ཉེ་ཆར། རང་བྱུང་ཐོན་ཁུངས་པུའུ་དང་ཞིང་ལས་གྲོང་གསེབ་པུའུ་ཡིས་མཉམ་འབྲེལ་ཐོག་བརྡ་ཐོ་བཀྲམ་སྟེ། “མི་ཆོག་པ་བརྒྱད”ལ་བརྩི་སྲུང་ནན་ཞུས་ཀྱིས་གྲོང་གསེབ་ཀྱི་རྨོ་ཞིང་གང་བྱུང་བཟུང་ནས་ཁང་པ་བསྐྲུན་པའི་གནད་དོན་གསར་པར་བཀག་འགོག་མཐའ་གཅིག་ཏུ་བྱེད་དགོས་པའི་བླང་བྱ་བཏོན་ཡོད།

ངོ་སྤྲོད་བྱས་པར་གཞིགས་ན། 2020ལོའི་ཟླ་7པར《གྲོང་གསེབ་ཀྱི་རྨོ་ཞིང་གང་བྱུང་དུ་བཟུང་ནས་ཁང་པ་སྐྲུན་པའི“མི་ཆོག་པ་བརྒྱད”སྐོར་གྱི་བརྡ་ཐོ》བཀྲམ་ཚུན། ས་གནས་ཁག་གིས་ཁྲིད་སྟོན་དང་བཀག་འགོག་ཟུང་འབྲེལ་བྱས་ཏེ། “ཐར་པར་གཏན་ནས་མི་གཏོང་བའི”རྣམ་འགྱུར་གྱི་ཐོག་ནས་རྨོ་ཞིང་གང་བྱུང་དུ་བཟུང་ནས་ཁང་པ་བསྐྲུན་པའི་གནད་དོན་གསར་པར་བཀག་འགོག་མཐའ་གཅིག་ཏུ་བྱས་པས། གནད་དོན་གསར་པ་ཡང་ཡང་ཐོན་པའི་རྣམ་པར་བཀག་འགོག་རགས་ཙམ་ཐུབ་ཡོད། འོན་ཀྱང་ས་ཆ་ཁག་གཅིག་ཏུ“མི་ཆོག་པ་བརྒྱད”ཀྱི་བླང་བྱ་དང་འགལ་ནས་རྨོ་ཞིང་གང་བྱུང་དུ་བཟུང་བ་དང་གཏོར་སྐྱོན་གཏོང་བ་སོགས་ཀྱི་གནད་དོན་སྔར་བཞིན་གནས་ཡོད་པས། གྲོང་གསེབ་ཀྱི་རྨོ་ཞིང་གང་བྱུང་དུ་བཟུང་ནས་ཁང་པ་བསྐྲུན་པར་ཆེད་དོན་བཅོས་སྒྲིག་བྱེད་པའི་ལས་དོན་གྱི་སྤུས་ཚད་དང་ཕན་འབྲས་ལ་ཤུགས་རྐྱེན་ཐེབས་ཡོད།

ད་ཐེངས་ཀྱི་བརྡ་ཐོའི་ནང་། རྨོ་ཞིང་གང་བྱུང་དུ་བཟུང་བ་དང་གཏོར་སྐྱོན་གཏོང་བའི་ཁྲིམས་འགལ་གྱི་བྱེད་སྤྱོད་ལ་བཅོས་སྒྲིག་མཐའ་གཅིག་ཏུ་བྱེད་པ་དང་། ངོ་བོ་འགྱུར་བའི་ཉོ་ཚོང་དང་རྨོ་ཞིང་ཟླ་སྒྲིལ་གཏོང་བར་སྔོན་འགོག་ནན་པོ་བྱེད་པ།“འགྱིག་ཤོག་དྲོད་ཁང”སླར་ཡང་ཐོན་པར་བཀག་འགོག་ཏན་ཏིག་བྱེད་པ། ས་ནག་བཟུང་ནས“ཁྱད་ལྡན་གྲོང་རྡལ་ཆུང་ངུ”བསྐྲུན་པ་སོགས་རྨོ་ཞིང་བཙན་བཟུང་བྱེད་པའི་གནད་དོན་སྣ་ཚོགས་ལ་བཅོས་སྒྲིག་མཐའ་གཅིག་ཏུ་བྱེད་དགོས། འཁོར་སྦྲེལ་ཧྲིལ་པོར་ལྟ་འདོམས་བྱེད་ཤུགས་ཆེ་རུ་གཏོང་བ་དང་ས་ཞིང་གི་ཐོན་ཁུངས་གསར་སྤེལ་བེད་སྤྱོད་ཀྱི་བརྒྱུད་རིམ་ཧྲིལ་པོ་དང་ལྷུ་ཚིགས་ཁག་གི་ལྟ་འདོམས་འགག་སྒོ་ཡག་པོ་བསྲུངས་ནས་རྨོ་ཞིང་ལ་སྲུང་སྐྱོང་བྱེད་པའི་ལས་དོན་སྔར་བས་ནན་དུ་བཏང་སྟེ། རྨོ་ཞིང་མུའུ་དུང་ཕྱུར་18ཀྱི་དམར་ཐིག་དང་ས་ཞིང་དོ་དམ་སྲིད་ཇུས་ཀྱི་མཐའ་ཚད་བརྟན་པོ་སྲུང་བར་འགན་ལེན་བྱེད་དགོས་པའི་བླང་བྱ་བཏོན་ཡོད།

