འདི་ནི་རྒྱང་སྐྱོད་ཨང་བརྒྱད་པ་རྟགས་ཅན་གྱི་སྐྱེལ་འདྲེན་མེ་ཤུགས་འཕུར་མདའ་ཀ་པ་ཡིན་པ།

ཟླ་2ཚེས་11ཉིན། ཧའེ་ནན་ཝུན་ཁྲང་འཇིག་རྟེན་འཕུར་སྐྱོད་འཕེན་གཏོང་ར་བར། ཀྲུང་གོ་འཇིག་རྟེན་འཕུར་སྐྱོད་ཚན་རྩལ་ཚོགས་པའི་ཁོངས་གཏོགས་ཀྲུང་གོ་སྐྱེལ་འདྲེན་མེ་ཤུགས་འཕུར་མདའ་ལག་རྩལ་ཞིབ་འཇུག་ཁང་གིས་སྤྱིའི་ཞིབ་བཟོའི་འགན་ཁུར་བའི་རྒྱང་སྐྱོད་ཨང་བརྒྱད་པ་རྟགས་ཅན་གྱི་སྐྱེལ་འདྲེན་མེ་ཤུགས་འཕུར་མདའ་ཀ་པ་མཁའ་དབྱིངས་སུ་ཐོག་མར་འཕུར་སྐྱོད་ལམ་ལྷོངས་བྱུང་ནས། སྲུང་སྐར་དྲ་སྦྲེལ་གྱི་འཁོར་ལམ་དམའ་བའི་སྲུང་སྐར་སྔོན་གཏན་འཁེལ་བའི་འཁོར་ལམ་དུ་བསྐྱལ་བ་རེད། ད་ཐེངས་རྒྱང་སྐྱོད་ཨང་བརྒྱད་པ་རྟགས་ཅན་གྱི་སྐྱེལ་འདྲེན་མེ་ཤུགས་འཕུར་མདའ་ཀ་པ་འཕེན་གཏོང་བྱས་པ་ནི་རྒྱང་སྐྱོད་ཨང་བརྒྱད་པའི་མེ་ཤུགས་འཕུར་མདའ་རབ་དང་རིམ་པ་ཐེངས་མང་འཕེན་གཏོང་བྱེད་འགོ་ཚུགས་པ་མཚོན་ཡོད།

ཕྱི་དབྱིབས་ནས་བལྟས་ན། རྒྱང་སྐྱོད་ཨང་བརྒྱད་པ་རྟགས་ཅན་གྱི་སྐྱེལ་འདྲེན་མེ་ཤུགས་འཕུར་མདའ་ཀ་པའི“མགོ”དེ་བས་ཆེ་བ་ཡོད་པས། སྲུང་སྐར་ལ་སྡོད་ས་དེ་བས་ཆེ་བ་མཁོ་འདོན་ཐུབ་ལ། རིགས་དེ་བས་མང་བ་དང་བོངས་ཚད་དེ་བས་ཆེ་བའི་སྲུང་སྐར་ལ་འཚམ་ཐུབ། རྒྱང་སྐྱོད་ཨང་བརྒྱད་པ་རྟགས་ཅན་གྱི་སྐྱེལ་འདྲེན་མེ་ཤུགས་འཕུར་མདའ་ཀ་པའི་སྤྱི་ཁྱབ་ཇུས་འགོད་པ་སུང་ཀྲེན་ཡུས་ཀྱིས་ངོ་སྤྲོད་བྱས་པར་གཞིགས་ན། རྒྱང་སྐྱོད་ཨང་བརྒྱད་པ་རྟགས་ཅན་གྱི་སྐྱེལ་འདྲེན་མེ་ཤུགས་འཕུར་མདའ་ཀ་པ་ནི་རྒྱང་སྐྱོད་ཨང་བརྒྱད་པ་རྟགས་ཅན་གྱི་མེ་ཤུགས་འཕུར་མདའ་རབ་དང་རིམ་པའི་རྨང་གཞིའི་ཐོག འབྱུང་འགྱུར་འཁོར་ལམ་དམའ་འབྲིང་གི་སྐར་ཚོམ་ཆེ་གྲས་དྲ་ཚོ་འཕེན་གཏོང་གི་དགོས་མཁོར་དམིགས་ནས་ལེགས་བཅོས་ཞིབ་བཟོ་བྱས་པ་ཞིག་རེད། དེར་རྒྱང་སྐྱོད་ཨང་བརྒྱད་པ་རྟགས་ཅན་གྱི་མེ་ཤུགས་འཕུར་མདའ་རབ་དང་རིམ་པའི་ཉིང་ལྷེབ་རིམ་པ་དང་པོ་དང་ཕན་སྐུལ་ཡོ་ཆས་མུ་མཐུད་བཀོལ་སྤྱོད་བྱས་ཡོད། ཉིང་ལྷེབ་རིམ་པ་གཉིས་པ་ནི་གསར་དུ་ཞིབ་བཟོ་བྱས་པའི་ཚངས་ཐིག་སྨི་3.35ཡི་ཀུན་སྤྱོད་ཆིང་དབྱང་རིམ་པ་མཐའ་མ་ཡིན་པས། ཚངས་ཐིག་སྨི་5.2དང་སྨི་4.2ཀྱི་རྒྱུག་ཁེབས་འདེམས་ཆོག་པ་དང་། ད་ཐེངས་སྤྱད་པ་དེ་ནི་ཚངས་ཐིག་སྨི་5.2ཀྱི་རྒྱུག་ཁེབས་རེད།

2025ལོར། རྒྱང་སྐྱོད་ཨང་བརྒྱད་པ་རྟགས་ཅན་གྱི་མེ་ཤུགས་འཕུར་མདའ་རབ་དང་རིམ་པ་ཐེངས་མང་འཕེན་གཏོང་གི་ལས་འགན་ལག་བསྟར་གྱི་འཆར་གཞི་ཡོད་པས། སླད་ཕྱིན་ཐེངས་མང་འཕེན་གཏོང་བྱེད་པའི་དགོས་མཁོ་དེ་བས་ལེགས་པར་སྐོང་ཐུབ་ལ། འགྲན་རྩོད་ནུས་པ་དེ་བས་ཆེ་བའི་ཚོང་ལས་འཕེན་གཏོང་གི་ཞབས་ཞུ་ཡང་མཁོ་འདོན་བྱ་རྒྱུ་རེད།