སྐྱེ་ཁམས་ཁོར་ཡུག་པུའུ་ཡིས་ས་སྦས་གཙང་སེལ་བྱེད་ཚད་རིམ་བཞིན་ཉུང་དུ་བཏང་ནས་ཉེན་ཆེའི་བེད་མེད་ཟོག་རོའི་ཁོར་ཡུག་བཅོས་སྐྱོང་ལ་ཤུགས་སྣོན་རྒྱག་དགོས་པའི་བླང་བྱ་བཏོན་པ།
ཉེ་ཆར། སྐྱེ་ཁམས་ཁོར་ཡུག་པུའུ་ཡིས《ཉེན་ཆེའི་བེད་མེད་ཟོག་རོའི་ཁོར་ཡུག་བཅོས་སྐྱོང་ལ་སྔར་བས་ཤུགས་སྣོན་བརྒྱབ་ནས་ཁོར་ཡུག་གི་ཉེན་ཁ་སྔོན་འགོག་དང་ཚོད་འཛིན་ནན་པོ་བྱ་རྒྱུའི་སྐོར་གྱི་མཛུབ་ཁྲིད་བསམ་འཆར》བཀྲམ་པ་རེད།
མཛུབ་ཁྲིད་བསམ་འཆར་ནང་བཏོན་དོན། 2026ལོར་སླེབས་སྐབས་རྒྱལ་ཡོངས་ཀྱི་ཉེན་ཆེའི་བེད་མེད་ཟོག་རོའི་ཁོར་ཡུག་ལྟ་འདོམས་ཚན་པ་གཙོ་བོའི་བརྒྱུད་རིམ་ཧྲིལ་པོར་ཆ་འཕྲིན་ཅན་གྱི་ལྟ་འདོམས་སྤྱི་ཡོངས་ལ་ཁྱབ་པ་དང་། 2027ལོར་སླེབས་སྐབས་རྒྱལ་ཡོངས་ཀྱི་ཉེན་ཆེའི་བེད་མེད་ཟོག་རོའི་འབྲེལ་ཡོད་ཚན་པར་བརྒྱུད་རིམ་ཧྲིལ་པོ་ཆ་འཕྲིན་ཅན་གྱི་ལྟ་འདོམས་གཞི་རྩའི་ཆ་ནས་སྤྱི་ཡོངས་ལ་ཁྱབ་པ་མངོན་འགྱུར་དང་། ཉེན་ཡོད་བེད་མེད་ཟོག་རོ་ས་སྦས་གཙང་སེལ་བྱེད་ཚད་ཀྱིས་བཟུང་བའི་བསྡུར་ཚད་བརྟན་པོའི་ངང་ཆག་པ། བེད་སྤྱོད་གཙང་སེལ་འགན་ལེན་ནུས་པ་དང་ཁོར་ཡུག་ཉེན་ཁ་སྔོན་འགོག་དང་ཚོད་འཛིན་གྱི་ཆུ་ཚད་སྔར་བས་མཐོ་རུ་བཅས་གཏོང་རྒྱུ། 2030ལོར་སླེབས་སྐབས་ཉེན་ཆེའི་བེད་མེད་ཟོག་རོའི་བརྒྱུད་རིམ་ཧྲིལ་པོའི་ཆ་འཕྲིན་ཅན་གྱི་ལྟ་འདོམས་མ་ལག་སྔར་བས་འཐུས་སྒོ་ཚང་དུ་བཏང་ནས། རྒྱལ་ཡོངས་ཀྱི་ཉེན་ཆེའི་བེད་མེད་ཟོག་རོ་ས་སྦས་གཙང་སེལ་བྱེད་ཚད་ཀྱིས་བཟུང་བའི་བསྡུར་ཚད་10%ནང་ཚུན་དུ་ཚོད་འཛིན་བྱས་ཏེ་ཉེན་ཆེའི་བེད་མེད་ཟོག་རོའི་ཁོར་ཡུག་གི་ཉེན་ཁ་སྔོན་འགོག་དང་ཚོད་འཛིན་ནུས་ལྡན་ཐུབ་པ་བྱ་རྒྱུ་བཅས་རེད།
