2024ལོའི་ལོ་མཇུག་ཏུ། ཆབ་མདོ་གྲོང་ཁྱེར་ཇ་རྟ་ཐང་ཆེན་དུ་མི་ཚོགས་ཀྱིས་ཁེངས་ཤིང་། ཕར་འགྲོ་ཚུར་འོང་བྱེད་མཁན་སྐུ་མགྲོན་ཚོས་དགའ་སྤྲོའི་ངང་རང་ཉིད་ཀྱི་མཁོ་ཆས་འདེམས་བཞིན་མཆིས།

འདི་ནི་ཆབ་མདོ་གྲོང་ཁྱེར་འཕེལ་སྒྱུར་ཨུ་ལྷན་དང་ཚོང་དོན་ཅུས་སོགས་སྡེ་ཚན་གྱིས་མཉམ་དུ་གཉེར་བའི་འཛད་རྫས་རྙིང་པ་གསར་པར་བརྗེ་བའི་དྲིལ་བསྒྲགས་བྱེད་སྒོ་ཡིན་ཞིང་། གཙོ་བོ“ཟོག་འདྲེན་རླངས་འཁོར་རྙིང་པ་དང་། ཟོག་རོར་གཏོང་བའི་རླངས་འཁོར། མི་སྒེར་གྱི་འཛད་སྤྱོད་པའི་རླངས་འཁོར། ཁྱིམ་སྤྱོད་གློག་ཆས། ཁྱིམ་ཆས”སོགས་ཁྱབ་ཁོངས་སུ་རྙིང་པ་གསར་པར་བརྗེ་བའི་སྲིད་ཇུས་དྲིལ་བསྒྲགས་བྱས་ཏེ། གྲོང་མིར་རྙིང་པ་གསར་པར་བརྗེ་བའི་སྟབས་བདེ་དང་གཟིགས་སྐྱོང་ཕྱོགས་ཡོངས་ནས་ངོ་སྤྲོད་བྱས་པ་རེད།

2024ལོ་ནས་བཟུང་། རྒྱལ་སྲིད་སྤྱི་ཁྱབ་ཁང་གིས་གཞི་ཁྱོན་ཆེ་བའི་སྒྲིག་ཆས་གསར་སྒྱུར་དང་འཛད་རྫས་རྙིང་པ་གསར་པར་བརྗེ་བའི་བྱ་སྤྱོད་ལ་སྐུལ་འདེད་གཏོང་བའི་ཇུས་གཞིའི་དགོངས་དོན་ལག་བསྟར་གཏིང་ཟབ་བྱ་ཆེད། རང་ལྗོངས་ཀྱི་ཚོང་དོན་སྡེ་ཚན་གྱིས་རླངས་འཁོར་དང་། ཁྱིམ་སྤྱོད་གློག་ཆས། ཁྱིམ་ཆས་སོགས་ཁྱབ་ཁོངས་སུ་འཛད་སྤྱོད་འཛིན་ཤོག་སྤྲོད་རྒྱུ་དང་དེ་བཞིན་རྙིང་པ་གསར་པར་བརྗེ་བའི་འཛད་སྤྱོད་ཡར་སྐུལ་གྱི་བྱེད་སྒོ་རབ་དང་རིམ་པ་སྤེལ་ནས་འཛད་སྤྱོད་ཀྱི་མི་མངོན་པའི་ནུས་པ་སྔར་བས་འཕེལ་བར་བྱས་པ་རེད།

