ཤ་ཚལ་སྒོང་གསུམ་དང་། འབྲས། ཤིང་ཏོག་བཅས་ཕུན་སུམ་ཚོགས་ལ་རིན་གོང་བརྟན་པ་དང་མི་སེར་གྱི་གསོལ་ལྕོག་གི་ཟས་རིགས་སྣེ་ཁ་འཛོམས་པ། ནུས་རྒྱུ་གསར་པའི་རླངས་འཁོར་དང་། ལྗང་མདོག་ཁྱིམ་སྤྱོད་གློག་ཆས། རིག་ནུས་ལག་ཐོགས་ཁ་པར་སོགས་ཚོང་ཟོག་མུ་མཐུད་ཁྲོམ་རར་བཏོན་པ་དང་གྲོང་མིའི་འཛད་སྤྱོད་ཀྱི་གདམ་ག་མང་དུ་སོང་། དཔྱིད་གསར་དུས་ཆེན་གྱི་གུང་གསེང་རིང་རྫོང་ཁོངས་ཀྱི་འཛད་སྤྱོད་སྣ་མང་ཕུན་སུམ་ཚོགས་པ་དང་ཁྲོམ་རར་མཁོ་འཚོང་གཉིས་ཀ་དར་བའི་རྣམ་པ་མངོན་ཡོད།

རྫོང་ཁོངས་ཀྱི་གྲོང་གསེབ་ཀྱི་མི་འབོར་མང་ལ། འཛད་སྤྱོད་ཀྱི་མི་མངོན་པའི་སྟོབས་ཤུགས་ཧ་ཅང་ཆེན་པོ་ཡོད། ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་ཐོག་རྫོང་ཁོངས་དཔལ་འབྱོར་འཕེལ་རྒྱས་ཤུགས་ཆེན་གཏོང་དགོས་ཞེས་བཏོན་ཡོད། 2024ལོར་གྲོང་གསེབ་ཀྱི་སིལ་ཚོང་གྲངས་འབོར་གྱིས་སྤྱི་ཚོགས་ཀྱི་འཛད་སྤྱོད་དངོས་རྫས་སིལ་ཚོང་བསྡོམས་འབོར་ནང་བཟུང་བའི་བསྡུར་ཚད་13.7%ཟིན་པ་དེ་ལོ་གོང་མ་ལས་བརྒྱ་ཆའི་གྲངས་0.1གིས་མཐོ་བ་ཡོད། གྲོང་གསེབ་ཀྱི་གྲོང་མི་མི་རེའི་ཆ་སྙོམས་འཛད་སྤྱོད་གཏོང་སྒོ་6.1%འཕར་བ་དང་འཕར་ཚད་གྲོང་ཁྱེར་དང་གྲོང་རྡལ་ལས་བརྒྱ་ཆའི་གྲངས་1.4ཡིས་མགྱོགས་པ་ཡོད།

འཁོར་རྒྱུག་བདེ་བླག་དང་། འཛད་སྤྱོད་མང་བ། གསོན་ཤུགས་ཆེ་བ་བཅས་ཀྱི་རྐྱེན་གྱིས་རྫོང་ཁོངས་ཀྱི་ཁྲོམ་ར་དར་རྒྱས་ཆེན་པོ་བྱུང་ཡོད། དཔྱིད་གསར་དུས་ཆེན་གྱི་གུང་གསེང་རིང་། ས་གནས་ཁག་གི་གྲོང་གསེབ་ཀྱི་ཁྲོམ་ར་དང་། ཞིང་ཞོར་ཐོན་རྫས་ཁྲོམ་ར། ཁྲོམ་རའི་སྒོ་རྩིས་ཚོང་ཁང་བཅས་སུ་སྐྱོད་སྐབས་ཤུན་མཁྲེགས་ཤིང་ཏོག་གི་ལག་རྟགས་ནས་ཤིང་ཏོག་དང་སྔོ་ཚལ་སྤུས་ལེགས་བར་དང་། འབྲོག་ལས་ཆུ་ཐོན་ནས་ཁྱད་ལྡན་སིལ་ཟས་བར་བཅས་ཚོང་ཟོག་སྣ་མང་ཕུན་སུམ་ཚོགས་པས་རྫོང་དང་ཤང་གི་གྲོང་མི་ཚོས་རང་ཉིད་ཀྱི་བློ་ལ་བབས་པའི་ཚོང་ཟོག་འདེམས་བཞིན་འདུག

