ཤིན་ཧྭ་གསར་འགྱུར་ཁང་པེ་ཅིང་ནས་ཟླ་2ཚེས་9ཉིན་གློག་འཕྲིན་འབྱོར་གསལ། ཉིན་ཤས་གོང་། ཀྲུང་དབྱང་རིམ་པ་ནས་ཕྱི་ཚུལ་རིང་ལུགས་བཅོས་སྒྲིག་བྱས་ཏེ་གཞི་རིམ་གྱི་ཁུར་པོ་ཡང་དུ་གཏོང་བའི་ཆེད་དོན་ལས་དོན་ལམ་སྲོལ་གཞུང་དོན་ཁང་གིས་ཀྲུང་དབྱང་སྒྲིག་ཨུད་གཞུང་དོན་ཐིང་དང་མཉམ་དུ་ཕྱི་ཚུལ་རིང་ལུགས་བཅོས་སྒྲིག་བྱས་ནས། གཞི་རིམ་གྱི་ཁུར་པོ་ཡང་དུ་གཏོང་བའི་དཔེ་མཚོན་གནད་དོན་3བརྡ་ཁྱབ་བཏང་ཞིང་། ཞིབ་ཕྲའི་གནས་ཚུལ་གཤམ་གསལ།

1.ཀྲུང་གོ་ལས་ཞུགས་གསོ་སྦྱོང་ལག་རྩལ་མཛུབ་ཁྲིད་ལྟེ་གནས་ཀྱི་བརྟག་ཞིབ་ཚོགས་ཆུང་གཞི་རིམ་དུ་བརྟག་ཞིབ་བྱེད་སྐབས་རིམ་པ་བཞིན་མི་མང་པོས་ཕེབས་རོགས་ཞུས་ཡོད། 2024ལོའི་ཟླ་10ཚེས་16ནས་18ཉིན་བར། ཀྲུང་གོ་ལས་ཞུགས་གསོ་སྦྱོང་ལག་རྩལ་མཛུབ་ཁྲིད་ལྟེ་གནས་ཀྱི་མི་3ཞིང་ཆེན་ག་གེ་མོ་ཞིག་གི་རྫོང་དང་ཆུས་གཉིས་སུ་བསྐྱོད་ནས་ངལ་ནུས་སྤུས་རྟགས་འཛུགས་སྐྲུན་ལས་དོན་ལ་བརྟག་ཞིབ་བྱས་ཤིང་། དེའི་རིང་གཞི་རིམ་གྱི་ཕེབས་རོགས་མི་གྲངས་ཚོད་འཛིན་ཡག་པོ་མ་བྱུང་བར་བརྟེན་ཞིང་ཆེན་དང་། གྲོང་ཁྱེར། རྫོང་། ཤང་བཅས་སུ་རིམ་པ་བཞིན་ཕེབས་རོགས་ཞུ་མཁན་མང་པོ་བྱུང་བ་དང་སྐབས་འགར་བརྟག་ཞིབ་ས་ཚིགས་རེར་ཕེབས་རོགས་ཞུ་མཁན་10ཙམ་ཟིན་ནས་གཞི་རིམ་གྱི་ཁུར་པོ་ལྕི་རུ་སོང་ཡོད། བརྟག་ཞིབ་ཚོགས་ཆུང་གིས་སྔ་རྗེས་སུ་རྒྱལ་ཁབ་ཀྱི་ལོ་རྒྱུས་རིག་གནས་གྲགས་ཅན་གྲོང་ཁྱེར་དང་། མིང་ཆིང་གི་གནའ་ཁྲོམ། སྟོང་ལོའི་གནའ་མཁར་སོགས་ལ་རྟོག་ཞིབ་དང་བརྟག་ཞིབ་བྱས་པ་དང་བརྟག་ཞིབ་གནས་ཁག་གཅིག་གི་བརྟག་ཞིབ་ཀྱི་ནང་དོན་དངོས་དང་རྩ་བ་ནས་མཐུན་གྱི་མེད།

2.ཀྲུང་གོ་སློབ་མའི་འཚོ་བཅུད་དང་བདེ་ཐང་སྐུལ་འདེད་ཚོགས་པས་སྒྲིག་འགལ་ངང་ཚད་ལོན་འཛུགས་གཏོད་ཀྱི་བྱེད་སྒོ་སྤེལ་བ་དང་སྐར་གྲངས་དཔྱད་བསྡུར་གྱི་ཚད་གཞི་རྙོག་འཛིང་ཆེ་བས་གཞི་རིམ་ལ་དཔང་རྟགས་དཔྱད་ཡིག་མང་པོ་འདོན་དུ་བཅུག་ཡོད། 2024ལོའི་ཟླ་9པར། ཀྲུང་གོ་སློབ་མའི་འཚོ་བཅུད་དང་བདེ་ཐང་སྐུལ་འདེད་ཚོགས་པས་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་ཁག་གི་འབྲེལ་ཡོད་སྡེ་ཚན་ལ་སྒྲིག་འགལ་ངང་བརྡ་ཐོ་བཏང་ནས། 