ཟླ་2ཚེས་4ཉིན་གྱི་དགོང་མོར། ས་བབ་མཐོ་ཚད་སྨི་4000ལྷག་ཙམ་ཟིན་པའི་མཚོ་བོད་ལྕགས་ལམ་ལྷ་ས་ནས་འདམ་གཞུང་བར་གྱི་དུམ་བུའི་ཡངས་པ་ཅན་ས་ཚིགས་སུ་གྲང་རླུང་འུར་འུར་དུ་ལྡང་བ་དང་དྲོད་ཚད་ཀླད་ཀོར་འོག་ཏུ་སླེབས་ཡོད། གསར་འགོད་པས་ཀྲུང་གོ་ལྕགས་ལམ་ཅུས་བཅུ་གཉིས་པ་ཚོགས་པའི་ལྕགས་ལམ་བདག་སྐྱོང་ལས་གྲྭ་ཚད་ཡོད་ཀུང་སིའི་བུད་མེད་སྐྱོན་འཚོལ་པན་གྱི་རུ་མི་དང་མཉམ་དུ་དཔྱིད་གསར་སྐྱེལ་འདྲེན་ལས་མིའི་བརྟན་སྲུང་ལས་དོན་ལ་ཉམས་ལེན་བྱས་པ་ཡིན།

སྐྱོན་འཚོལ་པན་གྱི་པན་ཀྲང་ཧྥུའུ་ལིང་གིས་གསར་འགོད་པར། དཔྱིད་གསར་སྐྱེལ་འདྲེན་རིང་མེ་འཁོར་འཁོར་སྐྱོད་བྱེད་ཚད་མང་དུ་ཕྱིན་པས་ལྕགས་ལམ་ལ་གས་སྲུབས་ཕྲ་མོ་དང་། ཨི་ཁུང་ཆུང་ཆུང་། དེ་བས་གཅུས་ཟེར་ལྷུག་ཏུ་སོང་བ་སོགས་ཀྱི་གནས་ཚུལ་ཐོན་སྲིད་པས་ཆེད་ལས་མི་སྣས་དུས་བཀག་ནང་ཞིབ་བཤེར་སྐྱོན་འཚོལ་ཐུབ་པ་བྱེད་དགོས་ཀྱི་ཡོད་ཅེས་བཤད།

ལྕགས་ལམ་སྐྱོན་འཚོལ་བཟོ་པར“ལྕགས་ལམ་སྨན་པ”ཞེས་འབོད་ཅིང་། སྐྱོན་འཚོལ་འཕྲུལ་ཆས་ནི་ཁོང་ཚོས་ལྕགས་ལམ་བདེ་འཇགས་ལ་འགན་ལེན་བྱེད་པའི“ཉན་ཆས”ཤིག་རེད། ལྕགས་ལམ་གྱི་སྐྱོན་འཚོལ་འཕྲུལ་ཆས་ཀྱི་འཚོལ་མགོས་ལྕགས་ལམ་ལ་ཚད་བརྒལ་སྒྲ་རླབས་འཕྲོ་གཏོང་བྱེད་པ་དང་། འཕྲུལ་ཆས་དེས་ལྡོག་འཕྲོ་བྱས་པའི་ཚད་བརྒལ་སྒྲ་རླབས་ཀྱི་བརྡ་རྟགས་ལ་བརྟེན་ནས་སྐྱོན་ཡོད་མེད་ཀྱི་གནས་ཚུལ་བརྡར་ཤ་གཅོད་པ་དང་མངོན་མེད་རྐྱེན་ངན་ཤེས་ཀྱི་ཡོད། ཧྥུའུ་ལིང་གིས། ང་ཚོས་འགན་འཁུར་བའི་ལས་ཁུལ་གྱི་སྤྱིའི་ལམ་ཐག་ལ་སྤྱི་ལེ་150ལྷག་ཙམ་ཡོད་པས། དུམ་བུ་ཚང་མར་གྲལ་བཤེར་ཞིབ་ཕྲ་བྱེད་དགོས་ཤིང་། ལོ་གཅིག་ལ་གྲལ་བཤེར་ཐེངས་མང་བྱས་ནས་ལྷོད་གཡེང་སྤུ་ཙམ་ཡང་གཏོང་མི་རུང་ཞེས་བཤད།

ཀྲུང་གོ་ལྕགས་ལམ་ཅུས་བཅུ་གཉིས་པ་ཚོགས་པའི་ལྕགས་ལམ་བདག་སྐྱོང་ལས་གྲྭ་ཚད་ཡོད་ཀུང་སིའི་སྐྱོན་འཚོལ་རྣམ་གྲངས་པུའུ་ཡི་ཅིང་ལི་ཤིང་ཀྲེང་གིས“བུད་མེད་སྐྱོན་འཚོལ་བཟོ་པ་དེ་བས་ཞིབ་ཚགས་པ་དང་ངང་རྒྱུད་རིང་བས་སྐྱོན་ཆ་གང་དུ་ཡོད་མེད་དེ་བས་ལེགས་པ་ཤེས་རྟོགས་ཐུབ་ཀྱི་ཡོད”ཅེས་གསར་འགོད་པར་བཤད།

