ཀུའེ་ཀྲོའུ་ཡིས་ཡོང་འབབ་དམའ་བའི་མི་འབོར་གྱི་འགུལ་རྣམ་ལྟ་ཞིབ་ཚད་ལེན་ལ་སྐུལ་འདེད་རྒྱུན་མཐུད་བཏང་བ།
ཆ་རྐྱེན་དང་མི་མཐུན་པའི་མི་994མ་མཐའི་འཚོ་བའི་འགན་ལེན་ནས་འབུད་རྒྱུ་ཡིན་པ།
གསར་འགོད་པས“ཀུའེ་ཀྲོའུ་དམངས་སྲིད་ཀྱི་ལོ་ལྔའི་རིང”གི་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱས་པར། ཀུའེ་ཀྲོའུ་ཞིང་ཆེན་གྱི་ཡོང་འབབ་དམའ་བའི་མི་འབོར་གྱི་འགུལ་རྣམ་ལྟ་ཞིབ་ཚད་ལེན་ཆ་འཕྲིན་ལས་སྟེགས་དེ་2021ལོར་བཙུགས་ཚུན། ཁྱོན་བསྡོམས་སྔོན་ཚུད་ཉེན་བརྡའི་ཆ་འཕྲིན་ཁྲི་26ལྷག་ཙམ་བཏང་བ་དང་། ཞིབ་བཤེར་བྱས་པ་བརྒྱུད། སྔོན་ཚུད་ཉེན་བརྡའི་མི་ཁྲི་2.6རང་འགུལ་ངང་མ་མཐའི་འཚོ་བའི་འགན་ལེན་སོགས་ཀྱི་ཐ་སྐྱོང་འགན་ལེན་ཁྱབ་ཁོངས་སུ་འཇུག་རྒྱུ་དང་ཆ་རྐྱེན་དང་མི་མཐུན་པའི་མི་994མ་མཐའི་འཚོ་བ་འགན་ལེན་ནས་འབུད་རྒྱུ་རེད།
མ་མཐའི་འཚོ་བའི་འགན་ལེན་བྱ་ཡུལ་དང་། དམིགས་བསལ་དཀའ་ངལ་ཡོད་པའི་མི་སྣ། འཚོ་བའི་འགན་ལེན་མཐར་ལུས་ཁྱིམ་ཚང་། དབུལ་པོ་བསྐྱར་ལོག་སྔོན་འགོག་ལྟ་ཞིབ་ཚད་ལེན་བྱ་ཡུལ། མི་གཏོང་ཀ་མེད་ཀྱི་གཏོང་སྒོར་དཀའ་ངལ་ཡོད་པའི་ཁྱིམ་ཚང་སོགས་ཡོང་འབབ་དམའ་བའི་མི་འབོར་ཁྲི་360ལྷག་ཙམ་གཞི་གྲངས་མཛོད་ཀྱི་ལྟ་ཞིབ་ཚད་ལེན་ནང་འཇུག་རྒྱུའི་རྨང་གཞིའི་ཐོག་ཀུའེ་ཀྲོའུ་ཡིས་ལས་ཀའི་དོན་དངོས་དང་ཟུང་འབྲེལ་བྱས་ནས་དབང་པོ་སྐྱོན་ཅན་དང་། ཉེ་བའི་ལོ་གཉིས་ནང་མ་མཐའི་འཚོ་བའི་འགན་ལེན་གྱི་ཁོངས་གཏོགས་ནས་འབུད་པའམ་ཡང་ན་དམིགས་བསལ་དཀའ་ངལ་ཡོད་པའི་མི་སྣ། རེ་ཞུར་ཆོག་མཆན་མ་ཐོབ་པའི་མི། དབུལ་སྒྲོལ་ཐུབ་པའི་མི་འབོར་སོགས་མི་མངོན་པའི་རོགས་སྐྱོབ་བྱ་ཡུལ་ཁྲི་910ལྷག་ཙམ་ལྟ་ཞིབ་ཚད་ལེན་ཁྱབ་ཁོངས་སུ་བཅུག་སྟེ། ལྟ་ཞིབ་ཚད་ལེན་གྱི་སྔོན་ཚུད་ཉེན་བརྡའི་དམིགས་ཚད་མ་ལག་རྒྱུན་ཆད་མེད་པར་འཐུས་སྒོ་ཚང་དུ་གཏོང་རྒྱུ་མ་ཟད། “གྲངས་གཞི་ཆེན་པོའི་གཤིབ་བསྡུར+གཞི་རིམ་གྱི་དཀའ་ངལ་ཁྱད་བསད”གྱི་ལས་ཀའི་ལམ་སྲོལ་ལ་ཤུགས་སྣོན་བརྒྱབ་ནས“འགུལ་རྣམ་ལྟ་ཞིབ་ཚད་ལེན་དང་། འགུལ་རྣམ་ཞིབ་དཔྱད། འགུལ་རྣམ་གཙང་སེལ”བཅས་ཏན་ཏིག་བྱ་རྒྱུ་ཡིན་པ་རེད།