2025ལོར“འཚོ་བཅུད་དང་བདེ་ཐང་སློབ་གྲྭ(བུ་བཅོལ་ཁང)”འཛུགས་སྐྲུན་རེ་ཞུའི་ཞིབ་དཔྱད་ལས་དོན་བཀོད་སྒྲིག་བྱས་ནས་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་ཁག་གི་འབྲེལ་ཡོད་ལས་ཁུངས་ཀྱིས་ས་གནས་དེ་གའི་སློབ་གྲྭ་དང་བུ་བཅོལ་ཁང་སྒྲིག་འཛུགས་བྱས་ཏེ་རེ་ཞུ་ཞིབ་དཔྱད་བྱེད་དགོས་པའི་བླང་བྱ་བཏོན་པ་མ་ཟད། ལོ་ལྟར་ཚད་གཞི་ལོན་པའི་སློབ་གྲྭའི་ལས་དོན་སྤེལ་ཚུལ་ལ་དཔྱད་ཞིབ་བྱེད་དགོས་པ་བཏོན་ཡོད། སྐར་གྲངས་དཔྱད་བསྡུར་གྱི་ཚད་གཞི་རྙོག་འཛིང་ཆེ་ལ། འཚོ་བཅུད་དང་བདེ་ཐང་གི་སློབ་གྲྭའི་སྐར་གྲངས་དཔྱད་བསྡུར་རེའུ་མིག་ནང་རིགས་ཆེན་པོ་8དང་། ནང་དོན་ཁག་39 སྐར་གྲངས་དཔྱད་བསྡུར་གྱི་ཚད་གཞི་ཁག་117བཅས་ཚུད་ཡོད་པ་དང་དམིགས་ཚད་རིམ་པ་3པར་སླེབས་ཀྱི་ཡོད། ཀྲུང་གོ་སློབ་མའི་འཚོ་བཅུད་དང་བདེ་ཐང་སྐུལ་འདེད་ཚོགས་པའི་གོང་གསལ་གྱི་བྱེད་སྟངས་དེ《ཕྱི་ཚུལ་རིང་ལུགས་བཅོས་སྒྲིག་བྱས་ནས་གཞི་རིམ་གྱི་ཁུར་པོ་ཡང་དུ་གཏོང་བའི་གཏན་འབེབས་འགའ་ཞིག》གི་དཔེ་སྟོན་འཛུགས་གཏོད་ཀྱི་ཚད་གཞི་དང་ཚད་ལོན་བྱེད་སྒོ་དང་ཚད་ལྡན་ལྟ་བཤེར་ཞིབ་བཤེར་དཔྱད་ཞིབ་སྤྱི་འདོམས་སོགས་ཀྱི་འབྲེལ་ཡོད་བླང་བྱ་ལས་འགལ་ཡོད།

3.ཀོང་ཏུང་ཧུའེ་ཀྲོའུ་གྲོང་ཁྱེར་སློབ་གསོ་སྡེ་ཚན་གྱིས་སྤྱི་ཚོགས་ལས་དོན་སློབ་གྲྭར་སྤེལ་བའི་ཐད་སྤྱི་འདོམས་དང་ཚད་ལྡན་མ་བྱུང་བ་དང་། ཚད་ལོན་དང་འགན་འཁྲིའི་ཡི་གེར་མིང་རྟགས་འགོད་དུ་འཇུག་པ་སོགས་ཀྱི་སྒྲིག་འགལ་བྱེད་སྒོ་སྤེལ་བས་དགེ་རྒན་གྱི་སློབ་གསོ་སློབ་ཁྲིད་མིན་པའི་ཁུར་པོ་ལྕི་རུ་སོང་ཡོད། ཧུའེ་ཀྲོའུ་གྲོང་ཁྱེར་སློབ་གསོ་ཅུས་ཀྱིས《ཕྱི་ཚུལ་རིང་ལུགས་བཅོས་སྒྲིག་བྱས་ནས་གཞི་རིམ་གྱི་ཁུར་པོ་ཡང་དུ་གཏོང་བའི་གཏན་འབེབས་འགའ་ཞིག》དང་འགལ་ཡང་འབྲེལ་ཡོད་ཚད་ལོན་བྱེད་སྒོ་མཚམས་འཇོག་ཏུ་བཅུག་མེད། 2024ལོའི་ཟླ་10པར་སྔར་བཞིན་སློབ་གྲྭ་འབྲིང་ཆུང་གི་མེ་ཟོན་བདེ་འཇགས་ཚད་ལྡན་ཅན་གྱི་དོ་དམ་ཚད་ལོན་གྱི་ཞིབ་བཤེར་རྩིས་ལེན་ལས་དོན་སྤེལ་བ་མ་ཟད། སློབ་གྲྭས་ཞིབ་བཤེར་རྩིས་ལེན་ཚད་གཞི་ཁག་100ལྷག་ཙམ་ལ་གཞིགས་ནས་རང་དཔྱད་རང་བཤེར་བྱས་ནས་ཟླ་རེར་མེ་ཟོན་ཞིབ་བཤེར་དང་། ཉིན་རེར་མེ་ཟོན་སྐོར་