས་རྒྱག་གི་ཡོད་ཅེས་བཤད།
སློབ་ཞུགས་རོགས་དངུལ་རིགས་ཀྱི་ཁ་བསླུས་ནང་། ཁ་བསླུས་རྒྱག་མཁན་གྱིས་སློབ་གྲྭའམ་ཡང་ན་སློབ་གསོ་ཅུས་ཀྱི་ལས་དོན་པ་ཡིན་ཁུལ་གྱིས་སློབ་ཞུགས་རོགས་དངུལ་གྱི་མི་གྲངས་ཀྱི་ཚད་ཡོད་པས། འབྲེལ་ཡོད་ཀྱི་འགྲོ་ལུགས་གཉེར་བའི་ཆ་འཕྲིན་མཁོ་འདོན་བྱས་ཚེ་སློབ་ཞུགས་རོགས་དངུལ་འཕྲལ་མར་ཁྱིམ་བདག་གི་རྩིས་ཁྲའི་ནང་བསྒྱུར་ཆོག་པའི་རྫུན་བཤད་པ་དང་། དེ་ནས་ཆ་འཕྲིན་རག་པའི་རྗེས། ཕ་རོལ་གྱིས“འབྲེལ་ཡོད་ཀྱི་འགྲོ་གྲོན་འཇལ་ཚེ་སློབ་ཞུགས་རོགས་དངུལ་རག་ཐུབ་པར”ཁ་གཡར་ཏེ། ཁྱིམ་བདག་ལ་དངུལ་བསྐུར་དགོས་པའི་རེ་བ་འདོན་གྱི་ཡོད།
བྲིན་རྫུ་དང་རོལ་རྩེད་ཨང་རྟགས་ཉོ་ཚོང་རིགས་ཀྱི་ཁ་བསླུས་དེ་སློབ་འགོ་ཚུགས་པའི་སྐབས་སློབ་ཆེན་ནང་ཡང་སེ་ཐོན་གྱི་ཡོད། ཁྲིམས་འགལ་བ་ཁག་ཅིག་གིས་སློབ་ཞོར་ཕོགས་ཆེན་སྤྲོད་པར་བསྙད་དེ་སློབ་མར་དྲ་བར་བྲིན་རྫུ་བྱེད་དུ་བཅུག་ནས་སྔོན་ལ་ཁེ་བཟང་ཆུང་ངུ་སྤྲད་པ་དང་། དེ་ནས་གནོད་འཚེ་ཕོག་མཁན་གྱིས་དངུལ་མང་པོ་བཏང་རྗེས། རྒྱུ་མཚན་སྣ་ཚོགས་ལ་ཁ་གཡར་ནས་དངུལ་ཕྱིར་སྤྲོད་མི་བྱེད་པར་ནག་གསུབ་གཏོང་གི་ཡོད། ཁ་བསླུས་རྒྱག་མཁན་ཁག་ཅིག་གིས་རོལ་རྩེད་ལས་སྟེགས་སམ་ཡང་ན་སྤྱི་ཚོགས་འབྲེལ་བའི་མཉེན་ཆས་ཐོག་རོལ་རྩེད་ཨང་རྟགས་ཉོ་སྒྲུབ་ཀྱི་བརྡ་ཁྱབ་བཏང་བར་གནོད་འཚེ་ཕོག་མཁན་གྱིས་དེ་བདེན་པར་བརྩིས་ནས་ཕ་རོལ་གྱིས་རེ་བ་བཏོན་པ་ལྟར་ཡོང་ཁུངས་མི་གསལ་བའི་ལས་སྟེགས་ལ་འགྲོ་གྲོན་བླུགས་རྗེས། ཕ་རོལ་གྱིས་ཡང་མ་ལག་ལ་སྐྱོན་ཤོར་བ་སོགས་ཀྱི་རྒྱུ་མཚན་བཤད་དེ་གནོད་འཚེ་ཕོག་མཁན་ལ་འགྲོ་གྲོན་དེ་བས་མང་བ་བླུག་དགོས་ཚུལ་གྱི་རེ་བ་བཏོན་ནས་མཐར་གནོད་འཚེ་ཕོག་མཁན་གྱིས་རང་ཉིད་མགོ་སྐོར་འོག་ཚུད་པ་མ་ཤེས་པར་མུ་མཐུད་གྲོན་དངུལ་བླུགས་ཀྱི་ཡོད།
