“ཀྲུང་གོ་བས་སྲོལ་རྒྱུན་ལོ་གསར་ལ་རྟེན་འབྲེལ་ཞུ་བའི་སྤྱི་ཚོགས་ཀྱི་ལག་ལེན་ཞིག་ཡིན་པའི་དཔྱིད་གསར་དུས་ཆེན”མཉམ་འབྲེལ་རྒྱལ་ཚོགས་ཚན་སློབ་རིག་གསུམ་རྩ་འཛུགས་ཀྱི་མིའི་རིགས་ཀྱི་མངོན་མིན་རིག་གནས་ཤུལ་བཞག་གི་མཚོན་བྱེད་བརྩམས་ཆོས་ཀྱི་མིང་གཞུང་ནང་བཅུག་པ་དེ་ནི་དོན་སྙིང་གལ་ཆེན་ལྡན་པའི་བྱ་བ་ཞིག་རེད”ཅེས་མོ་རོ་ཁོ་ཁཱ་སཱ་པུའུ་ལན་ཁ་ཧ་སང་ཁྲི་ཐོག་གཉིས་པའི་སློབ་ཆེན་ཁུང་ཙི་སློབ་གླིང་གི་ཕྱི་ཕྱོགས་ཡོན་ཀྲང་ཧྥ་ཏེ་མཱ་·ཨའེ་ཐེ་མུའུ་སི་ཡིས་ཉེ་ཆར་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས་དེ་ལྟར་བརྗོད།

ཧྥ་ཏེ་མཱ་ཡིས་བརྗོད་དོན། ཀྲུང་གོའི་དམངས་ཚོགས་ཀྱིས་སྲོལ་རྒྱུན་ལོ་གསར་ལ་རྟེན་འབྲེལ་ཞུ་སྟངས་ཐད་རིག་གནས་ཀྱི་ནང་དོན་ཕུན་སུམ་ཚོགས་པོ་ལྡན་ཞིང་། ནང་མི་མཉམ་འཛོམས་ཀྱིས་ལོ་གསར་གནམ་གང་གི་ཟ་མ་བཟའ་བ་དེས་ཁྱིམ་ཚང་འཆམ་མཐུན་གྱི་གལ་ཆེའི་རང་བཞིན་སྔར་བས་མཚོན་པ་དང་། ཤོག་ཆག་སྤྲོད་པ་ནི་དར་རྒྱས་དང་རླུང་རྟ་ཡོང་རེ་བྱེད་པ་མཚོན་པ། ཁང་པའི་ཕྱི་ནང་ཚང་མར་བཀྲ་ཤིས་པའི་རྒྱན་སྤྲས་པ་དང་ཤོག་སྦག་རྒྱག་པ་དེས་མཛེས་སྡུག་ལྡན་པའི་འབྱུང་འགྱུར་ཧུར་ཐག་གཏོད་རྒྱུ་ཡིན་པ་མཚོན་གྱི་ཡོད། “ལྷག་པར་དུ་ཀྲུང་གོའི་དཔྱིད་གསར་དུས་ཆེན་གཏོང་སྐབས་ས་གཞི་ཡོངས་སུ་སྐྱེ་སྟོབས་ཀྱི་དཔལ་འབར་བའི་དཔྱིད་དུས་ཡིན་པ་དང་དཔྱིད་གསར་དུས་ཆེན་དགའ་གཏོང་བྱེད་པ་དེ་ཡང་རྙིང་ཕུད་གསར་སྡུད་བྱེད་པ་ཞིག་རེད”ཧྥ་ཏེ་མཱ་ཡིས། མོ་རོ་ཁོ་ཡི་ཨཱ་མཱ་ཅི་བས་ལོ་གསར་བསུ་བར་ཡང་འདུ་ཤེས་དེ་འདྲར་བརྩི་སྲུང་བྱེད་པ་དང་དེ་གཉིས་ཀ“ཚེ་སྲོག་གི་མྱུ་གུ་འབུད་པ་དང་སོ་ནམ་ལས་དུས”ལ་རྟེན་འབྲེལ་ཞུ་གི་ཡོད་ཅེས་བརྗོད།