ཉེན་ཆེའི་བེད་མེད་ཟོག་རོ་ས་སྦས་གཙང་སེལ་དོ་དམ་དང་ཚོད་འཛིན་ནན་པོ་བྱེད་པའི་ཐད། མཛུབ་ཁྲིད་བསམ་འཆར་ནང་ས་སྦས་གཙང་སེལ་བྱེད་ཚད་རིམ་བཞིན་ཉུང་དུ་གཏོང་དགོས་པའི་བླང་བྱ་བཏོན་ཡོད། ཁོར་ཡུག་ལྟ་འདོམས་བྱེད་ཤུགས་ཆེ་རུ་བཏང་ནས་བེད་སྤྱོད་དང་མེར་བསྲེགས་པ་སོགས་ཀྱི་གཙང་སེལ་བྱེད་སྟངས་བརྒྱུད་འབོར་ཚད་ཉུང་དུ་གཏོང་བའི་ཉེན་ཡོད་བེད་མེད་ཟོག་རོ་ཐད་ཀར་སྦས་རྒྱུ་རིམ་བཞིན་ཚོད་འཛིན་བྱེད་དགོས། དེ་དང་ཆབས་ཅིག་ཉེན་ཆེའི་བེད་མེད་ཟོག་རོ་ས་སྦས་གཙང་སེལ་བྱེད་ཚད་ཀྱིས་བཟུང་བའི་བསྡུར་ཚད་བརྟན་པོའི་ངང་ཆག་པར་སྐུལ་འདེད་ཤུགས་ཆེན་བཏང་ནས་ཉེན་ཆེའི་བེད་མེད་ཟོག་རོའི་འབྱུང་ཁུངས་ཉུང་དུ་གཏོང་བ་དང་ཐོན་ཁུངས་ཅན་གྱི་བེད་སྤྱོད་བྱེད་པར་སྐུལ་འདེད་གཏོང་དགོས།
སྨན་བཅོས་བེད་མེད་ཟོག་རོ་བསྡུ་རུབ་གཙང་སེལ་བྱེད་པའི་ཐད་མཛུབ་ཁྲིད་བསམ་འཆར་ནང་བཏོན་དོན། གྲོང་ཁྱེར་ཁོངས་གཏོགས་ཀྱི་སྨན་བཅོས་བེད་མེད་ཟོག་རོ་གཅིག་སྡུད་གཙང་སེལ་བྱེད་ནུས་འགན་ལེན་ཡོད་པ་དང་། ཐག་རིང་ས་ཁུལ་དུ་གཅིག་སྡུད་གཙང་སེལ་དང་རང་སར་གཙང་སེལ་ཟུང་འབྲེལ་བྱེད་པ། “དུས་རྒྱུན་དང་འཕྲལ་སྡོམ་གཉིས་སྤྱོད”ཀྱི་གཙང་སེལ་བྱེད་ནུས་སྒུལ་རྣམ་འཐུས་སྒོ་ཚང་དུ་གཏོང་བ་བཅས་ཀྱི་གྲབས་གཤོམ་གྱི་སྨན་བཅོས་བེད་མེད་ཟོག་རོ་བསྡུ་རུབ་གཙང་སེལ་མ་ལག་འཛུགས་པར་སྐུལ་འདེད་གཏོང་དགོས་པ་དང་། སྨན་བཅོས་བེད་མེད་ཟོག་རོ་གཅིག་སྡུད་གནོད་མེད་ཅན་བཞིན་གྱི་གཙང་སེལ་བྱ་ཐབས་མུ་མཐུད་ཁྱབ་གདལ་གཏོང་དགོས།