ལོ་གསར་གྱི་རྣམ་པ་ཟབ་ལ་ཁྲོམ་ར་འཁྲུག་ཆ་དོད་པ།

“དྲི་ཞིམ་རྒྱ་ཁོག་གི་སྨན་སྣ་ཡོད་དམ” “ཚ་ལུ་མ་རྒྱ་མ་10བཀྱག་རོག”སོགས་སི་ཁྲོན་ཞིང་ཆེན་ཀོང་ཡོན་གྲོང་ཁྱེར་ཁྲའོ་ཐེན་ཆུས་ཀྲུང་ཙི་གྲོང་རྡལ་གྱི་ཞིང་ཞོར་ཐོན་རྫས་ཁྲོམ་རར་མི་ཚོགས་ཀྱིས་ཁེངས་ཤིང་། ཝང་པིན་དང་བཟའ་ཟླས་ཕྲུ་གུ་ཁྲིད་ནས་དགའ་སྤྲོའི་ངང་ལག་རྟགས་ཉོ་བཞིན་དུ“དཔྱིད་གསར་དུས་ཆེན་རིང་གཉེན་འཕྲད་དུ་འགྲོ་དགོས་པས་མང་ཙམ་ཉོས་དོ”ཞེས་བཤད།

ཤང་དང་གྲོང་རྡལ་གྱི་ཁྲོམ་རས་ལོ་གསར་གྱི་དངོས་ཟོག་གྲ་སྒྲིག་བྱས་ཡོད། ཧོ་ནན་ཞིང་ཆེན་ཤིན་དབྱང་གྲོང་ཁྱེར་ཕིང་ཆའོ་ཆུས་དབྱང་ཧོ་གྲོང་རྡལ་གྱི་ཁྲོམ་རར་འཁྲུག་ཆ་དོད་པ་མ་ཟད། སྔོ་ཚལ་དང་ཤ་སོས་པ་དང་། ཏན་ཞིམ་དང་ཤིང་འབྲས་སྐམ་པོ་སོགས་གང་མཁོ་འདང་ངེས་ཡོད། “ཟླ་བཅུ་གཉིས་ཚུན་ལོ་གསར་གྱི་མཁོ་ཆས་ཉོ་མཁན་མང་དུ་ཕྱིན་པས་ངའི་ཚོང་ཡག་པོ་འདུག”ཅེས་ཚོང་པ་ཞུས་ཁྲའོ་ཡིས་བཤད།

