སྡེ་ཚན་མང་པོས་ཡིག་ཆ་བཀྲམ་ནས་སྐྱེ་ཁམས་ཁོར་ཡུག་གི་གནོད་འཚེའི་སྐྱིན་ཚབ་འཇལ་བའི་དཀའ་གནད་ཐག་གཅོད་བྱེད་པ།
ཤིན་ཧྭ་གསར་འགྱུར་ཁང་པེ་ཅིང་ནས་ཟླ་2ཚེས་4ཉིན་གློག་འཕྲིན་འབྱོར་གསལ། ཉེ་ཆར། སྐྱེ་ཁམས་ཁོར་ཡུག་པུའུ་ཡིས་འབྲེལ་ཡོད་སྡེ་ཚན་དང་མཉམ་དུ《སྐྱེ་ཁམས་ཁོར་ཡུག་གི་གནོད་འཚེའི་སྐྱིན་ཚབ་འཇལ་བའི་ལམ་ལུགས་སྒྱུར་བཅོས་ལ་སྐུལ་འདེད་གཏིང་ཟབ་གཏོང་བའི་ཞིབ་ཕྲའི་གནད་དོན་འགའ་ཞིག་སྐོར་གྱི་བསམ་འཆར》བཀྲམ་ནས། ལག་ལེན་ཁྲོད་ཀྱི་མངོན་གསལ་དོད་པའི་གནད་དོན་ཐག་གཅོད་བྱ་རྒྱུར་སྐུལ་འདེད་དང་ས་གནས་ཀྱི་དོ་ཁུར་ལ་ལན་བཏབ་པ་རེད།
བསམ་འཆར་འདིས་སྐྱེ་ཁམས་ཁོར་ཡུག་གི་གནོད་འཚེའི་སྐྱིན་ཚབ་གྱོད་གཞིའི་ཁུངས་སྣེ་དབྱེ་བཤེར་དང་། འགོ་འཛུགས་པ། བརྟག་དཔྱད། དཔྱད་དཔོག གྲོས་མོལ། ཁྲིམས་འཛིན་གཏན་འཁེལ་སོགས་བརྒྱུད་རིམ་ཡོངས་ཀྱི་གྱོད་སྒྲུབ་གོ་རིམ་ཐད་ཞིབ་ཕྲའི་བླང་བྱ་བཏོན་ཡོད་པ་དང་། གཙོ་བོ་མངོན་གསལ་དོད་ཅིང་ཆུང་བ་དང་། སྟབས་བདེ་བ། ཚབས་ཆེ་བ་བཅས་ཀྱི་གྱོད་གཞི་རིགས་གསུམ་ལ་དམིགས་ཏེ་ཁྲུན་ཐག་གཅོད་པའི་རྩ་དོན་དང་ཐག་གཅོད་ཀྱི་བླང་བྱ་སོ་སོར་གཏན་འཁེལ་བྱས་ཏེ། སྲིད་འཛིན་ཁྲིམས་སྒྱུར་དང་ཁོར་ཡུག་སྤྱི་ཕན་གཏུག་བཤེར་འབྲེལ་མཐུད་འཐུས་སྒོ་ཚང་དུ་བཏང་བ་དང་། མ་དངུལ་དོ་དམ་དང་། དྲིལ་བསྒྲགས་གསོ་སྦྱོང་། ཆ་འཕྲིན་སྙན་ཞུ་སོགས་འགན་སྲུང་ལམ་སྲོལ་ལ་ཤུགས་སྣོན་བརྒྱབ་ནས་སྒྱུར་བཅོས་རྒྱུན་རྣམ་ཅན་གྱི་སྒོ་ནས་འཁོར་སྐྱོད་བྱེད་པར་མཛུབ་ཁྲིད་བྱས་ཡོད།
སྐྱེ་ཁམས་ཁོར་ཡུག་པུའི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན། སྐྱེ་ཁམས་ཁོར་ཡུག་གི་གནོད་འཚེའི་སྐྱིན་ཚབ་འཇལ་བའི་ལམ་ལུགས་འཛུགས་པ་དང་འཐུས་སྒོ་ཚང་དུ་གཏོང་བ་ནི་སྐྱེ་ཁམས་ཤེས་དཔལ་ལམ་ལུགས་མ་ལག་འཛུགས་སྐྱོང་གི་གྲུབ་ཆ་གལ་ཆེན་