ཞིབ། མེ་ཟོན་བདེ་འཇགས་སློབ་གསོ་སོགས་ཀྱི་རྩིས་ཐོའི་དཔྱད་གཞི་སྣ་ཚོགས་གྲ་སྒྲིག་བྱེད་དགོས་པའི་བླང་བྱ་བཏོན་ཡོད། ཧུའེ་ཀྲོའུ་གྲོང་ཁྱེར་པོ་ལུའོ་རྫོང་སློབ་གསོ་ཅུས་ཀྱིས་2024ལོའི་ཟླ་5པར་སློབ་མ་ཆུར་མ་ལྷུང་སྔོན་འགོག་བྱེད་པའི་བདེ་འཇགས་ཆེད་དོན་ལས་དོན་སྤེལ་ནས་ཆེད་ལས་སྡེ་ཚན་གྱིས་འཁུར་དགོས་པའི་འགན་འཁྲི་དང་ལས་འགན་སློབ་གྲྭར་རྩིས་སྤྲད་པ་དང་། སློབ་གྲྭས་སློབ་གྲྭའི་མཐའ་འཁོར་གྱི་ཆུ་མཛོད་དང་། གཙང་པོ། མཚོ་སོགས་ཆུ་ཁོངས་གཙོ་བོར་ཕྱོགས་ཡོངས་ནས་ཞིབ་བཤེར་བྱ་རྒྱུའི་བཀོད་སྒྲིག་བྱས་པ་མ་ཟད། སློབ་མ་དང་ཁྱིམ་བདག་ཁས་ལེན་ཡི་གེ་དང་འགན་འཁྲི་ཡི་གེར་མིང་རྟགས་འགོད་དགོས་པའི་བླང་བྱ་བཏོན་ཏེ། ཕྲུ་གུ་ཆུར་མ་ལྷུང་སྔོན་འགོག་བྱེད་པའི་ལས་དོན་དེ་སློབ་སྤྱིའི་འགན་འཁྲིའི་ལམ་ལུགས་དཔྱད་ཞིབ་དང་འགན་འཁྲི་བདའ་འདེད་བྱེད་པའི་གཞི་འཛིན་ས་གལ་ཆེན་དུ་བརྩིས་པར་བརྟེན་སློབ་གསོ་སློབ་ཁྲིད་མིན་པའི་ལས་དོན་དང་རྙོག་རྫིང་ཆེ་བའི་བླང་བྱས་སློབ་གྲྭ་འབྲིང་ཆུང་གི་དགེ་རྒན་གྱི་ཁུར་པོ་ལྕི་རུ་སོང་ཡོད།

གོང་གསལ་གྱི་གནད་དོན་ལས། ས་གནས་དང་སྡེ་ཚན་ལ་ལས་ཀྲུང་དབྱང་གི་གཏན་འབེབས་དོན་ཚན་བརྒྱད་དང་དེའི་ལག་བསྟར་ཞིབ་སྲོལ་གྱི་དགོངས་དོན་ལག་བསྟར་དང་དོན་འཁྱོལ་ནན་པོ་མི་བྱེད་པ་མངོན་ཡོད་ལ། བརྟག་ཞིབ་བྱེད་རིང་བསུ་སྐྱེལ་དང་། རིམ་པ་བཞིན་ཕེབས་རོགས་ཞུ་བ། ཕན་འབྲས་དངོས་དོན་གཉེར་མ་བྱས་པར་གཞི་རིམ་གྱི་ཁུར་པོ་ལྕི་རུ་སོང་ཡོད། ལ་ལས《ཕྱི་ཚུལ་རིང་ལུགས་བཅོས་སྒྲིག་བྱས་ནས་གཞི་རིམ་གྱི་ཁུར་པོ་ཡང་དུ་གཏོང་བའི་གཏན་འབེབས་འགའ་ཞིག》ལག་བསྟར་ནན་པོ་མ་བྱས་པ་མ་ཟད། སྒྲིག་འགལ་ངང་གཞི་རིམ་དུ་ཚད་ལོན་འཛུགས་གཏོད་ཀྱི་བྱེད་སྒོ་སྤེལ་བ་དང་། གདེང་འཇོག་དམིགས་ཚད་རྙོག་འཛིང་ཆེ་བ། གཞི་རིམ་ལ་དཔང་རྟགས་དཔྱད་ཡིག་མང་པོ་འདོན་དུ་འཇུག་པ་བཅས་བྱས་ནས་ཡིག་ཆ་རིང་ལུགས་དང་ཆོ་མེད་ཀྱི་ལས་དོན་སྤེལ་གྱི་ཡོད། ལ་ལས་སྤྱི་ཚོགས་ལས་དོན་སློབ་གྲྭར་སྤེལ་བར་སྤྱི་འདོམས་ནུས་ལྡན་མ་བྱུང་བར་བརྟེན་སློབ་གྲྭས་དགོས་མེད་ཀྱི་སློབ་གསོ་སློབ་ཁྲིད་མིན་པའི་ལས་འགན་མང་པོ་འཁུར་དགོས་པའི་གནས་ཚུལ་ཐོན་ཡོད།