ཐབ་སྟེང་གི་འབར་བཞིན་པའི་མེ་ལྕེར་ལྟ་བཞིན། ལོ་82ལ་སླེབས་པའི་ཧ་སག་རིགས་ཀྱི་བགྲེས་སོང་ལིའུ་ཧྲི་པ་དབྱི་ཡི་ངོ་གདོང་ལས་དགའ་བའི་འཛུམ་མདངས་འཕྱུར་བཞིན་འདུག འོ་ཇ་འཁོལ་ཟིན་ལ། དྲི་ཞིམ་རོ་བཅུད་ལྡན་པའི་ལུག་ཤ་འཚོས་གྲབས་ཡོད་ཅིང་། མི་རབས་གསུམ་མཉམ་འཛོམས་ཀྱི་ཁྱིམ་ཚང་ཆེན་པོ་ཞིག་ཏུ་ནང་མི་25མཉམ་དུ་ཞིམ་ཟས་ལ་རོལ་རྩིས་བྱེད་བཞིན་ཡོད།

ཟླ་2ཚེས་4ཉིན་དཔྱིད་གསར་དུས་ཆེན་གྱི་གུང་གསེང་གི་ཉིན་མཐའ་མར་ཕྲུ་གུ་ཚོ་སླར་ཡང་ལས་གནས་སུ་ལོག་ཉེར་ཡོད་པས་བགྲེས་སོང་ལིའུ་ཧྲི་པ་དབྱི་དང་བཟའ་ཟླ་མཱ་ཞིའུ་ལན་ལ་མཚོན་ན། དགོང་ཟས་དེས་དཔྱིད་གསར་དུས་ཆེན་གྱི་སྨོན་འདུན་བཟང་པོ་མཚོན་གྱི་ཡོད།

ལོ་26གི་གོང་། ཀན་སུའུ་ཞིང་ཆེན་ཨ་ཁེ་སའེ་ཧ་སག་རིགས་རང་སྐྱོང་རྫོང་དུ་མཚོ་སྔོན་ཚ་འདམ་གཤོང་ས་ནས་ཐོན་པའི་རང་བྱུང་སོལ་རླངས་བཏང་བས་ཀན་སུའུ་ཞིང་ཆེན་གྱི་རང་བྱུང་སོལ་རླངས་སྤྱོད་པའི་མི་རིགས་ས་ཁུལ་དང་པོར་གྱུར་ཡོད། བགྲེས་སོང་ལིའུ་ཧྲི་པ་དབྱིས“སྐབས་དེར་རྫོང་ནང་དུ་ཧ་ཅང་འཁྲུག་ཆ་དོད་པ་དང་ཚང་མས་ང་ཚོ་བསོད་ནམས་འདུག ད་ནས་མེ་ཤིང་སྒྲུག་དགོས་མེད་ལ་ལྕི་བ་ཡང་འབུད་དགོས་མེད་ཅེས་བརྗོད་ཀྱི་ཡོད”ཅེས་ཕྱིར་དྲན་བྱེད་བཞིན་བརྗོད།

“རང་བྱུང་སོལ་རླངས་ཀྱིས་འཚོ་བ་གསར་པ་སྦྱིན” གཙང་ལ་བདེ་འཇགས་དང་ལྡན་པའི་རང་བྱུང་སོལ་རླངས་སྤྱད་པས། འདི་ལོའི་མཉམ་འཛོམས་ཀྱི་ཟ་མ་དེ་མགྱོགས་ལ་སྟབས་བདེ་པོའི་སྒོ་ནས་བཟོ་ཐུབ་བྱུང་ཞེས་བགྲེས་སོང་ལིའུ་ཧྲི་པ་དབྱིས་བརྗོད། ད་ཆ་ཁོང་རྫོང་གྲོང་གི་མི་རིགས་གྲོང་ཚོ་གསར་པའི་ཁང་པ་ཡངས་ཤིང་དྲོ་སྐྱིད་ལྡན་པ་ཞིག་ནང་སྤོས་ཡོད། བུ་ལྔ་དང་བུ་མོ་གཉིས་ཀྱིས་རང་རང་སོ་སོའི་ནང་མི་ཁྲིད་ནས་རྒན་རྒོན་གཉིས་ལ་ལྟ་བར་ཡོང་།

