ཉིན་གུང་གི་མཚམས་སུ། ཧྥུའུ་ཅན་ཞིང་ཆེན་ཤ་ཕུའུ་རྫོང་ཧའེ་ཏའོ་ཤང་ཀུང་ཏུང་གྲོང་ཚོའི་ཤིས་ཡང་གྲུ་ཁར་གྲུ་གཟིངས“ཧྥུའུ་ཡའོ་ཨང་26པ”མཚོ་ངོགས་སུ་ཁ་བཀག་པ་དང་བསྟུན་ནས། རྡོག་ཆས་ཆེ་ཆུང་སྣ་ཚོགས་འཁྱེར་བའི་འགྲུལ་པ་གཅིག་རྗེས་གཉིས་མཐུད་ངང་གྲུ་གཟིངས་ནས་དོན་ཏེ་མཚོ་ངོགས་སུ་སྐྱོད།

མཚོ་ངོགས་སུ་ཤ་རྩི་ཅུང་ནག་པའི་སྐྱེས་པ་ཞིག་གིས་གྲུ་ཁང་ལ་ལྟ་བཞིན་འདུག ཁོང་གི་མིང་ལ་ལི་ཁྲུན་ཟེར་བ་དང་ཀུང་ཏུང་གྲོང་ཚོའི་འགྲུལ་ཟོག་སྦྲག་སྐྱེལ་མཉམ་འདྲེས་ཞབས་ཞུའི་ས་ཚིགས་གཉེར་སྐྱོང་བྱེད་བཞིན་ཡོད། “ང་ཚོས་སྡེབ་སྐྱེལ་མགྱོགས་ཙམ་བྱས་ཚེ་ཡུལ་མི་ཚོས་གུང་གསེང་རིང་སྔ་ཙམ་སྤྱོད་ཐུབ”ཅེས་མཉན་དཔོན་ཅང་ཚུན་ལེང་གིས་ལི་ཁྲུན་དང་དངོས་ཟོག་དབོར་འདྲེན་བྱེད་མཁན་ཚོར་བཤད། ཆུ་ཚོད་ཕྱེད་ཀའང་མ་འགོར་བར་དངོས་ཟོག་ཚང་མ་གྲུ་ཁ་དང་བར་ཐག་སྨི་བརྒྱ་ཙམ་ཆོད་པའི་ཞབས་ཞུའི་ས་ཚིགས་སུ་དབོར་ཟིན།

ལི་ཁྲུན་གྱིས“པང་གཅལ་བཏིང་སྐྱོར་དང་གྱང་ལ་དཀར་རྩི་བྱུག་སྐྱོར་བརྒྱབ་པ་མ་ཟད། ད་དུང་མཛོད་ཁང་ནང་འཇུག་ཆས་དང་། མཛོད་ཁང་ནས་ཕྱིར་འདོན་ཆས། མེ་གསོད་སྒྲིག་ཆས་སོགས་སྒྲིག་སྦྱོར་བྱས་པར་ཁ་གསབ་སྒོར་ཁྲི་6ལྷག་ཙམ་སྤྲད་སྟབས་རང་སོ་སོས་སྒོར་ཁྲི་2མ་ཟིན་ཙམ་ལས་གཏོང་དགོས་མ་བྱུང”ཞེས་གསར་འགོད་པར་བཤད། ཞབས་ཞུའི་ས་ཚིགས་ཀྱི་རྒྱ་ཁྱོན་ལ་སྨི་ངོས་གྲུ་40ལྷག་ཙམ་ཟིན་པ་དང་ན་ནིང་ཟླ་7པར་ཉམས་གསོ་སྒྱུར་བཀོད་ལེགས་གྲུབ་བྱུང་ཡོད། ལི་ཁྲུན་གྱིས“ང་ཚོས་སློབ་གྲྭ་དང་སྨན་ཁང་སོགས་ཀྱི་མྱུར་སྐྱེལ་བསྐུར་མ་སྒོ་རྩར་སྐྱེལ་གྱི་ཡོད། གཞན་དག་ཡུལ་མི་སོ་སོས་ལེན་པར་ཡོང་གི་ཡོད་རུང་རྐང་ཐང་མར་སྐར་མ་10ཡང་འགོར་གྱི་མེད”ཅེས་བཤད།

