ཀྲུང་གོ་མི་དམངས་དངུལ་ཁང་གིས་ཁྱབ་བསྒྲགས་བྱས་པའི《2024ལོའི་དུས་ཚིགས་བཞི་པའི་ཀྲུང་གོའི་དངུལ་ལོར་སྲིད་ཇུས་ཀྱི་ལག་བསྟར་སྙན་ཞུ》ལས་མངོན་པར། ན་ནིང་རང་རྒྱལ་གྱི་བརྟན་འཁྱོངས་ཀྱི་དངུལ་ལོར་སྲིད་ཇུས་བབ་བསྟུན་ཚད་རན་དང་གནད་སྨིན་ནུས་ལྡན་བྱུང་ནས། ཟློག་པའི་འཁོར་ཡུན་གྱི་སྙོམས་སྒྲིག་བྱེད་ཤུགས་ཆེ་རུ་བཏང་སྟེ་དངོས་ཚན་དཔལ་འབྱོར་བསྐྱར་འཕར་ལེགས་སུ་འགྲོ་བ་དང་དངུལ་རྩའི་ཁྲོམ་ར་བརྟན་པོའི་ངང་འཁོར་རྒྱུག་ཐུབ་པར་རྒྱབ་སྐྱོར་བྱས་ཡོད།

2024ལོར་དངུལ་རྩའི་བསྡོམས་འབོར་ལུགས་མཐུན་ངང་འཕར་ནས་ལོ་མཇུག་ཏུ་སྤྱི་ཚོགས་ཀྱི་མ་དངུལ་བསྡུ་སྒྲིལ་གྱི་གཞི་ཁྱོན་གསོག་འབོར་དང་ཁྱབ་ཆེའི་དངུལ་ལོར(M2)དུས་མཚུངས་ལས་8.0%དང་7.3%སོ་སོར་འཕར་ནས། མི་དམངས་ཤོག་སྒོར་གྱི་དངུལ་བུན་ལྷག་གྲངས་སྒོར་དུང་ཕྱུར་ཁྲི་255.7ཟིན་པ་དང་། དངུལ་བུན་གྱི་སྐྱེད་ཚད་མངོན་གསལ་དོད་པོས་ཆག་ནས་ཟླ་12པར་གསར་དུ་ཁེ་ལས་ལ་དངུལ་བུན་གཏོང་ཚད་དང་མི་སྒེར་གྱི་སྡོད་ཁང་གི་དངུལ་བུན་སྐྱེད་ཚད་དུས་མཚུངས་ལས་གཞི་ཐིག་40དང་90ཙམ་ཁག་སོ་སོར་ཆག་ཡོད།

སྙན་ཞུའི་ནང་གོམ་སྟབས་རྗེས་མར་ཀྲུང་གོ་མི་དམངས་དངུལ་ཁང་གིས་དུས་ཐུང་དང་ཡུན་རིང་སོགས་ཀྱི་འབྲེལ་བ་དོ་སྙོམས་ཡག་པོ་ཡོང་བར་བྱས་ནས་གཞི་ཆེའི་སྟངས་འཛིན་གྱི་རྒྱང་ལྟའི་རང་བཞིན་དང་། དམིགས་སའི་རང་བཞིན། ཕན་འབྲས་རང་བཞིན་བཅས་ཆེ་རུ་བཏང་ནས་དཔལ་འབྱོར་བརྟན་པོའི་ངང་འཕར་བར་སྐུལ་འདེད་གཏོང་རྒྱུ་རེད། འོས་འཚམ་ལྷུག་གཏོང་གི་དངུལ་ལོར་སྲིད་ཇུས་ལག་བསྟར་ཡག་པོ་བྱེད་པ་དང་། གོ་སྐབས་དང་བསྟུན་ནས་དངུལ་ལོར་སྲིད་ཇུས་ཀྱི་ཤུགས་ཚད་དང་མྱུར་ལྷོད་ལེགས་སྒྲིག་བྱེད་པ། འཁོར་རྒྱུག་རང་བཞིན་འདང་ངེས་ཡོང་བ་རྒྱུན་འཁྱོངས་བཅས་བྱས་ཏེ་སྤྱི་ཚོགས་ཀྱི་མ་དངུལ་བསྡུ་སྒྲིལ་གྱི་གཞི་ཁྱོན་དང་དངུལ་ལོར་འདོན་སྤྲོད་བྱེད་ཚད་འཕར་བ་དེ་དཔལ་འབྱོར་འཕར་བ་དང་རིན་གོང་གི་སྤྱི་ཡོངས་ཚུ་ཚད་ཀྱི་སྔོན་དཔག་དམིགས་ཚད་དང་སྙོམས་སྒྲིག་ཡོང་བར་བྱེད་རྒྱུ་རེད། ཟོག་གོང་ལུགས་མཐུན་ངང་འཕར་བར་སྐུལ་འདེད་གཏོང་རྒྱུ་དེ་དངུལ་ལོར་སྲིད་ཇུས་ལ་སྟངས་འཛིན་བྱེད་པའི་ཚད་ལོན་བྱེད་ས་གལ་ཆེན་ཞིག་ལ་བརྩིས་ནས། ཟོག་གོང་ལུགས་མཐུན་གྱི་ཆུ་ཚད་ནང་རྒྱུན་འཁྱོངས་ཐུབ་པར་སྐུལ་འདེད་གཏོང་རྒྱུ་རེད། ཀྲུང་དབྱང་དངུལ་ཁང་སྲིད་ཇུས་ཀྱི་སྐྱེད་ཚད་ལ་ཁྲིད་སྟོན་བྱེད་ཤུགས་ཆེ་རུ་གཏོང་བ་དང་ཁྲོམ་ར་ཅན་གྱི་སྐྱེད་ཚད་ལ་བརྒྱུད་མཆེད་ཀྱི་ལམ་སྲོལ་ཆགས་རྒྱུ་འཐུས་སྒོ་ཚང་དུ་བཏང་སྟེ་ཁེ་ལས་ཀྱི་མ་དངུལ་བསྡུ་སྒྲིལ་དང་གྲོང་མིའི་ཡིད་རྟོན་དངུལ་བུན་གྱི་མ་གནས་ཆག་རྒྱུར་སྐུལ་འདེད་གཏོང་དགོས་ཞེས་བཏོན་ཡོད།