ཟླ་2ཚེས་7ཉིན་གྱི་ཉིན་གུང་། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་སྐུ་ཟླ་ཕེང་ལི་ཡོན་གྱིས་ཧེ་ལུང་ཅང་ཞིང་ཆེན་ཧར་པིན་གྲོང་ཁྱེར་ཉི་མའི་གླིང་ཕྲན་གསོལ་མགྲོན་ཁང་དུ་གསོལ་སྟོན་བཤམས་ནས། ཀྲུང་གོར་ཧར་པིན་ཨེ་ཤེ་ཡའི་དགུན་དུས་ལུས་རྩལ་འགྲན་ཚོགས་སྐབས་དགུ་པའི་འགོ་ཚུགས་མཛད་སྒོར་ཞུགས་མཁན་རྒྱལ་སྤྱིའི་སྐུ་མགྲོན་ཚོར་དགའ་བསུ་ཞུས་ཤིང་། འདི་ནི་ཞི་ཅིན་ཕིང་དང་ཕེང་ལི་ཡོན་གྱིས་སྐུ་མགྲོན་ཚོ་དང་ལྷན་བཞུགས་དྲན་རྟེན་སྐུ་པར་བསྐྱོན་བཞིན་པ།

ཟླ་2ཚེས་7ཉིན་གྱི་ཉིན་གུང་། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་སྐུ་ཟླ་ཕེང་ལི་ཡོན་རྣམ་གཉིས་ཀྱིས་ཧེ་ལུང་ཅང་ཞིང་ཆེན་ཧར་པིན་གྲོང་ཁྱེར་ཉི་མའི་གླིང་ཕྲན་གསོལ་མགྲོན་ཁང་དུ་གསོལ་སྟོན་བཤམས་ནས་ཀྲུང་གོར་ཧར་པིན་ཨེ་ཤེ་ཡའི་དགུན་དུས་ལུས་རྩལ་འགྲན་ཚོགས་སྐབས་དགུ་པའི་འགོ་ཚུགས་མཛད་སྒོར་ཞུགས་མཁན་རྒྱལ་སྤྱིའི་སྐུ་མགྲོན་ཚོར་དགའ་བསུ་ཞུས་ཤིང་། འདི་ནི་ཞི་ཅིན་ཕིང་གིས་ཤིས་ཚིག་སྒྲོན་བཞིན་པ།

ཟླ་2ཚེས་7ཉིན་གྱི་ཉིན་གུང་། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་སྐུ་ཟླ་ཕེང་ལི་ཡོན་གྱིས་ཧེ་ལུང་ཅང་ཞིང་ཆེན་ཧར་པིན་གྲོང་ཁྱེར་ཉི་མའི་གླིང་ཕྲན་གསོལ་མགྲོན་ཁང་དུ་གསོལ་སྟོན་བཤམས་ནས། ཀྲུང་གོར་ཧར་པིན་ཨེ་ཤེ་ཡའི་དགུན་དུས་ལུས་རྩལ་འགྲན་ཚོགས་སྐབས་དགུ་པའི་འགོ་ཚུགས་མཛད་སྒོར་ཞུགས་མཁན་རྒྱལ་སྤྱིའི་སྐུ་མགྲོན་ཚོར་དགའ་བསུ་ཞུས་པ་རེད།

ཁོང་རྣམ་པ་ནི། པུ་རུ་ནེའི་སུའུ་ཏན་ཧ་སང་ནར་དང་། ཁེར་གྷི་སི་ཐན་གྱི་ཙུང་ཐུང་ཀྲ་ཕཱ་ལུའོ་ཧྥུའུ་དང་སྐུ་ཟླ་ཀྲ་ཕཱ་ལུའོ་ཝ། ཕ་ཁི་སི་ཐན་གྱི་ཙུང་ཐུང་ཀྲ་ཨེར་ཏ་ལི། ཐེ་ལན་གྱི་ཙུང་ལི་ཕེ་ཐུང་ཐན། ཧན་གོའི་རྒྱལ་ཚོགས་ཀྱི་གྲོས་དཔོན་ཡུས་ཡོན་ཀྲི་དང་སྐུ་ཟླ་ཧྲེན་ཅིན་ཧུའེ་བཅས་དང་དེ་བཞིན་རྒྱལ་སྤྱིའི་ཨོ་ལིམ་ཕིག་ཨུ་ལྷན་གྱི་ཀྲུའུ་ཞི་པཱ་ཧོ་དང་ཨེ་ཤེ་ཡའི་ཨོ་ལིམ་ཕིག་ལས་འཛིན་ལྷན་ཚོགས་ཀྱི་ཀྲུའུ་ཞི་གཞོན་པ་དང་པོ་ཧུའོ་ཀྲེན་ཐིང་སོགས་ཡིན་པ་རེད།