“གཅིག་འཐུས་རྣམ་པའི”ཉོ་སྒྲུབ་བྱེད་ཐབས་ཞིང་ཞོར་ཐོན་རྫས་སྡེབ་ཚོང་དུ་དར། ཞོགས་པ་སྔ་པོ་ནས་ཅང་ཤིས་ཞིང་ཆེན་ཕིང་ཤང་གྲོང་ཁྱེར་ཨན་ཡོན་ཆུས་ཝུའུ་ཕའོ་གྲོང་རྡལ་ཝུའུ་ཕའོ་གྲོང་ཚོའི་ཡུལ་མི་ཀྲུང་ཧྲེང་ཧྭ་ཨན་ཡོན་ཞིང་ཞོར་ཐོན་རྫས་སྡེབ་ཚོང་ལྟེ་གནས་སུ་བསྐྱོད། ཞིང་ཞོར་ཐོན་རྫས་སྡེབ་ཚོང་ལྟེ་གནས་ཀྱི་སྐབས་དང་པོའི་རིག་གནས་ཡུལ་སྐོར་ཚོང་ཟོག་གི་ལོ་གསར་མཁོ་ཆས་འཛད་སྤྱོད་གཟའ་འཁོར་གྱི་ས་གནས་ས་ཐོག་ཏུ་གུར་དམར་པོ་གྲལ་སྟར་འགྲིག་པ་མ་ཟད། ལྒང་བཞུ་དམར་པོ་དང་དར་མཚོན་གང་སར་བཀལ་ནས་འདུག་ལ། ཁྲོམ་བཀྱག་གི་མདུན་ནས་སྐྱོད་སྐབས་སྲོལ་རྒྱུན་གྱི་ཤ་བསྙལ་མ་དང་སིལ་ཟས་སོགས་ཁྱད་ལྡན་ལོ་གསར་གྱི་མཁོ་ཆས་གང་དགོས་འཛོམས་འདུག

གོ་སྐབས་བཟང་པོ་དམ་འཛིན་བྱས་ཏེ་ཀྲུང་གོ་མཁོ་འཚོང་ཚོགས་པའི་ཁོངས་སུ་གཏོགས་པའི་ཀྲུང་གོའི་མཁོ་འཚོང་ཚོང་དོན་འཁོར་རྒྱུག་ཚོགས་པའི་གཤམ་འོག་གི་ཤིན་ཡུའེ་མའོ་རྣམ་གྲངས་ཀྱིས་ལོ་གསར་བསུ་བའི་བྱེད་སྒོ་རབ་དང་རིམ་པ་སྤེལ་ཞིང་། ཟླ་1ཚེས་23ཉིན་ནས་ཚེས་30ཉིན་བར་ཞིང་ཆེན་8ཀྱི་གྲོང་ཁྱེར་22ཀྱི་ཤིན་ཡུའེ་མའོ་ཡིས་འཛད་སྤྱོད་པ་མི་ཐེངས་ཁྲི་600ཙམ་ལ་སྣེ་ལེན་ཞུས་ནས་དུས་མཚུངས་ལས་20%འཕར་ཡོད།

ཁྲོམ་རར་བཀྲག་མདངས་འཚེར་ས་མང་བ་དང་འཛད་སྤྱོད་གསར་པ་དར་བ།

ལོ་གསར་ཚེས་གསུམ་གྱི་ཞོགས་པར། ཨན་ཧུའེ་ཞིང་ཆེན་དབྱིན་ཧྲང་རྫོང་དུ་ཁ་བ་བབས། ལོ་26ལ་སླེབས་པའི་ལི་ཤིན་ཡུས་ཀྱིས་བྱ་སྤུའི་སྟོད་ཐུང་གྱོན་ཏེ་ཁྲོམ་གཞུང་ཟུར་གྱི་འོ་ཇ་ཚོང་ཁང་དུ་སོང་ནས་རྩ་གཉིས་ཨང་རྟགས་བཤེར་ཏེ་འོ་ཇ་ཚ་པོ་ལྔ་ཉོས། “དཔྱིད་གསར་དུས་ཆེན་གྱི་གུང་་གསེང་རིང་ཕྲུ་གུ་ཚོ་འོ་ཇ་འཐུང་རྒྱུར་དགའ་པོ་འདུག”ཅེས་ལི་ཤིན་ཡུས་ཀྱིས་བཤད།

སྲོལ་རྒྱུན་གྱི་ལོ་གསར་རིང་གྲངས་འཛིན་ཅན་གྱི་ཞབས་ཞུ་དར་བ་བརྟེན་རྫོང་ཁོངས་ཀྱི་འཛད་སྤྱོད་ལ་དེང་རབས་ཀྱི་རྣམ་པ་མངོན།