ཤ་ཕུའུ་རྫོང་གི་ཤར་ལྷོའི་མཚོ་ཁོངས་སུ་གནས་པའི་ཧའེ་ཏའོ་ཤང་ནི་རྫོང་ཡོངས་ཀྱི་ཟོག་འགྲེམས་དྲ་རྒྱ་ཤར་གཏོང་ཐུབ་འགོར་ཤོས་ཡིན་པ་རེད། ཀྲུང་གོ་སྦྲག་སྲིད་ཤ་ཕུའུ་རྫོང་ཡན་ལག་ཀུང་སིའི་ཁྲོམ་ར་པུའུ་ཡི་ཀྲུའུ་རེན་ལིའུ་ཅན་ཡོན་གྱིས“དེ་སྔ་ཧའེ་ཏའོ་ཤང་དུ་སྦྲག་སྲིད་ཀྱི་ཐུམ་སྒྲིལ་སྐྱེལ་གྱི་ཡོད་པ་ལས་མྱུར་སྐྱེལ་ཀུང་སི་གཞན་དག་གིས་ཤ་ཞུས་གྲོང་རྡལ་ལ་མ་གཏོགས་སྐྱེལ་གྱི་མེད”ཅེས་ངོ་སྤྲོད་བྱས།

ན་ནིང་ཟླ་3པར། ཤ་ཕུའུ་རྫོང་གིས་རྒྱལ་ཁབ་ཀྱི་དྲ་ཐོག་ཚོང་དོན་གྲོང་གསེབ་ཏུ་ལག་བསྟར་བྱེད་པའི་ཕྱོགས་བསྡུས་དཔེ་སྟོན་རྫོང་གི་རྣམ་གྲངས་ལ་བརྟེན་ནས་སྒོར་ཁྲི་230ལྷག་ཙམ་བཏང་སྟེ་རྫོང་རིམ་པའི་མཉམ་སྐྱེལ་ལྟེ་གནས་1རིམ་སྤོར་དང་། ཤང་དང་གྲོང་རྡལ་གྱི་འགྲུལ་ཟོག་སྦྲག་སྐྱེལ་མཉམ་འདྲེས་ཞབས་ཞུའི་ས་ཚིགས་12ལ་སྒྱུར་བཀོད། གྲོང་ཚོ་རིམ་པའི་འགྲུལ་ཟོག་སྦྲག་སྐྱེལ་ཞབས་ཞུའི་ས་ཚིགས་263བཀོད་སྒྲིག་བཅས་བྱས་ཏེ་རྫོང་དང་། གྲོང་རྡལ། གྲོང་ཚོ་བཅས་རིམ་པ་གསུམ་གྱི་བསྐུར་སྐྱེལ་ཟོག་འགྲེམས་ཞབས་ཞུའི་མ་ལག་གྲུབ་པར་བྱས་ཡོད། ཤ་ཕུའུ་རྫོང་འགྲིམ་འགྲུལ་སྐྱེལ་འདྲེན་བྱ་གཞག་འཕེལ་རྒྱས་ལྟེ་གནས་ཀྱི་ཀྲུའུ་རེན་སུན་ཅན་ཡུང་གིས“མྱུར་སྐྱེལ་ཁེ་ལས་ཀྱིས་འགྲུལ་སྐྱེལ་སྡེ་ཚན་གྱི་སྐྱེལ་འདྲེན་ནུས་ཤུགས་ཐོན་ཁུངས་སྤྱད་དེ་གྲོང་གསེབ་ཀྱི་འགྲུལ་ཟོག་སྦྲག་སྐྱེལ་མཉམ་འདྲེས་ལམ་ཐིག་14ཤར་གཏོང་བྱས་ནས་གྲོང་ཚོར་སྡེབ་སྐྱེལ་བྱེད་པའི‘མཐའ་མའི་འགག་གནད’འཐུས་སྒོ་ཚང་དུ་གཏོང་བར་སྐུལ་འདེད་བཏང་ཡོད”ཅེས་བཤད།