ཉེ་ཆར་ཆེས་མཐོའི་མི་དམངས་ཁྲིམས་ཁང་དང་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུས་བསམ་ངན་གླ་ཆད་ཉེས་གསོག་ལ་ཆད་པ་ནན་པོ་བཅད་པའི་དཔེ་མཚོན་གྱོད་དཔེ་5མཉམ་དུ་ཁྱབ་བསྒྲགས་བྱས་ཏེ། ངལ་རྩོལ་པའི་ཁེ་དབང་ཁྲིམས་སྐྱོང་འགན་སྲུང་ལ་སྔར་བས་ཤུགས་སྣོན་བརྒྱབ་ནས་ས་གནས་ཁག་གི་ཁྲིམས་སྒྱུར་དང་ཁྲིམས་འཛིན་ལས་ཁུངས་ཀྱིས་གླ་ཆད་བཅོས་སྐྱོང་གི་འབྲེལ་ཡོད་ལས་དོན་གཏིང་ཟབ་དང་ཏན་ཏིག་སྤེལ་རྒྱུར་མཛུབ་ཁྲིད་བྱས་པ་རེད།

2020ལོ་ནས་2024ལོ་བར་གྱི་ལོ་ལྔའི་རིང་རྒྱལ་ཡོངས་ཀྱི་ཁྲིམས་ཁང་གིས་ངལ་རྩོལ་གྱི་གླ་ཆ་མ་སྤྲད་པའི་ཉེས་དོན་གྱོད་གཞི་6200ལྷག་ཙམ་ཞིབ་གཅོད་མཇུག་སྒྲིལ་བྱས་པ་དང་ཁྲིམས་གཅོད་ཀྱི་ནུས་པ་ཐོན་པའི་མི་གྲངས་6200ལྷག་ཙམ་ཟིན་ཡོད།

ངོ་སྤྲོད་བྱས་པར་གཞིགས་ན། སྲིད་ཇུས་དང་བྱེད་ཐབས་ཁག་དོན་འཁྱོལ་བྱེད་པ་དང་ཆབས་ཅིག་གླ་ཆད་བཅོས་སྐྱོང་ལས་དོན་ལ་ཕན་འབྲས་མངོན་གསལ་དོད་པོ་ཐོབ་མོད། འོན་ཀྱང་མི་སྤྱོད་སྡེ་ཚན་དང་མི་སྒེར་ཁ་ཤས་ཀྱིས་ངལ་རྩོལ་གྱི་གླ་ཆ་འགྱངས་ཆད་བྱས་པ་དང་ཐ་ན་བསམ་ངན་བཅངས་ནས་གླ་ཆ་འགྱངས་ཆད་བྱས་པ་དང་ངལ་རྩོལ་པའི་ཁྲིམས་མཐུན་ཁེ་དབང་ལ་གནོད་འཚེ་ཚབས་ཆེན་བཟོ་བའི་གནས་ཚུལ་སྔར་བཞིན་ཡོད། ཨར་ལས་ལས་རིགས་ནི་ད་བར་དུ་གླ་ཆད་བཅོས་སྐྱོང་གི་ཁྱབ་ཁོངས་གཙོ་བོ་ཞིག་ཡིན་ཞིང་། ངལ་རྩོལ་གྱི་གླ་ཆ་མ་སྤྲད་པའི་གྱོད་གཞི་དེ་རིགས་ཐག་གཅོད་བྱེད་པར་མི་སྤྱི་པུའུ་དང་ཁྲིམས་འཛིན་ལས་ཁུངས་ཀྱི་ལས་ཀའི་མཉམ་ཤུགས་ཆེ་རུ་ཏན་ཏིག་གཏོང་དགོས་ཀྱི་ཡོད།

