གསར་འགོད་པར་སྤྱི་བདེ་པུའུ་ནས་ཤེས་རྟོགས་བྱུང་བར། དཔྱིད་གསར་དུས་ཆེན་གྱི་གུང་གསེང་རིང་། རྒྱལ་ཡོངས་སྤྱི་བདེ་ལས་ཁུངས་ཀྱིས་བདེ་སྲུང་བརྟན་ལྷིང་གི་བྱ་ཐབས་ཁག་དོན་འཁྱོལ་བྱེད་པར་དམ་འཛིན་ནན་པོ་བྱས་ནས། མི་དམངས་མང་ཚོགས་སྤྲོ་སྣང་དང་འཆམ་མཐུན་ངང་ལོ་གསར་གཏོང་ཐུབ་པའི་འགན་ལེན་བྱས་ཤིང་། ཟླ་2ཚེས་4ཉིན་གྱི་ཆུ་ཚོད་17བར། རྒྱལ་ཡོངས་ཀྱི་སྤྱི་ཚོགས་སྤྱི་ཡོངས་བརྟན་ལྷིང་དང་བདེ་འཇགས་ཀྱི་སྒྲིག་ལམ་ཡག་པོ་ཡོད་པས་ཉེས་དོན་དང་བདེ་འཇགས་ཀྱི་ཉེན་དོན་ལས་སྒྲུབ་དུས་མཚུངས་ལས་20.9%དང་14.3%སོ་སོར་ཆག་སྟེ། བྱེད་སྒོ་ཆེ་གྲས་4800ལྷག་ཙམ་དང་ཤོག་སྦག་སྤོར་བའི་བྱེད་སྒོ་ཆེན་པོ་710ལྷག་ཙམ་བདེ་འཇགས་དང་བདེ་བླག་ངང་གཉེར་ཐུབ་པ་དང་། རྒྱལ་ཡོངས་ཀྱི་ལྕགས་ལམ་འགྲིམ་འགྲུལ་གྱི་བདེ་འཇགས་དུས་བབ་ཀྱང་སྤྱིར་ན་བརྟན་པོ་བྱུང་ཡོད་པ་རེད།

ས་གནས་ཁག་གི་སྤྱི་བདེ་ལས་ཁུངས་ཀྱིས་ཉེན་རྟོག་པ་མི་ཐེངས་ཁྲི་400ལྷག་ཙམ་དང་མཉམ་འགོག་མཉམ་བཅོས་ཀྱི་མི་ཐེངས་ཁྲི་740ལྷག་ཙམ་བཏང་ནས་དམིགས་ས་ཡོད་པའི་སྒོ་ནས་འདུ་འཛི་ཆེ་བའི་ཚོང་ར་དང་། ཡུལ་སྐོར་མཛེས་ལྗོངས་ཁུལ། འགྲིམ་འགྲུལ་འགག་གནད་སོགས་གཙོ་གནད་ཁུལ་དང་མི་ཚོགས་སྟུག་སར་སྐོར་གཡེང་གིས་སྔོན་འགོག་དང་ཚོད་འཛིན་བྱས་ཏེ། དུས་ཆེན་རིང་ཐོན་སླ་བའི་ཁྲིམས་འགལ་ཉེས་གསོག་གི་གནད་དོན་ལ་རྡུང་རྡེག་གཏོང་བའི་བཅོས་སྒྲིག་བྱེད་ཤུགས་ཆེ་རུ་བཏང་ནས་བདེ་འཇགས་ཀྱི་སྒྲིག་ལམ་ནུས་ཤུགས་ཡོད་རྒུས་སྲུང་སྐྱོང་བྱས་ཡོད།

འདི་ག་ཚགས་པར་ཁང་དུ་པེ་ཅིང་ནས་གློག་འཕྲིན་འབྱོར་གསལ། གསར་འགོད་པར་འཕྲལ་སྡོམ་དོ་དམ་པུའུ་ནས་ཤེས་རྟོགས་བྱུང་བར། འདི་ལོའི་དཔྱིད་གསར་དུས་ཆེན་གྱི་གུང་གསེང་རིང་། རྒྱལ་ཡོངས་ཀྱི་བདེ་འཇགས་དུས་བབ་སྤྱིར་ན་བརྟན་པོ་བྱུང་ནས་ཚབས་ཆེན་ཡན་གྱི་གནོད་འཚེའི་ལས་འཛོལ་ཐོན་མེད་པ་རེད།