མོས་འདེམས་ཚོགས་པའི་ཉོ་སྐྱེལ་གྲངས་གཞི་ལས་མངོན་པར་གཞིགས་ན། གནམ་གང་ཚུན་དུ“དཔྱིད་གསར་དུས་ཆེན་རིང་ལག་རྟགས་སྤྲོད་པའི”དྲ་ཐོག་ནས་འོ་ཇའི་འཛིན་ཤོག་སྤྲོད་ཚད་ལྡབ་གསུམ་ཙམ་འཕར་བ་དང་། འཛིན་ཤོག་སྤྱོད་མཁན་གྱི་གསུམ་ཆ་གཅིག་ལྷག་ཙམ་རྫོང་ཁོངས་ཁྲོམ་ར་ནས་ཡིན་པ་རེད། བཏུང་བྱ་སྤུས་རྟགས་ཚོང་ཁང་དུ་བཏུང་བྱ་ཉོ་མཁན་གྱི་གཞོན་ནུས་ཁེངས་ཡོད།

“རྒྱལ་ཁབ་ཀྱི་ཁ་གསབ་སྲིད་ཇུས་དང་བསྟུན་ནས་ལོ་གསར་རིང་ངས་ཁང་པ་གསར་པར་མཁོ་བའི་ཁྱིམ་སྤྱོད་གློག་ཆས་ཆ་ཚང་ཉོས་པ་ཡིན”ཟླ་དང་པོའི་ཚེས་གསུམ་ལ་ཅང་ཤིས་ཞིང་ཆེན་དབྱིན་ཐན་གྲོང་ཁྱེར་ཤིན་ཅང་ཁུལ་གསར་ཀང་ཁུའོ་གྲོང་ཚོའི་ཡུལ་མི་ཞུས་ཝུའུ་དབྱང་གིས་ཤིན་ཅང་ཁུལ་གསར་གྱི་ཁྱིམ་སྤྱོད་གློག་ཆས་ཚོང་ཁང་ཆེ་གྲས་ཤིག་ནས་འཁྱགས་སྒམ་གཅིག་དང་དབྱིན་ཚུན75ཡི་བརྙན་འཕྲིན་གཅིག་ཉོས་པར་རྒྱལ་ཁབ་ཀྱི་ཁ་གསབ་20%ཡོད་པས་འཁྱགས་སྒམ་དང་བརྙན་འཕྲིན་ལ་སྒོར་5500ལྷག་ཙམ་ལས་སྤྲོད་དགོས་བྱུང་མེད་ལ། ཚོང་པས་ད་དུང་སེམས་རྩ་འཁོལ་པོས་ཁྱིམ་དུ་བསྐྱལ་ཡོད།

“རྙིང་པ་གསར་བརྗེས”ཀྱི་འཛད་སྤྱོད་ཀྱི་མི་མངོན་པའི་སྟོབས་ཤུགས་ཧ་ཅང་ཆེན་པོ་ལྡན་པ་དང་། ལྗང་མདོག་རིམ་སྤོར་རིགས་ཀྱི་འཛད་སྤྱོད་དགོས་མཁོ་རྒྱུན་ཆད་མེད་པར་ཆེ་རུ་ཕྱིན་ལ། ནུས་རྒྱུ་གསར་པའི་རླངས་འཁོར་སོགས་ཀྱིས་མཚོན་བྱེད་དུ་བྱེད་པའི་ལྗང་མདོག་ཚོང་ཟོག་རྫོང་ཁོངས་ཀྱི་འཛད་སྤྱོད་གསར་པ་ཞིག་ཏུ་གྱུར་ཡོད།