འཁྱགས་གྲོང་དུ་དཔྱིད་གསར་གྱི་རྣམ་པས་ཁེངས་ལ། ཁ་བས་རབ་ཏུ་བརྒྱན་ནས་ལོ་ལེགས་ཀྱི་ཉམས་འགྱུར་ལྡན།

ཞི་ཅིན་ཕིང་དང་ཕེང་ལི་ཡོན་རྣམ་གཉིས་ཀྱིས་སྐུ་མགྲོན་ཚོ་དང་ཕན་ཚུན་དཔྱིད་གསར་གྱི་སྨོན་འདུན་ཞུས་པ་དང་། ཕན་ཚུན་ཕྱག་བཏང་གནང་ནས་ལྷན་བཞུགས་དྲན་རྟེན་སྐུ་པར་བསྐྱོན་པ་རེད།

ཀྲུང་གོ་དང་ཕྱི་རྒྱལ་གྱི་མི་རིགས་ཀྱི་གྱོན་ཆས་གྱོན་པའི་ལོ་ཆུང་བྱིས་པ་40ཡིས་སྙན་འཇེབས་ལྡན་པའི་ཧེ་ལུང་ཅང་གི་དམངས་གཞས《ཝུའུ་སུའུ་ལིའི་གྲུ་གཞས》བཏང་ནས། རྒྱལ་སྤྱིའི་སྐུ་མགྲོན་ཚོར་སྤྲོ་སེམས་འཁོལ་པོས་དགའ་བསུ་ཞུས་པ་རེད།

གསོལ་སྟོན་ཚོམས་ཆེན་ནང་གངས་འཁྱགས་ཀྱི་སྟོན་མོ་དང་དཔྱིད་གསར་གྱི་རྣམ་པས་ཁེངས་ནས་གང་སར་བཀྲ་ཤིས་ཀྱི་དཔལ་རབ་ཏུ་འབར།

ཞི་ཅིན་ཕིང་གིས་ཤིས་ཚིག་བསྒྲོན་ནས་ཀྲུང་གོ་སྲིད་གཞུང་དང་ཀྲུང་གོའི་མི་དམངས་ཀྱི་ཚབ་ཞུས་ཏེ། ཀྲུང་གོར་ཨེ་ཤེ་ཡའི་དགུན་དུས་ལུས་རྩལ་འགྲན་ཚོགས་སྐབས་དགུ་པའི་འགོ་ཚུགས་མཛད་སྒོར་ཕེབས་པའི་རྒྱལ་སྤྱིའི་སྐུ་མགྲོན་ཚོར་སྤྲོ་སེམས་འཁོལ་པོས་དགའ་བསུ་ཞུས་པ་རེད།

