ལུགས་རྙིང་ལོའི་ལོ་གསར་ཚེས་གསུམ་ཉིན་ཆར་པ་སིམ་སིམ་ཞིག་བབས་ནས་ཀྲེ་ཅང་ཧྲེང་ཀྲོའུ་གྲོང་ཁྱེར་ཁྲུང་རེན་གྲོང་རྡལ་ཀྲི་པིན་གྲོང་ཚོའི་སྨྱུག་མའི་ནགས་ཚལ་ལ་བྱི་དོར་བྱས་པ་ལྟར་དེ་བས་སྔོ་ཐིང་ཐིང་དུ་གྱུར།

“ཨ་མ་ཀྲི་ལགས། ང་ཚོས་ཁྱེད་ལ་ཟློས་གར་འཁྲབ་སྟོན་བྱེད་རྩིས་ཡོད”ཅེས་ཤོད་ཀྱིན། སྔ་དྲོའི་ཆུ་ཚོད་9དང་ཕྱེད་ཀ་ཙམ་དུ་གྲོང་སྡོད་མཛུབ་ཁྲིད་པ་ཆིའུ་ཏན་ཧུའེ་ལོ་76ལ་སླེབས་པའི་ཀྲི་མེང་ཧྥེ་ཡི་ཁྱིམ་དུ་སླེབས།

“ཨ་མ་ཀྲི་ལགས་གཡོད་ཅུས་ཟློས་གར་ལྟ་རྒྱུར་དགའ་པོ་ཡོད་པས་དཔྱིད་གསར་དུས་ཆེན་རིང་ནང་མི་དང་མཉམ་དུ་ཟློས་གར་ལྟ་འདོད་ཆེ་མོད། འོན་ཀྱང་རྐང་པ་ཐང་པོ་མེད་རྐྱེན་སྟབས་བདེ་པོ་མེད”ལོ་གསར་ཚེས་གཅིག་ཉིན་འཚམས་འདྲིར་འགྲོ་སྐབས་ཆིའུ་ཏན་ཧུའེ་ཡིས“ཀྲེ་ཅང་གི་གྲོང་དར་ཧྲེ་སྐྱོང”APPསྟེང་གི“དམངས་ཀྱི་གནས་ཚུལ་འགོད་པའི་ཉིན་ཐོའི”ནང་གནས་ཚུལ་དེ་བཀོད་ཡོད། དེ་རྗེས་ཁོང་གིས་ཁྲུང་རེན་གྲོང་རྡལ་གྱི་ཅིན་ཐེན་གཅེན་གཅུང་རྒན་མོའི་གཡོད་ཅུས་ཟློས་གར་ཁང་གི་ལས་ཞོར་འཁྲབ་སྟོན་པ་ལི་ཡ་ལུའུ་དང་ཁ་ཆད་བྱས་ནས་སྒོ་རྩར་ཟློས་གར་འཁྲབ་ཡོད།

“ནང་མི་མཉམ་འཛོམས་དགའ་ལྷང་ལྷང”ཞེས་པའི་གཡོད་ཅུས་ཟློས་གར《གཡུ་ཡི་སྐྲ་པིང》ཞེས་པའི་གྲགས་ཅན་གླུ་གཞས་ཀྱི་དུམ་བུ་ཞིག་བླངས། གྲོང་པ་ཁྱིམ་མཚེས་ཚང་མས་ལྟད་མོ་བལྟས་རྗེས་ཐལ་མོའི་རྡེབ་སྒྲ་རྒྱུན་ཆད་མེད་པར་གྲགས།

2004ལོར་སྐབས་དེ་དུས་ཀྲེ་ཅང་ཞིང་ཨུད་ཀྱི་ཧྲུའུ་ཅི་ཡིན་པའི་བློ་མཐུན་ཞི་ཅིན་ཕིང་གིས་ཧྲེང་ཀྲོའུ་རུ་བརྟག་དཔྱད་ཞིབ་འཇུག་གནང་སྐབས“དམངས་ཀྱི་གནས་ཚུལ་འགོད་པའི་ཉིན་ཐོར”གསོན་ཤུགས་སྔར་ལས་ཆེ་བ་ལྡན་པ་དང་ཕན་འབྲས་སྔར་བས་བཟང་པོ་ཐོན་པ་བྱེད་དགོས”ཞེས་བཏོན་གནང་ཡོད། ད་ལོའི་དཔྱིད་གསར་དུས་ཆེན་གྱི་སྔ་ནུབ་ཏུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་ལེའོ་ཉིང་དུ་གཞི་རིམ་ལས་བྱེད་པ་དང་མང་ཚོགས་ལ་འཚམས་འདྲིར་ཕེབས་སྐབས“འགན་འཁྲི་ཁ་གསལ་དང་། མཐར་ཕྱིན་པ། ལས་དོན་དང་མི་ཡོད་པའི་སྒོ་ནས་གཞི་རིམ་བཅོས་སྐྱོང་དམ་འཛིན་ཡག་པོ་བྱེད་དགོས”ཞེས་ནན་བཤད་གནང་བ་རེད།

