ཉིན་ཤས་གོང་། རྒྱལ་ཁབ་རླུང་འཕྲིན་བརྙན་འཕྲིན་སྤྱི་ཁྱབ་ཅུས་ཀྱིས《དྲ་རྒྱའི་འཁྲབ་གཞུང་ཐུང་གྲས་ལས་རིགས་སྐྱོན་བྲལ་ངང་དར་རྒྱས་གོང་འཕེལ་ཡོང་བར་སྔར་བས་སྤྱི་འདོམས་འཕེལ་རྒྱས་དང་བདེ་འཇགས་ངང་སྐུལ་འདེད་གཏོང་རྒྱུའི་སྐོར་གྱི་བརྡ་ཐོ》བཀྲམ་ནས། “རིགས་དབྱེ་རིམ་དབྱེའི་ཞིབ་དཔྱད”ལམ་ལུགས་དོན་འཁྱོལ་བྱེད་དགོས་པའི་བླང་བྱ་བཏོན་ཡོད། འཁྲབ་གཞུང་ཐུང་གྲས་ལས་རིགས་འཕེལ་རྒྱས་ཀྱི་དོན་དངོས་ལ་གཞིགས་ནས། རང་རྒྱལ་གྱིས་བཟོས་པའི་དྲ་རྒྱའི་འཁྲབ་གཞུང་རིམ་དབྱེ་ལྟ་འདོམས་དང་གཙོ་གནད་ལྟ་འདོམས་ཀྱི་རྩ་དོན་གཞིར་བཟུང་། འཁྲབ་གཞུང་ཐུང་གྲས་ལ་རིགས་གསུམ་དང་རིམ་པ་གསུམ་དུ་དབྱེ་ནས་ཞིབ་དཔྱད་དོ་དམ་བྱས་ཏེ། ཧེ་བག་ཅན་དང་གནད་སྨིན་ཅན་གྱི་དོ་དམ་ལ་བརྟེན་ནས་ཞིབ་དཔྱད་བརྒྱུད་རིམ་ལེགས་སུ་དང་ཞིབ་དཔྱད་ལས་ཆོད་ཆེ་རུ་བཏང་ཡོད།

བརྡ་ཐོ་གཞིར་བཟུང་། གཙོ་གནད་འཁྲབ་གཞུང་ཐུང་གྲས་དང་སྤྱིར་བཏང་གི་འཁྲབ་གཞུང་ཐུང་གྲས་ཚང་མ་ཞིང་ཆེན་རིམ་པ་ཡན་གྱི་རླུང་འཕྲིན་བརྙན་འཕྲིན་གཙོ་གཉེར་སྡེ་ཚན་ལ་སྙན་སེང་ཞུས་ནས་འཆར་འགོད་ཐོ་འགོད་དང་གློག་བརྙན་གྲུབ་པར་ཞིབ་བཤེར་བྱེད་དགོས་པ་དང་། གཙོ་གནད་འཁྲབ་གཞུང་ཐུང་གྲས་ཀྱི་འཆར་འགོད་ཐོ་འགོད་དེ་རྒྱལ་ཁབ་རླུང་འཕྲིན་བརྙན་འཕྲིན་སྤྱི་ཁྱབ་ཅུས་ཀྱིས་གཅིག་གྱུར་ཐོ་འགོད་དང་ཡོངས་བསྒྲགས་དོ་དམ་བྱེད་དགོས། འཁྲབ་གཞུང་ཐུང་གྲས་གཞན་དག་སྟོན་མཁན་ནམ་ཡང་ན་ཁྱབ་སྤེལ་གཏོང་མཁན་གྱི་དྲ་རྒྱའི་ལྟ་ཉན་ལས་སྟེགས་ཀྱིས་ནང་དོན་དོ་དམ་གྱི་འགན་འཁྲི་འཁུར་བ་དང་། ནང་དོན་ཞིབ་དཔྱད་དང་འགག་སྒོ་ནན་སྲུང་དང་པར་དབང་ཞིབ་བཤེར་གཏན་འབེབས་བྱེད་འགན་འཁུར་ནས། དུས་བཀག་ལྟར་ཞིབ་དཔྱད་བྱས་པའི་འཁྲབ་གཞུང་གི་ཆ་འཕྲིན་ཁོངས་གཏོགས་ཁུལ་གྱི་ཞིང་ཆེན་རིམ་པའི་རླུང་འཕྲིན་བརྙན་འཕྲིན་གཙོ་གཉེར་སྡེ་ཚན་ལ་ཐོ་འགོད་བྱ་རྒྱུར་འབུལ་དགོས།

བརྡ་ཐོ་གཞིར་བཟུང་། དྲ་རྒྱའི་ལྟ་ཉན་ལས་སྟེགས་དང་། བྱ་རིམ་ཆུང་གྲས། ཁྱབ་སྤེལ་གཏོང་མཁན་སོགས་ཀྱིས་སྟོན་པའམ་ཡང་ན་ཁྱབ་སྤེལ་བཏང་བའི་འཁྲབ་གཞུང་ཐུང་གྲས་ཚང་མར་ངེས་པར་དུ་དྲ་རྒྱའི་འཁྲབ་གཞུང་འགྲེམས་སྤེལ་གྱི་ཆོག་འཐུས་ལག་ཁྱེར་ཡོད་པའམ་ཡང་ན་དེ་མཚུངས་ཀྱི་དྲ་ཐོག་སྙན་སེང་ཐོ་འགོད་གོ་རིམ་ལེགས་སྒྲུབ་བྱེད་དགོས། ལེ་ཚན་དྲ་ཐོག་ཏུ་མ་བཏང་གོང་ངེས་པར་དུ་འཁྲབ་གཞུང་གི་མདུན་མར་དེ་མཚུངས་ཀྱི་རྣམ་པ་ལྟར་དྲ་རྒྱའི་འཁྲབ་གཞུང་འགྲེམས་སྤེལ་གྱི་ཆོག་འཐུས་ལག་ཁྱེར་གྱི་ཨང་གྲངས་སམ་ཡང་ན་ལེ་ཚན་ཐོ་འགོད་ཨང་གྲངས་འགོད་དགོས། དྲ་རྒྱའི་ལྟ་ཉན་ལས་སྟེགས་ཐོག་ཆོག་འཐུས་ལག་ཁྱེར་རམ་ཐོ་འགོད་ཨང་གྲངས་བཀོད་མེད་པའི་འཁྲབ་གཞུང་ཐུང་གྲས་སྟོན་པའམ་ཡང་ན་ཁྱབ་སྤེལ་བྱེད་ཆོག་གི་མེད།