ཁྲལ་དོན་སྤྱི་ཁྱབ་ཅུས་ཀྱིས་རྩོམ་ཡིག་སྤེལ་ནས་རྒྱལ་སྒྲོལ་དྲ་ཐོག་ཚོང་དོན་གྱི་ཕྱིར་གཏོང་ཕྱི་རྒྱལ་མཛོད་ཁང་གི་དངོས་ཟོག“རྒྱལ་མཚམས་ནས་བསྒྲལ་མ་ཐག་ཁྲལ་སློག་པར”རྒྱབ་སྐྱོར་བྱེད་པ།
ཉེ་ཆར། རྒྱལ་ཁབ་ཁྲལ་དོན་སྤྱི་ཁྱབ་ཅུས་ཀྱིས་རྒྱལ་སྒྲོལ་དྲ་ཐོག་ཚོང་དོན་གྱི་ཕྱིར་གཏོང་ཕྱི་རྒྱལ་མཛོད་ཁང་འཕེལ་རྒྱས་གྱི་ཕྱིར་གཏོང་ཁྲལ(རྩ་ཆག)སློག་ལ་རྒྱབ་སྐྱོར་བྱེད་པའི་འབྲེལ་ཡོད་དོན་ཚན་སྐོར་གྱི་སྤྱི་བསྒྲགས་ཁྱབ་བསྒྲགས་བྱས་ནས། ཁྲལ་འཇལ་མཁན་གྱིས་རྒྱལ་སྒྲོལ་དྲ་ཐོག་ཚོང་དོན་གྱི་ཕྱིར་གཏོང་ཕྱི་རྒྱལ་མཛོད་ཁང(གཤམ་ལ་ཕྱིར་གཏོང་ཕྱི་རྒྱལ་མཛོད་ཁང་ཞེས་བསྡུ་རྒྱུ)ནས་ཕྱིར་གཏོང་བྱས་པའི་དངོས་ཟོག་ལ“རྒྱལ་མཚམས་བསྒྲལ་མ་ཐག་ཁྲལ་སློག་པའི”གཏན་འབེབས་བྱས་ཡོད།
སྤྱི་བསྒྲགས་ལ་གཞིགས་ན། ཁྲལ་འཇལ་མཁན་གྱིས་ཕྱིར་གཏོང་ཕྱི་རྒྱལ་མཛོད་ཁང(འགག་སྒོའི་ལྟ་འདོམས་བྱེད་སྟངས་ཀྱི་ཚབ་ཨང“9810”)ནས་ཕྱིར་གཏོང་བྱས་པའི་དངོས་ཟོག་དག་འགག་སྒོར་སྙན་སེང་ཞུས་ཏེ་རྒྱལ་མཚམས་བསྒྲལ་རྗེས། ཕྱིར་གཏོང་ཁྲལ(རྩ་ཆག)སློག་པའི་རེ་བ་ཞུ་ཆོག ཁྲལ་འཇལ་མཁན་གྱིས་ཕྱིར་གཏོང་ཁྲལ(རྩ་ཆག)སློག་པའི་རེ་བ་ཞུ་སྐབས། དངོས་ཟོག་ཕྱིར་འཚོང་བྱས་ཟིན་ན་ད་ལྟ་ལག་བསྟར་བྱེད་བཞིན་པའི་གཏན་འབེབས་ལྟར་འཕྲལ་དུ་ཕྱིར་གཏོང་ཁྲལ(རྩ་ཆག)སློག་པའི་རེ་བ་ཞུ་དགོས་པ་དང་། དངོས་ཟོག་ཕྱིར་འཚོང་བྱས་མེད་ན“རྒྱལ་མཚམས་བསྒྲལ་མ་ཐག་ཁྲལ་སློག་དང་ཕྱིར་ཚོང་བྱས་རྗེས་ཡང་བསྐྱར་ཞིབ་རྩིས་བྱེད་པའི”བྱེད་ཐབས་གཞིར་བཟུང་། ཕྱིར་གཏོང་ཁྲལ(རྩ་ཆག)སློག་པའི་རེ་བ་ཞུ་དགོས་པ་སྟེ། དངོས་ཟོག་འགག་སྒོར་སྙན་སེང་ཞུས་ཏེ་རྒྱལ་མཚམས་བསྒྲལ་རྗེས་སྔོན་ལ་ཕྱིར་གཏོང་ཁྲལ(རྩ་ཆག)སློག་པའི་རེ་བ་ཞུས་ནས། རྗེས་མཐུད་དངོས་ཟོག་ཕྱིར་འཚོང་བྱས་ཚུལ་ལ་གཞིགས་ཏེ་ཁྲལ་དངུལ་ཞིབ་རྩིས་བྱེད་དགོས་པ་དེ་རེད།
ཤེས་རྟོགས་བྱུང་བར་གཞིགས་ན། ཁྲལ་འཇལ་མཁན་གྱིས་ཞིབ་རྩིས་གནད་ལ་འཁེལ་ཞིང་ཕན་འབྲས་ཆེན་པོས་སྒྲུབ་རྒྱུར་རོགས་རམ་བྱ་ཆེད། ཁྲལ་དོན་ལས་ཁུངས་ཀྱིས་དྲ་ཐོག་ཁྲལ་དོན་ཅུས་དང་རྒྱལ་སྤྱིའི་ཚོང་དོན་གྱི“སྐར་ཁུང་རྐྱང་པ”སོགས་ཀྱི་ཆ་འཕྲིན་མ་ལག་བརྒྱུད། ཁྲལ་འཇལ་མཁན་ལ་ཁྲལ་དོན་ལས་ཁུངས་ཀྱིས་བསྒྲུབས་ཟིན་ཀྱང་ཁྲལ་འཇལ་མཁན་གྱིས་ཞིབ་རྩིས་བྱས་མེད་པའི་ཕྱིར་སློག་བྱེད་རྩིས་ཡོད་པའི་ཕྱིར་གཏོང་ཁྲལ་གྱི་གྲངས་གཞིའི་གསལ་ཐོ་སྐྱེལ་དགོས་ཤིང་། ཁྲལ་འཇལ་མཁན་གྱིས་དངོས་སུ་ཕྱིར་འཚོང་བྱས་པའི་གནས་ཚུལ་ལ་གཞིགས་ནས། དངོས་ཟོག་ཕྱིར་འཚོང་བྱས་ཡོད་མེད་དང་ཕྱིར་སློག་བྱེད་རྩིས་ཡོད་པའི་ཕྱིར་གཏོང་ཁྲལ་སློག་ལེགས་སྒྲིག་བྱེད་དགོས་མིན་སོགས་ཀྱི་གནས་ཚུལ་གཏན་འཁེལ་བྱེད་དགོས།