ཁཱ་སཱ་པུའུ་ལན་ཁ་ཧ་སང་ཁྲི་ཐོག་གཉིས་པའི་སློབ་ཆེན་ཁུང་ཙི་སློབ་གླིང་ནི་ཧྲང་ཧའེ་ཕྱི་རྒྱལ་སྐད་ཡིག་སློབ་ཆེན་དང་ཁཱ་སཱ་པུའུ་ལན་ཁ་ཧ་སང་ཁྲི་ཐོག་གཉིས་པའི་སློབ་ཆེན་གཉིས་ཀྱིས་2013ལོར་མཉམ་ལས་བྱས་ནས་བཙུགས་པ་ཞིག་རེད། ཧྥ་ཏེ་མཱ་ཡིས“དཔྱིད་གསར་དུས་ཆེན་ནི་ཀྲུང་གོའི་སྣ་མང་རིག་གནས་མངོན་པའི་སྐར་ཁུང་ཞིག་རེད། ཁཱ་སཱ་པུའུ་ལན་ཁ་ཧ་སང་ཁྲི་ཐོག་གཉིས་པའི་སློབ་ཆེན་གྱིས་ལོ་ལྟར་དཔྱིད་གསར་དུས་ཆེན་ལ་རྟེན་འབྲེལ་ཞུ་བའི་བྱེད་སྒོ་གཉེར་གྱི་ཡོད། ང་ཚོའི་བྱེད་སྒོ་དེ་མོ་རོ་ཁོ་དང་ཀྲུང་གོའི་སྲོལ་རྒྱུན་མང་པོ་མཉམ་འདྲེས་བྱས་ནས། ང་ཚོས་ཐུན་མོང་ཐོག་གཅེས་སྤྲས་བྱེད་པའི་སྲོལ་རྒྱུན་རིག་གནས་དང་འདུ་ཤེས་མངོན་པ་དཔེར་ན། ཁྱིམ་ཚང་འཆམ་མཐུན་དང་། མཛེས་སྡུག་དོན་གཉེར། བཀྲ་ཤིས་སྨོན་འདུན་ཞུ་བ་སོགས་རེད། རིག་གནས་སྤེལ་རེས་དེ་རིགས་བརྒྱུད་ང་ཚོས་མོ་ཀྲུང་མི་དམངས་ཀྱི་མཛའ་གྲོགས་སྦྲེལ་ཐག་ལ་ཤུགས་སྣོན་བརྒྱབ་ནས་ཕྱོགས་གཉིས་པོའི་འབྲེལ་བ་སྔར་བས་སྲ་བརྟན་དུ་གཏོང་གི་ཡོད”ཅེས་བརྗོད།

ཧྥ་ཏེ་མཱ་ཡིས། དཔྱིད་གསར་དུས་ཆེན་ལ་རྟེན་འབྲེལ་ཞུ་བའི་བྱེད་སྒོའི་དམིགས་ཡུལ་ནི་ཀྲུང་ཧྭའི་སྲོལ་རྒྱུན་རིག་གནས་ཀྱི་མཛེས་པར་མྱོང་རོལ་བྱས་པ་མ་ཟད། མོ་རོ་ཁོའི་སྒྱུ་རྩལ་མཁས་ཅན་ཚོར་རང་ངོས་ཀྱི་རིག་གནས་མངོན་པའི་ལས་སྟེགས་མཁོ་འདོན་ཡང་བྱས་ཡོད། མཛེས་པ་མཉམ་སྤྱོད་ཀྱི་བྱེད་སྒོའི་ཁྲོད་མོ་ན་ཁོའི་དམངས་ཚོགས་ཀྱིས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ལ་སྔར་བས་ཤེས་རྟོགས་ཐུབ་ནས། ཤེས་དཔལ་སྤེལ་རེས་དང་དཔྱད་གཞིར་འཛིན་རེས་ཀྱི་དོན་སྙིང་ལ་ངོས་འཛིན་ཐུབ་ཡོད་ཅེས་བརྗོད་པ་དང་། ཁོང་གིས“