སྡེ་ཚན་ཁག་17གྱིས་2025ལོའི“མཉམ་དུ་ཁེ་ལས་ལ་ཕན་འདོགས་པའི”ཁེ་ལས་འབྲིང་ཆུང་གི་ཞབས་ཞུའི་བྱ་སྤྱོད་སྤེལ་བ།
ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ཚེས་14ཉིན། གསར་འགོད་པར་བཟོ་འཕྲིན་པུའུ་ནས་ཤེས་རྟོགས་བྱུང་བར། བཟོ་འཕྲིན་པུའུ་དང་། རྒྱལ་ཁབ་འཕེལ་སྒྱུར་ཨུ་ལྷན། ནོར་སྲིད་པུའུ་སོགས་སྡེ་ཚན་ཁག་17གྱིས་མཉམ་དུ་བརྡ་ཐོ་བཏང་སྟེ། 2025ལོའི“མཉམ་དུ་ཁེ་ལས་ལ་ཕན་འདོགས་པའི”ཁེ་ལས་འབྲིང་ཆུང་གི་ཞབས་ཞུའི་བྱ་སྤྱོད་སྤེལ་བ་དང་། ཞབས་ཞུའི་བྱ་སྤྱོད་དེ་2025ལོའི་ལོ་འཁོར་མོར་སྤེལ་རྒྱུ་ཡིན་ཞིང་། སྲིད་ཇུས་ཀྱིས་ཁེ་ལས་ལ་ཕན་འདོགས་པ་དང་། ཁོར་ཡུག་གིས་ཁེ་ལས་ལ་གསོན་ཤུགས་སྦྱིན་པ། གསར་གཏོད་ཀྱིས་ཁེ་ལས་སྟོབས་ཆེར་གཏོང་བ། ཤེས་ལྡན་པས་ཁེ་ལས་དར་རྒྱས་གཏོང་བ། བཅའ་ཁྲིམས་ཀྱིས་ཁེ་ལས་ལ་སྲུང་སྐྱོང་བྱེད་པ་བཅས་ཕྱོགས་ལྔ་གཙོ་གནད་དུ་བཟུང་ནས་སྤེལ་རྒྱུ་མ་ཟད། ཟླ་6པར“ཁེ་ལས་འབྲིང་ཆུང་གི་ཞབས་ཞུའི་ཟླ་བའི” བྱེད་སྒོ་སྤེལ་རྒྱུ་རེད།
ཤེས་རྟོགས་བྱུང་བར་གཞིགས་ན། “མཉམ་དུ་ཁེ་ལས་ལ་ཕན་འདོགས་པའི”ཁེ་ལས་འབྲིང་ཆུང་གི་ཞབས་ཞུའི་བྱ་སྤྱོད་ཀྱིས་ད་དུང་ས་གནས་ཁག་དང་སྡེ་ཚན་ཁག་གི་ཁེ་ལས་གཟིགས་སྐྱོང་སྲིད་ཇུས་དྲིལ་བསྒྲགས་དང་ལག་བསྟར་རྒྱ་ཁྱབ་བྱ་རྒྱུ་དང་། གྲངས་གཞི་ཆེ་མོ་དང་། སྤྲིན་རྩིས། མི་ཐབས་རིག་ནུས་སོགས་ཀྱི་གྲངས་འཛིན་ལག་རྩལ་སྤྱད་པ། ཁེ་ལས་ཀྱི་དོན་དངོས་རྨང་གཞིར་བྱས་ཏེ་ཁེ་ལས་དང་འབྲེལ་བའི་སྲིད་ཇུས་ཆ་འཕྲིན་འདེད་སྐྱེལ་གནད་སྨིན་བྱེད་པ། ཀུན་ཕན་རང་བཞིན་དང་དམིགས་སའི་རང་བཞིན་གྱི་སྲིད་ཇུས་དང་བྱ་ཐབས་དེ་བས་མང་བ་འདོན་པར་སྐུལ་འདེད་གཏོང་བ་བཅས་བྱས་ནས། ཁེ་ལས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་དུས་ཐོག་ཏུ་ཐག་གཅོད་བྱེད་རོགས་བྱ་རྒྱུ་རེད། དེ་དང་དུས་མཚུངས། འཛད་སྤྱོད་ཀྱི་ཁོར་ཡུག་ཧུར་ཐག་བཏོད་དེ། ཁེ་ལས་འབྲིང་ཆུང་གིས་ཁྲོམ་ར་རྒྱ་སྐྱེད་གཏོང་བ་དང་། ཁེ་ལས་ཆེ་གྲས་ཀྱི་ཐོན་ལས་འཁོར་འབྲེལ་དང་། མཁོ་སྤྲོད་འཁོར་འབྲེལ། གསར་གཏོད་འཁོར་འབྲེལ་བཅས་ཀྱི་མཉམ་འདྲེས་ལ་སྐུལ་འདེད་གཏོང་རྒྱུ་རེད།
གླེང་རིན་ཡོད་པ་ཞིག་ནི། “མཉམ་དུ་ཁེ་ལས་ལ་ཕན་འདོགས་པའི”ཁེ་ལས་འབྲིང་ཆུང་གི་ཞབས་ཞུའི་བྱ་སྤྱོད་ཀྱིས་ད་དུང་ཁེ་ལས་འབྲིང་ཆུང་ལ་དམིགས་ཏེ། དོ་དམ་བརྟག་དཔྱད་དང་། སྤུས་ཚད་བརྟག་དཔྱད། ནུས་རྒྱུ་གྲོན་ཆུང་བརྟག་དཔྱད། འབྲིང་རིམ་ཚོད་ལྟའི་ར་སྤྲོད། ཞིབ་དཔྱད་ཚད་ལེན། ཆེད་ཞིབ་ཁྱད་གསར་བཞིའི་ནུས་སྤྲོད་སོགས་ཀྱི་ཞབས་ཞུ་སྤེལ་བ་དང་། ཁེ་ལས་འབྲིང་ཆུང་གི་ཁྱད་ཆོས་དང་འཚམ་པའི“ཆུང་གྲས་ཅན་དང་། མགྱོགས་མྱུར་ཅན། འབོར་ཉུང་ཅན། གནད་སྨིན་ཅན”བཅས་ཀྱི་གྲངས་འཛིན་ཅན་གྱི་ཐོན་རྫས་དང་། ཞབས་ཞུ། ཐག་གཅོད་ཇུས་གཞི་བཅས་གསར་སྤེལ་ཁྱབ་གདལ་གཏོང་བ། ཐབས་ལམ་སྣ་མང་གི་འབྲེལ་སྦྱོར་ལས་སྟེགས་གཏོད་པ་བཅས་བྱས་ཏེ། ཁེ་ལས་འབྲིང་ཆུང་གིས་ཤེས་ལྡན་པ་ནང་འདྲེན་དང་བཀོལ་སྤྱོད་ཐུབ་པར་འགན་ལེན་བྱེད་པ་སོགས་ལ་རམ་འདེགས་བྱ་རྒྱུ་རེད།
བཟོ་འཕྲིན་པུའུ་ཡི་འབྲེལ་ཡོད་འགན་འཁུར་བས། སྡེ་ཚན་ཁག་དབར་གྱི་མཉམ་ལས་དང་གོང་འོག་མཉམ་འབྲེལ་ལ་ཤུགས་སྣོན་བརྒྱབ་སྟེ། ཞབས་ཞུའི་ཐོན་ཁུངས་དང་ཞབས་ཞུའི་སྟོབས་ཤུགས་སྣ་ཚོགས་སྒྲིག་འཛུགས་བྱས་ནས། ཁེ་ལས་དང་། གླིང་ཁུལ། ཚོ་འདུས་བཅས་ལ་ཞབས་འདེགས་ཞུ་གི་ཡིན་ཞེས་བརྗོད་པ་རེད།