“ནུས་རྒྱུ་གསར་པའི་རླངས་འཁོར་བརྗེས་པས་རླངས་འཁོར་མཐོང་སྣང་མཛེས་ལ་ཁོར་ཡུག་སྲུང་སྐྱོང་ཐུབ་པ་མ་ཟད། དངུལ་ཡང་གྲོན་ཆུང་ཐུབ་སོང”ཞེས་དབྱིན་ཐན་གྲོང་ཁྱེར་གཡོད་ཧུའུ་ཆུས་ཞ་པུའུ་གྲོང་ཚོའི་ཡུལ་མི་ཀྲང་མའེ་ཡིས་ཉོས་མ་ཐག་པའི་པི་ཡ་ཏིའི་གློག་སྒུལ་རླངས་འཁོར་བཏང་ནས་དགའ་སྤྲོའི་ངང་གཉེན་འཕྲད་དུ་བསྐྱོད། དཔྱིད་གསར་དུས་ཆེན་གྱི་སྔ་ནུབ་ཏུ་སྤེལ་བའི་བྲིན་ཚོང་བྱེད་སྒོ་དང་བསྟུན་ནས་ཀྲང་མའེ་ཡིས་རླངས་འཁོར་དེ་བློ་ལ་བབས་ནས་སྲིད་གཞུང་གིས་ཁ་གསབ་སྒོར་ཁྲི་1.5དང་རླངས་འཁོར་རྙིང་པར་རག་པའི་སྒོར་4000བསྡོམས་མཐར་སྒོར་ཁྲི་6.5སྤྲད་ནས་རླངས་འཁོར་གསར་པ་དེ་ཉོས།

འཁོར་རྒྱུག་དྲ་བ་འཐུས་སྒོ་ཚང་བ་དང་མཁོ་སྤྲོད་འགན་ལེན་བདེ་བླག་བྱུང་བ།

དཔྱིད་གསར་དུས་ཆེན་གྱི་ངལ་གསོའི་རིང་། ས་ཁུལ་ཁག་དང་འབྲེལ་ཡོད་སྡེ་ཚན་ཁག་གིས་ལོ་མཇུག་དང་ལོ་སྟོད་ཀྱི་འཛད་སྤྱོད་ཁྱད་ཆོས་དང་ཟུང་འབྲེལ་བྱས་ཏེ་མཁོ་སྤྲོད་འཁོར་འབྲེལ་དང་། ཟོག་འགྲེམས་སྡེབ་སྐྱེལ། ཚོང་ཟོག་དང་ཞབས་ཞུ་གཤམ་སྐྱེལ་བཅས་དང་དེ་བཞིན་ཞིང་ལས་ཐོན་རྫས་དྲ་ཐོག་ནས་ཕྱིར་འཚོང་བཅས་བྱས་པར་བརྟེན་ཐོན་ཁུངས་གཙོ་བོ་གྲོང་གསེབ་ཀྱི་ཁྲོམ་རར་འདོན་པར་སྔར་བས་སྐུལ་མ་ཐེབས་པ་མ་ཟད། རྫོང་དང་། ཤང་། གྲོང་ཚོ་བཅས་ཀྱི་ཟོག་འགྲེམས་སྡེབ་སྐྱེལ་མ་ལག་འཐུས་སྒོ་ཚང་དུ་ཕྱིན་ནས་རྫོང་ཁོངས་ཀྱི་ཚོང་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་མ་ཐེབས་ཡོད།

མཁོ་སྤྲོད་འགན་ལེན་དང་རིན་གོང་བརྟན་པ་དང་མི་སེར་གྱི་གསོལ་ལྕོག་གི་ཚལ་སྣ་ཕུན་སུམ་ཚོགས་པ།