རྒྱལ་སྲིད་སྤྱི་ཁྱབ་ཁང་བདེ་འཇགས་ལས་དོན་ཨུ་ལྷན་གཞུང་དོན་ཁང་དང་འཕྲལ་སྡོམ་དོ་དམ་པུའུ་ཡིས་ཉེན་ཁའི་མངོན་མེད་རྐྱེན་ངན་དང་བདེ་འཇགས་ཀྱི་དུས་བབ་ལ་སྐབས་བསྟུན་དབྱེ་ཞིབ་དང་བརྡར་གཅོད་བྱས་ཏེ་ས་གནས་ཁག་ལ་གྲང་ངར་ཆེ་བའི་གནམ་གཤིས་དང་། རླུང་བུ་ཆེན་པོ་བརྒྱབ་ནས་དྲོད་ཚད་ཆག་པ། དཔྱིད་གསར་སྐྱེལ་འདྲེན་དང་མཛེས་ལྗོངས་ཁུལ་གྱི་བདེ་འཇགས་སོགས་ཉེན་བརྡའི་དྲན་སྐུལ་བཏང་བ་མ་ཟད། འབྲེལ་ཡོད་ས་གནས་ཀྱིས་ཤོག་སྦག་གི་བདེ་འཇགས་ཐོན་སྐྱེད་ལས་དོན་ཡག་པོ་བསྒྲུབ་རྒྱུར་མཛུབ་ཁྲིད་བྱས་ནས་ཚད་གཞི་ལས་བརྒལ་བའི་གཏན་འགོག་ཐོན་རྫས་ལ་སྔར་བས་གྲལ་བཤེར་གཙང་སེལ་གྱིས་ཁྲིམས་འགལ་དང་ཁྲིམས་དང་མ་མཐུན་པའི་བྱེད་སྤྱོད་ལ་རྡུང་རྡེག་ཚ་ནན་བཏང་ཡོད། རིམ་ཁག་འཕྲལ་སྡོམ་དོ་དམ་སྡེ་ཚན་གྱིས་གཏེར་རི་དང་། ཉེན་ཡོད་རྫས་འགྱུར། བཟོ་ལས་ཚོང་དོན། མེ་ཟོན། ཤོག་སྦག་ཐོན་སྐྱེད་སོགས་གཙོ་གནད་ལས་རིགས་ཁྱབ་ཁོངས་དང་། ཡུལ་སྐོར་མཛེས་ལྗོངས་ཁུལ། འགྲིམ་འགྲུལ་འགག་གནད། ཕྱོགས་བསྡུས་ཁང་ཆེན་སོགས་མི་ཚོགས་སྟུག་སར་དམིགས་ནས་ལྟ་སྐུལ་ཞིབ་བཤེར་དང་། མངོན་བཤེར་ལྐོག་ཞིབ། མངོན་མེད་རྐྱེན་ངན་གྲལ་བཤེར། བདེ་འཇགས་དྲིལ་བསྒྲགས་ཀྱི་ཉེན་ཟོན་དྲན་སྐུལ་བཅས་ཀྱི་ལས་དོན་ལ་ཤུགས་སྣོན་བརྒྱབ་ནས་འགན་འཁྲི་རིམ་པ་བཞིན་ནན་དུ་བཏང་ཡོད།

རྒྱལ་ཁབ་ཕྱོགས་བསྡུས་རང་བཞིན་གྱི་མེ་ཟོན་རོགས་སྐྱོབ་དཔུང་ཁག་གིས་ཉེན་དོན་ཁག་ཁྲི་8.3ལྷག་ཙམ་ཐག་གཅོད་བྱས་པ་དང་མེ་ཟོན་རོགས་སྐྱོབ་པ་མི་ཐེངས་ཁྲི་98.8བཏང་ནས། ཉེན་གྱར་མང་ཚོགས་2550བསྐྱབས་ཡོད། རྒྱལ་ཁབ་བདེ་འཇགས་ཐོན་སྐྱེད་འཕྲལ་སྡོམ་རོགས་སྐྱོབ་དཔུང་ཁག་གིས་མི་ཐེངས་ཁྲི་7260ལྷག་ཙམ་བཏང་ནས་ཁེ་ལས་1130ལྷག་ཙམ་ལ་ཉེན་ཁར་འགོག་ཟོན་དང་བདེ་འཇགས་ལག་རྩལ་གྱི་ཞབས་འདེགས་ཞུས་ཡོད།