ལྗོངས་ཡོངས་ཀྱི་གྲོང་ཁྱེར་དང་ས་གནས་ཁག་གིས་བཀའ་འབྱོར་འཕྲལ་སྒྲུབ་བྱས་ཏེ་ལྷ་ས་ནས་གཞིས་རྩེ་བར་དང་ཉིང་ཁྲི་ནས་ལྷོ་ཁ་བར་ས་གནས་ཁག་གི་སྲིད་གཞུང་དང་ཁེ་ལས་ཀྱིས་འཛད་སྤྱོད་འཛིན་ཤོག་སྤྲོད་པ་དང་། བྲིན་ཚོང་བྱེད་སྒོ་གཉེར་བ། འཛད་སྤྱོད་ཁོར་ཡུག་ལེགས་སུ་གཏོང་བ་སོགས་ཀྱི་བྱ་ཐབས་བརྒྱུད་འཛད་སྤྱོད་པའི་ཡིད་དབང་བཀུག་ནས་འཛད་སྤྱོད་ཁྲོམ་ར་དར་རྒྱས་གོང་འཕེལ་ཡོང་བར་སྐུལ་ཁྲིད་བྱེད་ཀྱི་ཡོད། ལྷག་པར་དུ་2024ལོའི་ཟླ་10པའི་ཟླ་སྟོད་དུ། ཕྱོགས་ཡོངས་ནས་སྤེལ་འགོ་ཚུགས་པའི་འཛད་རྫས་རྙིང་པ་གསར་པར་བརྗེ་བའི་སྲིད་ཇུས་དེ་དཔལ་འབྱོར་འཕར་བར་སྐུལ་ཁྲིད་བྱེད་པའི་སྐུལ་འདེད་གཏོང་མཁན་གལ་ཆེན་ཞིག་ཏུ་གྱུར་ཡོད། བསྡོམས་རྩིས་བརྒྱབ་པར་ལྟར་ན། 2024ལོར་ལྗོངས་ཡོངས་སུ་སྒྲིག་ཆས(ཆ་ཚང)ཁྲི་6.5གསར་སྒྱུར་ལེགས་སྒྲུབ་བྱས་པ་དང་འཛད་རྫས་རྙིང་པ་གསར་པར་བརྗེ་བའི་ཕྱིར་ཚོང་ཡོང་འབབ་སྒོར་དུང་ཕྱུར་19.5བྱུང་ཡོད་པ་རེད།

ངོ་སྤྲོད་བྱས་པར་གཞིགས་ན། རང་ལྗོངས་ཀྱིས་རྒྱལ་ཁབ་ཀྱི་རླངས་འཁོར་ཟོག་རོར་བཏང་ནས་གསར་སྒྱུར་དང་བརྗེ་རེས་གསར་བརྗེས་བྱེད་པའི་རྨང་གཞིའི་ཐོག་རླངས་འཁོར་གཅིག་པུ་ཉོ་བའི་དགོས་མཁོ་གསར་པ་ཁོ་ན་ཡོད་པའི་འཛད་སྤྱོད་པར་དམིགས་ནས། རླངས་འཁོར་གསར་པ་ཕྱིར་ཚོང་གི་རིན་གོང་ལྟར་རིམ་པ་དབྱེ་ནས་ཁ་གསབ་སྤྲོད་རྒྱུ་སྟེ། ཁ་གསབ་དམའ་ཤོས་ལ་སྒོར་2000དང་། ཁ་གསབ་མཐོ་ཤོས་ལ་སྒོར་ཁྲི་1.5ཡིན་ཞིང་། གལ་སྲིད་འཛད་སྤྱོད་པ་ཞིང་འབྲོག་པ་ཡིན་ཚེ། ཁ་གསབ་ཚད་གཞིའི་རིམ་པ་ཁག་གི་རྨང་གཞིའི་ཐོག་སྒོར་2000ཁ་གསབ་སྤྲོད་རྒྱུ་དང་། ནུས་རྒྱུ་གསར་པའི་འགྲུལ་སྐྱེལ་རླངས་འཁོར་གསར་པ་ཉོ་མཁན་ལ་ཁ་གསབ་ཚད་གཞིའི་རིམ་པ་ཁག་གི་རྨང་གཞིའི་ཐོག་སྒོར་1000ཁ་གསབ་སྤྲོད་རྒྱུ་རེད།

