ལོ་52ལ་སླེབས་པའི་ཞིང་པ་ལུའོ་ཁྲུང་ཀུའེ་ཡི་ཕ་ཡུལ་ནི་ས་སེར་མཐོ་སྒང་གི་དབུས་སུ་གནས་པའི་ཀན་སུའུ་ཞིང་ཆེན་པའེ་དབྱིན་གྲོང་ཁྱེར་ཅིང་ཐའེ་རྫོང་དུ་རེད།

ལོ་ཤས་གོང་དགུན་ཁ་ཤར་རིམ་བཞིན། ལུའོ་ཁྲུང་ཀུའེ་དགུན་ངལ་རྒྱག་གི་ཡོད་ཅིང་། ཉེ་བའི་ལོ་འདི་དག་རིང་གི་དགུན་ཁར་ཁོང་ཁྱིམ་དང་ཐག་རིང་པོ་དེ་ཙམ་མེད་པའི་རྒྱལ་ཁབ་གངས་ཐོག་རྣམ་གྲངས་སྦྱོང་བརྡར་རྟེན་གཞིར་ལས་ཀར་སོང་བ་དང་ད་ཆ་གངས་བཟོ་མཁར་པར་གྱུར་ཡོད།

ཀན་སུའུ་པའེ་དབྱིན་རྒྱལ་ཁབ་གངས་ཐོག་རྣམ་གྲངས་སྦྱོང་བརྡར་རྟེན་གཞི་ནི་2019ལོར་རྒྱལ་ཁབ་ལུས་རྩལ་སྤྱི་ཁྱབ་ཅུས་ཀྱིས་སྒོ་བྱང་སྤྲད་པ་ཞིག་རེད། ལུའོ་ཁྲུང་ཀུའེ་དང་འདྲ་བར་རྟེན་གཞི་དེ་དང་དེ་གའི་ལྷན་སྦྱར་སྤྱི་དམངས་གངས་ཤུད་ར་བས་ཡུལ་དེ་གའི་ཞིང་པ་མི་ཉུང་བ་ཞིག་ལ་ལོ་འདི་དག་རིང་ཡོང་འབབ་བརྟན་པོ་བྱུང་ཡོད།

དགོང་མོའི་ཆུ་ཚོད་8པར། དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་5བར་ཆག་ཅིང་། ལུའོ་ཁྲུང་ཀུའེ་ཡིས་ཞྭ་མོ་གྱོན་ནས་མགོ་བཞུ་དང་ལག་ཤུབས་བཏགས་ཏེ་གངས་བཟོ་འཕྲུལ་ཆས་ཀྱི་འཁྲིས་སུ་བསྐྱོད་ནས་ཆུ་སྦུག་ལ་འཁྱགས་པ་ཐེབས་ཡོད་མེད་བལྟས་རྗེས་ལས་རོགས་ཚོ་དང་མཉམ་དུ་གངས་བཟོ་འཕྲུལ་ཆས་4ཁ་ཕྱེ།

མགོ་བཞུའི་འོད་ལ་བརྟེན་ནས་ཁོང་གིས་ལྷགས་ཕྱོགས་གཞིར་བཟུང་གངས་བཟོ་འཕྲུལ་ཆས་ཀྱི་ཁ་ཕྱོགས་སྒྱུར་བ་དང་ད་དུང་འཕྲུལ་ཆས་ལས་དོན་པའི་གངས་ཐུལ་ཁྲོད་དུ་འཛུལ་ནས་གངས་ཀྱི་སྤུས་ཚད་ལ་ལྟ་གི་ཡོད། སྐབས་འཕྲལ་ངལ་གསོ་ཁང་དུ་ལོག་སྐབས་ལུའོ་ཁྲུང་ཀུའེ་ཡི་ཞྭ་མོ་དང་མིག་སྤུར་འཁྱགས་རལ་ཐེབས་ཡོད།