ད་ཐེངས་ཀྱི་བརྡ་ཐོའི་ནང་། ཁྲིད་སྟོན་དང་བཀག་འགོག་ཟུང་འབྲེལ་མཐའ་འཁྱོངས་བྱས་ཏེ་གྲོང་གསེབ་ཀྱི་ཡུལ་མིའི་སྡོད་ཁང་འཛུགས་སྐྲུན་སོགས་ལུགས་མཐུན་ས་སྤྱོད་ཀྱི་དགོས་མཁོར་འགན་ལེན་ཏན་ཏིག་བྱེད་དགོས། ས་ཞིང་ཐོན་ཁུངས་ཀྱི་རྒྱུ་རྐྱེན་གཙོ་བོར་འགན་སྲུང་བྱེད་ཤུགས་ཆེ་རུ་གཏོང་དགོས། རྨོ་ཞིང་གི་ཁ་གསབ་དམིགས་ཚད་དང་འཛུགས་སྐྲུན་ས་སྤྱོད་མང་དུ་གཏོང་བའི་འཆར་གཞིར་སྤྱི་འདོམས་བཀོད་སྒྲིག་བྱས་ཏེ། གྲོང་གསེབ་ཀྱི་ཐོན་ལས་དང་པོ་དང་། གཉིས་པ། གསུམ་པ་བཅས་མཉམ་འདྲེས་འཕེལ་རྒྱས་གཏོང་བའི་ས་སྤྱོད་ལ་འགན་སྲུང་དང་ཚད་ལྡན་དུ་གཏོང་དགོས། གྲོང་གསེབ་ཀྱི་ཡུལ་མིའི་སྡོད་ཁང་གི་ས་སྤྱོད་འཆར་འགོད་དང་འཆར་གཞིའི་དམིགས་ཚད་མུ་མཐུད་ལོགས་སུ་བཀོད་ནས་གྲོང་གསེབ་ཀྱི་ཡུལ་མིའི་སྡོད་ཁང་འཛུགས་སྐྲུན་གྱི་ལུགས་མཐུན་གྱི་ས་སྤྱོད་དགོས་མཁོར་ཁྲིམས་ལྟར་འགན་སྲུང་བྱེད་དགོས། ནོར་འཛོལ་རུང་ལ་ནོར་འཁྲུལ་ཡོ་བསྲང་ལམ་སྲོལ་འཛུགས་པ་དང་འཐུས་སྒོ་ཚང་དུ་གཏོང་དགོས། སྒྲིག་འགལ་ངང་རྨོ་ཞིང་བཟུང་སྤྱོད་རིགས་ལ་དག་ཐེར་དང་བསྐྱར་འདེབས་ལས་དོན་རིགས་དབྱེ་ནས་བརྟན་པོ་སྤེལ་དགོས། དོན་དངོས་དང་མི་མཐུན་པར་ལས་འགན་དང་དུས་བཀག་གཏན་འཁེལ་བྱེད་པ་དང་། བཙན་ཤེད་ཀྱིས་ཤིང་སྡོང་གཅོད་པ་དང་། འབྲས་ཤིང་ལ་གཏོར་བརླག་གཏོང་བ། རྫིང་བུ་རྒྱོང་བ། བསྐྱར་འདེབས་བྱས་ཁུལ་བྱེད་པ་སོགས་ཀྱི་བྱེད་སྤྱོད་གཏན་འགོག་མཐའ་གཅིག་ཏུ་བྱས་ཏེ། གཞི་རིམ་ལ་ལུགས་མཐུན་དང་དགོས་ངེས་ཀྱི་བར་བརྒལ་དུས་སྐབས་བཞག་ནས་རིམ་བཞིན་སྐུལ་འདེད་གཏོང་དགོས། སྟབས་བདེ་ཅན་དང“བྲེ་ཁ་གཅིག་ཆོད”ཀྱི་གནད་དོན་ལ་སྔོན་འགོག་ནན་པོ་བྱེད་དགོས། གྲོང་གསེབ་ཀྱི་རྨོ་ཞིང་སྤྱད་ནས་ཁང་པ་བསྐྲུན་པའི་བཅའ་ཁྲིམས་དང་སྲིད་ཇུས་ཀྱི་མཐའ་ཚད་དང་དམར་ཐིག་ནན་སྲུང་བྱེད་དགོས་པའི་ནན་བཤད་བྱས་ཡོད།