མི་དམངས་ལྟེ་བར་འཛིན་རྒྱུ་མཐའ་འཁྱོངས་བྱེད་པ་ནི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པའི་ནང་ཁྱབ་པའི་ཐིག་དམར་ཞིག་རེད་ལ། ཀྲུང་གོ་གུང་ཁྲན་ཏང་གིས་ཐོག་མཐའ་བར་གསུམ་དུ་མཐའ་འཁྱོངས་བྱེད་པའི་རྩ་བའི་ཆབ་སྲིད་ཀྱི་ལངས་ཕྱོགས་ཤིག་ཀྱང་རེད། རང་རྒྱལ་ནི་འཛམ་གླིང་ཐོག་རང་བྱུང་གི་གནོད་འཚེ་ཐོན་མང་བའི་རྒྱལ་ཁབ་ཀྱི་གྲས་ཤིག་ཡིན་པའི་ཆ་ནས། གནོད་འཚེ་སྔོན་འགོག་དང་། ཉུང་གཏོང་། གེགས་སེལ་བཅས་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གིས་ཐོག་མཐའ་བར་གསུམ་དུ་ཐུགས་ཁུར་ཧ་ཅང་ཆེན་པོ་གནང་མུས་ཀྱི་དམངས་འཚོའི་གནད་དོན་གལ་ཆེན་ཞིག་རེད། གནོད་འཚེ་ཐོན་རིམ་བཞིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འཕྲལ་མར“མི་སྣ་མྱུར་སྐྱོབ་ཨང་དང་པོར་འཇོག་དགོས”ཞེས་དང“ཐབས་ཤེས་ཡོད་རྒུ་རྩལ་སྤྲུགས་ཀྱིས་མི་སྣ་ཤི་རྨས་ཉུང་དུ་གཏོང་དགོས”ཞེས་ནན་བཤད་གནང་གི་ཡོད།

ཟླ་1ཚེས་7ཉིན། བོད་རང་སྐྱོང་ལྗོངས་གཞིས་རྩེ་གྲོང་ཁྱེར་དིང་རི་རྫོང་དུ་ས་ཡོམ་རིམ་པ་6.8བརྒྱབ་ནས་མི་སྣ་ཤི་རྨས་ཚབས་ཆེན་བྱུང་བ་དང་ཁང་ཁྱིམ་ཕོན་ཆེན་ཞིག་རོར་གྱུར། ས་ཡོམ་བརྒྱབ་རྗེས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འཕྲལ་མར་ཡོམ་འགོག་གེགས་སེལ་ལས་དོན་ལ་མཛུབ་སྟོན་གལ་ཆེན་གནང་བ་སྟེ། ནུས་ཤུགས་ཡོད་རྒུས་མི་སྣ་འཚོལ་སྐྱོབ་དང་རྨས་མ་སྐྱོབ་བཅོས་བྱས་ནས་ཐབས་ཤེས་ཡོད་རྒུ་རྩལ་སྤྲུགས་ཀྱིས་མི་སྣ་ཤི་རྨས་ཉུང་དུ་གཏོང་དགོས་པ་མ་ཟད། ཞོར་ཐོན་གནོད་འཚེ་སྔོན་འགོག་དང་གནོད་འཚེ་ཕོག་པའི་མང་ཚོགས་བཀོད་སྒྲིག་ཡག་པོ་བྱེད་པ་དང་མཇུག་མཐུད་ལས་དོན་སོགས་ཡག་པོ་སྒྲུབ་དགོས་ཞེས་གསུངས་ཡོད། མཛུབ་སྟོན་ནང་གི་ཡིག་འབྲུ་རེ་རེའི་ཁྲོད་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མི་དམངས་གོང་དུ་བཀུར་བའི་འདུ་ཤེས་དང་བྱ་སྤྱོད་མངོན་ཡོད་ལ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གེགས་ཁུལ་གྱི་མང་ཚོགས་ལ་ཐུགས་ཁུར་གཟབ་བཞེས་གནང་བའང་གང་ལེགས་མཚོན་ཡོད་པས། གྲང་ངར་ཆེ་བའི་དགུན་དུས་འདིར་གེགས་ཁུལ་མི་སེར་གྱི་སེམས་པ་དྲོ་སོབ་སོབ་ཏུ་གྱུར་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་སྣེ་ཁྲིད་འོག ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལམ་ལུགས་ཀྱི་ཁྱད་འཕགས་ལེགས་ཆ་གསོན་ཉམས་དོད་པོས་མངོན་ཞིང་། ཕྱོགས་ཁག་གི་སྟོབས་ཤུགས་ཀྱིས་བཀའ་རྒྱ་མགྱོགས་མྱུར་དང་ལེན་དང་བྱ་སྤྱོད་འཕྲལ་དུ་སྤེལ་ཏེ་མི་སྣ་འཚོལ་སྐྱོབ་དང་། རྨས་མ་སྐྱོབ་བཅོས། གནོད་འཚེ་ཕོག་པའི་མང་ཚོགས་བཀོད་སྒྲིག་དང་དེ་བཞིན་གནོད་འཚེ་ཕོག་པའི་རྨང་གཞིའི་སྒྲིག་བཀོད་མྱུར་བཟོ་སོགས་ཀྱི་ལས་དོན་ཕྱོགས་ཡོངས་ནས་སྤེལ་འགོ་ཚུགས་པ་དང་སྦྲགས། ཡོམ་འཕྲོ་དང་དྲོད་ཚད་དམའ་བ་སོགས་ཞོར་ཐོན་གནོད་འཚེ་ཡང་སྔོན་འགོག་ནན་པོ་བྱས་པ་རེད། ཡོམ་འགོག་གེགས་སེལ་གྱི་ལས་དོན་ནང་མི་སེམས་དེ་མུར་གཡོ་བའི་བྱ་བ་མང་པོ་བསྟུད་མར་ཐོན་པ་སྟེ། རོགས་སྐྱོབ་སྟོབས་ཤུགས་ཕྱོགས་བཞི་མཚམས་བརྒྱད་ནས་གནོད་འཚེ་ཕོག་ཁུལ་དུ་གཅིག་རྗེས་གཉིས་མཐུད་འབྱོར་བ་དང་། དམག་ཉེན་དམངས་ཀྱིས་ལག་གདང་དཔུང་སྦྲེལ་བྱས་ནས་ལག་གཉིས་ལ་བརྟེན་ས་ལོ་90ལ་སླེབས་པའི་རྒན་མོ་ཚུད་པའི་མི་ཕོན་ཆེན་ས་འོག་ནས་བསྐྱབས་པ། གེགས་སེལ་དངོས་ཟོག་ཁག་དང་ཁག་བྱས་ཏེ་ཕྱོགས་བཞི་མཚམས་བརྒྱད་ནས་གནོད་འཚེ་ཕོག་པའི་མང་ཚོགས་ཀྱི་སྒོ་རྩར་བསྐྱལ་བ། དེ་བཞིན་ས་ཕྱོགས་གང་ས་གང་ནས་བཅངས་པའི་སེམས་ཁུར་གྱིས་གནོད་འཚེ་ཕོག་པའི་མང་ཚོགས་ཀྱི་སེམས་པ་དྲོས་པར་བྱས།

སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གིས་བཀའ་རྒྱ་བཏང་མ་ཐག ཕྱོགས་ཁག་གིས་སྟོབས་ཤུགས་གཅིག་ཏུ་བསྒྲིལ་ནས་གེགས་སེལ་གྱི་དམག་འཐབ་དྲག་པོ་བརྒྱབ་ཡོད། ཕྱོགས་གཅིག་ལ་དཀའ་ངལ་འཕྲད་དུས་ཕྱོགས་བཞི་མཚམས་བརྒྱད་ནས་རོགས་རམ་བྱས་ཏེ་གནོད་འཚེ་ཕོག་པའི་མང་ཚོགས་དཀའ་ངལ་ལས་སྒྲོལ་རོགས་བྱས་པ་ནི་དུས་རབས་གསར་པའི་ཀྲུང་གོས་མི་དམངས་གོང་བཀུར་ཞེས་པར་བརྒྱབ་པའི་འགྲེལ་བཤད་གསོན་ཉམས་ལྡན་པ་ཞིག་རེད། དེ་ཐོག་ནས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་བླ་ན་མེད་པའི་བརྩེ་སེམས་དང་འགན་འཁྲི་འཁུར་སེམས་གང་ལེགས་མཚོན་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཐུགས་ཁུར་ཟབ་མོ་དང་། ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད། རྒྱལ་ཡོངས་མི་དམངས་ཀྱི་སྒེར་སེམས་མེད་པའི་རོགས་སྐྱོར། བོད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་གཞོགས་འདེགས་དང་འབད་བརྩོན་བཅས་ཡོད་པས། ང་ཚོས་ཐོལ་བྱུང་གི་ས་ཡོམ་གྱི་གནོད་འཚེ་འདི་ལས་རྣམ་པར་རྒྱལ་ཐུབ་ངེས་རེད། དེའང་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་ཡོམ་ཁུལ་གྱི་ས་གནས་ས་ཐོག་ཏུ་ཕེབས་ནས་ཡོམ་འགོག་གེགས་སེལ་གྱི་ལས་དོན་ལ་བཀོད་འདོམས་གནང་སྐབས་བློ་བརྟན་འགྱུར་མེད་ཀྱི་སྒོ་ནས་གསུངས་པ་ལྟར“སྤྱི་ཁྱབ་ཧྲུའུ་ཅིའི་མཁས་མཛངས་ལྡན་པའི་འགོ་ཁྲིད་འོག ང་ཚོས་ཁྱིམ་གཞིས་བསྐྱར་སྐྲུན་ཐུབ་ངེས་རེད་ལ། དེས་མ་ཚད་ཁྱིམ་གཞིས་དེ་བས་ལེགས་པ་ཞིག་སྐྲུན་ཐུབ་ངེས་རེད”