1999ལོའི་ཟླ་7ཚེས་1ཉིན། ཀྲུང་གོ་རྡོ་སྣུམ་མཚོ་སྔོན་སྣུམ་ཞིང་ཀུང་སིས་ཨ་ཁེ་སའེ་རྫོང་དུ་ལོ་རེར་སོལ་རླངས་སྨི་རྒྱ་དཔངས་གྲུ་བཞི་ཁྲི་3500གཏོང་ཐུབ་པའི་རླངས་བགོས་ས་ཚིགས་ཤིག་དང་ལོ་རེར་རང་བྱུང་སོལ་རླངས་སྨི་རྒྱ་དཔངས་གྲུ་བཞི་ཁྲི་450གཏོང་ཐུབ་པའི་གྲོང་ཁུལ་གྱི་སྦུག་དྲ་བསྐྲུན་ནས་སྤྱོད་འགོ་ཚུགས་ཡོད། 2009ལོ་དང་2011ལོར་སླར་ཡང་སྔ་རྗེས་སུ་བཟོ་ལས་ལ་སྤྱོད་པའི་སོལ་རླངས་མཁོ་སྤྲོད་ལས་རིམ་དང་རླངས་བགོས་ས་ཚིགས་ཀྱི་རང་འགུལ་ཅན་གྱི་གྲབས་སྤྱོད་ལས་རིམ་གསར་སྐྲུན་དང་བསྒྱུར་བཀོད་རིམ་སྤོར་བྱས་ཡོད། ཨ་ཁེ་སའེ་རྫོང་གི་རང་བྱུང་སོལ་རླངས་མཁོ་སྤྲོད་ཇེ་བརྟན་དང་ཚན་རིག་དང་ཇེ་མཐུན་དུ་འགྲོ་བཞིན་ཡོད།

ལོ་75ལ་སླེབས་པའི་བགྲེས་སོང་དབྱང་ཕེ་ཧའོ་དྲོད་གཏོང་ཐབ་ཀྱི་བཟོ་པ་བྱེད་མྱོང་ཞིང་། རང་བྱུང་སོལ་རླངས་ལས་བྱུང་བའི་འགྱུར་ལྡོག་ལ་མྱོང་ཚོར་ཟབ་མོ་ཡོད་པ་སྟེ“སྔོན་ཆད་གོ་ཐལ་གང་སར་ཐོར་ནས་ལས་ཀར་འགྲོ་སྐབས་ལུས་ཡོངས་ཐལ་རྡུལ་གྱིས་ཁེངས་ཀྱི་ཡོད། དྲོད་གཏོང་ཐབ་ལ་རང་བྱུང་སོལ་རླངས་སྤྱད་པ་ནས་བཟུང་ལས་གོས་གཙང་རྐྱང་ཡིན་པ་མ་ཟད། ད་དུང་ལས་ཁང་དུ་མེ་ཏོག་དང་སྔོ་ལྗང་རྩི་ཤིང་ཡང་ཡོད”ཅེས་བརྗོད།

“2024ལོའི་ཟླ་12པའི་ཟླ་མཇུག་བར། ཨ་ཁེ་སའེ་རྫོང་གི་ལོ་རེའི་སོལ་རླངས་སྤྱོད་ཚད་སྨི་རྒྱ་དཔངས་གྲུ་བཞི་ཁྲི་330ཟིན་ཡོད། འདི་ལོའི་དཔྱིད་གསར་དུས་ཆེན་གྱི་གུང་གསེང་རིང་ཉིན་རེར་སོལ་རླངས་མཁོ་འདོན་བྱེད་ཚད་དུས་རྒྱུན་ལས་སྨི་རྒྱང་དཔངས་གྲུ་བཞི་ཁྲི་1གིས་མང་བ་ཡོད”ཅེས་ཧུའེ་ཐུང་རང་བྱུང་སོལ་རླངས་ཚད་ཡོད་ཀུང་སིའི་སྤྱི་ཁྱབ་ཅིང་ལི་པའེ་ཡན་ཧུང་གིས་བརྗོད།