རང་རྒྱལ་གྱི་ཉ་པར“ཉ་གྲུའི་གློག་རྡུལ་ལག་ཁྱེར”ཡོད་པ།
གསར་འགོད་པས་ཞིང་ལས་གྲོང་གསེབ་པུའུ་ནས་ཤེས་རྟོགས་བྱས་པར། ད་ལོའི་ཟླ་3ཚེས་1ཉིན་ནས་བཟུང་། རྒྱལ་ནང་དུ་ཉ་གྲུའི་གློག་རྡུལ་ལག་ཁྱེར་སྤྱོད་རྒྱུ་ཡིན་པ་རེད། གློག་རྡུལ་ལག་ཁྱེར་ནང་ཉ་གྲུའི་དྲ་བའི་ཡོ་བྱད་དམིགས་ཚད་ཆོག་མཆན་ཡི་གེ་དང་། ཉ་གྲུའི་བདག་དབང་ཐོ་འགོད་ལག་ཁྱེར། ཉ་གྲུའི་རྒྱལ་ཁོངས་ལག་ཁྱེར། ཉ་ལས་འཛིན་རྙབ་ཆོག་འཐུས་ལག་ཁྱེར་བཅས་ཚུད་ཡོད། གོང་གསལ་ཁྲིམས་མཐུན་ནུས་ལྡན་གྱི་ཉ་གྲུའི་ལག་ཁྱེར་ཡོད་པའི་ཁེ་ལས་དང་། མི་སྒེར་དང་དེ་བཞིན་མངགས་བཅོལ་བྱེད་མཁན་གཞན་བཅས་ཀྱིས་གཏན་འབེབས་ཀྱི་གོ་རིམ་ལྟར་གློག་རྡུལ་ལག་ཁྱེར་རེ་ཞུ་དང་བེད་སྤྱོད་བྱས་ཆོག
ངོ་སྤྲོད་བྱས་པར་གཞིགས་ན། ཉ་གྲུའི་གློག་རྡུལ་ལག་ཁྱེར་ནི་ཉ་པ་མང་ཚོགས་ཀྱི“ཁ་ལོ་བའི་གློག་རྡུལ་ལག་ཁྱེར”དང་མཚུངས། སྔོན་ཆད་ཉ་པ་མང་ཚོགས་ཀྱིས་བྱ་བ་སྒྲུབ་པའམ་གྲུ་གཟིངས་ཐོག་ལས་ཀ་བྱེད་སྐབས། དུས་དང་རྣམ་པ་ཀུན་ཏུ་ཉ་གྲུའི་ཤོག་ཐོག་ལག་ཁྱེར་འཁྱེར་དགོས་ཀྱི་ཡོད་མོད། ད་ཆ་ལག་ཐོགས་ཁ་པར་ནས་གློག་རྡུལ་ལག་ཁྱེར་བསྟན་ན་ལས་དོན་མི་སྣས་ཨང་རྟགས་བཤེར་བ་བརྒྱུད་ཞིབ་བཤེར་ཐུབ་པས། དོ་དམ་ནུས་པ་དང་ལས་སྒྲུབ་ལས་ཆོད་ཆེ་རུ་ནུས་ལྡན་ཕྱིན་ཡོད།
མིག་སྔར། ཉ་གྲུའི་གློག་རྡུལ་ལག་ཁྱེར་གྱིས་གཙོ་བོ་ལག་ཁྱེར་སྟོན་པ་དང་ལས་སྒོ་འདྲི་རྩད་བྱེད་ཐུབ་ཀྱི་ཡོད། ཉ་ལས་ཁྲིམས་སྒྱུར་ཞིབ་བཤེར་དང་ལེན་བྱེད་པ་དང་ཉ་ལས་དང་ཉ་སྲིད་ཀྱི་འབྲེལ་ཡོད་ལས་སྒོ་སྒྲུབ་སྐབས། གློག་རྡུལ་ལག་ཁྱེར་གྱིས་ཤོག་ཐོག་ལག་ཁྱེར་གྱི་ཚབ་བྱེད་ཆོག་པ། འབྲེལ་ཡོད་མི་སྣས་ཀྱང་གློག་རྡུལ་ལག་ཁྱེར་གྱི་གནས་ཚུལ་བརྒྱུད་ཉ་གྲུའི་ཆ་འཕྲིན་དང་ལས་སྒོ་སྒྲུབ་རིམ་འདྲི་རྩད་བྱེད་ཐུབ་ཀྱི་ཡོད།