རྙིང་པ་གསར་པར་བརྗེ་བའི་བྱེད་སྒོ་རྒྱུན་མཐུད་སྤེལ་བཞིན་ཡོད་པ་དང་སྦྲགས། ཚོང་པའི་ཕྱིར་ཚོང་ཡོང་འབབ་ཀྱང་མང་དུ་འགྲོ་བཞིན་ཡོད། བོད་ལྗོངས་ལན་ཙེ་གློག་ཆས་ཚད་ཡོད་ཀུང་སིའི་འགན་འཁུར་བས་རྙིང་པ་གསར་པར་བརྗེ་བའི་བྱེད་སྒོའི་ཁྲོད་ཚོང་པའི་ཕྱིར་ཚོང་ཡོབ་འབབ་དུས་རྒྱུན་ལས་30%ཙམ་འཕར་བ་དང་། 2024ལོའི་རྒྱལ་སྟོན་རིང་། ཕྱིར་ཚོང་ཡོང་འབབ་སྒོར་ཁྲི་200ལྷག་ཙམ་ཟིན་ནས་ཉིན་རེར་ཚོང་ཁང་དུ་ཁྱིམ་སྤྱོད་གློག་ཆས་བལྟ་བར་ཡོང་མཁན་མི་ཐེངས་200ལྷག་ཙམ་ཟིན་གྱི་འདུག་ཅེས་གསར་འགོད་པར་བཤད། “དེ་དག་གཙོ་བོ་རྙིང་པ་གསར་པར་བརྗེ་བའི་བྱེད་སྒོ་ཁྱབ་གདལ་བཏང་ནས་གྲོང་མིའི་ཉོ་སེམས་ཆེ་རུ་ཕྱིན་པ་ལས་བྱུང་བ་ཞིག་རེད། རྙིང་པ་གསར་པར་བརྗེ་བའི་བྱེད་སྒོ་སྤེལ་ཚུན། འཛད་སྤྱོད་པར་དངོས་ཕན་ཐོབ་པ་མ་ཟད། ཚོང་པའི་ཡོང་འབབ་ཀྱང་མངོན་གསལ་དོད་པོས་མང་དུ་ཕྱིན་ཡོད། ན་ནིང་ཟླ་9པ་དང་10པར། ང་ཚོའི་ཀུང་སིའི་ཕྱིར་ཚོང་ཡོང་འབབ་སྒོར་ཁྲི་900ལྷག་ཙམ་ཟིན་ནས་མི་ཐེངས་2000ལྷག་ཙམ་བྱེད་སྒོའི་ཁ་གསབ་ནང་ཞུགས་ཡོད”ཅེས་བོད་ལྗོངས་ལན་ཙེ་གློག་ཆས་ཚད་ཡོད་ཀུང་སིའི་སྤྱི་ཁྱབ་ཅིང་ལེ་ཀྲང་ཡུས་ཞང་གིས་བཤད།

རང་ལྗོངས་ཀྱི་རྙིང་པ་གསར་པར་བརྗེ་བའི་སྲིད་ཇུས་མུ་མཐུད་གཏིང་ཟབ་ཏུ་འགྲོ་ངེས་རེད། ཉེ་ཆར། རང་སྐྱོང་ལྗོངས་ཚོང་དོན་ཐིང་སོགས་སྡེ་ཚན་9ཡིས་2025ལོའི་འཛད་རྫས་རྙིང་པ་གསར་པར་བརྗེ་བའི་ལས་དོན་ཡག་པོ་བསྒྲུབ་རྒྱུའི་སྐོར་གྱི་བརྡ་ཐོ་བཀྲམ་ནས་རླངས་འཁོར་དང་། ཁྱིམ་སྤྱོད་གློག་ཆས། 3Ｃགྲངས་འཛིན། ཁྱིམ་ཆས་སྒྲིག་བཟོ། གློག་སྒུལ་རྐང་འཁོར་སོགས་ཕྱོགས་ལྔའི་ཐད་ནས་རྙིང་པ་གསར་པར་བརྗེ་བའི་བྱེད་སྒོ་རྒྱ་ཆེར་བཏང་ནས་འཛད་རྫས་ཁྱབ་ཁོངས་ཁོ་ནར་བྱེད་སྒོའི་ཁ་གསབ་མ་དངུལ་སྒོར་དུང་ཕྱུར་2ལྷག་ཙམ་ཡོད་པ་རེད།

