“ཀྲུང་གོའི་དཔྱིད་གསར་དུས་ཆེན་གྱི་མི་རིགས་རོལ་དབྱངས་འདུ་ཚོགས”སྐབས་ཉེར་ལྔ་པ་འཇར་མན་གྱི་གྲོང་ཁྱེར་ཧན་པའོ་རུ་གཉེར་ཞིང་། འདི་ནི་འཁྲབ་སྟོན་གྱི་མཇུག་ཏུ་ལྟད་མོ་བ་ཡོངས་ཡར་ལངས་ནས་ཀྲུང་གོའི་སྒྱུ་རྩལ་མཁས་ཅན་ལ་དགའ་བསུ་དང་གུས་འདུད་ཞུ་བཞིན་པ།

པར་ཙིར་ཧྥུའུ་ལུའུ་སྨི་ནེན་སའེ་རྒྱལ་ཕྲན་མཉམ་འབྲེལ་སློབ་ཆེན་ཁུང་ཙི་སློབ་ཁང་དུ་པར་ཙིར་གྱི་སློབ་མས་ཀྲུང་གོའི་དགེ་རྒན་གྱི་སྣེ་ཁྲིད་འོག ཤོག་དྲས་འདྲ་གཟུགས་ཀྱི་སྒྱུ་རྩལ་ཉམས་ལེན་བྱེད་བཞིན་པ།

པེར་ཀྲེམ་གྱི་གྲོང་ཁྱེར་པུ་རུ་སེར་གྱི་ཀྲུང་གོའི་རིག་གནས་ལྟེ་གནས་སུ་ས་གནས་དེ་གའི་དམངས་ཚོགས་ཀྱིས་ཀྲུང་གོའི་ཡིག་གཟུགས་འབྲི་རྩལ་ལ་ལྟ་བཞིན་པ།

ཏི་པའེ་རུ་བཅའ་སྡོད་ཀྲུང་གོའི་སྤྱི་ཁྱབ་ཁེ་སྐྱོང་ལས་ཤག་གིས་གཉེར་བའི“སྒྱུ་རྩལ་མྱོང་རོལ——སུང་རྒྱལ་རབས་ཀྱི་སྒྱུ་རྩལ་སྤྱི་ཁྱབ་ཁེ་སྐྱོང་ལས་ཤག་ཏུ་སྤེལ་བའི”བྱེད་སྒོར། ཏི་པའེ་དགེ་སྒྲུབ་སློབ་ཆུང་གི་ཕྲུ་གུ་ཚོས་ཀྲུང་གོའི་གནའ་རབས་ཀྱི་ཇའི་སྒྱུ་རྩལ་ལ་ལྟ་བཞིན་པ།

ཉེ་ཆར། པུ་རུ་སེར་གྱི་ཀྲུང་གོའི་རིག་གནས་ལྟེ་གནས་སུ་འཁྲུག་ཆ་ཧ་ཅང་དོད་ཅིང་། གང་སར་དཔྱིད་གསར་དུས་ཆེན་གྱི་དགའ་སྤྲོའི་རྣམ་པས་ཁེངས། དེ་གར་གཉེར་བའི“སྤྲོ་སྣང་ལྡན་པའི་དཔྱིད་གསར་དུས་ཆེན། ཉམས་ཀྱིས་ཕྱུག་པའི་ཅང་སུའུ་གྲོང་ཁྱེར”གྱི་དམངས་སྲོལ་རིག་གནས་འགྲེམས་སྟོན་ཐོག གསོན་ཉམས་དོད་པའི་ཡིག་རིས་དང་དངོས་པོ་བརྒྱུད་ཅང་སུའུ་ཁུལ་གྱི་དཔྱིད་གསར་དུས་ཆེན་གྱི་དམངས་སྲོལ་དང་རིག་གནས་ཡུལ་སྐོར་གྱི་ཁྱད་ཆོས་ངོ་སྤྲོད་བྱས་པ་རེད། ཡོ་རོབ་ཀྱི་རྒྱལ་ཁབ་མང་པོ་ནས་ཡོང་བའི་དམངས་ཚོགས་བརྒྱ་གྲངས་ཀྱིས་བྱེད་སྒོ་དེར་ཧུར་ཐག་ཞུགས་པ་དང་ཅིན་ལིན་གྱི་ཤོག་དྲས་འདྲ་གཟུགས་དང་ཐའོ་ཧྭ་ཝུའུ་ཡི་ཤིང་དཔར་གྱི་ལོ་གསར་རི་མོ་དང་ཡིག་གཟུཌ་སྨོན་ཚིག ཅང་སུའུ་ཡི་ཞིམ་ཟས་སོགས་ཀྱི་འགྲེམས་སྟེགས་མདུན་དུ་ལྟད་མོ་བས་ཁེངས་ཡོད།

པུ་རུ་སེར་ཀྲུང་གོའི་རིག་གནས་ལྟེ་གནས་ཀྱི་ཀྲུའུ་རེན་ཀུང་དབྱི་ཡིས་གསར་འགོད་པར། དཔྱིད་གསར་དུས་ཆེན་དེ་མངོན་མིན་རིག་གནས་ཤུལ་བཞག་ཏུ་འདུན་ཞུ་ལེགས་གྲུབ་བྱུང་རྗེས་ཀྱི“སྤྲོ་སྣང་ལྡན་པའི་དཔྱིད་གསར་དུས་ཆེན”གྱི་བྱེད་སྒོ་དང་པོ་ཡིན་པའི་ངོས་ནས་ཅང་སུའུ་ཞིང་ཆེན་རིག་གནས་དང་ཡུལ་སྐོར་ཐིང་གིས་ད་རེས་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་མི་ཉུང་བ་ཞིག་འགྲེམས་སྟོན་བྱས་ཡོད། དེའི་ནང་ཐའོ་ཧྭ་ཝུའུ་ཡི་ཤིང་དཔར་གྱི་ལོ་གསར་རི་མོ་དང་མའོ་ཧྲན་གྱི་ལས་གཞས་གཉིས་ཀ་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་རེད། ཁུན་ཧྲན་གྱི་ཁྲང་ཞི་ནི་མཉམ་འབྲེལ་རྒྱལ་ཚོགས་ཚན་སློབ་རིག་གསུམ་རྩ་འཛུགས་ཀྱིས“མིའི་རིགས་ཀྱི་ངག་རྒྱུན་དང་མངོན་མིན་རིག་གནས་ཤུལ་བཞག་གི་མཚོན་བྱེད་བརྩམས་ཆོས”ནང་ཁག་དང་པོར་བཅུག་ཡོད་པས། ད་ཐེངས་ཀྱི་བྱེད་སྒོས་ས་གནས་དེ་གའི་དམངས་ཚོགས་ལ་ཀྲུང་གོའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་ཤེས་རྟོགས་དང་ཉམས་ལེན་བྱེད་པར་ལས་སྟེགས་བཏོད་ཡོད་ཅེས་བཤད་པ་རེད།