ཞི་ཅིན་ཕིང་གིས་གསུངས་དོན། ཨེ་ཤེ་ཡའི་དགུན་དུས་ལུས་རྩལ་འགྲན་ཚོགས་སྐབས་དགུ་པའི་མེ་མཆོག་དོ་དགོང་སྤོར་རྒྱུ་རེད། པེ་ཅིང་དགུན་དུས་ཨོ་རྩལ་འགྲན་ཚོགས་ནས་ཧར་པིན་ཨེ་ཤེ་ཡའི་དགུན་དུས་ལུས་རྩལ་འགྲན་ཚོགས་བར། ཀྲུང་གོའི“གངས་འཁྱགས་ལུས་རྩལ་གྱི་ཚ་རླབས”འབྲི་ཆུའི་ལྷོ་བྱང་དུ་འཕྱུར་ཡོད་ལ། འཛམ་གླིང་གི་གངས་འཁྱགས་ལུས་རྩལ་ལ་སྐྱེ་སྟོབས་དང་གསོན་ཤུགས་བསྣན་ཡོད། སྐབས་འདིའི་འགྲན་བསྡུར་ནང་ཞུགས་མཁན་རྒྱལ་ཁབ་དང་ས་ཁུལ་གྱི་གྲངས་འབོར་དང་ལུས་རྩལ་པའི་མི་གྲངས་ཀྱིས་ཨེ་ཤེ་ཡའི་དགུན་དུས་ལུས་རྩལ་འགྲན་ཚོགས་ཀྱི་ལོ་རྒྱུས་ཀྱི་ཟིན་ཐོ་བཏོད་ཡོད། ཨེ་ཤེ་ཡའི་ཨོ་རྩལ་ལས་འཛིན་ལྷན་ཚོགས་དང་རྒྱལ་ཁབ་ཁག་དང་ས་ཁུལ་ཁག་གི་འཐུས་མི་ཚོགས་པའི་ཐུན་མོང་འབད་བརྩོན་འོག ཧར་པིན་གྱིས་འཛམ་གླིང་ལ“ཀྲུང་གོའི་ཁྱད་ཆོས་དང་། ཨེ་ཤེ་ཡའི་ཉམས་འགྱུར། ངོ་མཚར་ལྡན་པ”བཅས་ཀྱི་ལུས་རྩལ་འགྲན་ཚོགས་ཤིག་གཉེར་ནས་གངས་འཁྱགས་ལུས་རྩལ་གྱི་ལེའུ་གསར་པ་ཞིག་རྩོམ་ཐུབ་པའི་ཡིད་ཆེས་ཡོད།

ཞི་ཅིན་ཕིང་གིས་གསུངས་དོན། ཧར་པིན་ནི་ཀྲུང་གོའི་དེང་རབས་གངས་འཁྱགས་ལུས་རྩལ་གྱི་འབྱུང་གནས་ཡིན། “གངས་རི་འཁྱགས་ཀླུང་ཡིན་ཡང་གསེར་དངུལ་རི་ཡིན”གངས་འཁྱགས་ཀྱི་རིག་གནས་དང་གངས་འཁྱགས་ཀྱི་དཔལ་འབྱོར་ཧར་པིན་གྱི་སྤུས་ཚད་མཐོ་བའི་འཕེལ་རྒྱས་ཀྱི་སྒུལ་ཤུགས་གསར་པ་དང་ཕྱི་ཕྱོགས་ལ་སྒོ་མོ་འབྱེད་པའི་འབྲེལ་ཐག་གསར་པར་འགྱུར་བཞིན་ཡོད། ཚང་མ་སྤྲོ་བས་ཁེངས་པའི་སྒོ་དབྱེ་ཁོང་ཡངས་ཀྱི་ཧེ་ལུང་ཅང་དུ་སྤྲོ་གསེང་དུ་ཕེབས་ནས་ཀྲུང་གོའི་ལུགས་ཀྱི་དེང་རབས་ཅན་གྱི་རྗེས་ཤུལ་འཚོལ་ཐུབ་པ་དང་མཛེས་སྡུག་ལྡན་ལ་བརྗེད་པར་དཀའ་བའི་བག་ཆགས་བཟང་པོ་ཞིག་འཇོག་ཐུབ་པའི་དགའ་བསུ་ཞུ་རྒྱུ་ཡིན། ལུས་རྩལ་པ་ཚོས་ལུགས་རྙིང་གི་སྦྲུལ་ལོར་སྦྲུལ་ལྟར་བདེ་ལྕག་འཁྱུག་ལ་གྲུབ་འབྲས་བཟང་པོ་གཏོད་ཐུབ་པའི་སྨོན་འདུན་ཞུ་གི་ཡིན།