ཨན་ཧུའེ་ཞིང་ཆེན་ཝུའུ་ཧུའུ་གྲོང་ཁྱེར་དུ་གྲོང་ཁྱེར་ཡོངས་ཀྱི་མཁོ་ཚོང་ཁོངས་གཏོགས་ཀྱིས་ལོ་གསར་གྱི་མཁོ་ཆས་འཚོང་བའི་བྱེད་སྒོ་སྤེལ་བ་དང་། ཝུའུ་ཧུའུ་ཏ་ཏི་ཞིང་ཞོར་ཐོན་རྫས་སྡེབ་ཚོང་ཁྲོམ་ར་དང་ནན་ལིང་མཁོ་ཚོང་ཁང་སོགས་ཀྱིས་ཚོང་ཟོག་གྲ་སྒྲིག་ཧུར་ཐག་བྱས་ཏེ་ཚོང་ཟོག་མཁོ་སྤྲོད་འཛད་མེད་ཐུབ་པ་བྱས་ཡོད།

མིག་སྔར། རྒྱལ་ཡོངས་མཁོ་ཚོང་མཉམ་ལས་ཁང་ཁོངས་གཏོགས་ཀྱི་ཞིང་ལས་ཐོན་རྫས་ཁྲོམ་ར་4200ལྷག་ཙམ་དང་ཞིང་ལས་ཐོན་རྫས་གཉེར་སྐྱོང་ཁེ་ལས་7500ལྷག་ཙམ་གྱིས་ངལ་གསོའི་རིང་ཁྲོམ་རའི་མཁོ་སྤྲོད་ལས་དོན་ནུས་ཤུགས་ཡོད་རྒུས་ལེགས་པར་བསྒྲུབས་ཏེ་ཞིང་ལས་ཐོན་རྫས་ཐོན་ཁུལ་ནས་ཐོན་ཐུབ་པ་དང་། སྐྱེལ་ཐུབ་པ། བྲིན་ཁ་རྒྱུག་པ་བཅས་ཡོང་བར་བྱས་ཡོད།

ཟོག་འགྲེམས་ཤར་བགྲོད་ཐུབ་པ་དང་ཞིང་ལས་ཐོན་རྫས་གྲོང་ཁྱེར་དུ་མགྱོགས་མྱུར་འབྱོར་བ།

“ཚོང་པ་ཞིག་གིས‘ཕ་ཡུལ་སྡེ་ཁུལ’ནས་རྟ་རྨིག་རྒྱ་མ་200ལྷག་ཙམ་དགོས་པའི་མངག་ཐོ་བཏང་བྱུང་། སང་ཉིན་ང་ལེན་པར་ཡོང་གི་ཡིན”ཞེས་ཧྥུའུ་ཅན་ཞིང་ཆེན་ལུང་ཡན་གྲོང་ཁྱེར་ཝུའུ་ཕིང་རྫོང་གི་ཞིང་དུད་ཀྲུང་ཅིན་ཧྥ་ལ་རྫོང་དེའི“ཕ་ཡུལ་སྡེ་ཁུལ”གྱི་གྲངས་འཛིན་གྲོང་གསེབ་གཉེར་སྐྱོང་འགན་འཁུར་བ་རའོ་ཕིན་ཐེན་གྱི་མངག་ཉོ་ཁ་པར་འབྱོར་ནས་ཁོང་ཁྱིམ་གྱི་རྟ་རྨིག་མྱུར་བགྲོད་ལྕགས་ལམ་ནས་ཞ་མོན་དུ་སྐྱེལ་རྒྱུ་རེད་ཅེས་བཤད།

དཔྱིད་གསར་སྐྱེལ་འདྲེན་རིང་རྒྱལ་ཁབ་ལྕགས་ལམ་ནན་ཁྲང་ཅུས་ལུང་ཡན་མེ་འཁོར་ལས་དོན་ཁང་གིས་ཀྲུང་གོ་ལྕགས་ལམ་མྱུར་སྐྱེལ་དང་འབྲེལ་གཏུག་བྱ་རྒྱུར་ཤུགས་སྣོན་བརྒྱབ་ནས་སྐྱེལ་འདྲེན་གྱི་བརྒྱུད་རིམ་བདེ་རུ་བཏང་སྟེ་ཞིང་ལས་ཐོན་རྫས་བདེ་བླག་ངང་གྲོང་ཚོ་ནས་གྲོང་ཁྱེར་དུ་དབོར་ཐུབ་པ་བྱས་ཡོད།