“ད་ལྟ་ནས་ང་ཚོས་ཆུ་ཚོད་ཕྱེད་ཀ་སོང་མཚམས་འཕྲུལ་ཆས་ལ་ཐེངས་རེ་ལྟ་བར་སོང་སྟེ་འཕྲུལ་ཆས་ཀྱི་ཁ་ཕྱོགས་སྒྱུར་དགོས”ཞེས་ཁོང་གིས་བཤད། ཚང་མས་མཚན་ལྷགས་འགྱུར་ནས་གངས་བཟོ་འཕྲུལ་ཆས་ལ་འཁྱགས་པ་ཐེབས་པར་སེམས་ཁྲལ་བྱེད་ཀྱི་ཡོད།

གངས་བཟོའི་སྐོར་གླེང་སྐབས། རྣམ་ཀུན་སྐད་ཆ་མང་པོ་མེད་པའི་ལུའོ་ཁྲུང་ཀུའེ་ལམ་སེང་སྐད་ཆའི་སྒམ་ཆུང་ཁ་ཕྱེ་བ་དང་འདྲ་ཞིང་། “གངས་ཤུད་ར་བར་ལས་ཀར་མ་ཡོང་གོང་། ང་ཁྱིམ་དུ་ཞིང་ཁ་བཏབ་ནས་སྡོད་པ་དང་སྐབས་རེ་རྫོང་གྲོང་དུ་ཁང་པ་མཛེས་བཟོ་བྱེད་པར་འགྲོ་གི་ཡོད། ལོ་འདི་དག་རིང་དགུན་དལ་སྐབས་སུ་རྟེན་གཞིར་གླ་པར་ཡོང་གི་ཡོད། ཁྱིམ་དང་ཐག་ཉེ་བ་མ་ཟད་ཟླ་རེར་ད་དུང་ཡོང་འབབ་སྒོར་4000རག་གི་འདུག”ཅེས་བཤད།

“ལུའོ་ཁྲུང་ཀུའེ་ད་ཆ་གངས་བཟོ་ཚན་ཁག་གི་འགོ་འཛིན་རེད། ཡོང་འབབ་ཀྱང་མང་དུ་འགྲོ་བཞིན་ཡོད”ལོ་འདི་དག་རིང་། ཡུལ་འདི་གའི་ཞིང་པ་ཁག་གཅིག་གིས་གང་ཡང་མི་ཤེས་པ་ནས་འགོ་བཙུགས་ཏེ་རིམ་བཞིན་གངས་བཟོའི་ལག་རྩལ་ཁོང་དུ་ཆུད་ཡོད་ཅེས་ལུའོ་ཁྲུང་ཀུའེ་དང་ཕ་ཡུལ་གཅིག་པ་ཡིན་པའི་རྟེན་གཞིའི་གངས་ཤུད་ར་བའི་གཙོ་གཉེར་པ་ཁའུ་མིང་ཧྥུའུ་ཡིས་བཤད།

རྟེན་གཞིའི་འགན་འཁུར་བ་ཀྲུའུ་ཅི་ཧྥེ་ཡིས་ངོ་སྤྲོད་བྱས་པར་གཞིགས་ན། གངས་འབབ་པའི་ནམ་དུས་སུ་སྦྱོང་བརྡར་རྟེན་གཞི་དང་སྤྱི་དམངས་ཀྱི་གངས་ཤུད་ར་བར་ནམ་དུས་ལ་གཞིགས་ནས་ལས་མི་100ལྷག་ཙམ་བཀོལ་བ་ཚང་མ་ཉེ་འཁོར་ས་ཁུལ་གྱི་ཞིང་པ་ཡིན་པ་རེད། “གངས་འཁྱགས་དཔལ་འབྱོར་ལས་ཞིང་པར་ཡོང་འབབ་འཕར་བར་རྒྱུན་མཐུད་སྐུལ་ཁྲིད་ཐེབས་བཞིན་ཡོད”ཅེས་ཀྲུའུ་ཅི་ཧྥེ་ཡིས་བཤད།

(ཤིན་ཧྭ་གསར་འགྱུར་ཁང་ནས་འབྱོར་པའི་གློག་འཕྲིན་གཞིར་བཟུང)