དཔྱིད་གསར་དུས་ཆེན་རིང་ཨན་ཧུའེ་དུ་ལོག་ནས་ཁྱིམ་གྱི་སྒོ་འཛུལ་མ་ཐག་ཁྱིམ་མཚེས་ཝུའུ་ཀྲི་ཡི་གདན་ཞུའི་ཡི་གེ་ཞིག་འབྱོར་བ་སྟེ། དཔྱིད་གསར་དུས་ཆེན་རིང་ཙུང་དབྱང་རྫོང་གི་ཕ་ཡུལ་དུ་ཕྱིར་ལོག་པའི་ཤེས་ལྡན་པའི་སྙིང་གཏམ་ཤོད་རེས་ཀྱི་ཚོགས་འདུར་ཞུགས་རྒྱུ་དེ་རེད།

ལོ་གསར་སྐབས“ཚོགས་འདུ”འདི་འདྲ་ཚོགས་པའི་དགོས་པ་ཡོད་དམ། ཐེ་ཚོམ་དང་བཅས་ཐད་ཀར་གྲོང་རྡལ་དུ་དོན་དངོས་ལ་བརྟག་དཔྱད་བྱེད་པར་བསྐྱོད།

བདེ་འཇགས་ལས་དོན་བཀོད་སྒྲིག་བྱེད་བཞིན་པའི་ཡུས་ཐན་གྲོང་རྡལ་ཏང་ཨུད་ཀྱི་ཧྲུའུ་ཅི་ཝང་ཀྲང་ཀྲུའུ་ལ་ཁ་པར་རྒྱུན་ཆད་མེད་པར་འབྱོར་ཡང་ལས་དོན་པ་དེ་ཙམ་མང་པོ་ཡོང་བ་མཐོང་རྒྱུ་མེད། “ལས་དོན་པ་མང་ཆེ་བ་འཐབ་ས་དང་པོར་བསྐྱོད་པ་རེད” རྫོང་ལས་ཁུངས་ནས་གཞི་རིམ་བར་ལས་ཀ་བྱས་ནས་ལོ་ཤས་རིང་ཝང་ཀྲང་ཀྲུའུ་ལ་ལོ་མཇུག་ཏུ་ཚོགས་འདུ་དང་ཞིབ་བཤེར་སྣ་ཚོགས་ཉུང་དུ་ཕྱིན་པ་དང་། འཐབ་ས་དང་པོར་དོན་འཁྱོལ་ལ་དམ་འཛིན་བྱེད་པའི་དུས་ཚོད་མང་དུ་ཕྱིན་པའི་མྱོང་ཚོར་ཟབ་མོ་བྱུང་བ་རེད།

གཅིག་འཕར་བ་དང་གཅིག་ཉུང་དུ་ཕྱིན་པ་དེ་གྲངས་གཞིའི་ཐོག་ནས་ར་སྤྲོད་བྱས་པ་སྟེ། ན་ནིང་ཟླ་12པའི་ཟླ་འགོར། གོང་རིམ་གྱིས་ཕྱི་ཚུལ་རིང་ལུགས་བཅོས་སྒྲིག་བྱས་ནས་གཞི་རིམ་གྱི་ཁུར་པོ་ཡང་དུ་གཏོང་བའི་ལས་དོན་ལ་ཞིབ་བཤེར་བྱེད་སྐབས་གྲོང་རྡལ་ནང་བསྡོམས་རྩིས་བརྒྱབ་པ་ལྟར་ན། གོང་གི་ཟླ་བ་11ནང་ལྟ་སྐུལ་ཞིབ་བཤེར་35%ཉུང་དུ་ཕྱིན་པ་དང་། ཡིག་ཆ་25%ཉུང་དུ་ཕྱིན་པ། ཚོགས་འདུ་15%ཉུང་དུ་ཕྱིན་པ་བཅས་རེད།

དུས་ཚོད་བཙལ་ནས་གང་ཞིག་བྱེད་དགོས་སམ། བཟོ་ལས་ཀྱི་འགན་ཁུར་མཁན་ཀྲེན་ཀྲང་གཞོན་པ་ཝུའུ་ཧའོ་ཡིས་དུས་ཚོད་མང་ཆེ་བ་ཁེ་ལས་ལ་བསྐྱོད་པ་དང་རྣམ་གྲངས་དམ་འཛིན་གྱི་ལས་ལ་གཞོལ་གྱི་ཡོད་ཅེས་བཤད། གྲོང་རྡལ་ཏང་ཨུད་ཀྱི་ཧྲུའུ་ཅི་གཞོན་པ་ཝང་ཁྲེང་གིས“ཚོགས་འདུ་དང་ཡིག་ཆ་ཉུང་དུ་ཕྱིན་པས་དེ་བས་ཀྱང་གྲོང་ཚོའི་སྣེ་ཁྲིད་དེ་ལས་ཀ་ཧུར་ཐག་བྱེད་དགོས”ཞེས་དྲང་པོ་བཤད། གྲོང་རྡལ་ཏང་ཨུད་ཀྱི་ཨུ་ཡོན་དང་སྲིད་ཁྲིམས་ཨུ་ཡོན་ལུའུ་ཅུན་གྱིས“དཔྱད་ཞིབ་དེ་བས་སྟབས་བདེ་ལ་ཁ་གསལ་ཡིན་པས་ལས་དོན་སྒྲུབ་སྐབས་དེ་བས་སྟབས་བདེ་པོ་འདུག”ཅེས་སྦ་གསང་མེད་པར་བཤད།

