ཉིན་གུང་གི་མཚམས་སུ། རྒན་མོ་བསོད་ནམས་ཀྱིས་འཁར་རྒྱུག་བཙུགས་ནས་འཛུམ་དམུལ་དམུལ་ངང་ལྷ་ས་གྲོང་ཁྱེར་ཁྲེང་ཀོན་ཆུས་འོ་བརྒྱལ་ཐང་སྡེ་ཁུལ་གྱི་སྐལ་བཟང་ཟ་ཁང་དུ་འོང་།

“རྨོ་བོ་ལགས། ཉིན་གུང་གི་ལྟོ་ཆས་བཟོས་མ་ཐག་ཡིན་པས། མགྱོགས་པོ་མཆོད་པར་ཕེབས་ཤོག”ཅེས་སྦྱིན་བདག་ཀྲོའུ་ཐའོ་ཧྥང་གིས་སེམས་རྩ་འཁོལ་པོས་རྒན་མོ་བསྐྱོར་ཏེ་ཟ་ཁང་ནང་ཁྲིད། རྒན་མོ་བསོད་ནམས་ནི་འདི་ལོ་ལོ་70ལ་སླེབས་པ་དང་། འོ་བརྒྱལ་ཐང་སྡེ་ཁུལ་ཚོགས་ཆུང་ལྔ་པའི་གྲོང་མི་ཞིག་རེད། ཁོང་རྐང་པ་ཐང་པོ་མེད་པས་མགྱོགས་པོ་དེ་ཙམ་འགྲོ་མི་ཐུབ་ཀྱང་། ཉིན་ལྟར་འདིར་གུང་ཟས་བཟའ་བར་ཡོང་གི་ཡོད།

རྒན་མོ་བསོད་ནམས་ཀྱི་ངོས་ནས་བརྗོད་ཚེ། 2024ལོར་ཁོང་གི་འཚོ་བར་འགྱུར་ལྡོག་ཆེ་ཤོས་བྱུང་བ་སྟེ། “བདེ་སྐྱིད་ལྡན་པའི‘གཅེས་སེམས་ལྟོ་ཆས’བཟའ་རྒྱུ་ཡོད་པ”དེ་རེད། དེ་ནི་འོ་བརྒྱལ་ཐང་སྡེ་ཁུལ་ལ་བཙུགས་པའི་ཁྲེང་ཀོན་ཆུས་ཀྱི་རྒན་རྒོན་གྱི་བཟའ་བཏུང་ཞབས་ཞུའི་ས་ཚིགས་ཀྱིས་བཟོས་པ་ཞིག་ཡིན་པ་དང་། དེའི་དམིགས་ཡུལ་ནི་མང་ཚོགས་དང་ལྷག་པར་དུ་རྒན་རྒོན་ཚོགས་སྤྱིའི་སེམས་ཁྲལ་སེལ་ཆེད་རེད།

“སྡེ་ཁུལ་ཟ་ཁང་གིས་ཉིན་གུང་དང་། དགོང་དྲོའི་ཁ་ལག་སྤྲད་དེ། ལོ་70ཡན་གྱི་རྒན་རྒོན་ལ་རིན་པ་མི་བསྡུ་བ་དང་། ལོ་60ནས་ལོ་70བར་དང་། ཁོར་ཡུག་གཙང་སྦྲ་བ་དང་དམག་ཞབས་ཐིམ་པའི་དམག་མིར་རིན་གོང་ཕྱེད་ཀ་ལས་མི་བསྡུ་བ་ཕུད། དེ་བྱིངས་ཚང་མར་ཐོག་མའི་རིན་གོང་བཞིན་ལྟོ་རིན་བསྡུ་གི་ཡོད”ཅེས་སྡེ་ཁུལ་གྱི་དྲ་མིག་པ་