2025ལོར་འཛད་རྫས་རྙིང་པ་གསར་པར་བརྗེ་བའི་རྒྱབ་སྐྱོར་ཁྱབ་ཁོངས་དེ་2024ལོའི་4ནས་5བར་རྒྱ་ཆེར་གཏོང་རྒྱུ་ཡིན་པའི་ནང་ལག་ཐོགས་ཁ་པར་དང་། ངོས་ལེབ། རིག་ནུས་ཆུ་ཚོད་(ལག་གདུབ)བཅས་ལ་ཁ་གསབ་སྤྲོད་རྒྱུ་དང་ཐོན་རྫས་རེར་མཐོ་ཤོས་ལ་ཁ་གསབ་སྒོར་500ལས་མི་བརྒལ་བ། ཁྱིམ་སྤྱོད་གློག་ཆས་རྙིང་པ་གསར་པར་བརྗེ་བའི་ཁ་གསབ་རིགས་8ནས་12བར་མང་དུ་གཏོང་རྒྱུ་ཡིན་པ་དང་ཆུ་གཙང་ཆས་དང་། ཕོར་པ་འཁྲུ་ཆས། གློག་ཕྲུ། ཝེ་པོ་ཚ་ཐབ་བཅས་ཐོན་རྫས་རིགས་4གསར་དུ་བསྣན་ཡོད་པ་རེད། ཁྱིམ་ཆས་སྒྲིག་བཟོ་གསར་པ་ཉོ་སྒྲུབ་ཐད་ཐོན་རྫས་རིགས་23ལ་མཐའ་མའི་ཕྱིར་ཚོང་རིན་གོང་གི་20%དང་མཐོ་ཤོས་ལ་ཁ་གསབ་སྒོར་2000ལས་མི་བརྒལ་བར་སྤྲད་པ་ཕུད། རང་ལྗོངས་ཀྱིས་ད་དུང་དོན་དངོས་དང་ཟུང་འབྲེལ་བྱས་ཏེ་མཐའ་མཚམས་ས་ཁུལ་གྱི་གནས་སྤོ་བཀོད་སྒྲིག་བྱ་ཡུལ་དང་ས་ཡོམ་གྱི་གནོད་འཚེ་ཕོག་རྗེས་སླར་གསོའི་ཁྱབ་ཁོངས་ནང་གི་མང་ཚོགས་དང་དེ་བཞིན་མ་མཐའི་འཚོ་བའི་འགན་ལེན་དུད་ཚང་དང་དབང་པོ་སྐྱོན་ཅན་གྱི་ཁ་གསབ་ཚད་གཞི་དེ་ཐོན་རྫས་ཀྱི་མཐའ་མའི་ཕྱིར་ཚོང་རིན་གོང་གི་25%བར་མཐོ་རུ་བཏང་བ་དང་མཐོ་ཤོས་ལ་ཁ་གསབ་སྒོར་3000ལས་མི་བརྒལ་བ་བྱ་རྒྱུ་རེད། རིམ་པ་དང་ཁ་གསབ་ཀྱི་ཚད་གཞི་མཐོ་རུ་བཏང་བ་བརྒྱུད་དཀའ་ངལ་ཡོད་པའི་མང་ཚོགས་ཀྱི་འཚོ་བར་སྔར་བས་བདེ་སྐྱིད་སྐྲུན་རྒྱུ་ཡིན་པ་རེད།