རིགས་གཅིག་མཁས་ཅན་གྱིས་དྲན་སྐུལ་བྱས་དོན།
མྱུར་སྐྱེལ“བསྐུར་མ་སྟོང་པའི་ཁ་བསླུས”ལ་དོགས་ཟོན་བྱེད་དགོས།
མྱུར་སྐྱེལ་བསྐུར་མའི་ཕྱི་ངོས་སྟབས་བདེ་བའི་ཁར་བསྐུར་མཁན་གསལ་པོ་མེད་པ་དང་། ཁ་ཕྱེ་ན་དངོས་ཟོག་ཉོ་སྒྲུབ་གཱ་དང་བརྡ་ཁྱབ་ཤོག་བྱང་ཞིག་ཡོད། དེ་རྗེས་ཁེ་བཟང་ཕྱིར་སློག་གི་བསླུ་བྲིད་འོག་མགོ་བདེ་དྲན་འཕྲུལ་རྩེད་དེ་འཛད་སྤྱོད་པར་མགོ་སྐོར་གཏོང་བ་སོགས། དཔྱིད་གསར་དུས་ཆེན་གྱི་གུང་གསེང་མཇུག་འགྲིལ་བ་དང་ཆབས་ཅིག རྒྱལ་ནང་གི་མྱུར་སྐྱེལ་ཁེ་ལས་གཙོ་བོའི་དྲ་རྒྱའི་གཉེར་སྐྱོང་རྒྱུན་གཏན་གྱི་དུས་སུ་སླེབས་ནས་མྱུར་སྐྱེལ་ལས་རིགས་ཀྱི་ལས་སྒོའི་མཐོ་རླབས་འཕྱུར་ཡོད་མོད། ཡིན་ནའང་ཁྲིམས་འགལ་བ་ཁག་གཅིག་གིས་དྲ་ཐོག་ཚོང་དོན་གྱི་མྱུར་སྐྱེལ་ཐབས་ལམ་སྤྱད་དེ“བསྐུར་མ་སྟོང་པའི་ཁ་བསླུས”བརྒྱབ་ནས་མང་ཚོགས་ཀྱི་རྒྱུ་ནོར་ལ་གྱོང་གུན་བཟོ་གི་ཡོད་པ་རེད།
ཡོང་ཁུངས་གསལ་པོ་མེད་པའི་མྱུར་སྐྱེལ་བསྐུར་མ་དེ་དག་ལ་མངོན་མེད་ཉེན་ཁ་ཡོད་ཅིང་། “ཁ་བསླུས་རྒྱག་མཁན་གྱིས་ཁྲིམས་འགལ་གྱི་ཐབས་ལམ་བརྒྱུད་མི་སྒེར་གྱི་ཆ་འཕྲིན་རག་ཐབས་བྱེད་པ་དང་ཐོབ་ཐང་རྫུས་མ་སྤྱད་དེ་མྱུར་སྐྱེལ་རྩིས་ཐོའི་ཨང་གྲངས་ཐོ་འགོད་བྱས་ཏེ། བྱ་དགའ་ཡོད་པའི་གཱ་དང་དེ་བཞིན་དྲིལ་བསྒྲགས་ཤོག་བྱང་བླུགས་པའི‘བསྐུར་མ་སྟོང་པ’”འབོར་ཆེན་ཞིག་བསྐུར་གྱི་ཡོད། ཀྲུང་གོ་ཁྲིམས་རིག་པའི་ལྷན་ཚོགས་ཀྱི་འཛད་སྤྱོད་པའི་ཁེ་དབང་སྲུང་སྐྱོང་བཅའ་ཁྲིམས་ཞིབ་འཇུག་ལྷན་ཚོགས་ཀྱི་དྲུང་ཆེ་གཞོན་པ་ཁྲེན་དབྱིན་ཅང་གིས་ཐུམ་སྒྲིལ་ལེན་མཁན་གྱིས་རྩ་གཉིས་ཨང་རྟགས་བཤེར་རྗེས། ཁ་བསླུས་རྒྱག་མཁན་གྱིས་རིན་མེད་བྱ་དགའ་སྤྲོད་པའམ་ཡང་ན་དངུལ་སྨར་དང་ཤོག་ཆག་སྤྲོད་པ་སོགས་ཀྱི་བྱ་ཐབས་ལ་བརྟེན་ནས་ཡིད་ཆེས་ཐོབ་ཐབས་བྱས་རྗེས་འཛད་སྤྱོད་པ་ཚོགས་པའི་ནང་ཞུགས་སུ་འཇུག་པའམ་ཡང་ན་ལག་ཐོགས་ཁ་པར་ལ་མཉེན་ཆས་ཕབ་ལེན་བྱེད་དུ་བཅུག་སྟེ “ལས་འགན་སྒྲུབ་པ”དང“བྲིན་རྫུ་ཁེ་སློག”གི་རྣམ་པར་བརྟེན་ནས་གནོད་འཚེ་ཕོག་མཁན་གྱིས་རྒྱུས་མངའ་མེད་པའི་རྩིས་ཁྲར་དངུལ་བསྒྱུར་བར་འཇམ་ཁྲིད་བྱེད་པ་མ་ཟད། དངུལ་བསྒྱུར་རྗེས་འཕྲལ་དུ་འཛད་སྤྱོད་པ་མིང་ཐོ་ནག་པོའི་ནང་བཅུག་སྟེ་ཁ་བསླུས་རྒྱག་གི་ཡོད་པ་རེད།