ད་ཆ་ཧྲེང་ཀྲོའུ་ཡི་གཞི་རིམ་ལས་བྱེད་པས་སྔར་བཞིན“དམངས་ཀྱི་གནས་ཚུལ་འགོད་པའི་ཉིན་ཐོ”འབྲི་བའི་གོམས་གཤིས་རྒྱུན་འཁྱོངས་བྱེད་ཀྱི་ཡོད། ལོ་20ལྷག་ཙམ་རིང“དམངས་ཀྱི་གནས་ཚུལ་འགོད་པའི་ཉིན་ཐོ”དེ་ལག་བྲིས་ཟིན་བྲིས་ནས་དྲ་ཐོག་གི“དམངས་ཀྱི་གནས་ཚུལ་གྲངས་གཞི”དང“དམངས་ཀྱི་གནས་ཚུལ་གྱི་བསམ་གཞིགས”བར་འཕེལ་རྒྱས་ཕྱིན་པ་དང་། ཁྱབ་ཁོངས་དེ་གྲོང་གསེབ་ནས་གྲོང་ཁྱེར་གྱི་སྡེ་ཁུལ་དང་ཁེ་ལས་བར་སྣུར་བསྲིང་ཐུབ་པ། ཞབས་ཞུའི་ནང་དོན་ནི“དོན་དག་གཅིག་ཐག་གཅོད་བྱ་རྒྱུ”ནས“དོན་དག་རིགས་གཅིག་ཐག་གཅོད་བྱ་རྒྱུའི”བར་རིམ་འཕར་བྱུང་བ་བཅས་རེད།

“གྲོགས་པོ་ཆུང་ཆུང་ཚོ། སྤྲེའུ་ཡིས་དངོས་གནས་ཟླ་བ་ཆུ་ནང་ནས་བཏོན་ཡོད་དམ” སྔ་དྲོའི་ཆུ་ཚོད་བཅུ་གཅིག་པར་གསར་འགོད་པ་ཆིའུ་ཏན་ཧུའེ་དང་མཉམ་དུ་གྲོང་ཚོའི་རིག་གནས་ཚོགས་ཁང་གི་ཐོག་བརྩེགས་གཉིས་པའི་ལྟ་ཀློག་ཁང་དུ་སླེབས་སྐབས་ཕ་མ་བུ་ཕྲུག་གི་ལྟ་ཀློག་མྱོལ་རོལ་བྱེད་སྒོ་ཞིག་སྤེལ་བཞིན་འདུག

“ཕྲུ་གུ་ལོག་སླེབས་རྗེས་ཉིན་གཉིས་རིང་ཨ་གསར་གྱིས་སྐྱིད་པོ་འདུག འོན་ཀྱང་ཨ་གསར་ཡོལ་རྗེས་ག་རེ་བྱེད་དགོས་མིན་ཤེས་ཀྱི་མི་འདུག་ལ་ང་ཚོས་ཀྱང་ཕྲུ་གུས་ཉིན་གང་ཁ་པར་བལྟ་རུ་འཇུག་འདོད་མེད”ལེའོ་ཡོན་གྱི་ནང་མི་ཚང་མ་དུས་རྒྱུན་ཀོང་ཀྲོའུ་རུ་འཚོ་བ་སྐྱེལ་བཞིན་ཡོད་ལ། ལོ་གསར་དང་དུས་ཆེན་ལ་གཞི་ནས་ཕྲུ་གུ་འཁྲིད་དེ་ཕ་ཡུལ་དུ་ལོག་གི་ཡོད།

“དཔེ་དེབ་ཀྱི་སྣ་ཁ་མང་ཙམ་དང་ལྟ་ཀློག་མྱོང་རོལ་གྱི་རྣམ་པ་དེ་བས་མང་དུ་བཏང་ནས་བྱིས་པའི་དབར་གྱི་མཉམ་འགུལ་རོལ་རྩེད་མང་དུ་གཏོང་རྒྱུའི་རེ་བ་ཡོད”ཅེས“དམངས་ཀྱི་གནས་ཚུལ་འགོད་པའི་ཉིན་ཐོའི”ནང་ལེའོ་ཡོན་གྱི་རེ་འདུན་དེ་བྲིས་ཤིང་། ཆིའུ་ཏན་ཧུའེ་ཡིས་གྲོང་རྡལ་དང་གྲོས་བསྡུར་བྱས་ནས་ཧྲེང་ཀྲོའུ་གྲོང་ཁྱེར་དཔེ་མཛོད་ཁང་དང་འབྲེལ་གཏུག་བྱས་མཐར་ལོ་གསར་གོང་དུ་ན་ཚོད་མི་འདྲ་བའི་བྱིས་པར་འཚམ་པའི་དཔེ་དེབ་དང་རི་མོའི་དེབ་1000མང་དུ་བཏང་ནས་ཀྲི་པིན་གྲོང་ཚོའི་དཔེ་ཀློག་ཁང་གི་འཁོར་རྒྱུག་དཔེ་སྒྲོམ་ཕུན་སུམ་ཚོགས་སུ་བཏང་བ་རེད།