ངལ་རྩོལ་གྱི་གླ་ཆ་མ་སྤྲད་པའི་ཉེས་གསོག་ལ་གུ་ཡངས་ཆད་གཅོད་བྱ་རྒྱུའི་ཆ་རྐྱེན་ཁྲིམས་ལྟར་གནད་ལ་འཁེལ་པོས་ཁོང་དུ་ཆུད་པ་བྱེད་རྒྱུ་ནི་གུ་ཡངས་དང་དམ་ནན་ཟུང་འབྲེལ་གྱི་ཉེས་དོན་སྲིད་ཇུས་དང་ཉེས་གསོག་དང་ཉེས་དོན་འགན་འཁྲི་གཉིས་དང་ཉེས་ཆད་ཕན་ཚུན་འཚམ་པར་བྱེད་པའི་རྩ་དོན་ཕྱོགས་ཡོངས་ནས་དོན་འཁྱོལ་བྱེད་པའི་ནང་གནས་ཀྱི་བླང་བྱ་རེད་ལ། གྱོད་སྒྲུབ་ཀྱི་ཕན་འབྲས་ཡག་པོ་ཐོན་པར་བྱེད་པའི་གཞི་རྩའི་སྔོན་འགྲོའི་ཆ་རྐྱེན་ཡང་རེད། “ཆ་འཕྲིན་ཀུང་སི་ག་གེ་མོ་དང་ཧྥེང་ཆེ་གེ་མོས་ངལ་རྩོལ་གྱི་གླ་ཆ་མ་སྤྲད་པའི་གྱོད་གཞི”ཡི་ནང་མི་དམངས་ཁྲིམས་ཁང་གིས་ཁྲིམས་ལྟར་འདྲི་གཅོད་དང་པོའི་དཔྱད་ཁྲ་ཁྱབ་བསྒྲགས་མ་བྱས་གོང་། གཏོང་སྤྲོད་འོས་འགན་སྔར་བཞིན་མ་ཁུར་བའི་ཞུ་སྦྱོར་ཕྱི་མའི་སྡེ་ཚན་ལ་ཉེས་ཆད་ནན་པོ་བཏང་བ་དང་ཞུ་སྦྱོར་ཕྱི་མའི་སྡེ་ཚན་གྱི་འགན་འཁུར་བར་ཉེས་ཆད་དངོས་བཅད་དེ། གུ་ཡངས་དང་དམ་ནན་ཟུང་འབྲེལ་གྱི“དམ་ནན”གྱི་ཕྱོགས་མངོན་པར་བྱས་པ་དང་བསམ་ངན་བཅངས་ནས་གླ་ཆ་འགྱངས་ཆད་བྱེད་མཁན་ལ་ཁྲིམས་ཆད་བཅད་ནས་ཟིལ་གྱིས་མནན་ཡོད། “ཝུང་ཆེ་གེ་མོས་ངལ་རྩོལ་གྱི་གླ་ཆ་མ་སྤྲད་པའི་གྱོད་གཞི”ཡི་ནང་གླ་ཆད་གྲངས་འབོར་དང་མི་གྲངས་བལྟོས་བཅས་ཀྱིས་ཉུང་བ་དང་། མཇུག་འབྲས་ཚབས་ཆེན་ཐོན་མེད་པ། གཞུང་གཏུག་མ་བྱས་གོང་ངལ་རྩོལ་གྱི་གླ་ཆ་གཙང་སྤྲོད་བྱས་པ་བཅས་ཀྱི་བྱ་སྤྱོད་པར་ཁྲིམས་ལྟར་ཉེས་དོན་ཆད་པ་བཅད་མེད་པ་དེ་ཐོག་ནས། གུ་ཡངས་དང་དམ་ནན་ཟུང་འབྲེལ་གྱི“གུ་ཡངས”ཀྱི་ཕྱོགས་མཚོན་པ་དང་བྱ་སྤྱོད་པར་གཏོང་སྤྲོད་འོས་འགན་སྔ་ཙམ་ཁུར་རྒྱུའི་ཁྲིད་སྟོན་བྱས་ནས་ངལ་རྩོལ་པའི་ཁྲིམས་མཐུན་ཁེ་དབང་ལ་སྲུང་སྐྱོང་ནུས་ལྡན་བྱས་ཡོད།