གནད་དོན་ཐོན་པའི་ཐབས་ལམ་ཐོག་ནས་བལྟས་ན།“བསྐུར་མ་སྟོང་པའི་ཁ་བསླུས”དོགས་ཟོན་བྱེད་པར་ཕྱོགས་གཉིས་ཀྱི་ཐད་ནས་ཤུགས་རྒྱག་དགོས་པ་སྟེ། གཅིག་ནས་མི་སྒེར་གྱི་ཆ་འཕྲིན་བདེ་འཇགས་སྲུང་སྐྱོང་བྱེད་ཤུགས་ཆེ་རུ་བཏང་ནས་ཆ་འཕྲིན་ཕྱིར་མི་གྱར་བ་བྱེད་དགོས་པ་དང་། གཉིས་ནས་མྱུར་སྐྱེལ་གྱི་མིང་དངོས་བསྐུར་རྒྱུར་ཤུགས་སྣོན་བརྒྱབ་སྟེ་ཟོག་འགྲེམས་བདེ་འཇགས་ཀྱི་དྲ་རྒྱའི་ཚགས་དམ་དུ་གཏོང་དགོས།
ཁ་བསླུས་རྒྱག་སྟངས་དེ་རིགས་བཀག་འགོག་ནུས་ལྡན་བྱ་ཆེད། མྱུར་སྐྱེལ་ཁེ་ལས་མི་ཉུང་བ་ཞིག་གིས་ཆེད་དོན་ཁ་བསླུས་ལ་ངོ་རྒོལ་གྱི་བྱ་སྤྱོད་སྤེལ་ནས། འཛད་སྤྱོད་པའི་ཁེ་དབང་ལ་འགན་སྲུང་ནུས་ལྡན་བྱེད་ཀྱི་ཡོད།
“ཐུམ་སྒྲིལ་སྟོང་པའི་ཁ་བསླུས”ལ་རྡུང་རྡེག་གཏོང་རྒྱུ་དེ་ལྷུ་ཚིགས་དང་བྱེད་པོ་མང་དག་གཅིག་དང་འབྲེལ་བ་ཡོད་པས། ཕྱོགས་ཁག་གིས་མཐུན་སྦྱོར་དམ་ཟབ་བྱས་ཏེ། མཉམ་བཅོས་ཀྱི་མཉམ་ཤུགས་ཆེན་པོ་ཞིག་ཆགས་པར་བྱེད་དགོས། ཁྲིན་དབྱིན་ཅང་གིས་བསྟན་དོན། མྱུར་སྐྱེལ་ཁེ་ལས་ཙམ་མ་ཟད། དྲ་ཐོག་ཚོང་དོན་ལས་སྟེགས་ཀྱིས་ཀྱང་དགོས་ངེས་ཀྱི་བྱེད་ཐབས་སྤྱད་དེ་མི་སྒེར་གྱི་ཆ་འཕྲིན་བདེ་འཇགས་འགན་ལེན་བྱས་ནས་འཛད་སྤྱོད་པའི་ཆ་འཕྲིན་ཕྱིར་མི་གྱར་བ་བྱེད་དགོས། འབྲེལ་ཡོད་སྡེ་ཚན་གྱིས་ཀྱང་རང་རང་སོ་སོའི་འགན་འཁྲི་གཞིར་བཟུང་། ལྟ་འདོམས་བཅོས་སྐྱོང་ལ་ཤུགས་སྣོན་བརྒྱབ་ནས་ཞིབ་བཤེར་ཐག་གཅོད་དང་རྡུང་རྡེག་ཚ་ནན་གཏོང་དགོས།
རྒྱལ་ཁབ་སྦྲག་སྲིད་ཅུས་ཀྱི་འབྲེལ་ཡོད་འགན་འཁུར་བས་གོམ་སྟབས་རྗེས་མར་སྐུར་སྐྱེལ་ཞབས་ཞུའི་ནུས་པར་ལུགས་མཐུན་འགན་སྲུང་དང་མང་ཚོགས་ཀྱི་གཞི་རྩའི་སྐུར་སྐྱེལ་དགོས་མཁོ་བསྐངས་རྒྱུ་དང་ཆབས་ཅིག མྱུར་སྐྱེལ་ཁེ་ལས་ཀྱིས་བསྐུར་སྐྱེལ་ཐབས་ལམ་གྱི་བདེ་འཇགས་དོ་དམ་བྱེད་ཤུགས་ཆེ་རུ་གཏོང་བ་དང་བདེ་འཇགས་ངང་སྐུར་སྐྱེལ་བྱེད་ཐབས་གཏིང་ཟབ་དང་ཏན་ཏིག་ཡོང་བར་སྐུལ་འདེད་བཏང་སྟེ། ཆུ་ཚད་མཐོ་བའི་བདེ་འཇགས་ལ་བརྟེན་ནས་ལས་རིགས་སྤུས་ཚད་མཐོ་བའི་འཕེལ་རྒྱས་འགན་ལེན་བྱེད་ཀྱི་ཡིན་ཞེས་བརྗོད་པ་རེད།