བུད་མེད་སྐྱོན་འཚོལ་པན་དེ་བུད་མེད་ལས་བཟོ་9ལས་གྲུབ་པ་དང་ཆ་སྙོམས་ལོ་34རེད། ཁོང་ཚོའི་ཁྲོད་དུ་ཉམས་མྱོང་ཕུན་སུམ་ཚོགས་པའི“75ནང་སྐྱེས”ཡོད་ལ་གསོན་ཤུགས་ཀྱིས་ཁེངས་པའི“90ནང་སྐྱེས”ཀྱང་ཡོད།

ལོ་27ལ་སླེབས་པའི་བཀྲ་ཤིས་དབང་མོ་ནི་ཚོགས་པའི་ནང་གི་ན་གཞོན་ཁོངས་མི་ཞིག་རེད། ཁོ་མོས་བློ་རྩེ་གཅིག་སྒྲིམ་གྱིས་སྐྱོན་འཚོལ་འཕྲུལ་ཆས་ཀྱི་བརྙན་ཤེལ་ལ་བལྟས་ཤིང་། བརྙན་ཤེལ་ཐོག་སྒྲ་རླབས་འཁྱུག་འཁྱུག་བྱེད་པས་ལྕགས་ལམ་ནང་གི་གནས་ཚུལ་རྟོགས། གློ་བུར་དུ། འཕྲུལ་ཆས་ནས་ཏི་ཏི་ཏི་ཞེས་པའི་ཉེན་བརྡའི་སྒྲ་གྲགས། བཀྲ་ཤིས་དབང་མོས་མྱུར་དུ་ཞིབ་བཤེར་ཤེལ་སྒོ་སྤྱད་དེ་གློག་བཞུའི་འོད་མདངས་ཁྲོད་ལྕགས་ལམ་ནང་ཁུལ་གྱི་གནས་ཚུལ་ལ་ཞིབ་བཤེར་ཞིབ་ཕྲ་བྱས་པས། ཁོ་མོས་གྲངས་གཞི་ཟིན་ཐོར་བཀོད་པ་དང་ཆབས་ཅིག་སྐད་པར་བརྒྱུད་ནས“འདིར་སྐྱོན་ཆ་ཡོད་བཟོ་འདུག་པས་སྔར་བས་གཏན་འཁེལ་བྱེད་དགོས་ཀྱི་འདུག”ཅེས་སྙན་སེང་ཞུས།

“2006ལོར་མཚོ་བོད་ལྕགས་ལམ་གྱི་ལམ་ཐིག་ཧྲིལ་པོར་མེ་འཁོར་ཤར་གཏོང་ཐུབ་པ་རེད། སྐབས་དེ་དུས་ང་རང་ལོ་10ལའང་སླེབས་མེད་རུང་དེའི་སྐོར་གསལ་པོ་དྲན་གྱི་འདུག ད་ཆ་བཀྲ་ཤིས་དབང་མོ་ལྕགས་ལམ་བདེ་འཇགས་སྲུང་སྐྱོབ་ཀྱི་ཁོངས་མི་ཞིག་ཏུ་གྱུར་བ་དང་ལས་ཀ་བྲེལ་འཚུབ་ཆེ་བའི་སྐབས་སུ་ཟླ་ཕྱེད་ལ་ཡང་ཁྱིམ་དུ་ལོག་ཐུབ་ཀྱི་མེད། ཀྲུང་གོ་ལྕགས་ལམ་མཚོ་བོད་ཚོགས་པ་ཚད་ཡོད་ཀུང་སིའི་གྲངས་གཞི་ལས་མངོན་པར། དཔྱིད་གསར་སྐྱེལ་འདྲེན་རིང་ལྷ་ས་མེ་འཁོར་འབབ་ཚུགས་ཀྱིས་འགྲུལ་པ་མི་ཐེངས་ཁྲི་32སྐྱེལ་བ་དང་ཉིན་རེར་ཆ་སྙོམས་མི་ཐེངས་8000སྐྱེལ་གྱི་ཡོད། ལྕགས་ལམ་བདེ་འཇགས་ངང་འཁོར་སྐྱོད་ཐུབ་ཆེད། བུད་མེད་སྐྱོན་འཚོལ་པན་གྱི་ལས་ཀ་སྔར་བས་ཛ་དྲག་ཏུ་སོང་ཡོད།