ཉེ་ཆར། ཡོང་འབབ་དམའ་བའི་མི་འབོར་ལ་སྟབས་བསྟུན་ལྟ་ཞིབ་ཚད་ལེན་དང་རོགས་སྐྱོབ་རོགས་སྐྱོར་ལ་ཤུགས་སྣོན་རྒྱག་རྒྱུའི་སྐོར་གྱི་རང་སྐྱོང་ལྗོངས་ཀྱི་འབྲེལ་ཡོད་བཀོད་སྒྲིག་ལག་བསྟར་དོན་འཁྱོལ་གཏིང་ཟབ་བྱས་ནས། རིམ་དབྱེ་དང་རིགས་དབྱེའི་སྤྱི་ཚོགས་རོགས་སྐྱོབ་མ་ལག་སྔར་བས་འཐུས་སྒོ་ཚང་དུ་གཏོང་ཆེད། ལྷ་ས་གྲོང་ཁྱེར་གྱིས《ལྷ་ས་གྲོང་ཁྱེར་གྱི་མ་མཐའི་འཚོ་བ་འགན་ལེན་གྱི་ལག་བསྟར་ཞིབ་སྲོལ》(གཤམ་དུ《ཞིབ་སྲོལ》ཞེས་བསྡུ་རྒྱུ)དངོས་སུ་བཏོན་པ་རེད།

“ཐ་སྐྱོང་མཐར་ཕྱིན་དང་། ཐ་སྐྱོང་གནད་སྨིན། ཐ་སྐྱོང་བརྟན་པོ”བཅས་ཀྱི་དམིགས་ཚད་ལ་དམིགས་ནས། 《ཞིབ་སྲོལ》ནང་བྱེད་ཐབས་གསར་གཏོད་དང་ལམ་སྲོལ་འཐུས་སྒོ་ཚང་དུ་བཏང་སྟེ། “གོ་རིམ་སྟབས་བདེ་དང་། དང་ལེན་མགྱོགས་པ། ག་ལེར་ཕྱིར་འཐེན། ཞབས་ཞུ་སེམས་རྩ་འཁོལ་བ”བཅས་ཀྱི་ལམ་ལུགས་མ་ལག་ཧུར་ཐག་བཏོད་པས། ཐ་སྐྱོང་འགན་ལེན་བྱེད་ནུས་མངོན་གསལ་དོད་པོས་ཆེ་རུ་ཕྱིན་ཡོད། གཞན་ཡང་། 《ཞིབ་སྲོལ》ནང་དུད་ཚང་ལ་གཞིགས་ནས་འགན་ལེན་དང་མིར་གཞིགས་ནས་འགན་ལེན་ཟུང་འབྲེལ་བྱེད་པའི་མ་མཐའི་འཚོ་བ་འགན་ལེན་ལམ་ལུགས་སྔར་བས་འཐུས་སྒོ་ཚང་དུ་གཏོང་བ་དང་། ནད་ཚབས་ལྕི་རིགས་དང་དབང་པོ་སྐྱོན་ཅན་ཚབས་ཆེན་གྱི་མི་སྒེར་གྱི་ཡོང་འབབ་ཀྱི་ཚོད་འཛིན་མེད་པར་བཟོས་ནས། ཡོང་འབབ་དམའ་བའི་ཁྱིམ་ཚང་གི་ནད་ཚབས་ལྕི་རིགས་དང་དབང་པོ་སྐྱོན་ཅན་ཚབས་ཆེན་ལ་འགན་ལེན་བྱེད་ཤུགས་ཆེ་རུ་བཏང་ཡོད། ཞིབ་མཆན་འགོད་པའི་བརྒྱུད་རིམ་ཡང་སྔར་བས་ལེགས་སུ་དང་སྟབས་བདེ་རུ་བཏང་ནས། དམངས་གཙོའི་དཔྱད་གླེང་གི་འགྱུར་མེད་བླང་བྱ་མེད་པར་བཟོས་པ་དང་། ཞིབ་དཔྱད་གཏན་འཁེལ་བྱེད་པ་དེ་སྤྱི་བསྒྲགས་ཐེངས་གཉིས་སྤེལ་བ་ནས་ཐེངས་གཅིག་སྤེལ་བའི་བར་ཉུང་དུ་བཏང་ཡོད།