ཚེས་24ཉིན་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གིས་གསར་འགྱུར་ཡོངས་བསྒྲགས་ཚོགས་འདུ་འཚོགས་པ་དང་། ཚོང་དོན་པུའུ་དང་། རིག་གནས་དང་ཡུལ་སྐོར་པུའུ། རྒྱལ་ཁབ་ལུས་རྩལ་སྤྱི་ཁྱབ་ཅུས་བཅས་ཀྱི་འབྲེལ་ཡོད་འགན་འཁུར་བས་དཔྱིད་གསར་དུས་ཆེན་རིང་གི་ཁྲོམ་རའི་མཁོ་སྤྲོད་འགན་ལེན་དང་དུས་ཆེན་རིང་འཛད་སྤྱོད་ལ་སྐུལ་འདེད་གཏོང་བའི་འབྲེལ་ཡོད་གནས་ཚུལ་ངོ་སྤྲོད་བྱས་པ་རེད།

ཚོང་དོན་པུའུ་ཡི་པུའུ་ཀྲང་གཞོན་པ་ཧྲེང་ཆིའུ་ཕིན་གྱིས། དྲ་ཐོག་ཚོང་དོན་གྱི་གྲངས་གཞི་ཆེན་པོར་ལྟ་ཞིབ་ཚད་ལེན་བྱས་པར་གཞིགས་ན། དུས་ཆེན་གོང་ས་གནས་ཁག་གི་ཞིང་ཞོར་ཐོན་རྫས་སྡེབ་ཚོང་ཁྲོམ་ར་ཆེན་པོའི་འཚོ་བའི་མཁོ་ཆས་མཛོད་ཉར་བྱེད་ཚད་འདང་ངེས་ཡོད་པས། བཟའ་འབྲུ་དང་། བཟའ་སྣུམ། ཤ སྒོ་ང་། འོ་མ། ཤིང་འབྲས། སྔོ་ཚལ་སོགས་ཀྱི་རིན་གོང་སྤྱིར་ན་བརྟན་པོ་ཡོད། ཚོང་དོན་པུའུ་ཡིས་རིམ་ཁག་ཚོང་དོན་སྡེ་ཚན་གྱིས་དུས་ཆེན་རིང་ནུས་ཤུགས་ཡོད་རྒུས་མཁོ་སྤྲོད་འགན་ལེན་གྱི་ལས་དོན་ཡག་པོ་བསྒྲུབ་རྒྱུར་མཛུབ་ཁྲིད་བྱ་རྒྱུ་མ་ཟད། ལོ་མཇུག་དང་ལོ་འགོའི་འཛད་སྤྱོད་ཀྱི་ཁྱད་ཆོས་ལ་གཞིགས་ཏེ། ཟླ་1ཚེས་7ཉིན། “རྙིང་ཁུངས་མིང་ཅན་གྱི་དགའ་ནེའུ་དུས་ཆེན”དང“རྒྱལ་ཡོངས་སུ་དྲ་ཐོག་ནས་ལོ་གསར་མཁོ་ཆས་ཉོ་བའི་དུས་ཆེན”གྱི་བྱེད་སྒོའང་སྤེལ་འགོ་ཚུགས་ལ། ཟླ་1ཚེས་21ཉིན། རྒྱལ་ཡོངས་སུ་ལག་ཐོགས་ཁ་པར་དང་། ངོས་ལེབ་གློག་ཀླད། རིག་ནུས་ཆུ་ཚོད་གསར་པ་ཉོ་བར་ཁ་གསབ་སྤྲོད་པའི་སྲིད་ཇུས་ལག་ལེན་བསྟར་འགོ་བཙུགས་པས། མི་དམངས་མང་ཚོགས་ཀྱི་ལོ་གསར་མཁོ་ཆས་ཉོ་བ་དང་དགའ་སྤྲོའི་ངང་དཔྱིད་གསར་དུས་ཆེན་བསུ་བའི་འཛད་སྤྱོད་ཀྱི་དགོས་མཁོ་གང་ལེགས་སྐོང་རྒྱུ་རེད་ཅེས་བཤད།