ཟ་ཁང་བཙུགས་རྗེས། སྡེ་ཁུལ་གྱི་མང་ཚོགས་དགའ་པོ་བྱུང་སོང་། མིག་སྔའི་བར། ཟ་ཁང་དུ་ལྟོ་ཆས་བཟའ་བར་འོང་མཁན་རྒན་རྒོན་དང་། ཁོར་ཡུག་གཙང་སྦྲ་བ་མི་ཐེངས་300ཙམ་ཟིན་ཡོད། ཀྲོའུ་ཐའོ་ཧྥང་གིས་སྡེ་ཁུལ་གྱི་རྒན་རྒོན་ཚོགས་སྤྱིར་ལྟོ་ཆས་སྤྲོད་པའི་ཞབས་འདེགས་ཡག་པོ་ཞུ་ཆེད་འབད་བརྩོན་ཆེན་པོ་བྱས་ཤིང་། “ཁ་ཅིག་ཤ་སྨན་ཉུང་ཙམ་ལ་དགའ་བ་དང་། འགའ་ཞིག་སྒ་སྐྱ་དང་སྒོག་ཙོང་རིགས་ལ་མི་དགའ་བས། ང་ཚོས‘སི་ཁྲོན་གྱི་བྲོ་བ’དེར་ལེགས་བཅོས་ཡང་སེ་བྱས་ནས་རིམ་བཞིན་རྒན་རྒོན་མང་ཆེ་བས་དགའ་པོ་བྱེད་པའི་བྲོ་བ་ཞིག་ཏུ་འགྱུར་བར་བྱས་པ་ཡིན”ཞེས་བཤད།

མིག་སྔར། 2024ལོར་ལྷ་ས་ཁྲེང་ཀོན་ཆུས་ཀྱིས་འོ་བརྒྱལ་ཐང་སྡེ་ཁུལ་སྐལ་བཟང་ཟ་ཁང་དང་འདྲ་བའི་རྒན་རྒོན་གྱི་བཟའ་བཏུང་ཞབས་ཞུའི་ས་ཚིགས་6བཙུགས་ནས་སྒོ་བྱང་བཀལ་ཡོད། རང་སྐྱོང་ལྗོངས་དམངས་སྲིད་ཐིང་གི་འབྲེལ་ཡོད་འགན་འཁུར་བས། “2024ལོའི་ལོ་མཇུག་ཏུ་ས་ཁུལ་དང་གྲོང་ཁྱེར་ཚང་མར་ཉུང་མཐར་ཟ་ཁང་2དང་། རྫོང་དང་ཆུས་ཚང་མར་ཉུང་མཐར་ཟ་ཁང་1ཡོད་པར་བྱེད་དགོས་པའི”དམིགས་ཚད་ཀྱི་བླང་བྱ་ལྟར། ལྗོངས་ཡོངས་ཀྱིས་གྲོང་ཁྱེར་དང་། སྡེ་ཁུལ། གྲོང་གསེབ་བཅས་སུ་རྒན་རྒོན་གྱི་བཟའ་བཏུང་ཞབས་ཞུའི་ས་ཚིགས་114འཕེལ་རྒྱས་བཏང་ཡོད། རིམ་རྩིས་བརྒྱབ་ན། 2025ལོར། ལྗོངས་ཡོངས་སུ་གྲོང་ཁྱེར་སྡེ་ཁུལ་དུ་རྒན་རྒོན་ཟ་ཁང་དང་རྒན་རྒོན་གྱི་བཟའ་བཏུང་ཞབས་ཞུའི་ས་ཚིགས་28ཡན་ཏེ། ས་ཁུལ་དང་གྲོང་ཁྱེར་ཚང་མར་ཉུང་མཐར་ཟ་ཁང་4འཛུགས་རྒྱུ་དང་། གྲོང་གསེབ་ས་ཁུལ་དུ་རྒན་རྒོན་ཟ་ཁང་དང་། རྒན་རྒོན་གྱི་བཟའ་བཏུང་ཞབས་ཞུའི་ས་ཚིགས་148སྟེ། རྫོང་དང་ཆུས་ཚང་མར་ཉུང་མཐར་ཟ་ཁང་2འཛུགས་རྒྱུ་བཅས་ཡིན་ཚུལ་ངོ་སྤྲོད་བྱས་ཡོད།