དེའི་དབང་གིས་གུས་པས་ཀྱང་ཀྲུང་གོའི་དཔྱིད་གསར་དུས་ཆེན་རིག་གནས་ཀྱི་འཛམ་གླིང་རང་བཞིན་གྱི་དོན་སྙིང་ལ་སྔར་བས་བསྔགས་བརྗོད་བྱེད་ཀྱི་ཡོད། ཀྲུང་གོའི་དཔྱིད་གསར་དུས་ཆེན་རིག་གནས་ཀྱིས་རྒྱབ་ལྗོངས་མི་འདྲ་བའི་མི་རྣམས་སྔར་བས་ལེགས་པའི་ངང་སྦྲེལ་མཐུད་ཐུབ་པའི་ཡིད་ཆེས་ཡོད”ཅེས་བརྗོད།

ཁཱ་སཱ་པུའུ་ལན་ཁ་ཧ་སང་ཁྲི་ཐོག་གཉིས་པའི་སློབ་ཆེན་སྤྱི་ཚོགས་རིག་པ་ཚན་ཁག་གི་འགན་འཁུར་བ་ཡིན་པའི་ཧྥ་ཏེ་མཱ་ཡིས་སྤྱི་ཚོགས་ཀྱི་ཆབ་སྲིད་ཕྱོགས་སྒྱུར་དང་། གཞོན་ནུའི་རིག་གནས། འབྲེལ་ལམ་སྨྱན་སྦྱོར་སོགས་ཁྱབ་ཁོངས་ལ་ཡུན་རིང་དོ་ཁུར་བྱེད་ཀྱི་ཡོད། ཁོང་གིས། ཨ་རབ་རྒྱལ་ཁབ་དང་ཀྲུང་གོའི་རིག་གནས་འདྲ་བ་མ་ཟད་འདུ་ཤེས་ཀྱང་ཕན་ཚུན་མཐུན་ཞིང་། ཕྱོགས་གཉིས་པོས་ཐོག་མཐའ་བར་གསུམ་དུ་ཕ་རོལ་པོའི་རིག་གནས་སྲོལ་རྒྱུན་ལ་བརྩི་འཇོག་བྱེད་པའི་རྨང་གཞིའི་ཐོག་གླེང་མོལ་མཉམ་ལས་བྱས་ཏེ་དུས་རབས་གསར་པར་ཨ་ཀྲུང་གི་སྲོལ་རྒྱུན་མཛའ་གྲོགས་ལ་གསོན་ཤུགས་གསར་པ་རྒྱུན་ཆད་མེད་པར་རྒྱས་པར་བྱེད་ཀྱི་ཡོད་ཅེས་བརྗོད། ཧྥ་ཏེ་མཱ་ཡིས་ངོ་སྤྲོད་བྱས་པར་གཞིགས་ན། མིག་སྔར་ཁཱ་སཱ་པུའུ་ལན་ཁ་ཧ་སང་ཁྲི་ཐོག་གཉིས་པའི་སློབ་ཆེན་ཁུང་ཙི་སློབ་གླིང་གིས་རྒྱ་ཡིག་སློབ་ཁྲིད་རྨང་གཞིར་བྱེད་པ་དང་རིག་གཞུང་སྤེལ་རེས་ཁྱད་ཆོས་སུ་བྱས་ནས་མོ་རོ་ཁོར་རིག་གནས་སྤེལ་རེས་དང་རིག་གཞུང་བགྲོ་གླེང་གི་བྱེད་སྒོ་རྒྱ་ཁྱབ་ངང་སྤེལ་བཞིན་ཡོད། ཁུང་ཙི་སློབ་གླིང་གིས་ད་དུང་ཨ་རབ་རྒྱལ་ཁབ་ཀྱི་ཁུང་ཙི་སློབ་གླིང་གཞན་དག་དང་མཉམ་ལས་ལ་ཤུགས་སྣོན་བརྒྱབ་ནས་མཉམ་ལས་དྲ་རྒྱ་བཙུགས་ཏེ་ཨ་ཀྲུང་རིག་གནས་སྤེལ་རེས་མི་ཚོགས་དེ་བས་རྒྱ་ཆེ་བར་ཁྱབ་པར་བྱེད་ཀྱི་ཡོད།