ཞིག་ཡིན་པ་དང་། དེ་ནི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་བཏོན་པའི་ཐབས་ཇུས་གལ་ཆེན་ཞིག་རེད། སྐྱེ་ཁམས་ཁོར་ཡུག་གི་གནོད་འཚེའི་སྐྱིན་ཚབ་འཇལ་བའི་ལམ་ལུགས་དེ་ཐོག་མར་འགོ་བཙུགས་པ་ནས་འཚོལ་ཞིབ་རབ་དང་རིམ་པ་བྱས་པ་བརྒྱུད། ལམ་ལུགས་མ་ལག་གཞི་རྩའི་ཆ་ནས་གྲུབ་ཡོད། འོན་ཀྱང་ལག་ལེན་ཁྲོད་ད་དུང་གནད་དོན་འགའ་གནས་ཡོད། ད་ཐེངས་བཀྲམ་པའི་བསམ་འཆར་གྱི་དམིགས་ཡུལ་ནི་སྐྱེ་ཁམས་ཁོར་ཡུག་གི་གནོད་འཚེའི་སྐྱིན་ཚབ་འཇལ་བའི་ལས་ཀའི་ཚད་ལྡན་རང་བཞིན་དང་བཀོལ་སྤྱོད་རང་བཞིན་ཆེ་རུ་གཏོང་བ་དང་། ས་གནས་ཀྱི“ཁུར་པོ་ཡང་གཏོང”དང“ཕན་འབྲས་ཆེར་གཏོང”བྱ་རྒྱུ་དེ་རེད། དེའང་ཕྱོགས་གཅིག་ནས་ཁུངས་སྣེ་དབྱེ་བཤེར་ཁྱབ་ཁོངས་ནང་འཇུག་མི་དགོས་པའི་གནས་ཚུལ་དང་། སྐྱིན་ཚབ་འཇལ་མི་དགོས་པའི་གནས་ཚུལ། སླར་གསོའི་ཕན་འབྲས་ལ་དཔྱད་དཔོག་བྱེད་མི་དགོས་པའི་གནས་ཚུལ་བཅས་ཁ་གསལ་བཟོས་པ་བརྒྱུད་ས་གནས་ཀྱི་ལས་ཀའི་ཁུར་པོ་ཡང་དུ་གཏོང་རྒྱུ་དང་། ཕྱོགས་གཞན་ཞིག་ནས་འབྲེལ་ཡོད་བྱ་ཐབས་བརྒྱུད་སྐྱིན་ཚབ་འཇལ་བའི་ལས་ཀའི་ལས་ཕྱོད་ཆེ་རུ་གཏོང་རྒྱུ་ཡིན་པ་སྟེ། གཅིག་ནས་གྱོད་གཞིའི་དཀའ་སླ་ཁག་བགོའི་རིགས་དབྱེ་བ་དང་རིགས་དབྱེ་ཐབས་ཇུས་ལག་བསྟར་བྱེད་རྒྱུ་དང་། གཉིས་ནས་གྲོས་མོལ་མ་བྱུང་བའི་གནས་ཚུལ་ལ་དམིགས་ཏེ“ཡུན་རིང་གྲོས་བསྡུར་བྱས་ཀྱང་ཐག་གཅོད་མི་ཐུབ་པའི”གནད་དོན་འོས་འཚམ་ངང་ཐག་གཅོད་བྱེད་རྒྱུ། གསུམ་ནས་གྱོད་གཞི་ཚབས་ཆེན་གྱི་ཁྱབ་ཁོངས་གཅིག་གྱུར་གྱིས་གཏན་འཁེལ་བྱས་ཏེ། གྱོད་གཞི་ཚབས་ཆེན་ལྟ་སྐུལ་སྒྲུབ་གཉེར་ལ་སྐུལ་འདེད་གཏོང་རྒྱུ། བཞི་ནས་སྲིད་འཛིན་ཁྲིམས་སྒྱུར་དང་ཁོར་ཡུག་སྤྱི་ཕན་གཏུག་བཤེར་དང་འབྲེལ་མཐུད་བྱེད་ཤུགས་ཆེ་རུ་བཏང་ནས་ལམ་ལུགས་ཀྱི་མཉམ་ཤུགས་ཆགས་པར་སྐུལ་འདེད་གཏོང་རྒྱུ་བཅས་རེད།