གྲོང་ཚོའི་བུད་མེད་ཀྲུའུ་རེན་ཝུའུ་ཀྲིས“ད་ལྟ་ཁོམ་པ་དང་བྲེལ་བ་གཉིས་ལྡན་རེད་འདུག”“ཁོམ་པ”ནི་ཚོགས་འདུ་ཉུང་དུ་ཕྱིན་པ་མ་ཟད། ཐ་ན་ལས་ཀའི་སྐད་འཕྲིན་ཚོགས་པའང་གཅིག་ལས་མེད་པས་དངོས་གནས་སྟབས་བདེ་རུ་སོང་འདུག “བྲེལ་བ”ནི་ཞིང་ནང་དུ་རྒྱུགས་ནས་སྲིད་ཇུས་དྲིལ་བསྒྲགས་དང་དམངས་ཀྱི་འདོད་བློ་བསྡུ་རུབ་ཀྱི་བྲེལ་བ་དེ་རེད་ཅེས་བཤད།

ཚོགས་འདུ་མང་པོ་ཞིག་ཉུང་དུ་བཏང་བས་སྙིང་གཏམ་ཤོད་རེས་ཀྱི་ཚོགས་འདུ་ད་དུང་གསོར་འཇོག་བྱེད་དགོས་དོན་གང་ཡིན་ནམ། སྙིང་གཏམ་ཤོད་རེས་ཀྱི་ཚོགས་འདུའི་ཐོག་རྫོང་ཨུད་ཀྱི་ཧྲུའུ་ཅི་དབྱང་ཤིའུ་ཆིས་དེའི་རྒྱུ་མཚན་བརྗོད་པ་སྟེ། ཨན་ཧུའེ་ཞིང་ཆེན་གྱིས་དེ་སྔ་ལོ་རྒྱུས་རིག་གནས་གྲགས་ཅན་བརྒྱ་དཔྱད་འདེམས་བྱས་པའི་ནང་ཙུང་དབྱང་གིས་11བཟུང་ཡོད་པ་དང་མིག་སྔར་ཙུང་དབྱང་ནས་ཡིན་པའི་ཁང་གཉིས་ཀྱི་ཡོན་ཧྲི་9ཡོད་པ་རེད། རྫོང་འཕེལ་རྒྱས་མགྱོགས་པོ་གཏོང་དགོས་ན། ཤེས་ལྡན་པའི་ལེགས་ཆ་འདོན་སྤེལ་ཡག་པོ་བྱེད་དགོས། ལོ་ལྟར་ཚོགས་འདུ་འདི་འདྲ་འཚོགས་དོན་ནི་ཚང་མས“རྣམ་པ་གསར་པར་ལྟ་བ་དང་། ཕ་ཡུལ་གྱི་གནས་ཚུལ་གླེང་བ། ཐབས་ཇུས་བཟང་པོ་འདོན་པ། འཕེལ་རྒྱས་དོན་གཉེར་བྱེད་པ”བཅས་བྱ་རྒྱུའི་རེ་བ་བྱེད་ཀྱི་ཡོད་པ་དེ་རེད།

“ཚོགས་འདུ”དེའི་རྒྱབ་ཏུ་ལམ་སྲོལ་ཆ་ཚང་ཞིག་ཡོད་པ་སྟེ། རྫོང་ཡོངས་ཀྱི་ཤེས་ལྡན་པའི་མཛོད་བཙུགས་པར་ཐབས་འདོན་ཇུས་འབུལ་ལམ་ཡང་ན་ཞིབ་ཕྲའི་རྣམ་གྲངས་གང་ཡིན་རུང་རྫོང་དང་གྲོང་རྡལ་ཚང་མས་ཞིབ་འཇུག་ཧུར་ཐག་བྱས་ནས་དོན་འཁྱོལ་ལ་དམ་འཛིན་བྱེད་པ་དེ་རེད།

ལོ་གསར་ཚེས་གསུམ་ཉིན་གྱི་སྙིང་གཏམ་ཤོད་རེས་ཀྱི་ཚོགས་འདུའི་ཐོག་ཕ་ཡུལ་དུ་ཕྱིར་ལོག་བྱེད་མཁན་125མཉམ་འཛོམས་བྱས་ནས་ས་གནས་ས་ཐོག་ཏུ་རྣམ་གྲངས་8ལ་གན་རྒྱ་བཞག་པ་རེད།