“དུས་ཆེན་གོང་རྒྱལ་ཡོངས་ཀྱི་འཚོ་བའི་མཁོ་ཆས་ཁྲོམ་རར་ཚོང་ཟོག་འདང་ངེས་དང་རིན་གོང་སྤྱིར་ན་བརྟན་པོ་ཡོད”ཅེས་ཚོང་དོན་པུའི་ཁྲོམ་ར་འཁོར་རྒྱུག་དང་འཛད་སྤྱོད་སྐུལ་འདེད་སིའི་སི་ཀྲང་ལི་ཀང་གིས་ངོ་སྤྲོད་བྱས་པ་དང་། ཁོང་གིས་ཟླ་དང་པོའི་ཟླ་དཀྱིལ་དུ་རྒྱལ་ཡོངས་ཀྱི་ཞིང་ཞོར་ཐོན་རྫས་སྡེབ་ཚོང་ཁྲོམ་ར་ཆེ་ཁག་200ཡིས་བཟའ་འབྲུ་དང་། བཟའ་སྣུམ། ཕག་ཤ སྒོ་ང་། སྔོ་ཚལ་སོགས་མཛོད་ཉར་བྱེད་ཚད་2024ལོའི་ལོ་མཇུག་ལས་ཚད་གཞི་མི་འདྲ་བར་མང་དུ་ཕྱིན་ཡོད་པ་དང་། ཟླ་1ཚེས་23ཉིན། སྒོ་ང་དང་། ཚགས་ཤའི་ཆ་སྙོམས་སྡེབ་ཚོང་རིན་གོང་ཟླ་སྟོད་ལས་1.5%དང་1.1%སོ་སོར་ཆག་པ་དང་། བཟའ་འབྲུ་དང་། བཟའ་སྣུམ། ཕག་ཤ ལུག་ཤ་བཅས་ཀྱི་རིན་གོང་ཡང་ཟླ་སྟོད་དང་སྤྱིར་ན་སྙོམས་ཀྱི་ཡོད་ཅེས་བཤད།

ལི་ཀང་གིས། བོད་ལྗོངས་དིང་རིར་ས་ཡོམ་རིམ་པ་6.8བརྒྱབ་པའི་རྗེས། ཚོང་དོན་པུའུ་ཡིས་འཕྲལ་མར་འཕྲལ་སྡོམ་བརྡ་ལན་ཧུར་ཐག་ཞུས་ཏེ་ས་གནས་ཀྱི་ཚོང་དོན་སྡེ་ཚན་དང་ཉེ་འཁོར་ཞིང་ཆེན་ལ་དངོས་ཟོག་བཀོད་གཏོང་བྱེད་རྒྱུར་མཛུབ་ཁྲིད་ཀྱིས་མཁོ་སྤྲོད་འགན་ལེན་ཁེ་ལས་དང་། ལས་སྟེགས་ཁེ་ལས། ཀྲུང་དབྱང་གྲབས་གསོག་གྲབས་འགན་ཁེ་ལས་བཅས་གཙོ་བོར་མཐུན་སྦྱོར་བྱས་ནས་བཟའ་འབྲུ་ཤ་ཚལ་དང་། སྟབས་བདེའི་ཐུག་པ། མི་རིགས་ཀྱི་ཁྱད་ལྡན་བཟའ་རིགས་དང་སྨན་རྫས། དྲོད་སྲུང་མཁོ་ཆས་སོགས་ཀྱི་དངོས་ཟོག་གཏོང་འདྲེན་བྱས་ཡོད། མིག་སྔར། ས་གནས་ཀྱི་འཚོ་བའི་མཁོ་ཆས་ཚོང་གཉེར་བྱ་ཡུལ་གཙོ་བོ་ཚང་མ་རྒྱུན་གཏན་ལྟར་ལས་གཉེར་བྱེད་འགོ་བཙུགས་ནས་འཚོ་བའི་མཁོ་ཆས་རིམ་པས་མཁོ་སྤྲོད་འགན་ལེན་ཐུབ་ཡོད་ཅེས་བཤད།

