ཞོགས་པ་ནགས་གསེབ་ཏུ་འཁྲིགས་པའི་སྨུག་སྤྲིན་མ་ཡལ་གོང་ནས་ཁྲུང་ཆིང་གྲོང་ཁྱེར་ས་གཤིས་གཏེར་རྫས་རྩད་ཞིབ་གསར་སྤེལ་ཅུས་ནན་ཅང་ས་གཤིས་རུ་ཁག་གི་མཐོ་རིམ་ལག་རྩལ་ཆེ་མོ་བ་ལུའོ་ཧྥུའུ་ཧེང་དང་བཅས་པ་ཝན་ཀྲོའུ་ཆུས་ཐའེ་ཨན་གྲོང་རྡལ་ཀྲུང་ལིའུ་གྲོང་ཚོར་འབྱོར།

དཔྱིད་གསར་དུས་ཆེན་གྱི་གུང་གསེང་ཡིན་ཡང་རུ་མི་ཚོ་སྔར་བཞིན་ལས་བྲེལ་ཆེ་ཞིང་། “མིག་སྔ་ནི་ཆུ་བྲི་བའི་དུས་ཡིན་པས། ང་ཚོས་ཆུ་བྲི་བའི་དུས་ཚིགས་ཀྱི་ཆུ་རྒྱུན་ཚད་ལེན་གྲངས་གཞི་འཚོལ་བསྡུའི་ལས་དོན་ལ་དམ་འཛིན་བྱས་ཏེ། རྗེས་མའི་ས་འོག་ཆུའི་ཐོན་ཁུངས་ལ་གདེང་འཇོག་དང་གསར་སྤེལ་བེད་སྤྱོད་བྱེད་པར་རྨང་གཞི་འདིང་དགོས”ཞེས་ལུའོ་ཧྥུའུ་ཧེང་གིས་བཤད།

རྡོག་ཐོན་མ་བྱས་གོང་ལུའོ་ཧྥུའུ་ཧེང་གིས་རྒྱབ་ཁུག་ལ་ཞིབ་བཤེར་ཞིབ་ཕྲ་བྱས། དེའི་ནང་ས་གཤིས་ཐོ་བ་དང་། དྲོད་ཚད་འཇལ་ཆས། ཆུའི་སྤུས་ཚད་མཇལ་ཆས། ཆུ་དཔེའི་སྣོད་སོགས་ཆེད་ལས་ཡོ་བྱད་བླུགས་ཡོད་པ་མ་ཟད། ད་དུང་འཐུང་ཆུ་དང་ལམ་རྒྱགས་ཀྱང་བླུགས་ཡོད་པ་རེད། ལུའོ་ཧྥུའུ་ཧེང་གིས“ཉིན་ལྟར་ཁུར་པོ་ལྕི་པོ་ཁུར་ནས་ཆ་སྙོམས་སྤྱི་ལེ་30ལྷག་ཙམ་འགྲོ་དགོས་པ་དང་། དགོང་མོ་གནས་སྐབས་ཀྱི་སྒར་སྡོད་བྱ་ཡུལ་དུ་སླེབས་ཚེ། གཞི་ནས་ཟ་མ་ཚ་པོ་ཁ་གང་རག་གི་འདུག”ཅེས་བཤད།

ཆུ་རྒྱུན་འཇལ་གནས་དང་པོར་འགྲོ་སའི་ལམ་ཡག་པོ་མེད་སྟབས། ལུའོ་ཧྥུའུ་ཧེང་དང་ལས་རོགས་ཚོས་ཚད་འཇལ་དང་དཔེ་ལེན་སྒྲིག་ཆས་ཁྱེར་ནས་འཁར་རྒྱུག་བཙུགས་ཏེ་གཟབ་ནན་གྱིས་བསྐྱོད། བརླན་ཞིང་འདྲེད་པའི་རི་ལམ་སྟེང་གཏིང་ཚད་མི་འདྲ་བའི་རྐང་རྗེས་མང་པོ་ཞིག་བཞག་ཡོད།

ཆུ་རྒྱུན་འཇལ་གནས་སུ་སླེབས་རྗེས། ལུའོ་ཧྥུའུ་ཧེང་དང་ལས་རོགས་ཚོ་འཕྲལ་དུ་ལས་ཀ་བྱེད་འགོ་ཚུགས། “ཆུའི་དྲོད་ཚད་ཧྲེ་ཧྲི་ཏུའུ་16.8དང་། ཆུ་ཁ་རགས་ཁ་ལས་ལི་སྨི་5.82མཐོ་བ་འདུག”ལུའོ་ཧྥུའུ་ཧེང་གིས་ཚད་འཇལ་ཞིབ་ཕྲ་བྱས་པ་དང་ལས་རོགས་ཚོས་ཀྱང་རེ་རེ་བཞིན་ཟིན་ཐོར་བཀོད། ཆུ་རྒྱུན་འཇལ་གནས་ཀྱི་ཡུན་རིང་འགུལ་རྣམ་གྱི་འགྱུར་ལྡོག་ལ་རྩད་གཅོད་བྱ་ཆེད། ཁོང་ཚོ་ཆ་སྙོམས་ཉིན་ལྔ་ལ་ཐེངས་རེ་འགྲོ་དགོས་ཀྱི་ཡོད།

“ན་ནིང་ས་གཤིས་རུ་ཁག་གིས་ཁྲུང་ཆིང་ཏ་ཉིང་གཙང་པོའི་འབབ་རྒྱུད་ལ་ཆུ་དཔྱད་དང་ས་གཤིས་བརྟག་དཔྱད་བྱས་ཏེ། ས་འོག་ཆུ་བོ་སོགས་ཁག་20ལྷག་ཙམ་གསར་དུ་རྙེད་པ་དང་། རྗེས་གྲབས་ཆུ་ཁུངས་སོགས་ཁག་40ཙམ་གསར་དུ་གཏན་འཁེལ་བྱས་ནས། ས་གནས་དེ་གའི་མང་ཚོགས་3000ལྷག་ཙམ་གྱི་འཐུང་ཆུའི་གནད་དོན་ཐག་གཅོད་བྱས་ཡོད”ཅེས་ལུའོ་ཧྥུའུ་ཧེང་གིས་སྤོབས་པ་ཆེན་པོས་བཤད།