ལི་ཅ་ལུའུ་ཡིས། ཁ་བསླུས་རྒྱག་མཁན་གྱིས་དགེ་སློབ་ལ་བརྫུས་ནས་སློབ་གསར་ཚོགས་པའི་ནང་འཛུལ་ཏེ། ལག་ཐོགས་ཁ་པར་དང་། ཁ་པར་གཱ་སོགས་དངོས་ཟོག་བཙོངས་པའང་ཡང་ན་དགེ་རྒན་ཡིན་ཁུལ་གྱིས་ཁྱིམ་བདག་ལ་ཡོང་ཁུངས་མི་གསལ་བའི་སྦྲེལ་མཐུད་ཆ་འཕྲིན་བསྐུར་ནས་དེ་སྣོན་དུ་བཅུག་སྟེ་མི་སྒེར་གྱི་ཆ་འཕྲིན་རྐུ་བར་དོགས་ཟོན་བྱེད་དགོས་ཞེས་བཤད།
“གནས་ཚུལ་དེ་རིགས་འཕྲད་སྐབས་འཕྲལ་མར་གཞུང་ཕྱོགས་ཀྱི་ཐབས་ལམ་བརྒྱུད་ནས་བདེན་མིན་བརྟག་དཔྱད་བྱེད་དགོས”ཞེས་ལི་ཅ་ལུའུ་ཡིས་བཤད་པ་དང་། ཁོང་གིས་སློབ་ཞུགས་རོགས་དངུལ་དང་། སློབ་སྐྱོར་དངུལ་བུན་སོགས་ཀྱི་སྲིད་ཇུས་དུས་རྒྱུན་སློབ་གྲྭའི་གཞུང་ཕྱོགས་ཀྱི་ཐབས་ལམ་ཐོག་ཁྱབ་བསྒྲགས་བྱེད་ཀྱི་ཡོད་པས། གཞུང་ཕྱོགས་མ་ཡིན་པའི་ཐབས་ལམ་བརྒྱུད་ནས་སྤེལ་བའི་ཆ་འཕྲིན་ལ་ཡིད་ཆེས་བྱེད་རྒྱུ་མེད་ལ། ཆ་རྒྱུས་མེད་པའི་རྩིས་ཁྲར་དངུལ་གཏན་ནས་གཏོང་རྒྱུ་མེད། སློབ་གསར་ཚོགས་པར་བཏང་བའི་འགྲོ་གྲོན་སོགས་ཀྱི་དོན་གནད་སྐོར་ལ་ངེས་པར་སློབ་གྲྭའི་དགེ་རྒན་དང་འབྲེལ་བ་བྱས་ནས། བདེན་མིན་བརྟག་དཔྱད་བྱེད་དགོས་པ་ལས་རང་དགར་གཞན་ལ་ཡིད་ཆེས་དང་ཡོངས་ཁུངས་མི་གསལ་བའི་དྲ་རྒྱའི་སྦྲེལ་མཐུད་བྱ་ཡུལ་ལ་སྣོན་པ་སོགས་བྱེད་མི་རུང་། “མི་བྱེད་པ་གསུམ་དང་། མང་ཙམ་གཅིག་གི”ཁ་བསླུས་འགོག་པའི་ཐབས་བཟང་སྟེ། ཡོངས་ཁུངས་མི་གསལ་བའི་སྦྲེལ་མཐུད་མི་སྣོན་པ་དང་། ཆ་རྒྱུས་མེད་པའི་ཁ་པར་ལ་ཡིད་ཆེས་མི་བྱེད་པ། སྒེར་གྱི་ཆ་འཕྲིན་མི་ཤོད་པ། དངུལ་བསྐུར་བར་བདེན་མིན་བརྟག་དཔྱད་མང་ཙམ་བྱེད་དགོས་པ་བཅས་བློ་ལ་བརྟན་པོར་ངེས་དགོས་པའི་དྲན་སྐུལ་བྱས་ཡོད།