“མི་སེམས་དྲོ་བ་དང་། ཁྲོམ་རའི་གསོན་ཤུགས་རྒྱས་པ། མང་ཚོགས་དང་འབྲེལ་འདྲིས་བཅས་ཡོང་བའི་རིག་གནས་དང་ཡུལ་སྐོར་གྱི་བྱེད་སྒོ་སྤེལ་བ་དེས་ཚང་མར་དགའ་སྤྲོའི་ངང་དཔྱིད་གསར་དུས་ཆེན་གཏོང་རྒྱུ་བྱུང་བ་དང་སྦྲགས་རིག་གནས་དང་ཡུལ་སྐོར་ལས་བྱུང་བའི་སྤྲོ་སྣང་ཡང་སྦྱིན་ཡོད”ཅེས་རིག་གནས་དང་ཡུལ་སྐོར་པུའི་ཐོན་ལས་འཕེལ་རྒྱས་སིའི་སི་ཀྲང་མའོ་མུའུ་དབྱང་གིས་ངོ་སྤྲོད་བྱས་པ་དང་། ཁོང་གིས“དགའ་དགའ་སྤྲོ་སྤྲོའི་ངང་ལོ་གསར་གཏོང་བ”ཞེས་པའི་2025ལོའི་དཔྱིད་གསར་དུས་ཆེན་གྱི་བརྗོད་དོན་གཙོ་བོའི་རིག་གནས་དང་ཡུལ་སྐོར་གྱི་བྱེད་སྒོ་རྒྱལ་ཡོངས་སུ་ཕྱོགས་ཡོངས་ནས་སྤེལ་ཡོད། དུས་ཆེན་རིང་། རིག་གནས་དང་ཡུལ་སྐོར་མཁོ་སྤྲོད་སྣ་མང་ཕུན་སུམ་ཚོགས་པ་ཡོང་བའི་ཐད། ད་དུང་དམངས་ཕན་གྱི་འཁྲབ་སྟོན་དང་། མངོན་མིན་རིག་གནས་ཤུལ་བཞག རིག་གནས་དངོས་མང་སྟོན་ཚོགས་འགྲེམས་སྟོན་སོགས་ཀྱི་རིམ་སྤེལ་བྱེད་སྒོའང་སྤེལ་རྒྱུ་རེད་ཅེས་བཤད།

དུས་ཆེན་རིང་། རིག་གནས་དང་ཡུལ་སྐོར་གྱི་འཛད་སྤྱོད་ལ་སྐུལ་འདེད་གཏོང་བའི་ཐད། རིག་གནས་དང་ཡུལ་སྐོར་པུའུ་ཡིས་ཟླ་དང་པོ་དང་གཉིས་པར་2025ལོའི་རྒྱལ་ཡོངས་ཀྱི་དཔྱིད་གསར་དུས་ཆེན་རིང་རིག་གནས་དང་ཡུལ་སྐོར་འཛད་སྤྱོད་ཟླ་བའི་བྱེད་སྒོ་མུ་མཐུད་སྤེལ་ཏེ། རྒྱབ་སྐྱོར་བྱེད་མཁན་སྒྲིག་གཞི་ཁག་སྒྲིག་འཛུགས་བྱས་ནས་དཔྱིད་གསར་དུས་ཆེན་རིང་རིག་གནས་དང་ཡུལ་སྐོར་འཛད་སྤྱོད་ཀྱི་དམངས་ཕན་བྱ་ཐབས་སྣ་མང་ཕུན་སུམ་ཚོགས་པ་བཏོན་ནས་འཛད་སྤྱོད་ཀྱི་གསོན་ཤུགས་འཕེལ་བར་བྱས་ཏེ། རིག་གནས་དང་ཡུལ་སྐོར་གཉེར་མཁན་ཁེ་ལས་ཆུང་ངུས་བྲིན་ཚོང་གི་ཐབས་ལམ་རྒྱ་བསྐྱེད་དེ“ཁེ་ལས་ལ་ཕན་འདོགས་པ་དང་དམངས་ལ་སྤྲོ་སྣང་སྦྱིན་རྒྱུར”རམ་འདེགས་བྱས་ཡོད།

“ཕུན་སུམ་ཚོགས་པའི་འགྲན་བསྡུར་བྱེད་སྒོ་གཉེར་ནས་དུས་ཆེན་གྱི་རྣམ་པ་ཟབ་མོ་ཞིག་བཏོད་དེ་ལུས་རྩལ་ལ་བརྟེན་ནས་དཔྱིད་གསར་དུས་ཆེན་བསུ་བ་དང་བདེ་ཐང་གི་ལོ་གསར་ཞིག་གཏོང་ཐུབ་པ་བྱ་རྒྱུ་ཡིན”ཞེས་རྒྱལ་ཁབ་ལུས་རྩལ་སྤྱི་ཁྱབ་ཅུས་ལུས་རྩལ་དང་དཔལ་འབྱོར་སིའི་སི་ཀྲང་དབྱང་ཞུའེ་ཏུང་གིས་བརྗོད་པ་དང་། ཁོང་གིས་ལུས་རྩལ་སྤྱི་ཁྱབ་ཅུས་ཀྱིས“ཕུན་སུམ་ཚོགས་པ་གསུམ”ལ་བརྟེན་ནས་མི་དམངས་མང་ཚོགས་ལ་དཔྱིད་གསར་དུས་ཆེན་གྱི་ངལ་གསོའི་རིང་ལུས་རྩལ་གྱི་ཐོན་རྫས་དེ་བས་མང་བ་མཁོ་འདོན་བྱ་རྒྱུ་ཡིན་ཞེས་བཤད།