“མྱུར་བགྲོད་གཞུང་ལམ་ནས་མྱུར་སྐྱེལ”དང“མཁོ་འཚོང་དང་སྤྱི་སྤྱོད་རླངས་འཁོར” མྱུར་སྐྱེལ་གྲོང་ཚོར་ཁྱབ་གདལ་སོགས་རང་རྒྱལ་གྱིས་རྫོང་དང་། ཤང་། གྲོང་གསེབ་བཅས་རིམ་གསུམ་ཟོག་འགྲེམས་སྡེབ་སྐྱེལ་མ་ལག་མུ་མཐུད་འཐུས་སྒོ་ཚང་དུ་བཏང་བ་དང་། བཟོ་ལས་ཐོན་རྫས་གཤམ་སྤེལ་དང་ཞིང་ལས་ཐོན་རྫས་གྲོང་ཁྱེར་དུ་སྐྱེལ་བའི་ཕྱོགས་གཉིས་ཀྱི་འཁོར་རྒྱུག་ཐབས་ལམ་སྔར་བས་ཤར་གཏོང་ཐུབ་པས། ཞིང་པའི་འབབ་འཕར་དང་འཛད་སྤྱོད་སྤུས་ཚད་དབར་འཁོར་རྒྱུག་ཡག་པོ་མངོན་འགྱུར་བྱུང་ཡོད།

ཁྲོམ་རའི་ཁོར་ཡུག་ལེགས་སུ་བཏང་ནས་འཛད་སྤྱོད་པ་བློ་བདེ་ཡོང་བར་བྱས་པ།

དཔྱིད་གསར་དུས་ཆེན་རིང་། ཅང་སུའུ་ཞིང་ཆེན་ཀྲང་ཅ་ཀང་གྲོང་ཁྱེར་མཁོ་འཚོང་མཉམ་ལས་ཁང་ཁོངས་གཏོགས་ཀྱི་ཆིང་ཚའོ་ཤང་ཞིང་ཞོར་ཐོན་རྫས་སྡེབ་ཚོང་ཁྲོམ་རས་ཞིང་ཞོར་ཐོན་རྫས་ཀྱི་སྤུས་ཚད་བདེ་འཇགས་དོ་དམ་གྱི་ཁུངས་འདེད་མྱུར་བཤེར་གྱི་བཅོས་སྐྱོང་བྱེད་ཐབས་གསར་པ་བཏོད་ཡོད།

ཀོང་ཡོན་གྲོང་ཁྱེར་ཁྲའོ་ཐན་ཆུས་ཀྱི་ཚོང་དོན་དང་ཁྲོམ་ར་ལྟ་འདོམས་སོགས་སྡེ་ཚན་གྱིས་འཚོ་བའི་མཁོ་ཆས་ཐོན་སྐྱེད་བྱེད་མཁན་ཁེ་ལས་གཙོ་བོར་ལྟ་ཞིབ་ཚད་ལེན་བྱས་ཏེ། ཁེ་ལས་གཙོ་བོའི་རིན་གོང་དང་ཕྱིར་འཚོང་ཐད་ཉིན་རེའི་སྙན་སེང་ལམ་ལུགས་ལག་བསྟར་དང་། སྒོ་རྩིས་ཚོང་ཁང་དང་ཚོང་རའི་བདེ་འཇགས་ཐོན་སྐྱེད་ལ་ཞིབ་བཤེར་བྱེད་ཤུགས་ཆེ་རུ་བཏང་སྟེ་འཛད་སྤྱོད་པར་བདེ་འཇགས་བློ་བདེའི་འཛད་སྤྱོད་ཀྱི་ཁོར་ཡུག་ཧུར་ཐག་བཏོད་ཡོད།