དགུན་སྒྲོལ་དུས་བྱར་སྐོར་སྲུང་བྱེད། ཡུལ་ཕྱོགས་གཅིག་གི་དུས་བདེ་སྲུང་།
ལོ་གསར་བཏང་མ་ཐག ཅང་ཤིས་ནན་ཁྲང་གྲོང་ཁྱེར་སྤྱི་བདེ་ཅུས་ཤིན་ཅན་ཡན་ལག་ཅུས་ནན་ཅི་མངགས་གཏོང་ཁང་གི་སུའོ་ཀྲང་ལིའུ་དབན་ལི་དང་མི་དམངས་ཉེན་རྟོག་པ་གཉིས་ཀྱིས་ཞོགས་པ་སྔ་པོ་ནས་ལུས་ལ་ཆར་ཁེབས་གྱོན་ཏེ་ཆུ་ངོགས་སུ་དུས་བྱར་སྐོར་སྲུང་བྱེད་འགོ་ཚུགས།
“ལྟོས་དང་། ལུས་བོངས་ཅུང་ཆེ་ལ་གཤོག་རྩེ་ནག་པོ་དེ་ཤར་ཕྱོགས་ཁྲུང་ཁྲུང་དཀར་མོ་རེད། སྟོད་ཁམས་པ་དང་སྨད་དཀར་པོ་བྱས་པ་དེ་ཁྲུང་ཁྲུང་རེད། སྤུ་དཀར་པོ་དང་མཆུ་ཏོ་ནག་པོ་བྱས་པ་དེ་བྱ་ཁྱེམ་དཀར་རེད”ཅེས་ལིའུ་དབན་ལིས་རྒྱང་ཤེལ་འཁྱེར་ནས་རྒྱུས་མངའ་ཤིན་ཏུ་ཆེན་པོས་བཤད།
དགུན་དུས་ཀྱི་ཧྥན་དབྱང་མཚོར་སྡེར་མའི་དབྱིབས་ལྟ་བུའི་མཚེའུ་ཆེ་ཆུང་སྣ་ཚོགས་མཐོང་རྒྱུ་ཡོད་པ་དེ་ནི“མཐའ་ཡས་རྩྭ་ཐང”དང་འདྲ་བར་དགུན་སྒྲོལ་ལ་ཡོང་བའི་དུས་བྱའི་བབ་སྡོད་ས་ཆ་ཡག་པོ་ཞིག་རེད། “ཉིན་ཤས་གོང་། འདི་གར་རྨས་སྐྱོན་ཕོག་པའི་ཁྲུང་ཁྲུང་དཀར་མོ་ཞིག་འདུག ང་ཚོས་དེ་མངགས་གཏོང་ཁང་དུ་ཁྱེར་ཏེ་སྨན་པ་བཙལ་ནས་སྨན་བཅོས་བྱས་པ་ཡིན། ཉེ་བའི་ལོ་ཤས་རིང་། ཚང་མའི་སྐྱེ་ཁམས་སྲུང་སྐྱོང་གི་འདུ་ཤེས་སྔར་བས་ཟབ་ཏུ་ཕྱིན་ཡོད་པས། གྲོང་མི་ཚོས་རྨས་སྐྱོན་ཕོག་པའི་དུས་བྱ་མཐོང་ཚེ་མངགས་གཏོང་ཁང་དུ་སྐྱེལ་བར་ཡོང་གི་རེད”ཅེས་ལིའུ་དབན་ལིས་བཤད།
“དུས་བྱ་བབས་པར་བརྟེན་ལྟ་བར་ཡོང་མཁན་ཡུལ་སྐོར་བའང་མང་དུ་ཕྱིན་ཡོད་པས། དཔྱིད་གསར་དུས་ཆེན་གྱི་གུང་གསེང་ནི་ང་ཚོ་ལས་བྲེལ་ཆེ་ཤོས་སྐབས་རེད། དུས་བྱར་སྐོར་སྲུང་དང་སྤང་གཤོངས་ཀྱི་མེ་ཟོན་སོགས་རྒྱུན་གཏན་གྱི་ལས་འགན་སྒྲུབ་དགོས་ལ། ད་དུང་ཡུལ་སྐོར་བའི་རོགས་སྐྱོབ་དང་ཞབས་ཞུའི་ལས་དོན་ཡང་སྒྲུབ་དགོས”ཞེས་ལིའུ་དབན་ལིས་གསར་འགོད་པར་བཤད།