གྲོང་ཁྱེར་པ་ཀ་ཏ་ནས་གནས་ཚུལ་སྤེལ་བར་གཞིགས་ན། ཉིན་ཤས་གོང་། “ཀྲུང་གོའི་འཕེལ་རྒྱས་གསར་པ། མདུན་ལམ་དང་འགྲན་སློང”ཞེས་པའི་བགྲོ་གླེང་ཚོགས་འདུ་དབྱི་རག་ཏུ་འཚོགས་པ་རེད། བགྲོ་གླེང་ཚོགས་འདུ་དེ་དབྱི་རག་གུང་ཁྲན་ཏང་གིས་གཙོ་གཉེར་བྱས་པ་དང་དབྱི་རག་སྲིད་གཞུང་དང་། གྲོས་ཚོགས། རིག་མཛོད། སྨྱན་སྦྱོར་སོགས་ལས་རིགས་ཁག་གི་འཐུས་མི་200ལྷག་ཙམ་ཞུགས་ཡོད་པ་རེད།

དབྱི་རག་གུང་ཁྲན་ཏང་གི་སྤྱི་ཁྱབ་ཧྲུའུ་ཅི་ལཱ་དབྱི་ཏེ·ཧྥ་ཧོ་སྨི་ཡིས། ད་ཐེངས་ཀྱི་བགྲོ་གླེང་ཚོགས་འདུ་གཉེར་བའི་དམིགས་ཡུལ་ནི་ཀྲུང་གོའི་འཕེལ་རྒྱས་ཀྱི་ཉམས་མྱོང་སྤེལ་རེས་དང་སློབ་སྦྱོང་བྱ་རྒྱུ་དེ་ཡིན། འདས་ཟིན་པའི་ལོ་བཅུ་ཕྲག་ཁ་ཤས་རིང་། ཀྲུང་གོའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གྲུབ་འབྲས་ཆེན་པོ་ཐོབ་ཡོད། འཕེལ་རྒྱས་ཀྱི་འགག་རྩའི་དུས་སྐབས་སུ་གནས་པའི་དབྱི་རག་གིས། ཀྲུང་གོའི་འཕེལ་རྒྱས་ཀྱི་ཉམས་མྱོང་དཔྱད་གཞིར་འཛིན་ཚེ། དབྱི་རག་གི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བར་ཕན་ཐོགས་ཡོད། མིག་སྔར་ཀྲུང་གོའི་ཁེ་ལས་མང་པོ་དབྱི་རག་གི་རྨང་གཞིའི་སྒྲིག་བཀོད་འཛུགས་སྐྲུན་སོགས་ཁྱབ་ཁོངས་ཀྱི་མཉམ་ལས་ནང་ཞུགས་ཡོད་ལ། དབྱི་རག་དང་ཀྲུང་གོས་ཕྱོགས་ཁག་གི་མཉམ་ལས་ལ་སྔར་བས་ཤུགས་སྣོན་རྒྱག་རྒྱུའི་རེ་བ་ཡོད་ཅེས་བརྗོད།

དབྱི་རག་ཏུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཚུའེ་ཝེ་གདན་ཞུས་ལྟར་བགྲོ་གླེང་ཚོགས་འདུར་ཞུགས་པ་དང་འབྲེལ་གཙོ་དོན་གཏམ་བཤད་ཀྱང་སྤེལ་ཞིང་། ཀྲུང་གོ་གུང་ཁྲན་ཏང་གི་ལོ་རྒྱུས་དང་ཟུང་འབྲེལ་གྱིས་ཀྲུང་གོའི་འཕེལ་རྒྱས་ཀྱི་བརྒྱུད་རིམ་དང་གྲུབ་འབྲས་བརྗོད་པ་མ་ཟད། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པས་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་བར་ཡང་དག་པའི་ཁ་ཕྱོགས་གསལ་བསྟན་བྱས་ཡོད་ལ། ཐོག་མཐའ་བར་གསུམ་དུ་འཛམ་གླིང་གི་མིག་རྒྱང་ཐོག་ནས་མིའི་རིགས་ཀྱི་མདུན་ལམ་དང་ལས་དབང་ལ་དོ་ཁུར་བྱས་ཏེ་མིའི་རིགས་ཀྱི་འཕེལ་རྒྱས་དང་ཡར་ཐོན་ལ་ཀྲུང་གོའི་བློ་གྲོས་ལེགས་སྐྱེས་སུ་ཕུལ་ཡོད་ཅེས་ནན་བཤད་བྱས་པ་རེད། ཁོང་གིས། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་བཏང་བ་དེས་ཀྲུང་གོ་དང་དབྱི་རག་གི་མཉམ་ལས་ལ་ཡངས་ཤིང་རྒྱ་ཆེ་བའི་མཉམ་ལས་ཀྱི་གོ་སྐབས་བྱུང་ཡོད། ཀྲུང་གོ་ཕྱོགས་ཀྱིས་དབྱི་རག་ཕྱོགས་དང་ལག་གདང་སྦྲེལ་ནས་དུས་རབས་གསར་པར་ཕྱོགས་པའི་ཀྲུང་གོ་དང་ཨ་རབ་ལས་དབང་གཅིག་མཐུན་ཚོགས་པ་གཏོད་པར་ཐུན་མོང་ཐོག་འབད་འཐབ་བྱེད་འདོད་ཡོད་ཅེས་བརྗོད།