ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། མཚོ་གཏིང་རྟོག་ཞིབ་ཚད་ལེན་བྱེད་པའི“རྒྱལ་ཁབ་ཀྱི་མཆོག་ནོར”ཞིག་ཡིན་པའི“ཀླུ་མོ”རྟགས་ཅན་རིམ་སྤོར་སྒྱུར་བཀོད་བྱས་རྗེས་ད་ལོའི་ཟླ་2པར་ཆུ་རྫིང་དུ་ཚོད་ལྟ་བྱ་རྒྱུ་དང་ཟླ་3པར་མཚོ་ཐོག་ཚོད་ལྟ་བྱ་རྒྱུ་རེད།

གསར་འགོད་པར་ཀྲུང་གོ་མཚོ་དོན་དོ་དམ་ཅུས་ནས་ཤེས་རྟོགས་བྱུང་བར། མིག་སྔར་ཆུར་འཛུལ་མི་དང་ལག་རྩལ་བས“ཀླུ་མོ”རྟགས་ཅན་རིམ་སྤོར་སྒྱུར་བཀོད་ཀྱི་ལས་དོན་ཚ་ཚ་འུར་འུར་ངང་སྤེལ་བཞིན་པའི་ནང་། གཙོ་བོ་སྨི་7000རིམ་པའི་ཤོང་ཚད་ཆེ་བ་དང་སྤྱོད་ཡུན་རིང་བ་སོགས་འགག་རྩའི་ལྷུ་ལག་རིམ་སྤོར་ཚུད་ཡོད་པ་རེད།

ཤེས་རྟོགས་བྱུང་བར་གཞིགས་ན། “ཀླུ་མོ”རྟགས་ཅན་གྱི་འགག་རྩའི་ལྷུ་ལག་རིམ་སྤོར་སྒྱུར་བཀོད་ལེགས་གྲུབ་ཟིན་ནས། 2025ལོའི་ཟླ་2པར་ཆུ་རྫིང་དུ་ཚོད་ལྟ་བྱ་རྒྱུ་དང་ཟླ་3པར་ལྷོ་རྒྱ་མཚོར“ཀླུ་མོ”རྟགས་ཅན་གྱི་འགག་རྩའི་ལས་སྒྲུབ་ནུས་པ་ཆེར་གཏོང་བེད་སྤྱོད་ཀྱི་མཚོ་ཐོག་ཚོད་ལྟ་བྱ་རྒྱུ་རེད། ད་ཐེངས་ཀྱི་འགག་རྩའི་ལྷུ་ལག་གི་ལག་རྩལ་རིམ་སྤོར་བྱས་པ་དེས“ཀླུ་མོ”རྟགས་ཅན་གྱི་སྤྱི་ཡོངས་ཀྱི་ནུས་པ་དང་བདེ་འཇགས་ལས་སྒྲུབ་ནུས་པ་མངོན་གསལ་དོད་པོས་ཆེ་རུ་ཕྱིན་ནས། མཚོ་གཏིང་རྟོག་ཞིབ་ཚད་ལེན་ལག་རྩལ་གྱི་རང་བརྟེན་ཚོད་འཛིན་ཐུབ་པའི་རང་བཞིན་ཆེ་རུ་གཏོང་བ་དང་། “ཀླུ་མོ”རྟགས་ཅན་གྱི་ལག་རྩལ་གྱི་སྔོན་ཐོན་ལེགས་ཆ་རྒྱུན་འཁྱོངས་བྱས་ཏེ་རྗེས་མའི་མཚོ་གཏིང་ཚན་ཞིབ་བེད་སྤྱོད་མཚོ་འགྲུལ་ལ་ལག་རྩལ་གྱི་རྒྱབ་སྐྱོར་ཐུབ་རྒྱུ་རེད།