2025ལོའི“ང་ཚོའི་ཀྲུང་གོའི་ཕུགས་འདུན—རིག་གནས་ཁྱིམ་ཚང་ཁྲི་སྟོང་མང་པོར་ཁྱབ་གདལ་གཏོང་བའི”བྱེད་སྒོ་སྤེལ་འགོ་ཚུགས་པ།
ཀྲུང་དབྱང་དྲིལ་བསྒྲགས་པུའུ་དང་། སློབ་གསོ་པུའུ། རིག་གནས་དང་ཡུལ་སྐོར་པུའུ། རྒྱལ་ཁབ་རླུང་འཕྲིན་བརྙན་འཕྲིན་སྤྱི་ཁྱབ་ཅུས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས། ཀྲུང་གོ་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་བཅས་ཀྱིས་གཙོ་གཉེར་བྱས་པའི་2025ལོའི“ང་ཚོའི་ཀྲུང་གོའི་ཕུགས་འདུན—རིག་གནས་ཁྱིམ་ཚང་ཁྲི་སྟོང་མང་པོར་ཁྱབ་གདལ་གཏོང་བའི”བྱེད་སྒོའི་འགོ་ཚུགས་མཛད་སྒོ་དང་འཚམས་འདྲིའི་འཁྲབ་སྟོན་ཉེ་ཆར་ཅང་ཤིས་ཞིང་ཆེན་ཀན་ཀྲོའུ་གྲོང་ཁྱེར་ཞུན་ཝུའུ་རྫོང་དུ་གཉེར་བ་རེད།
2025ལོའི“རིག་གནས་ཁྱིམ་ཚང་ཁྲི་སྟོང་མང་པོར་ཁྱབ་གདལ་གཏོང་བའི”བྱེད་སྒོ་དེ་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ཕྱོགས་ཡོངས་ནས་ལག་བསྟར་བྱེད་པར་དམ་པོར་དམིགས་པ་དང་། ཞི་ཅིན་ཕིང་གི་རིག་གནས་དགོངས་པ་སློབ་སྦྱོང་དང་ལག་ལེན་གཏིང་ཟབ་བྱེད་པ། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རིག་གནས་རྒྱུན་ཆད་མེད་པར་འཕེལ་རྒྱས་གཏོང་བ། སྤྱི་ཚོགས་རིང་ལུགས་ཀྱི་རིག་གནས་རྒྱལ་ཁབ་སྟོབས་ཆེན་འཛུགས་སྐྲུན་ལ་སྐུལ་འདེད་གཏོང་བ། སྤུས་ལེགས་ཀྱི་རིག་གནས་ཐོན་ཁུངས་གཞི་རིམ་དུ་ཁྱབ་པའི་ལམ་སྲོལ་འཛུགས་པ། རྒྱ་ཆེའི་རིག་གནས་རིག་རྩལ་ལས་དོན་པ་སྐུལ་སློང་དང་སྒྲིག་འཛུགས་བྱས་ཏེ་གཞི་རིམ་ལ་ཕྱོགས་པའི་རིག་རྩལ་འཁྲབ་སྟོན་དང་། རིག་རྩལ་གསོ་སྦྱོང་། རིག་གནས་ཞབས་ཞུ་སོགས་སྤེལ་བ་མ་ཟད། ནང་དོན་ཕུན་སུམ་ཚོགས་པ་དང་། ནུས་ཆེ་སྤུས་ལེགས་ཀྱི་རིག་གནས་ཐོན་རྫས་མཁོ་འདོན་བྱེད་པ་དང་། མང་ཚོགས་ཀྱིས་རིག་གནས་རང་གཉེར་ལ་སྐུལ་ལྕག་དང་དར་སྤེལ་གཏོང་བ། ཞུགས་འདོད་ལ་ཞུགས་བདེ་བའི་རིག་གནས་རིག་རྩལ་བྱེད་སྒོ་སྤེལ་བ། གྲོང་གསེབ་ཀྱི་རྒན་རྒོན་ཚོགས་པ་དང་གྲོང་ཁྱེར་གྱི་ལས་ཞུགས་ཚོགས་པ་གསར་པ་སོགས་ལ་གཙོ་བོར་ཕྱོགས་ནས་མི་དམངས་མང་ཚོགས་ཀྱི་དཔའ་ངར་དང་འབད་འབུངས་ཆེར་སྐྱེད་ཀྱི་བསམ་པའི་ཉམས་འགྱུར་མཚོན་པར་བྱས་ཡོད།