དཔྱིད་གསར་དུས་ཆེན་རིང་། རིང་ཚད་ལ་སྤྱི་ལེ་10.1ཟིན་པའི་ཧུའུ་ནན་ཁྲང་ཧྲ་ལིའུ་དབྱང་གཙང་པོའི་ཕུག་ལམ་དུ་ཉིན་ལྟར་མེ་འཁོར་ཐེངས་བརྒྱ་ལྷག་ཙམ་ལྷོ་ནས་བྱང་དུ་བསྐྱོད་ཀྱི་ཡོད།

ཁྲང་ཧྲ་མྱུར་བགྲོད་ལྕགས་ལམ་བཟོ་ཁུལ་དུམ་བུ་ལིའུ་དབྱང་གཙང་པོའི་ཕུག་ལམ་ལྟ་སྲུང་ལས་ཁུལ་དུ་ལས་དཔོན་གཞོན་པ་ལི་ཧུང་པིང་དང་ལས་རོགས་ཚོས་ཉིན་ལྟར་སྔ་དྲོར་སྦི་ཅི་ལི་ཁྱེར་ནས་ཕུག་ལམ་དུ་ཆུ་འཐེན་ཁང་གི་སྒྲིག་ཆས་ལ་ཞིབ་བཤེར་བྱེད་པར་འགྲོ་གི་ཡོད། ཁོང་ཚོས་ལིའུ་དབྱང་གཙང་པོའི་ཕུག་ལམ་གྱི་རོགས་སྐྱོབ་གསེག་ཁྲོན་ལ་ལྟ་སྲུང་དང་ཕུག་ལམ་ནང་གི་ཆུ་འཐེན་སྒྲིག་ཆས་ལ་ལྟ་སྐུལ་ཚོད་འཛིན་གྱི་འགན་འཁུར་གྱི་ཡོད།

ས་ངོས་ནས་ཆུ་འཐེན་ཁང་དུ་འགྲོ་དགོས་ན། ལམ་ཐག་སྨི་730ཟིན་པའི་གསེག་ངོས་ཏུའུ་60ཙམ་ཡོད་པའི་གསེག་ཁྲོན་ཞིག་བརྒྱུད་དགོས་ཀྱི་ཡོད། གསེག་ཁྲོན་གྱི་གཞོགས་གཉིས་སུ་ཆུ་འབུད་སྦུ་གུ་སྦོམ་པོ་ཁག་ཅིག་ཡོད་པ་དང་། ལི་ཧུང་པིང་དང་ལས་རོགས་ཚོས་འགྲོ་ཞོར་དུ་སྦུ་གུའི་མཐུད་མཚམས་ནས་ཆུ་འདོན་ཡོད་མེད་ལ་ཞིབ་བཤེར་བྱེད་ཀྱི་ཡོད།

གསེག་ཁྲོན་དུ་ག་ཚོད་སྐྱོད་པ་དེ་ཙམ་གྱིས་གཏིང་རིང་ཞིང་། གློ་བུར་དུ་སྒྲ་ཆེན་པོ་ཞིག་གྲགས་པ་དང་བསྟུན་ནས་ཐལ་རྡུལ་མི་ཉུང་བ་ཞིག་ལངས། “སྒྲ་དེ་ནི་ལྷོ་ནས་བྱང་དུ་སྐྱོད་པའི་མེ་འཁོར་ཕུག་ལམ་བརྒྱུད་སྐབས་ཕྱོགས་གཉིས་ཀྱི་རླུང་གནོན་རིམ་བརྩེགས་ལས་ཐོན་པ་ཞིག་རེད”ཅེས་ལི་ཧུང་པིང་གིས་བློ་བག་ཡངས་པོས་བཤད།

ལས་གནས་དེར་ལི་ཧུང་པིང་གིས་ལས་ཀ་ལོ་13བྱས་པ་དང་། ལིའུ་དབྱང་གཙང་པོའི་ཕུག་ལམ་གྱི་ཨར་ལས་ཞིབ་བཤེར་ཐེངས་སྟོང་ཕྲག་ནང་ཞུགས་ནས་མི་ཐབས་སྐོར་གཡེང་གཙོ་བོར་བྱེད་པ་ནས་རིག་ནུས་ལྟ་སྐུལ་ཚོད་འཛིན་གཙོ་བོར་བྱེད་པའི་བར་གྱི་འགྱུར་ལྡོག་བརྒྱུད་མྱོང་། ཁོང་སྔ་ས་ནས་ཕུག་ལམ་ནང་གི་ལས་ཀའི་ཁོར་ཡུག་ལ་གོམས་ཡོད་ཅིང་། མེ་འཁོར་དུས་གང་ཞིག་དང་ཁ་ཕྱོགས་གང་ཞིག་ནས་ཡོང་མིན་ཁོང་གིས་གསལ་པོར་ཤེས་ཀྱི་ཡོད།