སྒེར་རྩེ་རྫོང་ལུང་རི་སྡེ་ཁུལ་དུ་བཅའ་སྡོད་མངའ་རིས་ས་ཁུལ་ཁྲོམ་ར་ལྟ་འདོམས་ཅུས་ཀྱི་ལས་དོན་རུ་ཁག་གིས་མང་ཚོགས་ཀྱི་དྲོ་ཇུས་དཀའ་གནད་ཐག་གཅོད་བྱེད་རོགས་བྱས་པ།
གནམ་གཤིས་གྲང་དུ་ཕྱིན་པ་དང་བསྟུན་ནས་དྲོ་ཇུས་ཀྱི་གནད་དོན་དེ་མངའ་རིས་ས་ཁུལ་ལུང་རི་སྡེ་ཁུལ་གྱི་མང་ཚོགས་ཚོས་དོ་ཁུར་ཆེ་ཤོས་བྱེད་པའི་གནད་དོན་ཞིག་ཏུ་གྱུར་ཡོད། ཉེ་ཆར། སྒེར་རྩེ་རྫོང་ལུང་རི་སྡེ་ཁུལ་དུ་བཅའ་སྡོད་མངའ་རིས་ས་ཁུལ་ཁྲོམ་ར་ལྟ་འདོམས་ཅུས་ཀྱི་ལས་དོན་རུ་ཁག་གིས་བྱ་སྤྱོད་ཧུར་ཐག་སྤེལ་ནས་ནུས་ཤུགས་ཡོད་རྒུས་སྡེ་ཁུལ་གྱི་དཀའ་ངལ་ཡོད་པའི་མང་ཚོགས་དྲོ་སྐྱིད་ལྡན་པའི་ངང་དགུན་ཁ་སྐྱེལ་ཐུབ་པའི་འགན་ལེན་བྱས་པ་རེད།
ཉེ་ཆར། ལུང་རི་སྡེ་ཁུལ་གྲོང་ལྷན་གྱི་སྒོ་རའི་ནང་རྡོ་སོལ་སྤྲོད་པའི་ལས་དོན་གོ་རིམ་ལྡན་པའི་ངང་སྤེལ་བཞིན་ཡོད་ཅིང་། ས་གནས་ས་ཐོག་ཏུ་ཞིང་སྤྱོད་འཁོར་གསུམ་སྦག་སྦག་གྲལ་སྟར་སྒྲིག་པོས་བཞག་པ་དང་མང་ཚོགས་ཚོས་ཀྱང་རེ་སྒུག་ཆེན་པོ་བྱེད་བཞིན་ཡོད། གྲོང་ཚོ་ཨུ་ལྷན་དང་གྲོང་སྡོད་ལས་དོན་རུ་ཁག་གི་རུ་མི་ཚོས་ཆ་འཕྲིན་ལ་ཞིབ་བསྡུར་ནན་ཏན་བྱས་ནས་གནད་ལ་འཁེལ་ལ་འཕྱུགས་པ་མེད་པའི་སྒོ་ནས་དཀའ་ངལ་ཡོད་པའི་དུད་ཚང་ཚང་མར་རྡོ་སོལ་རག་པའི་འགན་ལེན་བྱས་པ་དང་དུས་མཚུངས་མང་ཚོགས་ལ་རྡོ་སོལ་སྤྱོད་སྟངས་ཤེས་བྱ་གཙོ་བོ་འགྲེལ་བཤད་ཞིབ་ཕྲ་བརྒྱབ་པ་མ་ཟད། “རྟག་ཏུ་སྒེའུ་ཁུང་ཕྱེ་ནས་རླུང་འགྲོ་ཡག་པོ་ཐུབ་པར་བྱས་ཏེ་དུག་རླངས་མི་ཕོག་པ་བྱེད་དགོས་པའི”ནན་བཤད་ཀྱང་ཡང་ཡང་བྱས་ནས་མང་ཚོགས་ཀྱི་དྲོ་ཇུས་བདེ་འཇགས་འགན་ལེན་བྱས་པ་རེད།
ཤེས་རྟོགས་བྱུང་བར་གཞིགས་ན། ད་ཐེངས་ཀྱི་རྡོ་སོལ་སྤྲོད་པའི་ལས་དོན་ནི་གྲོང་སྡོད་ལས་དོན་རུ་ཁག་གིས་མང་ཚོགས་ཀྱི་དྲོད་ལེན་དགོས་མཁོར་མཐོང་ཆེན་བྱས་པ་ལས་བྱུང་བ་ཞིག་རེད། དུས་འགོར་དུད་ཚང་དུ་བརྟག་ཞིབ་དང་འཚམས་འདྲིར་སྐྱོད་རིང་། གྲོང་སྡོད་ལས་དོན་རུ་ཁག་གིས་སྡེ་ཁུལ་གྱི་དཀའ་ངལ་ཡོད་པའི་མང་ཚོགས་འབོར་ཆེན་ཞིག་ལ་དགུན་དུས་སུ་དྲོད་ལེན་ཐད་དཀའ་གནད་ཡོད་པ་ཤེས་རྗེས། གང་སར་སྐད་ཆ་འདྲི་བ་དང་འབྲེལ་གཏུག་མཐུན་སྦྱོར་ཧུར་ཐག་བྱས་པ་རེད། མངའ་རིས་ས་ཁུལ་བཟོ་ཚོང་མཉམ་འབྲེལ་ལྷན་ཚོགས་ཀྱི“ཁེ་ལས་བརྒྱ་ཡིས་གྲོང་ཚོ་བརྒྱ་དར་རྒྱས་གཏོང་བའི”བྱེད་སྒོའི་གོ་སྐབས་དང་བསྟུན་ནས་ལུང་རི་སྡེ་ཁུལ་དེ་ཁེ་ལས་ཀྱི་རོགས་སྐྱོར་བྱ་ཡུལ་དུ་བཅུག་པ་དང་འབྲེལ་རོགས་སྐྱོར་ཇུས་གཞི་བཟོ་བའི་ནང་ཞུགས་མཐར་རོགས་སྐྱོར་མ་དངུལ་སྒོར་ཁྲི་5བརྩོན་ལེན་ཐུབ་ནས་རྡོ་སོལ་ཏུན་45ཉོས་ཏེ་མང་ཚོཌ་ཀྱི“རྡོ་སོལ”གནད་དོན་ཐག་གཅོད་བྱས་པ་རེད།